Report Dagiti Manangiwaragawag ti Pagarian
“Busorenyo ti Diablo, ket Isu Agtalawto Kadakayo”
IDI umuna a siglo, maysa a grupo dagiti debotado iti “arte ti panagsalamangka” idiay Efeso ti nangipangag iti Nakristianuan a mensahe babaen ti panangpuorda kadagiti libroda iti panagsalamangka iti sanguanan ti isuamin. (Aramid 19:19) Nakarkulo nga agpateg dagitoy a libro iti 50,000 a kapisi ti pirak. No ti salaysay iti Biblia tuktukoyenna ti denario, maysa a sensilio a pirak dagiti Romano, mabalin nga agpateg dayta iti $37,000!
Itatta adu a tattao nga iti naminsan nagikut iti literatura a mainaig iti okulto ngem nangipakitada iti determinasion nga umasping kadagiti nagkauna a taga-Efeso. Usigenyo ti sumaganad a kapadasan manipud Canada.
Agarup lima a tawenen ti napalabas, maysa kadagiti Saksi ni Jehova ti mangaskasaba iti binalaybalay idi nga iti maysa a ruangan maysa a kasado a babai nga agnagan Nora ti literal a nangguyod kenkuana iti uneg ti pagtaengan. Iti las-ud ti adu a tawen a panagsukimat iti naespirituan, nakaurnong ni Nora iti ginasut a narelihiusuan ken espiritistiko a libro, ngem kayatna a maammuan no ania ti kunaen ti Biblia maipapan ti namnama dagiti natay. Intukon ti Saksi kenkuana ti tract nga Aniat’ Namnama Dagiti Ing-ingungoten a Natayen? Nasungbatan dagiti saludsod ni Nora, ken immanamong nga agsuskribe iti magasin a Pagwanawanan ken Agriingkayo!
Di nagbayag immakar ket napugsat ti pannakisarsaritana kadagiti Saksi ni Jehova. Nupay kasta, nagtultuloy nga umawat kadagiti magasin babaen ti koreo iti baro a direksionna. Nagpedido met iti sumagmamano a naibatay-Biblia a publikasion a nadakamat kadagiti magasin. Kalpasan ti sumagmamano a panawen, maysa kadagiti Saksi ni Jehova ti simmarungkar iti pagtaenganna. Gaput’ ragsakna iti panangaramat a direkta ti Saksi iti Biblia iti panangsungbatna kadagiti saludsod, isut’ pinastrek ni Nora ken inawisna nga agsubli para iti kanayonan a panagsarita.
Nupay kasta, nasarakan ti Saksi a narigat manen a makasarita ni Nora. Maulit-ulit nga isasarungkar ti naaramid iti nadumaduma nga oras iti aldaw ken iti nadumaduma nga oras iti lawas ngem saan a nagballigi. Idi agangay, nupay kasta, nagunggonaan ti panagreggetna, ket nagapit kadagiti naimbag a resulta. Narugian ti regular a panagadal iti Biblia, nga iti panangisikkir ni Nora masansan a maangay dayta iti mamitlo a daras iti makalawas. Dagiti banag a maad-adalna ti nangtignay kenkuana a mangisarita kadagiti gagayyem ken kameng ti pamiliana, a nagbanag iti panangkalikagum ti tallo kadakuada a makipagadal iti Biblia kadagiti Saksi ni Jehova.
Gapu iti panagadalna nabigbig ni Nora nga adu dagiti ulbod a relihion ken ulbod a mammadto ngem maymaysa laeng ti dalan a mangiturong iti biag. Iti adu a tawtawen isut’ agsapsapul iti sungbat dagiti saludsodna kadagiti ulbod a relihion, ngem kalpasan a maammuanna no ania ti kunaen ti Biblia maipapan kadagiti demonio, isut’ nagtignay kas kadagiti nagkauna a taga-Efeso a nadakamat idiay Aramid 19:19. Inikkatna amin a linaon ti bibliotekana ket, iti las-ud ti sumagmamano nga aldaw, dinadaelna ti nasurok a sangaribu a libro maipapan iti okulto ken kadagiti ulbod a narelihiusuan a sursuro. Karaman kadagiti publikasion a nadadael ti maysa a set dagiti uppat a libro nga agpateg iti nasurok a $800!
Nalawag a saan a naay-ayo iti inaramid ni Nora, isut’ riniribuk dagiti demonio iti agarup dua a lawas. Nupay kasta, saan a nabaelan dagitoy a dakes nga espiritu nga upayen iti panangitultuloyna nga agadal iti Biblia ken iti pannakitimpuyogna iti moderno-aldaw nga organisasion ni Jehova.
Ti kasta a kapadasan iladawanna a naimbag ti kinapudno dagiti sasao ti Biblia: “Ngarud, ipasakopyo ti bagbagiyo iti Dios; ngem busorenyo ti Diablo, ket isu agtalawto kadakayo.”—Santiago 4:7.