Tagtagiragsakenyo Kadi ti Personal a Panagadal?

PAGRAGSAKAN ti asinoman a napasnek nga adipen ti Dios ti mangbusbos iti umdas a panawen iti personal a panagadal iti Biblia. (Salmo 1:1, 2) Kaskasdi, gapu iti kinaadu dagiti banag a mangkalikagum iti panawen ken pigsada, adu ti marigatan a mangusar iti panawen ken pigsada iti personal a panagadal iti kaadu a kayatda.

Nupay kasta, tapno agtalinaed nga aktibo nga ad-adipen ti Dios, rumbeng nga inaldaw a pabaruen ti amin ti rag-o ken pigsada babaen ti panangbirok kadagiti baro wenno naun-uneg nga aspeto ti kinapudno iti Sao ti Dios. Dagiti kinapudno iti Biblia a dakkel ti epektona kadakayo iti sumagmamano a tawenen ti napalabas ket mabalin a saanen a kasta ti epektona kadakayo ita. Gapuna, nasayaat, nagpateg pay ketdi, a sipapasnek ken kanayon nga ikagumaantayo ti gumun-od iti baro a pannakaawat iti kinapudno tapno makapagtalinaedtayo a nasalukag iti naespirituan.

Kasano a pinatibker dagiti matalek a lallaki idi un-unana ti espiritualidadda babaen ti personal a panagadal iti Sao ti Dios? Kasano ti panangaramid dagiti dadduma a moderno-aldaw nga adipen ni Jehova iti panagadalda nga ad-adda a makaay-ayo ken nabunga? Kasano a nagunggonaanda iti panagreggetda?

Pinabaroda ti Pigsada Babaen ti Personal a Panagadal

Ad-adda ti regta ni Ari Josias ti Juda a nangiwayat iti kampaniana a maibusor iti idolatria idi maibasa kenkuana ‘ti mismo a libro ti linteg ni Jehova babaen ti ima ni Moises.’ Awan duadua a saan a dayta ti damo a panangusigna iti daytoy a paset ti Sao ti Dios; ngem ti pannakangngegna iti mensahe a direkta manipud iti orihinal a manuskrito ti nangpaganaygay kenkuana iti pannakidangadangna a maipuon iti nadalus a panagdaydayaw.​—2 Cronicas 34:14-19.

Naawatan ni mammadto Daniel ‘ti bilang dagiti tawen a maipaay iti pannakatungpal ti pannakalangalang ti Jerusalem’ ken ti kinasierto daytoy saan laeng a manipud iti libro ni Jeremias no di pay ket manipud “kadagiti libro.” Mabalin a karaman kadagitoy dagiti libro a kas iti Levitico (26:34, 35), Isaias (44:26-28), Oseas (14:4-7), ken Amos (9:13-15). Ti napasingkedanna babaen ti naanep a panagadalna kadagiti libro ti Biblia ti nangtignay iti daytoy managbuteng-Dios a lalaki a mangsapul iti Dios iti napasnek a kararag. Nasungbatan ti napasnek nga ararawna babaen ti kanayonan a paltiing ken pammatalged maipapan iti siudad ti Jerusalem ken dagiti umilina.​—Daniel, kapitulo 9.

Saan a naiduma kadatayo ita da Josias, a ‘nangaramid iti nalinteg kadagiti mata ni Jehova,’ ken Daniel, a ‘maysa a tao a makaay-ayo unay’ iti imatang ti Dios. (2 Ar-ari 22:2; Daniel 9:23) Ti kinasaetda nga agadal kadagiti Kasuratan nga adda idi tiempoda ti nangpabileg iti espiritualidadda ken nakatulong kadakuada a mangtagiragsak iti natibtibker a pannakainaig iti Dios. Maikuna met ti kasta kadagiti adu a dadduma pay a nagkauna nga adipen ni Jehova, kas kada Jefte, ti salmista iti balay ni Asaf, Nehemias, ken Esteban. Pinaneknekan amin dagitoy a siaannad a personal nga inadalda dagiti paset ti Biblia nga adda idi kaaldawanda.​—Oc-ocom 11:14-27; Salmo 79, 80; Nehemias 1:8-10; 8:9-12; 13:29-31; Aramid 6:15–7:53.

