Panangsaksi iti “Isuamin a Nasnasion”

“Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.”​—MATEO 24:14.

1. Apay a makapakellaat kadagiti pasurot ni Jesus iti sasaona a nailanad idiay Mateo 24:14?

NAKLAAT la ketdi dagiti Judio nga adalan ni Jesus iti sasaona nga adda iti ngato! Ti laengen kapanunotan maipapan iti pannakisarita dagiti nasantipikar a Judio kadagiti “narugit” a Gentil, dagiti “tattao iti nasnasion,” ket awan iti panunot ti maysa a Judio, makarurod pay ketdi.a Kinapudnona, di man la mapanunot ti maysa a napasnek a Judio ti sumrek iti pagtaengan ti maysa a Gentil! Adu pay laeng ti nasken a sursuruen dagidiay a Judio nga adalan maipapan ken Jesus, iti ayatna, ken iti bilinna. Ken adu pay laeng ti nasken a sursuruenda maipapan iti di panangidumduma ni Jehova.​—Aramid 10:28, 34, 35, 45.

2. (a) Kasanot’ kasaknapen ti ministerio dagiti Saksi? (b) Ania dagiti tallo a kangrunaan a banag a nakatulong iti irarang-ay dagiti Saksi?

² Inkaskasaba dagiti Saksi ni Jehova ti naimbag a damag kadagiti nasion, agraman iti moderno-aldaw nga Israel, ken iwarwaragawagda dayta ita iti ad-adu a nasion ngem iti napalabas. Iti 1994 nasurok nga uppat ket kagudua a milion a Saksi ti mangaskasaba iti ag-230 a daga. Mangidadauloda iti agarup uppat ket kagudua a milion a panagadal ti Biblia iti pagtaengan dagiti interesado a tattao. Maar-aramid daytoy iti sango ti sangalubongan nga ibubusor, masansan gapu iti kaawan pannakaammo kadagiti sursuro ken motibo dagiti Saksi. Kas iti naikuna maipapan kadagiti nagkauna a Kristiano, maikuna met ti kastoy maipapan kadakuada: “Pudno a no maipapan itoy a sekta naammuanmi a masupsuppiat iti isuamin a lugar.” (Aramid 28:22) Iti ania ngarud nga ipagaputayo ti naballigi a ministerioda? Adda tallo a banag a nakatulong iti irarang-ayda​—panagpaidalan iti espiritu ni Jehova, panangtulad kadagiti praktikal a pamay-an ni Kristo, ken panangaramat kadagiti umiso nga instrumento iti epektibo a pannakikomunikar.

Ti Espiritu ni Jehova ken ti Naimbag a Damag

3. Apay a ditay maipagpasindayag ti nagapuanantayo?

³ Pagpasindayag aya dagiti Saksi ni Jehova ti panagballigida, a kasla ketdin dayta ket gapu kadagiti naisangsangayan nga abilidadda? Saan, ta agaplikar ti sasao ni Jesus: “Inton naaramidyon amin dagiti bambanag a naituding kadakayo, kunaenyo, ‘Awan kaes-eskanmi nga ad-adipen. Ti naaramidanmi isu ti rebbengmi nga aramiden.’” Kas dedikado, bautisado a Kristiano, sibubulos dagiti Saksi ni Jehova a nangawat iti responsabilidad nga agserbi iti Dios, aniaman ti personal a kasasaadda. Kadagiti dadduma, kaipapanan dayta ti panagserbi iti amin a tiempo kas misionero wenno kas boluntario kadagiti sanga nga opisina ken pasilidad a pagimalditan kadagiti Nakristianuan a publikasion. Kadagiti dadduma, ti kinatulokda kas Kristiano ti nangiturong kadakuada [a makiraman] iti panangbangon kadagiti relihiuso a patakder, panangasaba iti amin a tiempo kas payunir a ministro, wenno iti paset-tiempo a panangasaba kas agibumbunannag iti naimbag a damag kadagiti lokal a kongregasion. Awan kadatayo ti makapagpasindayag iti panangaramid iti annongentayo, ‘ti rebbengtay nga aramiden.’​—Lucas 17:10; 1 Corinto 9:16.

