Dagiti Adipen ti Dios—Organisado Ken Naragsak nga Ili
“Naragsak ti ili a ni Jehova ti Diosna!”—SALMO 144:15.
1, 2. (a) Apay nga adda kalintegan ni Jehova a mangipasdek kadagiti pagalagadan maipaay kadagiti adipenna? (b) Ania dagiti dua a kababalin ni Jehova a kangrunaanna a kayattay a tuladen?
NI Jehova ti Sapasap a Soberano, ti mannakabalin-amin a Dios, ti Namarsua. (Genesis 1:1; Salmo 100:3) Gapuna, adda kalinteganna a mangipasdek kadagiti pagalagadan ti kababalin maipaay kadagiti adipenna, nga ammona ti kasayaatan para kadakuada. (Salmo 143:8) Ken isu ti Kangrunaan a Pagwadanda a dagiti kababalinna rumbeng a tuladenda. “Agbalinkayo a tumutulad iti Dios, kas annak a dungdunguen,” insurat ti maysa nga apostol.—Efeso 5:1.
2 Ti maysa a kababalin ti Dios a rumbeng a tuladentayo ket mainaig iti organisasion. Isu ket ‘saan a maysa a Dios ti riribuk.’ (1 Corinto 14:33) No amisigentayo a naimbag ti pinarsua ti Dios, mapilitantay a mangikuna nga isu ti kaurnosan a Persona iti uniberso. Nupay kasta, ti maysa pay a kababalin ti Dios a kayatna a tuladen dagiti adipenna isu ti kinaragsakna, ta isu “ti naragsak a Dios.” (1 Timoteo 1:11) No kasta, natimbeng iti kinaragsak ti kinalaingna a mangorganisar. Saan a maipangpangruna ti maysa a kababalin iti pagdaksan ti sabali.
3. Kasano nga iparangarang dagiti nabituen a langlangit ti kinalaing ti Dios a mangorganisar?
3 Paneknekan ti amin nga inaramid ni Jehova, manipud kadadakkelan agingga iti kababassitan, nga isu ket maysa a Dios ti organisasion. Usigenyo, kas pagarigan, ti makitkita nga uniberso. Naglaon dayta iti rinibu a bilion a bituen. Ngem saan a kusokuso ti pannakaiwaras dagitoy. Napaliiw ni astrophysicist George Greenstein nga adda “padron iti urnos dagiti bituen.” Naorganisar dagitoy kadagiti grupo a maaw-awagan galaksi, a dagiti dadduma naglaon iti ginasut a bilion a bituen. Ken mapattapatta nga adda binilbilion a galaksi! Organisado met dagiti galaksi, nga adu kadakuada (manipud sumagmamano agingga iti adu a ribu) ti nagrupogrupo iti rimmuok dagiti galaksi. Ket maipagarup a naorganisar dagiti rimmuok ti galaksi iti daddadakkel pay ketdi a grupo a maaw-awagan supercluster.—Salmo 19:1; Isaias 40:25, 26.
4, 5. Mangtedkayo kadagiti pagarigan ti organisasion kadagiti sibibiag a bambanag ditoy daga.
4 Makita iti uray sadinoman ti nagsayaat nga urnos dagiti parsua ti Dios, saan laeng nga iti makitkita a langlangit no di pay ket ditoy daga, a napno iti di mabilang a sibibiag a bambanag. Maipapan amin kadagitoy, insurat ni Paul Davies, maysa a propesor ti pisika, nga uray la “agamangá” dagiti managpaliiw iti “kinadaeg ken kinarikut ti urnos ti pisikal a lubong.”—Salmo 104:24.