Gapu iti Ministerio

Addaan ti kaaduan nga adipen ni Jehova ita nga adun a tawen nga agserserbi kenkuana iti eskediul para iti personal a panagadal iti Biblia. Nasarakanda a nasken daytoy tapno makapagtalinaedda a nasalukag ken matungpalda a naan-anay dagiti pagrebbenganda kas Kristiano. Agpapan pay, adu kadakuada ti mangannugot a saan a kanayon a nalaka a timbengen ti panangusar iti panawen ken pigsada iti panagadal ken kadagiti dadduma pay a banag a di rumbeng a baybay-an.

Kaskasdi, ti panagtalinaed a nasalukag iti naespirituan babaen ti napinget a personal a panagadal ket nasken iti panangtaming kadagiti kasapulan iti Nakristianuan a ministerio iti daytoy rumangrang-ay a sangalubongan a trabaho a panangikaskasaba iti Pagarian. Dagidiay maay-ayatan kadagiti baro ken naun-uneg a pannakaawat iti Sao ti Dios mabalinda a sanguen ti karit ti panangpennek kadagiti mawaw a puso. Pudno daytoy, natudingan man ti maysa iti lugar a manamnama nga adu ti makalapan iti naespirituan a panagdaklis wenno kadagiti naynay a mawanwanas a teritoria a saan nga interesado ti kaaduan.

Regular a Pannangan iti Sao ti Dios

Ti ar-aramiden dagiti dadduma mabalin nga ikkannakayo iti pamalatpatan no kasanoyo a matagiragsak nga ad-adda ti panagadalyo wenno no kasano a mapagbalinyo ken ti pamiliayo nga ad-adda a makagunggona ti panangusar iti tiempo nga agadal. Ti maysa kadagiti banag a saan a kayat a liwayan ti maysa nga adipen ti Dios isu ti regular a panangbasa iti Sao ti Dios a mismo. Pinagbalin a kalat dagiti adu ti panangbasa iti tallo wenno uppat a kapitulo ti Biblia iti linawas. Kayatyo kadi a mabasa ti intero a Biblia iti makatawen? No kasta, pagragsakanyo ti mangbusbos iti ad-adu a tiempo a mangbasa iti dayta, nalabit kaguduat’ oras kada aldaw.

Namin-adu kadin a nabasayo ti intero a Biblia? Apay a dikay mangikeddeng iti baro a kalat? Kas panagbalbaliw, binasa ti maysa a Kristiano a babai dagiti libro ti Biblia sigun iti urnos a pannakaisuratda. Adu a detalye ti napidutna, a naibatay iti kronolohia, a naliwayanna idi. Adda maysa pay a Kristiano a babai a naminliman a nabasana ti intero a Biblia iti napalabas a lima a tawen, tunggal gundaway iti naiduma a panirigan. Iti umuna a panagbasana, binasana dayta manipud rugi agingga iti ngudo. Iti maikadua a panagbasana, insuratna iti kuaderno iti maysa wenno dua a linia ti pakagupgopan ti linaon ti tunggal kapitulo. Manipud iti maikatlo a tawen, immallatiw iti dakkel nga edision nga addaan iti reperensia, a sinukimatna nga umuna dagiti cross-reference iti margin sana inusig a naimbag dagiti footnote ken ti impormasion iti apendise. Iti maikalima a panagbasana, inusarna dagiti mapa iti Biblia tapno rumang-ay ti pannakaawatna iti geograpia. Kunana: “No kaniak a maysa, ti panagbasa iti Biblia ket makaay-ayo a kas iti pannangan.”

Nasarakan dagiti dadduma a naanep nga estudiante ti Biblia a makagunggona ti maaddaan iti maysa a kopia ti Biblia a maaramat laeng iti personal a panagadal, nga isuratda iti ababa kadagiti margin daytoy dagiti makapainteres a komento, mamagpanunot nga ilustrasion, wenno dagiti panid dagiti dadduma pay a publikasion a mabalindanto nga usaren kas reperensia. Kada agtapos ti bulan, pagay-ayat ti maysa nga amin-tiempo a ministro nga isurat iti kopia a pagad-adalanna dagiti baro a punto a naadalna iti las-ud ti makabulan. “Ti panangsegga kadagitoy nagpateg nga orasko,” kunana, “ket makatulong kaniak a mangragpat a nasapsapa kadagiti dadduma pay a kalat iti bulan.”