4. Kasano a maparparmek ti sangalubongan nga ibubusor iti Nakristianuan a ministerio?

⁴ Maipagapu iti espiritu, wenno aktibo a puersa ni Jehova, ti aniaman a panagballigitayo. Siuumiso a maikuna ita ti kas naikuna idi kaaldawan ni mammadto Zacarias: “Daytoy ti sao ni Jehova ken Zorobabel, a kunana, ‘Saan a babaen ti puersa militar, wenno babaen ti pannakabalin, no di ket babaen ti espirituk,’ kuna ni Jehova dagiti buybuyot.” Gapuna, maparparmek ti sangalubongan nga ibubusor iti trabaho a panangasaba dagiti Saksi, saan a babaen ti panangikagumaan ti tao, no di ket babaen ti panangidalan ken pannalaknib ni Jehova.​—Zacarias 4:6.

5. Ania ti akem ni Jehova iti pannakaisaknap ti mensahe ti Pagarian?

⁵ Maipapan kadagidiay mangipangag iti mensahe ti Pagarian, kinuna ni Jesus: “Adda a naisurat kadagiti Mammadto, ‘Ket sursuruanto amin ida ni Jehova.’ Tunggal maysa a dimngeg iti Ama ken nakasursuro umay kaniak. . . . Awan ti makaumay kaniak malaksid no ipalubos kenkuana ti Ama.” (Juan 6:45, 65) Mabasa ni Jehova dagiti puso ken isip, ken ammona dagidiay mabalin a mangipangag iti ayatna nupay saanda pay nga am-ammo. Us-usarenna met dagiti anghelna a mangiturong iti daytoy naidumduma a ministerio. Isut’ gapuna nga iti sirmata nakita ni Juan ti pannakipaset ti anghel ket insuratna: “Ket nakitak ti sabali pay nga anghel a tumaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnaed iti daga, ken iti tunggal nasion ken tribo ken pagsasao ken ili.”​—Apocalipsis 14:6.

Sipapanunot iti Naespirituan a Kasapulan

6. Ania a napateg a kababalin ti nasken iti maysa a tao tapno mangipangag iti naimbag a damag?

⁶ Ti maysa pay a banag iti panangipaay ni Jehova iti gundaway iti maysa a tao nga umawat iti naimbag a damag ket isu daydiay inyebkas ni Jesus: “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” (Mateo 5:3) Saan a sipapanunot iti naespirituan a kasapulanna ti tao nga addaan bukod a pannakapnek wenno saan nga agbirbirok iti kinapudno. Dagiti laeng material, nainlasagan a banag ti pampanunotenna. Agbalin a tubeng ti kinaaleng-aleng. Gapuna, no iti panagbalay-balaytayo ket adu ti masarakantayo a mangilaksid iti mensahe, nasken nga usigentayo amin dagiti nadumaduma a makagapu iti reaksion dagiti tattao.

7. Apay nga adu ti di mangipangag iti kinapudno?

⁷ Adu ti agkedked a dumngeg gapu ta siiinget a sursurotenda ti relihion a tinawidda ken saanda a kayat ti makisarita. Naallukoy dagiti dadduma iti maysa a relihion a maibagay iti personalidadda​—kayat ti sumagmamano ti misterioso a relihion, dagiti dadduma ti emosionalismo, ket adda met dagidiay agbirbirok laeng iti sosial a gunglo iti simbaanda. Adu ita ti nangpili iti wagas ti panagbiag a maisalungasing kadagiti pagalagadan ti Dios. Nalabit narugit ti kabibiagda, isut’ gapuna a kunada, “Saanak nga interesado.” Dagiti dadduma, nga agkunkuna a de adal ken sientipiko, laksidenda ti Biblia agsipud ta nakasimsimple kano.​—1 Corinto 6:9-11; 2 Corinto 4:3, 4.

8. Apay a ti panangilaksid di rumbeng a pakapsutenna ti regtatayo? (Juan 15:18-20)

⁸ Ti kadi panangilaksid ti kaaduan rumbeng a pakapsutenna ti pammati ken regtatayo iti makaispal-biag a ministerio? Makaliwliwa kadatayo ti sasao ni Pablo kadagiti taga Roma: “Ania, ngarud, ti kaso? No ti sumagmamano dida nangyebkas iti pammati, ti aya kinakurang ti pammatida nalabit pagbalinenna nga awanan epekto ti kinamatalek ti Dios? Saan koma a pulos mapasamak dayta! No di ket ti Dios masarakan koma a napudno, nupay tunggal tao masarakan a naulbod, a kas adda a naisurat: ‘Tapno mapaneknekanka a nalinteg kadagiti sasaom ket mangabakka koma no mauk-ukomka.’”​—Roma 3:3, 4.