5 Usigenyo ti sumagmamano a pagarigan ti ‘narikut nga urnos’ a masarakan kadagiti sibibiag a bambanag. Kastoy ti kuna ni Joseph Evans, maysa a neurosurgeon, maipapan iti utek ken duri ti tao: “Kasla di nakappapati ti kinapudno ti naindaklan nga urnos.” Maipapan iti mikroskopiko a sibibiag a selula, kinuna ti maysa a bacteriologist a ni H. J. Shaughnessy: “Nakaskasdaaw unay ti kinarikut ken kinapintas ti urnos dagiti mikroskopiko a sibibiag a banag nga agparang a paset dayta ti maysa a sistema a gapuanan ti dios.” Kastoy met ti kinuna ti maysa a molecular biologist a ni Michael Denton maipapan iti genetic code (DNA) iti uneg ti selula: “Kasta unay ti kinasayaatna nga uray la malaon ti maysa a kutsarita ti amin nga impormasion . . . a kasapulan iti panangikeddeng iti disenio dagiti amin a kita ti organismo nga adda iti planeta . . . ket kaskasdi nga adda pay laeng umdas nga espasio para iti amin nga impormasion iti tunggal libro a naisurat.”—Kitaenyo ti Salmo 139:16.
6, 7. Ania nga organisasion ti naipakita kadagiti espiritu a parsua, ken kasanot’ panangyebkasda iti panangapresiarda iti Nangaramid kadakuada?
6 Saan laeng a dagiti material a parsuana ti inorganisar ni Jehova no di pay ket dagiti espiritu a parsuana idiay langit. Ipakaammo kadatayo ti Daniel 7:10 a ‘sitatakder iti saklang ni Jehova [dagiti anghel nga agdagup] ti ‘sangalaksa a laksa.’ Sangagasut a riwriw a nabibileg nga espiritu a parsua ti agserserbi, a tunggal maysa naisaad iti maiparbeng nga akemna! Makaariweng a panunoten ti laing a kasapulan iti panangorganisar iti kasta a nagdakkelan a bilang. Mayanatup la unay a kunaen ti Biblia: “Bendituenyo ni Jehova, O dakayo nga anghelna, a mannakabalin iti bileg, a manungtungpal iti saona, babaen ti panagimdeng iti timek ti saona. Bendituenyo ni Jehova, dakayo amin a buyotna [nga anghel], dakayo a ministrona, a mangar-aramid iti pagayatanna.”—Salmo 103:20, 21; Apocalipsis 5:11.
7 Anian a nagdaeg ti pannakaorganisar ken nagsayaat dagiti aramid ti Namarsua! Di pakasdaawan a sibubuteng ken sipapakumbaba a kuna dagiti nabileg nga espiritu a parsua idiay langit: “Maikarika, Jehova, a mismo a Diosmi, nga umawat ti dayag ken ti dayaw ken ti pannakabalin, agsipud ta pinarsuam dagiti isuamin a bambanag, ket gapu iti pagayatam napaaddada ken naparsuada.”—Apocalipsis 4:11.
8. Aniada a pagarigan ti mangipakita nga inorganisar ni Jehova dagiti adipenna ditoy daga?
8 Inorganisar met ni Jehova dagiti adipenna ditoy daga. Idi inyegna ti Layus idi kaaldawan ni Noe idi 2370 K.K.P., nakalasat ni Noe ken dagiti pito a sabsabali pay kas maysa nga organisado a pamilia. Iti Ipapanaw [dagiti Israelita] idi 1513 K.K.P., inruar ni Jehova ti sumagmamano a riwriw a tattaona idiay Egipto a nakaadipenanda ken inikkanna ida iti detalyado a kodigo dagiti linteg a nangorganisar iti inaldaw a panagbiagda ken iti panagdaydayawda. Ket kamaudiananna, idiay Naikari a Daga, pinullo a ribu kadakuada ti naorganisar para iti naisangsangayan a serbisio iti templo. (1 Cronicas 23:4, 5) Idi umuna a siglo, naorganisar dagiti Kristiano a kongregasion iti panangiturong ti Dios: “Intedna ti sumagmamano kas apostol, ti sumagmamano kas mammadto, ti sumagmamano kas managebanghelio, ti sumagmamano kas papastor ken mannursuro, a maipaay iti pannakaator dagiti sasanto, maipaay iti trabaho a panagministerio.”—Efeso 4:11, 12.
Organisado Met Dagiti Adipen ti Dios iti Moderno a Panawen
9, 10. Kasano nga inorganisar ni Jehova dagiti tattaona iti tiempotayo?
