Umakarda Idiay Puerto Rico
IDI Mayo 9, 1993, ti Translation Department nga Español, a buklen ti 20 a miembro, immakarda manipud sangalubongan a hedkuarter dagiti Saksi ni Jehova idiay Brooklyn, Nueva York, a napan idiay baro a sanga nga opisina ti Watch Tower Society idiay Guaynabo, Puerto Rico. Apay nga immakarda? Ilawlawag ti maysa a mapagtalkan a miembro dagiti mannurat idiay hedkuarter dagiti Saksi ni Jehova: “Nasarakanmi a nasaysayaat ti panagtrabaho dagiti managipatarus no agnaedda iti lugar a sadiay inaldaw a sasawenda ti pagsasao nga ipatpatarusda. Kasta met, gagangay a makiaddangda iti aniaman a baro a panagbalbaliw dayta a pagsasao. Napili ti Puerto Rico kas kumbiniente a sentro ti Español-pagsasaona a lubong.”
Ti Translation Department nga Español addan idiay Brooklyn, Nueva York, nanipud pay idi 1928 ket naaddaanen iti napateg a paset iti panangisaknap ti mensahe ti Pagarian babaen ti itutulongna a mangaramid kadagiti literatura ti Biblia a magun-odan dagiti agarup 350,000,000 nga Español-pagsasaona a tattao iti sangalubongan. Damo a naipatarus Ti Pagwanawanan iti Español idi 1917. Itatta, nasurok a 3,000,000 a kopia Ti Pagwanawanan ken nasurok a 2,000,000 a kopia ti Agriingkayo! ti maiyim-imprenta iti Español iti binulan. Iti kallabes a tawen ti sanga ti Watch Tower Society idiay España nakaipaayen iti napateg a tulong itoy a trabaho, nangruna iti panangipatarus ti magasin nga Agriingkayo! Adda nasurok a 1,100,000 nga Español-pagsasaona a Saksi ni Jehova iti sangalubongan, agarup 25 porsiento iti dagup a bilang dagiti Saksi iti intero a lubong. Daytoy a bilang iramanna dagiti pinullo a ribo nga immakar nga agserbi kadagiti saan nga Español-pagsasaona a dagdaga, kas iti Australia, Alemania, Sweden, ken ti Estados Unidos.
Ti iyaakarda iti nalawlawa ken barbaro a pasilidad idiay Puerto Rico adda pay sabali a pagsayaatanna. Ipalubosna ti panagkaykaysa dagiti managipatarus ken dagiti proofreader manipud kadagiti nadumaduma a pagilian, kas iti Colombia, España, Mexico, Puerto Rico, ken Venezuela, iti maymaysa a sentro a lugar tapno ti internasional a kasasaad dagiti Español a publikasion ti Sosiedad ket ad-adda pay a maparang-ay. Daytoy ti makatulongto a mangidanon iti mensahe ti Pagarian iti nalawlawag ken ad-adda nga umiso a pamay-an kadagiti Español-pagsasaona a tattao iti sangalubongan. Inanamaenmi ti bendision ni Jehova itoy baro nga addang.