9, 10. Ania ti mangpaneknek a naparmeken ti ibubusor iti adu a pagilian?

⁹ Makagun-odtayo iti pammaregta manipud kadagiti adu a pagarigan iti aglikmut ti lubong kadagiti pagilian a kasla di mangikankano ngem, idi agangay, napaneknekan a saan met gayam. Ammo ni Jehova ken dagiti anghel nga adda dagiti nasayaat-panagpuspusoda a tattao a masarakan​—ngem kasapulan nga agpinget ken agibtur dagiti Saksi ni Jehova iti ministerioda. Alaentay a pagarigan ti sumagmamano a pagilian a ti Katolicismo kasla nangidatag iti di maparmek a lapped, 50 a tawenen ti napalabas​—Argentina, Brazil, Colombia, España, Irlandia, Italia, Mexico, ken Portugal. Manmano dagiti Saksi idi 1943, ta 126,000 laeng iti intero a lubong, ket 72,000 kadagitoy ti adda idiay Estados Unidos. Pader a ladrilio a di maduprak ti kayarigan idi ti kaawan pannakaammo ken ibubusor a naipasango kadagiti Saksi. Ngem, itatta maar-aramid kadagitoy a pagilian ti dadduma kadagiti kababalligian a resulta ti panangasaba. Pudno met dayta kadagiti adu a dati a Komunista a pagilian. Idi 1993, ti panagpabautisar ti 7,402 iti maysa a kombension idiay Kiev, Ukraine, ti mangpaneknek iti daytoy.

¹⁰ Ania dagiti pamay-an nga us-usaren dagiti Saksi tapno maidanon ti naimbag a damag kadagiti kaarrubada? Us-usarenda aya dagiti material a pakaguyugoyan tapno makaawisda kadagiti pasurot, kas ipagarup ti dadduma? Dagiti laeng aya napanglaw ken awan adalna ti sarsarungkaranda, kas kuna dagiti dadduma?

Dagiti Naballigi a Pamay-an iti Panangyallatiw ti Naimbag a Damag

11. Ania a nagsayaat nga ulidan ti intuyang ni Jesus iti ministeriona? (Kitaenyo ti Juan 4:6-26.)

¹¹ Impasdek ni Jesus ken dagiti adalanna ti padron a sursuroten dagiti Saksi agingga kadagitoy nga aldaw iti trabahoda a panangaramid iti adalan. Napan ni Jesus iti sadinoman a pakasarakan kadagiti tattao, nabaknang wenno napanglaw​—kadagiti pagtaengan, publiko a lugar, igid ti dan-aw, bambantay, uray kadagiti sinagoga.​—Mateo 5:1, 2; 8:14; Marcos 1:16; Lucas 4:15.

12, 13. (a) Kasano a nangipaay ni Pablo iti padron para kadagiti Kristiano? (b) Kasano ti panangsurot dagiti Saksi ni Jehova iti ulidan ni Pablo?

¹² Maipapan iti ministeriona, siuumiso a maikuna ni apostol Pablo: “Pagaammoyo la unay no kasano a manipud idi umuna nga aldaw a bimmaddekak iti distrito ti Asia kaduadak iti amin a tiempo, nga agpapaadipen iti Apo . . . , bayat a diak minedmedan ti panangibaga kadakayo ti aniaman kadagiti bambanag a makagunggona wenno uray ti panangisuro kadakayo iti publiko ken iti binalay-balay.”​—Aramid 20:18-20.

