Malagipyo Pay Aya?

Inusigyon aya a naimbag dagiti nabiit pay a ruar Ti Pagwanawanan? No kasta, makitayo a makapainteres a lagipen dagiti sumaganad:

▫ Ania ti kangrunaan a pagdumaan ti tao ken dagiti ayup?

Ti kangrunaan a pagdumaan ket naisentro iti pannakabukel, kabaelan, ken panagandar ti utek. Kadagiti ayup, naiprograma ti dandani amin a panagandar ti utek iti maaw-awagan a nainkasigudan a sirib. Saan a kasta kadagiti tattao. Inikkan ti Dios dagiti tattao iti nakem a mangaramid iti bukodda a pangngeddeng. (Proverbio 30:24-28)​—4/15, panid 5.

▫ Ania ti paset ti panagkanta iti panagdaydayaw dagiti Israelita iti templo?

Ti musika, nangruna dagiti kumakanta, napateg ti pasetda iti panagdayaw, saan a ti panangipaganetget kadagiti nadadagsen a bambanag iti Linteg ti kasapulan, no di ket tapno ipaay ti umiso a kababalin iti panagdayaw. Tinulonganna dagiti Israelita nga agdaydayaw ken Jehova a sirarayray. (1 Cronicas 23:4, 5; 25:7)​—5/1, pinanid 10, 11.

▫ Ania a kita ti panangasikaso ti kasapulan dagiti annak manipud kinamaladaga?

Masapul nga asikasuen dagiti nagannak ti kappasngay nga ubing iti gistay amin a kanito. Insurat ni Pablo: “Manipud kinamaladaga naammuam dagiti nasantuan a sursurat, a makabael a mamagsirib kenka maipaay ti pannakaisalakan.” (2 Timoteo 3:15) Ngarud, ni Timoteo ket inaywanan met ti naganak kenkuana iti naespirituan, uray manipud iti kinamaladaga.​—5/15, panid 11.

▫ Aniada dagiti uppat a linia ti pammaneknek a ti Biblia ket naglaon iti mensahe ti Dios nga agpaay iti intero a sangatauan?

(1) Ti kinalakana a magun-odan. Ag-98 a porsiento ti populasion ti lubong ti mabalin a makagun-od iti Biblia. (2) Naglaon iti pudno a historia. Naglaon ti Biblia kadagiti historikal a pasamak, imbes a kadagiti di mapaneknekan a sarsarita. (3) Kinapraktikal. Dagiti bilin ken prinsipiona ibalabalana ti wagas ti panagbiag a mangyeg kadagiti gunggona kadagidiay mangannurot kadakuada. (4) Padto. Maysa a libro a makaibaga a detalyado no ania ti mapasamak iti masanguanan.​—6/1, pinanid 8, 9.

▫ Ania ti responsabilidad a kakuyog ti pannakaammo iti umiso a relihion?

Iti kanito a nailasintayon ti umiso a relihion, masapul nga agbiagtayo a mayannurot iti dayta. Maysa dayta a wagas ti panagbiag. (Salmo 119:105; Isaias 2:3)​—6/1, panid 13.

▫ Apay a nagpateg ti personal a panagadal iti Biblia?

Rumbeng nga inaldaw a pabaruen dagiti amin nga adipen ti Dios ti rag-o ken pigsada babaen ti panangbirok kadagiti baro wenno naun-uneg nga aspeto ti kinapudno iti Sao ti Dios. Iti kastoy a pamay-an, makapagtalinaedda a narayray iti naespirituan.​—6/15, panid 8.

▫ Ania ti kaipapanan ti sao a “basol” kas naaramat iti Biblia?

Iti verbo a pormada, ti Hebreo ken Griego a sasao a kaaduan a naaramat iti Biblia a mangiladawan iti “basol” kaipapananna “maikapis,” iti anag a pannakaikapis wenno di pannakaragpat iti kalat, marka, wenno puntiria. Nagkurang dagiti immuna a natauan a pagassawaan iti dayag ti Dios, naikapisda iti panggep ti pannakaparsuada a kaladladawan ti Dios. Iti sabali a pannao, nagbasolda. (Genesis 2:17; 3:6)​—6/15, panid 12.

▫ Apay a talaga a di nainsiriban a basaen ti literatura dagiti apostata?

Mangidatag dagiti dadduma a literatura ti apostata kadagiti kinaulbod babaen ti “nalamuyot a panagsao” ken “parparbo a sasao.” (Roma 16:17, 18; 2 Pedro 2:3) Bin-ig a pammabalaw laeng ken panangdadael dagiti amin a sinurat dagiti apostata. Awan a pulos ti makapabileg.​—7/1, panid 12.

▫ Ti Grecia aya ti nagtaudan ti demokrasia?

Iti nagkauna a Grecia, naannurot laeng ti demokrasia kadagiti sumagmamano a siudad-estado, ken uray kadagitoy dagiti laeng lallaki ti agbotos. Kayat a sawen daytoy nga uppat a kakalima ti populasion ti saan a nairaman. Saan ngarud a maikuna a popular a kinasoberano wenno demokrasia!​—7/1, panid 16.

▫ Ania ti mamagballigi iti Kristiano a pagassawaan?

No raemen ti asawa a lalaki ken asawa a babai ti panangmatmat ti Dios iti panagasawa ken ikagumaanda ti agbiag a mayannurot kadagiti prinsipio ti Saona. (Efeso 5:21-33)​—7/15, panid 10.

▫ Kasano nga agbalin a makaay-ayo ti panagadal ti pamiliayo?

Ikagumaanyo nga iraman dagiti amin nga annak. Agbalinkay koma a positibo ken makapabileg, a sibabara a komendaranyo dagiti annakyo gapu iti pannakiramanda. Saanyo laeng a basta saklawen ti material no di ket ikagumaanyo a danonen ti puspuso dagiti annakyo.​—7/15, panid 18.

▫ Ania ti ipasimudaag dagiti sasao: “Inton sasawenda: ‘Talna ken talged!’” (1 Tesalonica 5:3)

Paliiwenyo ta saan nga ibagbaga ti Biblia a matun-oyto dagiti nasion ti “talna ken talged.” Ngem mabalin a pagsasaritaandanto dayta iti naidumduma a pamay-an, a yebkasda ti namnama ken pammatida a saanda a narikna iti napalabas. Agparang nga as-asideg ngem idi ti posibilidad a matun-oy ti talna ken talged.​—8/1, panid 6.

▫ Mangdakamat iti tallo a pamay-an a panangipakita ni Jehova iti kina-nainkalintegan.

Impakita ni Jehova nga isu ket sisasagana a mangpakawan. (Salmo 86:5) Sidadaan a mangbalbaliw iti pinanggepna nga aramiden bayat a rumsua dagiti baro a kasasaad. (Kitaenyo ti Jonas, kapitulo 3.) Kasta met, impakita ni Jehova nga isut’ nainkalintegan iti panangwatwatna iti autoridad. (1 Ar-ari 22:19-22)​—8/1, pinanid 12-14.