Ti Nuklear a Pangta—Maikkatton iti Agnanayon!
SAAN a kayat ti Dios nga agbiag ti sangatauan iti buteng. Kas “ti naragsak a Dios,” kayatna a tagiragsakenda ti talna ken agbiagda a sitatalged—iti ababa a pannao, naragsak. (1 Timoteo 1:11) Iti maysa a lubong a napno iti nuklear a pangta, nalawag nga imposible daytoy.
“Talna ken Talged”—Saan a Napaypayso
Nalawag a saan pay a naggibus ti nuklear a pangta. Kaskasdi, iti laksid ti politikal, ekonomiko, ken sosial a riribuk, kasla siinanama dagiti nasion iti pangkaaduan. Sipud daydi panangiwaragawag ti NU iti 1986 kas Sangalubongan a Tawen ti Talna, agtultuloy nga ikagkagumaanda nga ikkaten ti peggad.
Iti napalabas a dekada binaliwan ti The Bulletin of the Atomic Scientists ti doomsday clock daytoy—ti wagas daytoy a mangipasimudaag iti posibilidad ti nuklear a gubat—manipud 3 a minuto sakbay ti tengnga ti rabii iti 17 a minuto sakbay ti tengnga ti rabii. Idi 1989 kinuna ti Stockholm International Peace Research Institute a “ti namnama iti natalna a resolusion kadagiti susik ket addaan iti nasaysayaat a pakaibatayan ngem iti aniaman a sabali a tawen sipud nagpatingga ti Gubat Sangalubongan II.”
Kadagiti kallabes a tawen, napatibker ti Naciones Unidas nga agtignay kadagiti paset ti lubong a maulit-ulit ti dangadang. Ti panagballigi daytoy, nupay saan a naan-anay, ket imdas a nangipaay iti positibo a panangmatmat. Mabalin nga addanto dagiti kanayonan a baro ken naballigi a pasamak iti masanguanan. Nalabit napigpigsa ken napaspasnekto ti panangipukkawda iti “talna ken talged.” Mabalin a nakappapatinto pay ketdi dagitoy.
Ngem agannadkayo! “Inton sasawenda: ‘Talna ken talged,’” mamakdaar ti Biblia, “iti kasta giddato nga umayto kadakuada ti kellaat a pannakadadael kas iti ut-ot ti panagrigat nga umay iti maysa a masikog a babai; ket didanto pulos makalisi.” No kasta, ti pannakaipukkaw ti “talna ken talged” ti mangirubuat ti tiempo a ‘panangdadael [ti Dios] kadagidiay mangdaddadael iti daga [babaen ti polusion, nuklear ken iti dadduma pay a pamay-an].”—1 Tesalonica 5:3, 4; Apocalipsis 11:18.
Paliiwenyo ta saan nga ibagbaga ti Biblia a matun-oyto dagiti nasion ti “talna ken talged.” Mabalin a pagsasaritaandanto dayta iti naidumduma a pamay-an, a yebkasda ti namnama ken pammatida a saanda a narikna iti napalabas. Agparangto nga as-asideg ngem idi ti posibilidad a matun-oy ti talna ken talged. Nupay agtultuloy ti nuklear a pangta, mailibayto dagiti nasion iti ubbaw a pannakarikna iti kinatalged.
Nupay kasta, saanto a maallilaw dagiti pudno a Kristiano. Sigagagar a mangnamnamada iti maysa a banag a nasaysayaat ngem ti talna ken talged a yeg ti tao!
Ti Pudpudno a Talna ken Talged
Sigun iti Salmo 4:8, masarakan ti pudpudno a talna ken talged iti laeng urnos ni Jehova a Dios: “Sitatalnaak nga agpadpada iti panagiddakto ken iti pannaturogko, ta sika, O Jehova, siksika laeng ti mangisaad kaniak iti kinatalged.” Sinsinan laeng ti aniaman a panangipukkaw iti “talna ken talged” a di maitunos iti urnos ti Pagarian ni Jehova. Saan a makaipaay dayta iti aniaman a banag nga agpaut.
Saanto a mangipaay laeng ti Pagarian ti Dios babaen ni Kristo kadagiti apagapaman a solusion. Saanto laeng a kissayan ti gobierno ti Dios dagiti nuklear nga armas; ikkatennanto a naan-anay dagitoy ken dagiti amin a dadduma pay nga igam iti gubat. Ikari ti Salmo 46:9: “Pagsardengenna dagiti gubat inggana iti ungto ti daga. Rungrungduenna ti bai ti pana ket gupdenna a mamimpinsan ti gayang; puoranna dagiti lugan iti apuy.”
Awanto metten dagiti nuklear a pangta gapu kadagiti addaan depekto a nuclear reactor wenno radioaktibo a rugit. Ta no saan a kasta, saan nga agpayso dagitoy a sasao: “Agtugawdanto, tunggal maysa iti sirok ti kayona nga ubas ken iti sirok ti kayona nga higos, ket awanto ti mangpabuteng kadakuada; ta ti ngiwat ni Jehova dagiti buybuyot sinaona.” Ti Dios dina mabalin ti agulbod. Awan panggapuantayo a pagduaduaan dagiti saona.—Mikias 4:4; Tito 1:2.
Kayatyo kadi ti agbiag iti maysa a lubong nga awanen nga agnanayon ti nuklear a pangta? Mabalinyo a matagiragsak dayta, ta silalawag nga ipakita ti Sao ti Dios dagiti alagaden. Babaen ti panangsursuro ken panangannurot kadagitoy, addanto aldaw a siraragsak a maikunayo a sibabang-ar: “Ti nuklear a pangta—naggibus met laengen!”
[Ladawan iti panid 7]
Agarinto ti talna iti baro a lubong ti Dios nga awan ti aniaman a nuklear a pangta
[Credit Line]
M. Thonig/H. Armstrong Roberts
[Picture Credit Line iti panid 6]
U.S. National Archives photo