Ti Biblia—Aniat’ Pudpudno a Pategna?
“TI Biblia ket datdatlag, maysa a libro a di nairanta a maawatan,” kuna ti maysa a bumalay. Kuna ti sabali: “Ammok a maysa a napateg a libro ti Biblia, ngem bassit lat’ ammok maipapan iti dayta. Narigat a maawatan.”
“Adu a Kristiano . . . ti bassit lat’ ammoda maipapan iti Biblia,” kuna ti The Toronto Star. Kinuna ti maysa a babai a Katoliko: “Nasayaat ti riknak a maaddaan iti Biblia. Dayta ti mangipapaay kaniak iti natalna a rikna.” “Mayarig ti Biblia iti maysa a kompas a mangidalan kenka iti tengnga ti nadawel a taaw ti biag nga agturong iti natalged a disso,” kuna ti maysa a mangngalap. Kinuna ti maysa a dati a Hindu a “ti Biblia ket Sao ti Dios ken maysa a sagut iti sangatauan ken agas kadagiti naespirituan nga an-annayen.”
Nakaad-adu ken nagduduma dagiti kapanunotan maipapan iti pudpudno a pateg ti Biblia. Nupay kasta, aniat’ pudpudno a pategna?
Ti Biblia ti kapatgan ken kasaknapan pannakaiwarasna a libro. Masarakan iti binulongna ti sungbat dagiti makariribuk a parikut a mapaspasaran ti tao wenno mapasarannanto pay laeng. Awan umarpad iti kinapraktikal ti balakadna. Awan umartap kadagiti moral a pagalagadan nga itantandudona. Nabileg ken makagunggona ti mensahe [a linaonna]. Daytoy a libro nga awan pumada iti pategna ket maikari nga alaen iti estante ken maipaayan iti naannad a panangusig ken panangsukimat.
Mabalintay nga ukagen ti Biblia buyogen ti naan-anay a panagtalek a dayta ket naan-anay nga umiso, mapagtalkan, ken pudno. Pasingkedan ti sekular a historia dagiti historikal a pasamak a nailanad iti dayta. Maulit-ulit a patalgedan dagiti arkeolohikal a takuat a napaypayso ken pudno ti Biblia. Ti kinaprangka dagiti 40 wenno nasursurok pay a mannurat ti Biblia paneknekanna a mapagpiaran ken napudnoda a lallaki. Ti panagtutunos ti linaon ti Biblia ipakitana a saan dayta a nagtaud iti tao. Agpayso dagiti pasamak a nailanad iti dayta. Agpayso dagiti tattao a sarsaritaenna. Agpayso dagiti lugar ken disso a dinakamatna. Mainayon pay, naglaon ti Biblia kadagiti naisangsangayan a padto nga awan duadua a mangipabigbig ken Jehova a Dios kas Autor ti Biblia.—2 Pedro 1:21.
Sinigurado ti Naindaklan nga Instruktortayo a ti pannakaammo iti pagayatan ken pangpanggepna ket magun-odan dagidiay mayat a makaammo iti dayta. Kinapudnona, silalawag a kunaen ni Jehova kadatayo a pagayatanna nga amin a kita ti tattao adalenda ti Saona ken “dumtengda iti umiso a pannakaammo iti kinapudno.” (1 Timoteo 2:3, 4; Proverbio 1:5, 20-33) Daytoy ti maysa kadagiti kapatgan a banag a mabalintay nga aramiden iti biagtayo. Maysa dayta a karit a rebbengtay a sanguen. Naawatan dagiti nagkauna a Kristiano daytoy. Natignay ti maysa kadakuada a nangikuna: “Daytoy ti agtultuloy nga ikarkararagko, a ti ayatyo umadu koma nga ad-adda pay buyogen ti umiso a pannakaammo ken naan-anay a panangilasin; tapno mabalinyo a siguraduen dagiti napatpateg a bambanag.”—Filipos 1:9, 10; Colosas 1:9, 10.
Ti Biblia ti kangrunaan a pamay-an ti Namarsua a mangipakaammo iti pagayatan ken panggepna iti sangatauan, ken ilawlawagna no kasano a maikari ti tunggal maysa kadatayo iti dayta a panggep. Nailanad iti dayta dagiti pasamak iti napalabas, ken silalawag nga iladawanna ti masanguanan. Naglaon ti Biblia iti umiso a doktrina ken palintegennatayo no maipapan iti rebbeng wenno di rebbeng a patientayo. (Aramid 17:11; 2 Timoteo 3:16, 17) Mangipaay dayta kadagiti pagalagadan iti kababalin a rebbeng nga annuroten ti tao iti biagna, ken iturongna dagiti tattao iti dalan ti balligi ken kinaragsak. (Mateo, kapitulo 5 agingga iti 7) Ipaganetgetna ti Pagarian ti Dios kas ti kakaisuna a namnama ti intero a sangatauan ken ipakitana no kasano nga usaren [ti Dios] ti gobiernona a mangsantipikar iti naganna ken mangalangon iti kinasoberanona. Ilawlawag ti Biblia ti wagas ti panagbiag a rebbengtay a suroten tapno matagiragsaktay ti nasinged, naayat a pannakirelasion iti Nangted ti Biagtayo, ni Jehova.
Mainayon pay, ti laeng Biblia ti libro a mangiturong kadakayo iti kadakkelan a gunggona nga awatento ti sangatauan—biag nga agnanayon iti paraiso a daga kas perpekto a tattao. (Roma 6:23) Kunaen kadatayo ti bugbugtong nga Anak ni Jehova: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Sigurado a rumbeng a gutugotennatay ti kasta a nagpateg a libro a mangammo iti nasken nga aramidentayo tapno magun-odtayo ti gunggona a biag nga agnanayon. Ti Biblia ket maysa a libro a nairanta a maawatan, kas ipakita ti sumaganad nga artikulo.