¹³ Agdinamag dagiti Saksi ni Jehova iti intero a lubong gapu iti panangsurotda iti apostoliko a padron, ti ministerio a panagbalay-balay. Imbes nga ipamaysada iti nangina, narabaw, ken impersonal a ministerio iti TV, mapan dagiti Saksi kadagiti tattao, nabaknang ken napanglaw, ken makiam-ammoda kadakuada a rupanrupa. Ikagumaanda ti makipatang maipapan iti Dios ken iti Saona.b Saanda a padpadasen ti mangaramid kadagiti makunkuna a rice Christians, a mangawis kadagiti pasurot babaen ti panangibunong kadagiti libre a bambanag. Kadagidiay mayat a makirinnason, ipakitada a ti laeng pudpudno a solusion kadagiti parikut ti sangatauan isu ti panagturay ti Pagarian ti Dios, a mangpasayaatto kadagiti kasasaad ditoy dagatayo.​—Isaias 65:17, 21-25; 2 Pedro 3:13; Apocalipsis 21:1-4.

14. (a) Kasano a nangipasdek dagiti adu a misionero ken payunir iti nalagda a pundasion? (b) Aniat’ maadaltayo iti kapadasan dagiti Saksi idiay Japan?

¹⁴ Tapno maitungpal ti trabaho iti kaaduan a pagilian aginggat’ mabalin, inrusat dagiti misionero ken payunir ti trabaho iti adu a nasion. Insaadda ti pundasion, ket dagiti lokal a Saksi ti nangidaulo. Gapuna, saan a kasapulan ti adu a ganggannaet a Saksi tapno agtultuloy ti panangasaba ken tapno agtalinaed nga organisado. Ti maysa a naipangruna a pagarigan isu ti Japan. Idi arinunos ti dekada ’40, bin-ig a taga Australia-Asia, ken Britania dagiti misionero a napan sadiay, nagadal iti pagsasao, nakibagay kadagiti kannawidan kadaydi a tiempo kalpasan ti gubat, ken nangirusat iti panangasaba iti binalay-balay. Bayat ti Gubat Sangalubongan II, naparitan ken naidadanes dagiti Saksi idiay Japan. Isu a manmano laeng dagiti aktibo a Saksi a Hapones a nasangpetan dagiti misionero. Ngem ita immadudan iti nasurok a 187,000 iti nasurok a 3,000 a kongregasion! Aniat’ sekreto ti nasapa a panagballigida? Kastoy ti kuna ti maysa a misionero a nasurok a 25 a tawenen nga agserserbi sadiay: “Nagpateg ti panagsursuro a makipatang kadagiti tattao. Babaen ti panangammo iti pagsasaoda, nabaelanmi ti makipulapol kadakuada, mangawat ken mangapresiar iti wagas ti panagbiagda. Nasken nga ipakitami nga ay-ayatenmi dagiti Hapones. Sipapakumbaba nga inkagumaanmi ti agbalin a paset ti lokal a komunidad, ngem siempre, saanmi nga inkompromiso dagiti Nakristianuan a prinsipiomi.”

Maysa Met a Pammaneknek ti Nakristianuan a Kababalin

15. Kasano nga ipakpakita dagiti Saksi ti Nakristianuan a kababalin?

¹⁵ Nupay kasta, saan laeng a ti mensahe ti Biblia ti ipangpangag dagiti tattao. Makitkitada met ti panagtignay ti Kinakristiano. Mapalpaliiwda ti ayat, panagtutunos, ken panagkaykaysa dagiti Saksi uray kadagiti narigat unay a kasasaad, kas dagiti guerra sibil, panagdadangadang gapu iti tribu, ken panagbibinnusor gapu iti pulí. Salsalimetmetan dagiti Saksi ti nalawag a neutral a takder kas Kristiano iti amin a susik ken tungtungpalenda ti sasao ni Jesus: “Mangtedak kadakayo iti maysa a baro a bilin, nga ayatenyo ti maysa ken maysa; kas ti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:34, 35.

16. Ania a kapadasan ti mangiladawan iti praktikal a Nakristianuan nga ayat?

¹⁶ Nailadawan ti panagayat iti pada a tao iti kapadasan ti maysa a lakay a nagsurat iti maysa a lokal a pagiwarnak maipapan kada “Mr. ken Mrs. Naimbag a Tao.” Inlawlawagna a nakaim-imbag kenkuana dagiti kaarrubana idi agbugbugsot ni baketna. “Sipud pimmusay ni baketko . . . napalalo ti kinaimbagda,” insuratna. “‘Inampon[dak]’ sipud idin . . . , nga isuda ti mangas-asikaso iti amin a trabaho iti balay ken tumultulong a mangrisut kadagiti parikut ti maysa a 74-años a retirado a tao. Ti mamagbalin iti daytoy nga ad-adda pay a karkarna ket nangisitda, idinto ta purawak. Saksi ni Jehova-da, maysaak a mapukpukaw a Katoliko.”

