Adda Kadi Pinaregtayo Itay Nabiit?

AGTAWEN laeng ni Elena iti 17 idi naduktalan dagiti doktor nga isut’ addaan kanser iti obario. Kasapulan ti inana, ni Mari, a sarangten ti saem ti pannakakita ken ni Elena nga agtirtiritir iti ut-ot.

Kamaudiananna, nayakar ni Elena iti maysa nga ospital idiay Madrid, España, nga ag-1,900 a kilometro ti kaadayona manipud iti pagtaenganna idiay Canary Islands. Maysa a grupo dagiti doktor idiay Madrid ti sidadaan a mangopera a di agusar iti dara. (Aramid 15:28, 29) Ngem di nagbayag kalpasan a narugian ti operasion, nabatad nga ipatay ni Elena ti kasasaadna. Nagramaramen ti kanser iti intero a bagina, ket awanen ti maaramidan dagiti siruhano. Natay ni Elena walo nga aldaw kalpasan a dimteng idiay Madrid.

Saan nga agmaymaysa ni Mari a nangsango iti dayta nakaro a suot. Iti bukodda a gastos, dua a Kristiano a panglakayen ti nangkuyog kenkuana ken iti inauna nga anakna a lalaki a napan idiay Madrid ken nagtalinaed sadiay agingga a natay ni Elena. “Tinulongandak a nangsaranget ti pannakariknak iti nakaro a kinakawaw,” inlawlawag ni Mari. “Pulos a diakto malipatan ti pammaregtada kaniak. Saan a magatadan ti naespirituan a suporta ken praktikal a tulongda. Pudno a maysada a ‘paglemmengan no agangin.’”​—Isaias 32:1, 2.

Maragsakan ni Jehova ta sidudungngo nga ay-aywanan dagitoy naayat a papastor dagiti karnerona. (Proverbio 19:17; 1 Pedro 5:2-4) Nupay kasta, saan laeng a dagiti panglakayen ti addaan pribilehio a mangparegta. Agtataripnong amin dagiti Kristiano tapno gumun-od ti naespirituan a sursuro ken tapno ‘agpipinnaregta iti maysa ken maysa.’ (Hebreo 10:24, 25) Maysa a napateg a paset iti Nakristianuan a panagkakadua ti pammaregta.

Aniat’ Ramanen ti Pammaregta?

No kasano a malaylay ti maysa a napintas a sabong no saan a masibugan, kasta met dagiti tao​—agpadpada iti pamilia ken iti kongregasion​—kumapuyda no awan ti pammaregta. Iti sabali a bangir, ti naintiempuan a pammaregta pabilgenna dagidiay maipasango iti suot, patibkerenna ti nakem dagiti malmalday, ken papigsaenna dagidiay simamatalek nga agserserbi iti Dios.

Ti Griego a sao a naipatarus a “pammaregta” ramanenna ti kapanunotan a mangandingay, mangbalakad, ken mangliwliwa. No kasta, saan a limitado ti pammaregta iti panangibaga iti maysa a nasayaat ti ar-aramidenna. Mabalin nga iramanna met dayta ti panangipaay ti praktikal a pannaranay ken naespirituan a tulong.

Kinapudnona, ti Griego a sao a naipatarus a “pammaregta” literal a kaipapananna ti “panangawis iti maysa nga umabay.” Ti pannakikadua kadagiti naespirituan a kakabsattayo tumulong kadatayo a mangipaay nga insigida iti suporta no mabannog wenno maitibkol ti maysa kadakuada. (Eclesiastes 4:9, 10) Makapainteres, ti ili ni Jehova ‘agserserbida kenkuana a situtunos.’ (Sofonias 3:9) Ken inawagan ni apostol Pablo ti maysa a Kristiano iti “pudpudno a kasinnangol.” (Filipos 4:3) Ti panagtrabaho a sangsangkamaysa iti sidong ti maymaysa a sangol babaen ti panagserbi a situtunos palag-anenna ti awit, nangnangruna kadagidiay saan a napigsa iti naespirituan.​—Idiligyo ti Mateo 11:29.

Nangparegtada

Yantangay nagpateg ti pammaregta, usigentayo ti sumagmamano a Nainkasuratan a pagarigan daytoy. Idi dandanin agngudo ti biag ti mammadto ti Dios a ni Moises, tinudingan ni Jehova ni Josue nga agbalin a lider dagiti Israelita. Saan a maysa a nalaka a trabaho daytoy, kas pagaammo unay ni Moises. (Numeros 11:14, 15) Gapuna, imbaga ni Jehova ken Moises a “bilinen[na] ni Josue ken paregtaen ken papigsaenna.”​—Deuteronomio 3:28.

Idi panawen dagiti ukom ti Israel, situtulok a nagtulnog ti balasang ni Jefte iti kari ni amana babaen ti dina panagpamilia tapno makapagserbi iti santuario ni Jehova. Nayaleng-aleng kadi ti panagsakripisiona? Saan, ta kunaen ti Oc-ocom 11:40: “Dagiti annak a babbai ti Israel mapanda iti tinawentawen a manglaglagip idi anak ni Jefte a Galaadita, uppat nga aldaw iti makatawen.” Makaparegta la ketdi ti kakasta nga isasarungkar iti managsakripisio a balasang ni Jefte.

