Apay a Di Agsarday a Sumarsarungkar Dagiti Saksi?

‘ADDADA manen! Ngem gapgapuda la ditoy kadagiti kallabes a lawas!’ Dayta aya ti mapanunotyo no sumarungkar ti maysa kadagiti Saksi ni Jehova kadakayo? Riniwriw ita ti regular a sarsarungkaran dagiti Saksi ni Jehova. Mabalin a maisaludsodyo, Apay a napingetda idinto ta ammoda a kaaduan a tattao addaanda iti bukod a relihion wenno saanda nga interesado? Maikari dayta a saludsod iti sungbat.

Pagrebbengan iti Dios

Naammuan dagiti Saksi ni Jehova iti Kasuratan a manipud 1914, ti tawen a panangrugi ti Gubat Sangalubongan I, tungtungpalenen dagiti pasamak iti lubong dagiti padto iti Biblia maipapan iti panungpalan ti agdama a sistema ti lubong ken ti um-umay a panagturay ti Pagarian ti Dios ditoy daga. Ti agarup maysa a siglo a kaadda ti kinaranggas, panangibuyat ti dara, ken guranggura kasla ad-adda nga inyadayona ti sangatauan iti napolitikaan a solusion kadagiti parikutda ngem iti napalabas. Dagiti gubat ken terorismo a mangap-apektar pay laeng iti natauan a pamilia ket pammaneknek a ti panangituray ti tao ket napaay a mangbalbaliw iti puso, isip, ken kababalin dagiti tao. Ti nairamut a gura gapu kadagiti pasamak a napagteng iti napalabas ti mangsabsabidong pay laeng ti relasion iti nagbabaetan dagiti tattao a nagtaud iti nagduduma nga etniko, pulí, ken narelihiusuan a grupo. Agpayso dayta kadagiti lugar a kas kaadayo ti Afghanistan, India, Makintengnga a Daya, Makin-amianan nga Irlandia, Sud Africa, ken ti dati a Yugoslavia. Ngarud, ania ti kakaisuna a manayon a solusion?

Ania ti Mangtigtignay Kadagiti Saksi?

Bigbigen dagiti Saksi ni Jehova a ti solusion ti Dios​—ti inkarina a Pagarian a pagturayan ni Kristo Jesus​—ket isu laeng ti nainkalintegan a solusion. Uray la nga inraman nga indawat ni Jesus dayta a turay ti Pagarian iti nalatak a modelo a kararagna: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.’” Mamati dagiti Saksi a daytoy a kararag idawdawatna ti ibaballaet ti Dios iti ar-aramid ti sangatauan.​—Mateo 6:9, 10.

Isu nga apay a marikna dagiti Saksi ni Jehova ti panagkasapulan a kanayon a mapan iti binalaybalay a mangidanon iti dayta a mensahe? Gapu iti dua a bilin nga intampok ni Jesus: “‘Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti kaarrubam a kas iti bagim.’”​—Mateo 22:37-39.

Tarigagayan dagiti Saksi ti pammendision ti Dios kadakuada, ket gapu ta ay-ayatenda dagiti kaarrubada, kayatda a maipaay met ti kasta a bendision [kadagiti kaarrubada]. Ngarud, kas panangsurot iti ulidan ni Jesus, ti di agimbubukodan nga ayat ti mangtignay kadakuada a sumarungkar kadagiti kaarrubada. No mabalbalin kayatda nga itukon kadakuada ti gundaway a mangammo iti inkari “ti naragsak a Dios” iti natulnog a sangatauan iti maysa a nadalusan a daga.​—1 Timoteo 1:11; 2 Pedro 3:13.

Mamati ti Kristiano a misionero a ni Pablo kadagiti kari ti Dios ket iti kasta naisuratna: “Ni Pablo, maysa nga adipen ti Dios ken maysa nga apostol ni Jesu-Kristo sigun iti pammati dagiti pinili ti Dios ken iti umiso a pannakaammo iti kinapudno a maitunos iti nadiosan a debosion maibatay iti namnama iti agnanayon a biag a ti Dios, a dina mabalin ti agulbod, inkarina kasakbayan dagiti nabayagen a tiempo.” Wen, ti Dios, “a dina mabalin ti agulbod,” “inkarina” ti biag nga agnanayon kadagidiay sipapakumbaba a mangammo ken agserbi kenkuana.​—Tito 1:1, 2; Sofonias 2:3.

Masusuelduan Aya Dagiti Saksi?

No dadduma ipapan dagiti sumagmamano a masusuelduan dagiti Saksi iti ministerioda. Naan-anay a saan a pudno daytoy! Sipapasnek a sursurotenda dagiti sao ni Pablo iti kongregasion idiay Corinto: “Saankami a managlako iti sao ti Dios a kas iti adu a tattao, no di ket gapu iti kinapasnek, wen, kas naibaon manipud iti Dios, iti imatang ti Dios, a kadua ni Kristo, agsasaokami.”​—2 Corinto 2:17.

Mangaskasaba dagiti dadduma a pangulo ti relihion gapu iti kuarta, kas bayad man dagiti narelihiusuan a serbisio wenno panangitandudo kadagiti komersial a ganuat iti ministerioda iti TV. Addaan ti kaaduan a relihion iti masusuelduan a klero.