17. Ania nga aramid ti rebbengtay a liklikan?

¹⁷ Ipakita daytoy a kapadasan a makaipaaytay ti pammaneknek iti adu a pamay-an, agraman ti inaldaw a kababalintayo. Kinapudnona, malaksid no ti kababalintayo ket kas ken Kristo, ti ministeriotayo ket panaginsisingpet laeng, barengbareng. Saantay a kayat ti maitulad kadagidiay dineskribir ni Jesus: “Amin a bambanag nga ibagada kadakayo, aramiden ken tungpalenyo, ngem dikay aramiden maitunos kadagiti ar-aramidda, ta sawenda ngem dida aramiden.”​—Mateo 22:37-39; 23:3.

Ipapaay ti Klase Adipen Dagiti Umiso nga Instrumento

18. Kasanonatay a kabalan dagiti literatura ti Biblia a tumulong kadagiti nasingpet-panagpuspusona a tattao?

¹⁸ Ti maysa pay a napateg a tulong iti pannakaikaskasaba ti naimbag a damag iti amin a nasion isu ti kaadda dagiti literatura ti Biblia nga ipabpablaak ti Watch Tower Bible and Tract Society. Addaantay kadagiti libro, broshur, tract, ken magasin a mangpennek iti gistay amin a napasnek a managsaludsod. No makasaraktay iti Muslim, Hindu, Budhista, Taoista, wenno Judio, mabalintay nga aramaten ti libro a Ti Panangbiruk ti Sangatauan iti Dios wenno dagiti nagduduma a tract ken polieto iti panangirugi iti saritaan ken nalabit panagadal iti Biblia. No agsaludsod ti maysa nga ebolusionista maipapan iti panamarsua, mabalintay nga aramaten ti libro a Life​—How Did It Get Here? By Evolution or by Creation? No isaludsod ti maysa nga agtutubo, ‘Ania ti panggep ti biag?’ mabalintay nga iturong iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. No madagdagsenan ti maysa a tao kadagiti personal a parikut​—panagladingit, pannakapaksuy, pannakarames, diborsio​—addaantay kadagiti magasin a nangsalaysay iti praktikal a pamay-an kadagiti kasta a suheto. Pudno la unay, ti matalek a klase adipen nga impadto ni Jesus a mangipaay iti “taraon iti umiso a tiempo” ket tungtungpalenna ti akemna.​—Mateo 24:45-47.

19, 20. Kasano a pimmardas ti trabaho ti Pagarian idiay Albania?

¹⁹ Ngem tapno madanon dagiti nasion, kasapulan a maipatarus dagitoy a literatura iti adu a pagsasao. Kasano a nagbalin a posible ti pannakaipatarus ti Biblia ken dagiti Nainkasuratan a literatura iti nasurok a 200 a pagsasao? Ipakita ti ababa a panangusig iti maysa a pagarigan, ti Albania, no kasano nga itantandudo ti klase matalek ken masirib nga adipen ti naimbag a damag iti laksid dagiti dadakkel a pakarigatan ken nupay awan ti moderno a Pentecostes a giddato a mangted iti pannakabalin nga agsao iti nagduduma a pagsasao.​—Aramid 2:1-11.

²⁰ Sumagmamano la a tawen ti napalabas, maibilang pay laeng ti Albania kas ti kakaisuna a pudpudno nga ateista a Komunista a pagilian. Kinuna ti magasin a National Geographic idi 1980: “Iparit ti Albania [ti relihion], a nangaklon idi 1967 kas ‘ti kaunaan nga ateista a pagilian iti lubong.’ . . . Ateismo laeng ti ammo ti baro a kaputotan ti Albania.” Ita ta kimmapsuten ti Komunismo, ipangpangag dagiti Albaniano a mangbigbig iti naespirituan a kasapulanda ti panangasaba nga ar-aramiden dagiti Saksi ni Jehova. Nabuangay idiay Tiranë idi 1992 ti maysa a bassit a bunggoy dagiti managipatarus a buklen dagiti agtutubo a Saksi a makaammo iti Italiano ken Ingles. Sinuruan ida dagiti kualipikado a kakabsat a lallaki a sumarsarungkar manipud kadagiti sabali a pagilian nga agusar kadagiti laptop computer iti panangiserrek ti teksto iti Albaniano. Rinugiandan nga impatarus dagiti tract ken ti magasin a Pagwanawanan. Bayat nga umad-adu ti kapadasanda, inrusatda nga impatarus dagiti dadduma pay a napateg a publikasion a naibatay iti Biblia. Iti agdama adda agarup 200 nga aktibo a Saksi iti dayta a bassit a pagilian (populasion a 3,262,000), ket 1,984 ti timmabuno iti Memorial iti 1994.

