Dagiti Saksi ni Jehova iti Aglikmut ti Lubong​—Puerto Rico

ADDA iti nagbaetan ti Baybay Caribe ken Taaw Atlantico ti nabaknang, tropikal a puro ti Puerto Rico. Kinuna ni Christopher Columbus idi 1493 a teritoria daytoy ti España ket ninagananna iti San Juan Bautista a pakalaglagipan ken ni Juan a Mammautisar. Nabayag nga inawaganda ti kadakkelan a siudadna iti Puerto Rico, wenno “Nabaknang a Sabangan.” Kamaudiananna, nayaplikar daytoy a nagan iti intero a puro, bayat nga inawaganda ti siudad iti San Juan.

Napaneknekan a maysa a nabaknang a sabangan ti Puerto Rico iti adu a pamay-an. Adu a balitok ti naipatulod a naggapu ditoy kadagidi immuna a tawen a panagturay dagiti Español. Agipatpatulod itan ti puro kadagiti unas, kape, sabá, ken bungbunga ti citrus iti sabsabali a pagilian, nupay dakkel ti maitultulong dagiti industria a pagaramidan kadagiti produkto ken serbisio iti ekonomia itatta. Nupay kasta, napaneknekan a maysa a nabaknang a sabangan ti Puerto Rico iti maysa a napatpateg a pamay-an.

Nangrugi idi 1930’s a maikaskasaba ditoy ti naimbag a damag ti Pagarian ti Dios. Itatta, addan nasurok a 25,000 nga agibumbunannag iti naimbag a damag idiay Puerto Rico. Idi 1993, immadu ti staff iti daytoy a sanga ti Watch Tower Society manipud 23 agingga iti nasurok a 100. Kasapulan daytoy a yaadu tapno maaywanan ti sanga [nga opisina] ti pannakaipatarus ti literatura ti Biblia iti Español, iti kasta magun-odan ti agarup 350,000,000 nga Español-pagsasaona a tattao iti intero a lubong dagiti kasta a publikasion.

Baro a Tay-ak

Impadamag met ti sanga nga opisina: “Nalukatan ti baro a tay-ak idiay Puerto Rico gapu ta ikagkagumaanmi nga idanon ti mensahe ti Pagarian kadagiti tuleng. Insalaysay ti maysa a kabsat a babai ti sumaganad a kapadasan: ‘Mangaskasabaak kadagiti tuleng ket sinarungkarak ti maysa a babai nga addaan dua a babassit nga annak. Idi maammuanna a maysaak a Saksi, dagdagus a pinagkedkedannak gapu ta ni lakayna, a maysa met a tuleng, dina kayat dagiti Saksi ni Jehova.

“‘Sumagmamano a bulan kalpasanna, simmarungkar daytoy met la a babai iti maysa a gayyem a makipagad-adal iti Biblia kadagiti Saksi. Nakiraman ket tinagiragsakna unay dayta. Sinarungkarak manen ti babai, ket inulitna a di kayat ni lakayna dagiti Saksi. Nupay kasta, kayatna a matarusan ti Biblia ken nauman iti iglesia a nakaikamenganna gapu ta awan ti maisursuroda. Rinugianmi ti agadal, nga inusarmi ti tract. Maysa nga aldaw, imbagana kaniak nga agsubliak iti Sabado gapu ta addanto sadiay ni lakayna. “Ngem dinakam kayat, saan aya?” insaludsodko. Insungbatna: “Kayatna a maammuan no ania a talaga ti isursuro dagiti Saksi ni Jehova.”

“‘Kabigatanna immayda a dua iti pagtaengak! Tangay adut’ saludsod ni lakayna, inawisko ida kadagiti gimongtayo a para kadagiti tuleng. Immun-una pay a simmangpet ngem siak ket pulos a di limmanglangan iti gimong manipud idin. Kaskasabaanna dagiti padana a tuleng, timmabunon iti asamblea, ket magagaran a mangpaspasungad iti pannakabautisarna.’”

Kinuna pay ti report ti sanga: “Iti distrito a kombensionmi iti daytoy a tawen, naiparang ti intero a programa iti sign language. Nakaad-adu a tuleng ti timmabuno a kaduada dagiti pamiliada. Dimteng ti makagutugot a kanito kabayatan ti maudi a palawag idi dinakamat ti nagpalawag ti maipapan iti trabaho a maar-aramid kadagiti tuleng ket kinunana nga ag-70 ti timmabuno. Adda napigsa a panagpalakpak, ngem, kas kinuna ti nagpalawag, saan a mangngeg dagiti tuleng dayta. Isu nga idi makiddaw kadagiti tuleng a kumitada kadagiti timmabuno, inulit ti nagpalawag ti saludsod a, ‘Maragsakankayo aya iti kaadda ita dagiti kakabsatyo a tuleng?’ ket nakiddaw kadagiti timmabuno a yebkasda ti panangabrasada​—babaen ti panangipayapay iti dua nga ima. Makaparagsak a buya ti pannakaimatang kadagiti 11,000 a kakabsat a lallaki ken babbai nga agpalpalakpak babaen ti panangipayapayda kadagiti imada. Napalalo ti rag-o dagiti kakabsattayo a tuleng ket nariknada a paset ida ti naindaklan a panagkakabsat. Adut’ nakalua gapu iti rag-o.”

Bayat a makiramraman dagiti Saksi ni Jehova iti trabaho a panagani idiay Puerto Rico, awan duadua nga agtultuloy dayta nga agbalin a maysa a nabaknang a sabangan. Agtultuloy ti iseserrek dagiti “karnero” ti Dios, nga aw-awaganna iti “dagiti makaay-ayo a banag dagiti amin a nasion,” tapno mapusek ti balay ni Jehova iti kinadayag.​—Juan 10:16; Haggeo 2:7.

[Kahon iti panid 9]

KASASAAD TI PAGILIAN

1994 Tawen Serbisio

KANGATUAN A BILANG TI MANGASKASABA: 25,428

RATIO: 1 a Saksi iti 139

TIMMABUNO ITI MEMORIAL: 60,252

PROMEDIO A BILANG DAGITI AGIBUMBUNANNAG A PAYUNIR: 2,329

PROMEDIO A BILANG DAGITI PANAGADAL ITI BIBLIA: 19,012

BILANG TI NABAUTISARAN: 919

BILANG DAGITI KONGREGASION: 312

SANGA NGA OPISINA: GUAYNABO