Iti kasunganina, awanan dagiti Saksi kadagiti masusuelduan a klero, ket masansan a maitukon dagiti literaturada iti Biblia nga awan bayadna kadagiti napasnek nga agsapsapul ti kinapudno, nupay kaaduan kadagitoy ti matignay a mangipaay kadagiti boluntario a donasion. Dagitoy ti mausar a mangsupusop kadagiti magastos iti daytoy sangalubongan a trabaho a panangasaba. Maitunos iti balakad ni Jesus: “Inawatyo nga awan bayadna, itedyo nga awan bayadna,” sibubulos a busbosen dagiti Saksi ti sanikuada, agraman ti tiempo ken pigsada, iti panangipaay iti riniwriw nga oras kada tawen iti panagserbi iti Dios. Iti kasta, isuroda dagiti interesado a tattao iti binalay-balay ken babaen ti panangyadal ti Biblia kadagiti pagtaengan.​—Mateo 10:8; 28:19, 20; Aramid 20:19, 20.

Dagiti ebidensia paneknekanna a dagiti Saksi ni Jehova kas indibidual, dagiti lokal a kongregasionda, wenno ti Watch Tower Society ket awan motiboda a manguarta. Awan ti masusuelduan iti panagbalay-balay. No kasta kasano a masuportaran ti trabaho? Babaen kadagiti boluntario a kontribusion dagiti manangapresiar a tattao iti aglikmut ti lubong. Awan dagiti maur-or a kuarta.

Ti Epekto ti Panangasabada

Pagaammo aya ti publiko ti panagbalay-balay a ministerio ken ti impormal a panangasaba dagiti Saksi? Mangipaay ti ebidensia iti warnakan iti nabatad a wen kas sungbat iti dayta a saludsod. Madakdakamat dagiti Saksi ni Jehova kadagiti programa iti TV ken sine no adda maiparang a maysa a tao nga agtuktuktok iti ruangan. Madakdakamat dagiti Saksi kadagiti kartón. Nalatak unay ti napinget a trabahoda ta uray la dakdakamaten dagiti kartónista iti aglikmut ti lubong dagiti Saksi ni Jehova. Agparang a maysa daytoy a pananguyaw, ngem gagangay a naibatay dagitoy iti positibo a kinapudno​—a nalatak dagiti Saksi gapu iti napinget a panangaskasabada iti binalay-balay.​—Aramid 20:20.

Impakita ti maysa a nabiit pay a kartón ti maysa a tao a sumangsang-at iti bantay tapno makiuman iti maysa a “guru.” Kinunana: “Ibagam kaniak dagiti nakaskasdaaw a banag a mapasamak!” Kasanot’ isusungbat ti “guru”? “Kitaenta . . . Addanto panagbisin, angol, ken ginggined. Agsipngetto ti bulan, ket ti bulan agbalin a dara.” Dinamag ti managsaludsod: “Ania ti naimbag a damag?” Kastoy ti insungbat ti “guru”: “Punasento ti Dios ti tunggal lua . . . ket awanton ti ipapatay wenno sasaibbek wenno ut-ot!” Insaludsod ti bisita: “Kasano nga ammom ti kakasta a banag?” Ti sungbat? “Saan a maliklikan ti uray siasino dagiti Saksi ni Jehova!” Ket pudno met la ketdi dayta iti kartónista a mismo!

Ti kinapateg daytoy a kartón ken dagiti dadduma a kas iti dayta isu ti panangipalgak a saan laeng a ti kinasansan dagiti Saksi a sumarungkar no di pay ket ti panagtutunos ti mensaheda. Iti sumagmamano laeng a pannao, nangipaay ti kartónista iti maysa a napateg a paset ti panangpaneknekda iti binalay-balay ken kadagiti naadaw a kasuratan.​—Idiligyo ti Mateo 24:7, 29; Apocalipsis 21:3, 4.

Ti kinapudno a kaaduan a tattao laksidenda ti mensaheda dina upayen dagiti Saksi wenno pabaawen ti regtada. Namakdaar ni apostol Pedro: “Kadagiti maudi nga al-aldaw umaydanto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti yan daytoy naikari a kaaddana? Ay ket, nanipud iti aldaw a dagiti ammami naturogda ken patay, amin a bambanag nagtultuloyda a kasta met laeng nanipud idi panangrugi ti sangaparsuaan.’” Iti baet daytoy, gapu ta natignay iti ayat, itultuloy dagiti Saksi ti sumarungkar kadagiti kaarrubada ken aramidenda ti kasta agingga a gibusan ti Dios ti agdama a dakes a sistema.​—2 Pedro 3:3, 4.

Kinuna ni Jesus a kadagiti maudi nga al-aldaw, maikaskasaba nga umuna ti naimbag a damag. Para iti kanayonan a panangsukimat no apay ken kasano, kitaenyo ti sumaganad a dua nga artikulo.​—Marcos 13:10.

[Dagiti Ladawan iti panid 9]

Awanan dagiti Saksi ni Jehova kadagiti masusuelduan a klase klero​—amin ket boluntario a ministro