Addaantay Amin iti Responsabilidad

21. Ania a kita ti panawen ti pagbibiagantayo?

²¹ Agturturongen iti kangitingitan dagiti pasamak iti lubong. Bayat a lumanlanlan ti krimen ken kinaranggas, pammapatay ken panangrames kadagiti lokal a gubat, agraraira ti kinalulok iti moral ken ti bunga daytoy a saksakit a mayakar babaen ti sekso, kaawan panagraem iti lehitimo nga autoridad, agparang a nakirokiro, saanen a maiturayan ti lubong. Addatayo iti panawen nga umasping iti panawen kasakbayan ti Layus a nailadawan iti Genesis: “Nakita ni Jehova a ti kinadakes ti tao dakkel iti daga ken amin nga arapaap dagiti panunot ti pusona dakes la a kankanayon. Ket napaladingit ni Jehova iti pinangaramidna iti tao iti daga, ket napasennaay ti pusona.”​—Genesis 6:5, 6; Mateo 24:37-39.

22. Addaan dagiti amin a Saksi ni Jehova iti ania a Nakristianuan a responsabilidad?

²² Kas idi kaaldawan ni Noe, agtignayto ni Jehova. Ngem gapu iti hustisia ken ayatna, kayatna a maikaskasaba nga umuna ti naimbag a damag ken ti pammakdaar a mensahe iti amin a nasion. (Marcos 13:10) Iti daytoy a banag, addaan dagiti Saksi ni Jehova iti responsabilidad​—panangbirok kadagidiay maikari iti talna ti Dios ken panangisuro kadakuada iti dana ti talna. Iti saanen a mabayag, iti naituding a tiempo ti Dios, sibaballiginto a mairingpas ti trabaho a panangasaba. “Iti kasta umayton ti panungpalan.”​—Mateo 10:12, 13; 24:14; 28:19, 20.

[Dagiti Footnote]

Malagipyo Pay Aya?

◻ Ania a balligi ti nagun-od dagiti moderno-aldaw a Saksi iti ministerioda?

◻ Apay nga adu ti mangilaksid iti Nakristianuan a mensahe?

◻ Ania nga apostoliko a pamay-an ti panangasaba ti us-usaren dagiti Saksi?

◻ Addaantay kadagiti ania nga instrumento iti epektibo a ministerio?

◻ Ania ti masapul nga aramidentay amin maitunos iti Marcos 13:10?

[Kahon iti panid 19]

PAGILIAN DAGITI SAKSI NGA AKTIBO IDI 1943 IDI 1993

Argentina 374 102,043

Brazil 430 366,297

Chile 72 44,668

Colombia ?? 60,854

Francia Gubat Sangalubongan II​—saan a nairekord 122,254

Irlandia 150? 4,224

Italia Gubat Sangalubongan II​—saan a nairekord 201,440

Mexico 1,565 380,201

Peru Saan a nairekord 45,363

Pilipinas Gubat Sangalubongan II​—saan a nairekord 116,576

Polandia Gubat Sangalubongan II​—saan a nairekord 113,551

Portugal Saan a nairekord 41,842

España Saan a nairekord 97,595

Uruguay 22 9,144

Venezuela Saan a nairekord 64,081

[Ladawan iti panid 17]

Umad-adu dagiti Saksi ni Jehova iti adu a Katoliko a pagilian, kas idiay España

[Dagiti Ladawan iti panid 18]

Aktibo dagiti Saksi ni Jehova kadagiti nasion iti aglikmut ti lubong