9 Kasta met, inorganisar ni Jehova dagiti adipenna iti moderno a panawen tapno siiepektibo a maitungpalda ti trabahona iti kaaldawantayo—ti pannakaikaskasaba ti naimbag a damag ti Pagarianna sakbay a gibusanna daytoy agdama a dakes a sistema ti bambanag. (Mateo 24:14) Usigenyo ti nairaman iti daytoy sangalubongan a trabaho ken no kasano kapateg ti nasayaat nga organisasion. Riniwriw a lallaki, babbai, ken ubbing ti masansanay a mangisuro kadagiti dadduma maipapan kadagiti kinapudno iti Biblia. Tapno masuportaran daytoy a panagsanay, nakaad-adu a Biblia ken naibatay-Biblia a publikasion ti maimalmaldit. Maimalmaldit ita ti tunggal ruar ti Pagwanawanan iti nasurok a 16 a milion iti 118 a pagsasao, ken ti Agriingkayo! iti ag-13 a milion iti 73 a pagsasao. Aggigiddan a maimalmaldit ti gistay amin a ruar tapno magun-od nga aggigiddan dagiti amin nga adipen ni Jehova no mabalbalin ti isu met laeng nga impormasion.
10 Mainayon pay, nasurok a 73,000 a kongregasion dagiti Saksi ni Jehova iti sangalubongan ti naorganisar nga agtataripnong a regular maipaay iti panagadal iti Biblia. (Hebreo 10:24, 25) Adda met rinibu a daddadakkel a panagtataripnong—dagiti asamblea sirkito ken kombension distrito—iti tinawen. Adda met ti nasaknap a sangalubongan a panangbangon wenno panangpasayaat kadagiti Kingdom Hall, Assembly Hall, pagtaengan a Bethel, ken pasilidad a pagimalditan iti literatura ti Biblia. Adda dagiti eskuelaan maipaay iti narang-ay a panagsanay dagiti mannursuro iti Biblia, kas ti Watchtower Bible School of Gilead para kadagiti misionero ken ti Pioneer Service School, a maang-angay iti nadumaduma a daga iti aglikmut ti lubong.
11. Ania a masanguanan a gunggona ti itden ti panangsursuro iti nasayaat nga organisasion ita?
11 Anian a nagsayaat ti panangorganisar ni Jehova kadagiti adipenna ditoy daga a ‘mangitungpal a naan-anay iti ministerioda,’ a badbadangan dagiti adipenna nga anghel! (2 Timoteo 4:5; Hebreo 1:13, 14; Apocalipsis 14:6) Babaen ti panangisurona kadagiti adipenna iti nasayaat nga organisasion ita, adda sabali pay a magapgapuanan ti Dios. Maisagsagana a naimbag dagiti adipenna tapno inton makalasatda iti panungpalan daytoy a sistema ti bambanag, organisadodanton a mangirugi iti biag iti baro a lubong. Kalpasanna, iti organisado a pamay-an iti panangiturong ni Jehova, rugiandanto a bangonen ti sangalubongan a Paraiso. Nakasaganadanto met a naimbag a mangisuro kadagiti binilion a tattao a mapagungar manipud kadagiti natay maipapan kadagiti detalyado a pagalagadan ti Dios iti pananggun-od iti biag.—Isaias 11:9; 54:13; Aramid 24:15; Apocalipsis 20:12, 13.
Organisado Ngem Naragsak
12, 13. Apay a maikunatayo a kayat ni Jehova nga agbalin a naragsak dagiti tattaona?
