Ti Panagsagaba ti Tao​—Agpatingganto Aya?

DAGITI nakaap-aprang a buya kalpasan ti panagbettak ti maysa a bomba iti napusek a tiendaan ti Sarajevo; dagiti nadawel a panangpapatay ken kinaranggas idiay Rwanda; mabisbisin nga ubbing nga umas-asug a dumawdawat iti taraon idiay Somalia; mariribukan a pampamilia a mangpinpinsar iti pukawda kalpasan ti maysa a ginggined idiay Los Angeles; dagiti awan gawayna a biktima ti masansan a layus idiay Bangladesh. Inaldaw nga agparang iti TV wenno kadagiti magasin ken periodiko ti kakasta a buya ti panagsagaba ti tao.

Ti maysa a nakalkaldaang nga epekto ti panagsagaba ti tao isu ti pannakapukaw ti pammati ti dadduma a tao iti Dios. “Ti kaadda ti kinadakes ti kakaruan pay laeng a lapped iti pammati,” sigun iti maysa a waragawag nga impablaak ti maysa a grupo dagiti Judio idiay Estados Unidos. Tinukoy dagiti nagsurat dagiti pammapatay a napasamak kadagiti kampo a pagbaludan ti Nazi kas idiay Auschwitz ken gapu kadagiti bomba kas iti daydi bimtak idiay Hiroshima. “Ti saludsod no apay nga ipalubos ti maysa a nalinteg ken mannakabalin a Dios a maungaw ti biag dagiti adu nga awan basolna a tattao buriborenna ti konsiensia ti relihiuso a tao ken di matukod a panunoten,” kuna dagiti nagsurat.

Nakalkaldaang, ti awan inggana a panangipadamag kadagiti nakaal-alingget a pasamak mabalin a bibinegenna ti rikna ti tao. Agingga a di nairaman dagiti gagayyem ken kakabagianda, adu ti di unay maasian iti panagsagaba dagiti sabsabali.

Nupay kasta, ti kinapudno a makariknatay iti asi, uray kaskasano kadagiti patpatgentayo, adda ipampamatmatna maipapan iti Nangaramid kadatayo. Sigun iti Biblia, naparsua ti tao a “kaladladawan ti Dios” ken “kaasping[na].” (Genesis 1:26, 27) Di kayat a sawen daytoy a kaing-ingas dagiti tattao ti Dios. Saan, ta inlawlawag ni Jesu-Kristo a “ti Dios maysa nga Espiritu,” ket “ti maysa nga espiritu awanan lasag ken tultulang.” (Juan 4:24; Lucas 24:39) Ti panagbalin a kaasping ti Dios tuktukoyenna ti kabaelantayo a mangiparangarang kadagiti nadiosan a kababalin. Gapuna, tangay makarikna dagiti normal a tattao iti asi kadagidiay agsagsagaba, maikunatayo a ti Namarsua iti tao, ni Jehova a Dios, ket naasi ken maasian unay iti agsagsagaba a sangatauan.​—Idiligyo ti Lucas 11:13.

Ti maysa a pamay-an a panangipakita ti Dios iti asina ket babaen ti panangipaayna iti sangatauan iti naisurat a panangilawlawag iti makagapu iti panagsagaba. Inaramidna daytoy iti Saona, ti Biblia. Silalawag nga ipakita ti Biblia a pinarsua ti Dios ti tao tapno tagiragsakenna ti biag, saan a tapno agsagaba. (Genesis 2:7-9) Ipalgakna met a nagsagaba dagiti immuna a tao gapu iti panangilaksidda iti nalinteg a turay ti Dios.​—Deuteronomio 32:4, 5; Roma 5:12.

Iti laksid daytoy, maasian latta ti Dios iti agsagsagaba a sangatauan. Silalawag a naipakita daytoy iti karina a pagpatinggaennanto ti panagsagaba ti tao. “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:3, 4; kitaenyo met ti Isaias 25:8; 65:17-25; Roma 8:19-21.

Paneknekan dagitoy nakaskasdaaw a kari a maseknan unay ti Dios iti panagsagaba ti tao ken determinado a mamagpatingga iti dayta. Ngem ania aya nga agpayso ti makagapu iti panagsagaba ti tao, ken apay nga impalubos ti Dios nga agtultuloy dayta agingga iti kaaldawantayo?

[Picture Credit Line iti panid 2]

Cover and page 32: Alexandra Boulat/Sipa Press

[Picture Credit Line iti panid 3]

Kevin Frayer/Sipa Press