Dagiti Pamuspusan

Adu kadi ti nakaeskediul nga aramidenyo iti tunggal aldaw ken lawas ken kasapulanyo dagiti singasing no kasanoyo a mausar a nasaysayaat ti limitado a tiempoyo? Bueno, itugotyo ti kayatyo a basaen, ket usarenyo ti wayayo. Iti pagtaengan wenno iti nakairuamanyo a pagadalan, no mabalbalin urnosenyo dagiti libro ken dadduma pay a mausaryo iti panagadal tapno nalaka dagitoy a gaw-aten. Pagbalinenyo a komportable ti suli a pagadalanyo ngem saan a komportable unay amangan ta saguyepyepenkayo. Adda kadi pasetyo? Basaenyo a nasaksakbay ti intero a material, ket bay-anyo a dumteng dagiti ideya kadakayo no agin-inanakayo wenno no adda ar-aramidenyo.

Mabalin a makikooperar kadakayo dagiti dadduma iti panangusar a nasaysayaat iti tiempo a maipaay iti pagimbaganyo amin. Kas pagarigan, mabalinyo nga idawat iti maysa nga ibasaannakayo iti nalag-an a material bayat nga adda ar-aramidenyo wenno no itimtimplaanyo iti ittia ti naanus a managbasayo. Mabalin nga umannugot met dagiti amin a kabbalayyo a maaddaan iti naulimek a panawen para iti personal a panagadal. “Ania ti tinagiragsakyo a binasa itay nabiit?” No dadduma mabalin a maaonyo ti naadal dagiti gagayyemyo babaen ti pannakipatang iti kastoy a pamay-an.

Interesadokay aya a mangipakat kadagiti baro nga ideya iti panagadalyo? Mabalinyo ti mangikeddeng iti kalat maipapan iti kaadu ti tiempo nga usarenyo iti panagadal a kas iti panangikeddeng dagiti adu iti kaadu ti tiempo a busbosenda a makisarita kadagiti dadduma maipapan iti Biblia. Ti maysa nga amin-tiempo (payunir) nga agibumbunannag ket addaan iti naikeddeng a kaadu ti oras nga usarenna iti panagadal iti tunggal bulan ken maragsakan a makakita iti tsart ti kalatna a mapumpunno. Dagiti dadduma kednganda ti tiempoda nga agbuya iti telebision tapno adda wayada nga agadal. Dagiti dadduma mangpilida iti tema nga adalenda iti sumagmamano a tiempo, kas dagiti bunga ti espiritu, dagiti makatulong nga impormasion maipapan kadagiti libro ti Biblia, wenno ti arte ti panangisuro. Kaay-ayo dagiti dadduma ti mangaramid kadagiti tsart maipapan iti kronolohia, kas dagidiay mangipakita iti relasion dagiti ari ti Israel ken dagiti mammadtoa wenno Dagiti Aramid dagiti Apostol ken dagiti surat ni Pablo.

Dakayo nga agtutubo, kayatyo kadi a tumibker ti pammatiyo? Apay a dikay mangpili iti maysa a publikasion nga adalenyo a naimbag kabayatan ti sumaganad a bakasionyo? Ti libro a Ti Panangbiruk ti Sangatauan iti Dios, nga impablaak ti Watch Tower Society, ti pinili ti maysa a bautisado nga estudiante iti haiskul. Insuratna iti kuaderno ti pakagupgopan ti naadalna iti tunggal kapitulo. Maysa dayta a karit ken ad-adu a tiempo ti kinasapulanna ngem iti impagarupna. Nupay kasta, idi nabasana ti intero a libro, nasdaaw iti kasta unay iti kinapudno ti mensahe ti Biblia.