12 Nupay nakaskasdaaw a trabahador ni Jehova ken nalaing a mangorganisar, isu ket saan a naulpit, nainget, wenno awanan rikna. Ngem ketdi, isu ket maysa a naayat unay, naragsak a Persona a maseknan iti kinaragsaktayo. “Maseknan kadakayo,” kuna ti 1 Pedro 5:7. Makitatayo ti pannakaseknanna ken ti tarigagayna a mangparagsak kadagiti adipenna kadagiti [bambanag nga] inaramidna a maipaay iti tao. Kas pagarigan, idi pinarsua ti Dios ti perpekto a lalaki ken babai, insaadna ida iti makaay-ayo a paraiso. (Genesis 1:26-31; 2:8, 9) Intedna amin a kasapulanda tapno matagiragsakda a naan-anay ti biag. Ngem napukawda amin dagitoy gapu iti yaalsada. Kas bunga ti basolda, natawidtayo ti kinaimperpekto ken ipapatay.—Roma 3:23; 5:12.
13 Nupay imperpektotayo ita, datayo a tattao kaskasdi a matagiragsaktayo dagiti inaramid ti Dios. Nakaad-adu dagiti banag a mangparagsak kadatayo—dagiti nadaeg a bantay; dagiti napintas a dan-aw, karayan, taaw ken aplaya; dagiti namaris, nabanglo a sabong ken dadduma pay a nakaad-adu a nadumaduma a kita ti mula; ti nawadwad nga agkakaimas a taraon; dagiti nangayed nga ilelennek ti init a pulos a di makauma a buybuyaen; dagiti nabituen a langit a kaay-ayotay a matmatan iti rabii; dagiti nadumaduma a kita ti animal ken dagiti nakaay-ayat a nagantil nga urbonda; ti makaabbukay a musika; ti makapainteres ken makagunggona a trabaho; dagiti nasayaat a gagayyem. Nalawag a Daydiay nangurnos iti kakasta a banag ket maysa a naragsak nga indibidual a pagaayatna a paragsaken dagiti dadduma.
14. Ania a kinatimbeng ti kalikaguman ni Jehova kadatayo iti panangtulad kenkuana?
14 Gapuna, saan laeng a ti naannayas nga urnos ti kayat ni Jehova. Kayatna met nga agbalin a naragsak dagiti adipenna, a kas kenkuana a naragsak. Dina kayat a sipapanatiko nga organisarenda dagiti bambanag iti pakadangran ti kinaragsakda. Nasken a timbengen dagiti adipen ti Dios ti abilidadda a mangorganisar iti kinaragsak, kas iti ar-aramidenna, ta iti sadinoman a yan ti nabileg a nasantuan nga espirituna, adda rag-o. Kinapudnona, ipakita ti Galacia 5:22 a ti maikadua a bunga ti nasantuan nga espiritu ti Dios nga agtigtignay kadagiti tattaona ket “rag-o.”
Ti Ayat Pataudenna ti Ragsak
15. Apay a nagpateg ti ayat iti kinaragsaktayo?
15 Makapainteres unay nga imutektekan a kuna ti Biblia: “Ti Dios ket ayat.” (1 Juan 4:8, 16) Pulos a dina kinuna: “Ti Dios ket organisasion.” Ti ayat ti kangrunaan a kababalin ti Dios, ket nasken a tuladen dagiti adipenna. Isut’ gapuna a ti umuna a bunga ti espiritu ti Dios a nailista idiay Galacia 5:22 ket “ayat,” kalpasanna “rag-o.” Ti ayat pataudenna ti rag-o. No tuladentayo ti ayat ni Jehova iti pannakilangentayo kadagiti dadduma, sumaruno ti kinaragsak, ta dagiti naayat a tattao naragsakda a tattao.
16. Kasano nga impakita ni Jesus ti kinapateg ti ayat?
16 Naitampok kadagiti pannursuro ni Jesus ti kinapateg ti panangtulad iti nadiosan nga ayat. Kinunana: “Kas iti insuro kaniak ni Ama sawek dagitoy a bambanag.” (Juan 8:28) Ania, kangrunaanna, ti naisuro ken Jesus nga insurona met kadagiti dadduma? A dagiti dua a kangrunaan a bilin isu ti panagayat iti Dios ken ti panagayat iti kaarruba. (Mateo 22:36-39) Impakita ni Jesus ti kasta nga ayat. Kinunana: “Ay-ayatek ti Ama,” a pinaneknekanna dayta babaen ti panangaramidna iti pagayatan ti Dios agingga ken patay. Ken impakitana ti panagayatna kadagiti tattao babaen ti ipapatayna maigapu kadakuada. Kinuna ni apostol Pablo kadagiti Kristiano idiay Efeso: ‘Inayatnakayo ni Kristo ken inyawatna ti bagina a maipaay kadakayo.’ (Juan 14:31; Efeso 5:2) Gapuna, kinuna ni Jesus kadagiti pasurotna: “Daytoy ti bilinko, nga ayatenyo ti maysa ken maysa kas ti panagayatko kadakayo.”—Juan 15:12, 13.
