Sungbatan ti Dios Dagiti Kararag

Ginun-od ni Cornelio ti anamong ti Dios babaen ti naynay ken naimpusuan a karkararag. Maysa pay, inaramatna a siuumiso ti saadna kas maysa nga opisial iti armada. Sigun iti Biblia, “nangipaay kadagiti adu a sagut ti asi” kadagiti napanglaw.​—Aramid 10:1, 2.

ITI daydi a tiempo, ti kongregasion Kristiano ket buklen dagiti manamati a Judio, proselita, ken Samaritano. Saan a nakugit a Gentil ni Cornelio ken saan a kameng ti kongregasion Kristiano. Kayatna kadi a sawen nga ubbaw dagiti kararagna? Saan. Impateg ni Jehova a Dios ni Cornelio ken dagiti naimpusuan nga aramidna.​—Aramid 10:4.

Babaen ti panangiwanwan ti maysa nga anghel, nayam-ammo ni Cornelio iti kongregasion Kristiano. (Aramid 10:30-33) Kas resultana, isu ken ti pamiliana ti naaddaan iti pribilehio kas kaunaan a di nakugit a Gentil a nagbalin a kameng ti kongregasion Kristiano. Nakita ni Jehova a Dios a maikari a mairekord iti Biblia ti kapadasan ni Cornelio. Sigurado nga adu ti binalbaliwan ni Cornelio tapno naan-anay a maitunos ti biagna kadagiti pagalagadan ti Dios. (Isaias 2:2-4; Juan 17:16) Agserbi koma ti kapadasan ni Cornelio a dakkel a pammaregta kadagiti tattao iti amin a pagilian nga agsapsapul ita iti anamong ti Dios. Usigentayo ti sumagmamano nga ehemplo.

Dagiti Ehemplo iti Moderno nga Aldaw

Agkasapulan unay idi iti liwliwa ti maysa nga agkabannuag a babai idiay India. Nakiasawa idi agtawen iti 21. Ngem natay ti asawana di nagbayag kalpasan a naipasngay ti maikadua nga anakda. Iti edadna a 24, maysan a balo nga addaan iti dua nga annak, maysa a 2 bulan a babai ken 22 bulan a lalaki. Di pakasdaawan nga agkasapulan iti liwliwa! Pagpatulonganna ngay? Maysa a rabii, gapu iti nakaro a liday, inkararagna: “Nailangitan nga Ama, liwliwaennak kadi babaen ti Saom.”

Kabigatanna, adda bisitana. Maysa a Saksi ni Jehova. Marigatan daytoy a Saksi a mangasaba iti dayta nga aldaw gapu ta manmano ti mayat a makisarita kenkuana. Agawid koman ta nabannog ken naupay. Ngem kasla mariknana a masapul a mangasaba pay uray maysa laengen a balay. Dita a naam-ammona ti agkabannuag a balo. Pinastrek ti balo ket nangala iti publikasion a mangilawlawag iti Biblia. Naliwliwa ti babai iti nabasana iti dayta a publikasion ken iti pannakisaritana iti Saksi. Naammuanna ti kari ti Dios a panagungar dagiti natay ken ti Pagarian ti Dios a mamagbalinto iti daga a maysa a paraiso iti saanen a mabayag. Kangrunaanna, naam-ammo ken nasursurona nga ayaten ti maymaysa a pudno a Dios, ni Jehova, a nangsungbat iti kararagna.

Ni Nora, nga agnanaed iti siudad ti George, South Africa, ket nangilatang iti maysa a bulan tapno makiraman iti amin-tiempo a panangasaba. Sakbay a nangrugi, sipapasnek nga inkararagna ti tulong ni Jehova tapno makasarak iti maysa a pudpudno nga interesado nga agadal iti Biblia. Adda iti teritoria a pangasabaanna ti pagtaengan ti maysa a tao a nauyong ken ni Nora kadagiti naglabas a panangasabana. Situtured a nagsubli ni Nora iti dayta a pagtaengan. Nasdaaw ta sabalin ti agnanaed. Noleen ti naganna. Inkarkararag ni Noleen ken ni nanangna ti tulong ti Dios tapno maawatanda ti Biblia. Kuna ni Nora: “Idi intukonko kadakuada ti panagadal iti Biblia, naragsakanda.” Napartak ti panagrang-ay da Noleen ken ni nanangna. Idi agangay, makiramramandan a kadua ni Nora iti trabaho a naespirituan a panangpaimbag.