Kanayon a Magagarankay Koma a Makasursuro

Nagadu dagiti moderno-aldaw a matalek nga adipen ni Jehova nga “aduan[en] ti aramiden iti trabaho ti Apo.” (1 Corinto 15:58) Iti laksid ti panangrepasoyo iti eskediulyo ken napasnek a panagreggetyo, mabalin a saan unay a nabalbaliwan ti rutina a sursurotenyo iti linawas. Kaskasdi, ti di agmawmaw a reggetyo a gumun-od iti naun-uneg a pannakaawat iti kinapudno ken ti pannakaammoyo a naan-anay ken panagbiagyo a mayannurot kadagiti panggep ni Jehova ket makatulong kadakayo a mangpasayaat iti panagad-adalyo.

Makaparegta a maammuan dagiti gunggona nga inapit dagidiay nangparang-ay iti panagad-adalda. Idi mabigbig ti maysa a Kristiano a lalaki a mapukpukaw ti positibo a panangmatmatna iti pananggun-od iti naun-uneg a pannakaawat iti kinapudno, inurnosna ti biagna tapno ad-adu ti tiempo a maipaayna iti personal a panagadal. “Nangyeg dayta kaniak iti ragsak a diak narikna idi,” kunana. “Gapu iti dumakdakkel a panagtalekko a ti Dios ti autor ti Biblia, kabaelak nga isarsarita kadagiti dadduma ti pammatik a buyogen ti napaypayso a gagar. Mariknak a matartaraonanak a naimbag, nasalun-at iti naespirituan, ken kontento iti ngudo ti tunggal aldaw.”

Maysa nga agdaldaliasat a manangaywan dagiti Saksi ni Jehova, a sumarsarungkar kadagiti adu a kongregasion, ti nangdakamat kadagiti dadduma pay a gunggona iti kastoy a pamay-an: “Dagidiay naanep iti personal a panagadal ket kaaduanna nabibiag ken nalawlawag ti panagsasaoda. Nasaysayaat ti pannakilangenda kadagiti sabsabali, ken saanda a nalaka a maisursurot kadagiti negatibo a komento dagiti dadduma. Iti tay-ak ti ministerio, nalaingda a makibagay ken naalibtakda kadagiti kasapulan dagiti tattao a makasaritada.”

Adda innayonna a punto a mabalin a kayat a tandaanan dagiti dadduma no usigenda ti panagad-adalda: “Kadagiti gimong a pakasalaysayan dagiti Kasuratan, adu ti agannayas a mangbasa kadagiti komentoda a direkta manipud iti publikasion. Ad-adda a magunggonaanda no utobenda no kasano a nainaig ti material iti sigud nga ammodan wenno iti mismo a biagda.” Iti panagkunayo mabalinyo pay ngata ti rumang-ay iti daytoy a banag?

Kalpasan ti nasurok a 90 a tawen a panagbiagna, binigbig ni mammadto Daniel a saanna a maawatan amin a daldalan ni Jehova. Kadagiti maudi a tawtawenna, nagsaludsod maipapan iti maysa a banag a saanna unay a maawatan: “O apok, anianto ti tungpal dagitoy a bambanag?” (Daniel 12:8) Awan duadua a daytoy di agbalbaliw a gagar a makasursuro iti ad-adu pay maipapan iti kinapudno ti Dios ti nakatulong kenkuana nga agtalinaed a matalek iti unos ti napnuan kapadasan a panagbiagna.​—Daniel 7:8, 16, 19, 20.

Addaan met ti tunggal adipen ni Jehova iti pumada a responsabilidad nga agtakder a sititibker kas maysa kadagiti Saksina. Kanayon a magagarankay koma nga agsursuro tapno agtalinaedkayo a natibker iti naespirituan. Padasenyo ti manginayon ti maysa wenno dua a baro nga ideya iti linawas, binulan, wenno tinawen nga eskediulyo para iti personal a panagadal. Kitaenyo no kasano a bendisionan ti Dios ti aniaman a bassit a panagregget nga aramidenyo. Wen, tagiragsakenyo ti personal a panagadalyo iti Biblia ken dagiti resulta a yeg dayta.​—Salmo 107:43.

[Footnote]