17. Kasano nga impakita ni Pablo a napateg ti panagayat kadagiti dadduma?
17 Inyebkas ni Pablo no kasano kapateg daytoy nadiosan nga ayat babaen ti panangikunana: “No agsaoak kadagiti pagsasao dagiti tattao ken dagiti anghel ngem awan ayatko, nagbalinak a maysa nga agun-uni a suer wenno umaw-aweng a piang-piang. Ket no addaanak iti sagut ti panagipadto ken ammok amin dagiti sagrado a palimed ken amin a pannakaammo, ket no addaanak iti amin a pammati tapno iyakarko dagiti bantay, ngem awan ayatko, awan ti kaes-eskak. Ket no itedko amin a sanikuak tapno mapakan dagiti sabsabali, ket no iyawatko ti bagik, tapno makapagpasindayagak, ngem awan ayatko, saanak a pulos magunggonaan. . . . Mataginayon ti pammati, namnama, ayat, dagitoy a tallo; ngem ti kadakkelan kadagitoy isu ti ayat.”—1 Corinto 13:1-3, 13.
18. Ania ti mainanamatayo manipud ken Jehova a mangnayon iti kinaragsaktayo?
18 No tuladentay ti ayat ni Jehova, makapagtalektayo iti ayatna kadatayo, uray no agbidduttayo, ta isu ket maysa a “Dios a manangngaasi ken managparabur, nainayad nga agpungtot ken aglaplapusanan iti naayat a kinamanangaasi ken kinapudno.” (Exodo 34:6) No sipapasnek nga agbabawitayo no makaaramidtayo kadagiti biddut, palabsen ti Dios dagitoy ken siaayat a pakawanennatayo. (Salmo 103:1-3) Wen, “ni Jehova nadungngo unay iti panagayat ken naasi.” (Santiago 5:11) Ti pannakaammo iti daytoy nayonanna ti ragsaktayo.
Kalalainganna a Kinaragsak Ita
19, 20. (a) Apay a saan a posible ita ti naan-anay a kinaragsak? (b) Kasano nga ipakita ti Biblia a mabalintay ti maaddaan iti kalalainganna a kinaragsak iti daytoy agdama a panawen?
19 Nupay kasta, posible aya ti agbalin a naragsak ita, idinto ta agbibiagtayo iti maudi nga al-aldaw daytoy napnuan-krimen, naranggas, imoral a lubong nga adda iti babaen ni Satanas, a pakapasarantayo iti sakit ken ipapatay? Siempre, saantay a mainanama ita ti rukod ti kinaragsak nga addanto iti baro a lubong ti Dios, kas ti naipadto iti Saona: “Adtoy, mamarsuaak iti baro a langlangit ken baro a daga; ket dagiti immun-una a banag didanto malagipen, didanto metten umapay iti puso. Ngem agragsakkayo, dakayo nga umili, ken agrag-okayo iti agnanayon iti daydiay parsuaek.”—Isaias 65:17, 18.
20 Ti magun-odan ita dagiti adipen ti Dios ket kalalainganna a kinaragsak gapu ta ammoda ti pagayatanna ken addaanda iti umiso a pannakaammo kadagiti nakaskasdaaw a bendision nga asidegen a dumteng iti paraiso a baro a lubongna. (Juan 17:3; Apocalipsis 21:4) Isut’ gapuna a maikuna ti Biblia: “O Jehova dagiti buybuyot, naragsak ti tao nga agkammatalek kenka,” “naragsak ti tunggal maysa nga agbuteng ken Jehova, a magna kadagiti dalanna,” “naragsak dagiti naalumamay ti kaririknada, yantangay tawidendanto ti daga.” (Salmo 84:12; 128:1; Mateo 5:5) Gapuna, iti laksid dagiti agdama a narigat a kasasaad a pakaipasanguantayo, mabalintay ti maaddaan iti kalalainganna a kinaragsak. Uray no mapasamak kadatayo dagiti dakes a banag, saantay a maldaangan a kas dagidiay di makaammo ken ni Jehova ken awanan namnama iti biag nga agnanayon.—1 Tesalonica 4:13.