Maysa pay a mangipakita iti bileg ti kararag isu ti kapadasan ti agassawa nga agnanaed iti siudad ti Johannesburg idiay South Africa. Iti maysa a rabii ti Sabado idi 1996, agsina koman da Dennis ken Carol. Kas maudi a pamuspusan, inkeddengda ti agkararag maipaay ti tulong, nga inulit-ulitda nga inaramid agingga iti kaadalman ti rabii. Kabigatanna, iti 11:00, adda dua a Saksi ni Jehova a nagtuktok iti ruanganda. Ni Dennis ti nanglukat iti ruangan ket pinagurayna ida bayat nga inayabanna ni baketna. Binallaagan ngarud ni Dennis ni Carol a no pastrekenna dagiti Saksi, narigatton a papanawen ida. Impalagip ni Carol ken Dennis nga inkarkararagda ti tulong ket kunana a nalabit daytoyen ti sungbat ti Dios kadagiti kararagda. Isu a pinastrekda dagiti Saksi, ket nairugi ti panagadal iti Biblia babaen ti libro a Pannakaammo a Mangiturong iti Biag nga Agnanayon. Naragsakan da Dennis ken Carol iti naadalda. Iti malemna, nakigimongda iti umuna a gundaway iti Kingdom Hall dagiti Saksi ni Jehova iti lugarda. Gapu ta inyaplikarda ti pannakaammo a naadalda iti Biblia, nasarakan da Dennis ken Carol ti solusion dagiti parikutda kas agassawa. Naragsakda itan kas bautisado a manangidaydayaw ni Jehova ken regular nga iranranudda kadagiti kaarrubada dagiti naibatay-Biblia a patpatienda.

Kasanon no iti Panagriknayo ket Dikay Maikari nga Agkararag?

Nalabit marikna ti dadduma a napudno a tattao a dida maikari nga agkararag gapu iti dakes a kabibiagda. Adda kasta a lalaki nga insalaysay ni Jesu-Kristo, maysa a malalais nga agsingsingir iti buis. Narikna daytoy a lalaki a di maikari a bumaddek iti kadawyan a lugar a pagkararagan no sumrek iti paraangan ti templo. “Agtaktakder iti adayo . . . agtultuloy a dandanogenna ti barukongna, a kunkunana, ‘O Dios, mangngaasika kaniak a managbasol.’” (Lucas 18:13) Sigun ken Jesus, impangag ti Dios daytoy a lalaki. Paneknekan daytoy a manangngaasi a talaga ni Jehova a Dios ken kayatna a tulongan dagidiay managbasol a napudno nga agbabawi.

Usigenyo ti maysa nga agtutubo idiay South Africa nga agnagan iti Paul. Idi ubing pay, simmursurot ken ni nanangna a tumabuno kadagiti Nakristianuan a gimong. Ngem idi addan iti haiskul, nakitimpuyog kadagiti agtutubo a di mangsursurot iti dalan ti Dios. Idi nagsardeng nga ageskuela, nagsoldado iti sidong ti dati a mamaglalasinlasin ti puli a gobierno ti South Africa. Kalpasanna, di ninamnama a nakisina kenkuana ti nobiana. Namagleddaang unay ken Paul ti kastoy a di makaay-ayo a klase ti panagbiag. Malagipna pay: “Maysa a rabii, nagkararagak ken ni Jehova ket dinawatko ti tulongna, nupay adun a tawen a diak nagkararag a naimpusuan iti Dios.”

Di nagbayag kalpasan dayta a kararag ni Paul, inawis ni nanangna a tumabuno iti tinawen a Pananglaglagip iti ipapatay ni Kristo. (Lucas 22:19) Kasla narigat a patien ni Paul daytoy nga inaramid ni nanangna yantangay rebelioso ken awan interesna iti Biblia. “Minatmatak daytoy nga awis kas sungbat ni Jehova iti kararagko isu a nariknak a rumbeng nga awatek daytoy.” Sipud idin, tabtabunuan ni Paul ti amin a Nakristianuan a gimong. Kalpasan iti uppat a bulan a panagadalna iti Biblia, nakualipikar nga agpabautisar. Maysa pay, insardengnan ti panangalana iti kinainheniero ket pinilina ti kurso nga amin-tiempo a panangasaba. Naragsak itan ni Paul, ket saanen a malmaldaangan gapu iti napalabasna. Iti naglabas a 11 a tawen, agserserbin iti sanga nga opisina ti Watch Tower Society idiay South Africa.

Pudno a siaayat a sungbatan ni Jehova a Dios dagiti kararag ken “agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Din agbayag, dumtengto ti dakkel nga aldaw ni Jehova ket pagpatinggaennanto ti amin a kinadakes. Kabayatanna, sungsungbatan ni Jehova ti kararag ti ilina agpaay iti pammabileg ken panangiwanwan bayat a sireregta a makiramramanda iti nagpateg a trabaho a panangasaba. Gapuna, minilion a tattao iti amin a nasion ti sumsumrek iti kongregasion Kristiano ken mangtagtagiragsak iti pannakaammo iti Biblia a mangiturong iti biag nga agnanayon.​—Juan 17:3.

[Ladawan iti panid 5]

Sinarungkaran ni apostol Pedro ni Cornelio gapu iti napasnek a kararagna

[Ladawan iti panid 6]

Adu ti natulongan ti kararag kadagiti panawen ti riribuk

[Dagiti Ladawan iti panid 7]

Nasayaat ti agkararag a dumawat iti tulong tapno matarusan ti Biblia

Mabalin nga agkararag ti agassawa a dumawat iti tulong tapno lumagda ti relasionda