21. Kasano a ti panangipaayda iti bagbagida mangnayon iti kinaragsak dagiti adipen ni Jehova?
21 Naragsak met dagiti adipen ni Jehova agsipud ta us-usarenda ti panawen, pigsa, ken sanikuada a mangisuro kadagiti dadduma maipapan kadagiti kinapudno iti Biblia, nangruna dagiti tattao nga ‘agsasaibbek ken agsangsangit gapu kadagiti kinarimon’ a maar-aramid iti lubong ni Satanas. (Ezequiel 9:4) Kuna ti Biblia: “Naragsak ti siasinoman a mangisakit iti napanglaw; ispalento ni Jehova iti aldaw ti didigra. Salaknibanto ni Jehova a mismo ket italimengnanto a sibibiag. Maawaganto a naragsak ditoy rabaw ti daga.” (Salmo 41:1, 2) Kas kuna ni Jesus, “ad-adu ti kinaragsak iti panangted ngem iti panangawat.”—Aramid 20:35.
22. (a) Maipapan iti kinaragsak, paggidiatenyo dagiti adipen ti Dios ken dagidiay saan nga agserserbi kenkuana. (b) Ania ti naisangsangayan a rason a rumbeng nga agragsaktayo?
22 Isu a nupay saan nga inanamaen dagiti adipen ti Dios ti naan-anay a kinaragsak iti daytoy agdama a panawen, magun-odanda ti kinaragsak nga awan kadagidiay saan nga agserserbi iti Dios. Kuna ni Jehova: “Adtoy! Dagiti adipenko agpukkawdanto a sirarag-o gapu iti nasayaat a kasasaad ti puso, ngem dakayo agsangitkayto gapu iti saem ti puso ken agdung-awkayto gapu iti naan-anay a panagkapuy ti espiritu.” (Isaias 65:14) Maysa pay, addaan dagidiay agserserbi iti Dios iti naisangsangayan unay a rason nga agragsak ita—addaanda iti nasantuan nga espiritu nga “inted ti Dios kadagidiay agtultulnog kenkuana kas agturay.” (Aramid 5:32) Ken laglagipenyo, iti sadinoman a yan ti espiritu ti Dios, adda kinaragsak.—Galacia 5:22.
23. Aniat’ usigentayto iti sumaganad a panagadaltayo?
23 Iti organisasion dagiti adipen ti Dios ita, adda napateg a paset nga ak-akmen “dagiti lallakay,” dagiti panglakayen, a mangidadaulo kadagiti kongregasion, a mangnayon iti kinaragsak ti tattao ni Jehova. (Tito 1:5) Kasanot’ rumbeng a panangmatmat dagitoy [a lallaki] kadagiti pagrebbenganda ken iti relasionda kadagiti naespirituan a kakabsatda a lallaki ken babbai? Masalaysay daytoy iti sumaganad nga artikulo.
Kasanoyo a Sungbatan?
◻ Kasano a paneknekan ti sangaparsuaan ti kinaorganisado ni Jehova?
◻ Kasano nga inorganisar ni Jehova dagiti adipenna iti napalabas ken iti agdama?
◻ Ania a kinatimbeng ti kayat ni Jehova kadatayo?
◻ Kasano kapateg ti ayat iti kinaragsaktayo?
◻ Ania a kita ti kinaragsak ti mainanamatayo iti panawentayo?
[Picture Credit Line iti panid 10]
Ngato: Iti pammalubos ti ROE/Anglo-Australian Observatory, rinetrato ni David Malin