No dadduma kasapulan ti tured no mangparegta. Bayat ti immuna a panagdaliasat ni apostol Pablo kas misionero, naipasango iti naulpit nga ibubusor kadagiti adu a siudad ti Asia Menor. Isut’ napapanaw idiay Antioquia, gistay napapatay idiay Iconio, ken naub-ubor ken nabaybay-an a dandanin matay idiay Listra. Ngem, di nagbayag kalpasanna, nagsubli ni Pablo ken dagiti kakaduana kadagitoy a siudad, a “pinabpabilegda dagiti kararua dagiti adalan, a pinarparegtada ida nga agtalinaed iti pammati ket kunkunada: ‘Masapul a sumrektayo iti pagarian ti Dios babaen kadagiti adu a rigat.’” (Aramid 14:21, 22) Nakasagana ni Pablo a mangirisgo iti biagna tapno maparegta dagitoy kabbaro nga ad-adalan.

Nupay kasta, saan laeng a dagiti kabbaro nga ad-adalan dagiti Kristiano nga agkasapulan iti pammaregta. Kalpasan ti sumagmamano a tawen, napasaran ni Pablo ti narikut a panagdaliasat nga agturong idiay Roma, tapno sumaklang iti pangukoman. Bayat nga umas-asideg iti papananna, mabalin a nakariknat’ pannakaupay. Ngem napabileg idi makagteng iti maysa a lugar a 74 kilometro ti kaadayona iti abagatan a daya ti Roma. Apay? Gapu ta dimteng dagiti kakabsat manipud idiay Roma a mangsabat kenkuana iti Plasa ti Appio ken Tallo a Taberna. “Idi a makitana ida, nagyaman ni Pablo iti Dios ket bimmileg.” (Aramid 28:15) Kadagiti umasping a gundaway, uray ti kaaddatay laeng mabalin a makaparegta unay kadagiti kapammatiantayo.

Aprobetsaren Dagiti Gundaway a Mangparegta

Pudno nga adu dagiti gundaway tapno mangparegta. Natignay kadi ti pusoyo iti maysa a nasayaat a paset nga imparang ti maysa a kabsat iti Teokratiko nga Eskuelaan ti Panagministro? Maragsakankay kadi ta adda dagiti natibker iti naespirituan nga agtutubo iti kongregasion? Naawiskay kadi iti panagibtur dagiti lallakay ken babbaketen? Nagustuanyo kadi ti pamay-an a panangaramat ti maysa kadagiti payunir iti Biblia iti ministerio a panagbalaybalay? No kasta padayawanyo ida, ken mangyebkaskayo iti banag a makaparegta.

Nagpateg ti paset ti pammaregta iti pamilia kasta met iti kongregasion. Makatulong daytoy kadagiti nagannak a mangpadakkel kadagiti annakda “iti disiplina ken panangiturong-panunot ni Jehova.” (Efeso 6:4) Makaparegta unay ti panangibaga iti maysa nga anak a nasayaat ti naaramidanna, ken ti panangilawlawag [kenkuana] no apay! Kadagiti tawen ti kinatin-edyer, no maipasango dagiti agtutubo iti adu a pakasuotan ken pannakapilit, napateg ti kankanayon a pammaregta.

Makapadakes ti kinaawan pammaregta bayat ti kinaubing. Itatta ni Michael, maysa a Kristiano a panglakayen, ket mannakigayyem, ngem kastoy ti kunana: “Pulos a di man la imbaga ni tatang nga adda nasayaat a naaramidak. Isu a dimmakkelak nga awanan panagraem iti bagi. . . . Nupay agtawenakon iti 50, apresiarek pay laeng ti panangipatalged dagiti gagayyemko a nasayaat ti panangannongko iti akemko kas panglakayen. . . . Nasursurok manipud iti mismo a kapadasak no kasanot’ kinapateg ti panangparegta kadagiti dadduma, ket ikagkagumaak nga aramiden dayta.”

Siasino ti Agkasapulan iti Pammaregta?

Maiparbeng a paregtaen dagiti nagaget a Kristiano a papanglakayen. Insurat ni Pablo: “Kiddawenmi kadakayo, kakabsat, a maaddaankayo iti panagraem kadagidiay agtartrabaho a sipipinget iti tengngayo ken mangidadaulo kadakayo iti Apo ken mangbagbaga kadakayo; ket ipaayanyo ida iti panangipateg iti ayat nga ad-adda pay a nalablabes ngem iti gagangay gapu iti aramidda.” (1 Tesalonica 5:12, 13) Nakalaklaka a tagibassiten ti panagbannog dagiti panglakayen. Ngem ti panangyebkas iti napasnek a panangapresiar ken pammaregta kasla palag-anenna ti awitda.

Agkasapulan met ti pammaregta dagidiay adda iti tengngatayo nga agib-ibtur kadagiti narigat a kasasaad. “Agsaokayo iti makaliwliwa kadagiti malmaldaangan a kararua, saranayenyo dagiti nakapuy,” imbalakad ti Biblia. (1 Tesalonica 5:14) Dagiti agsolsolo a nagannak, balo, agtutubo, nataengan, ken dagiti masakit ket karaman kadagidiay mabalin nga agledleddaang wenno kumapuy iti naespirituan no dadduma.

Ni María ket maysa a Kristiano a babai a bigla a pinanawan ni lakayna. Kinunana: “Kas ken Job, adda dagiti kanito a kayatkon ti matay. [Job 14:13] Ngem saanak a simmuko, gapu iti pammaregta nga inawatko. Dua a papanglakayen, nga am-ammok unay, ti nangbusbos iti adu nga oras a timmulong kaniak a makakita iti kinapateg ti panagtultuloy iti amin-tiempo a panagserbi. Ken dua a mannakaawat a kakabsat a babbai ti nangliwliwa met kaniak, a siaanus a dimngeg bayat nga impeksak ti adda iti kaunggak. Babaen ti panangaramatda iti Biblia, tinulongandak a mangmatmat kadagiti bambanag manipud iti panangmatmat ni Jehova. Diak ammo no namin-ano a daras a binasami ti Salmo 55:22, ngem ammok a gapu iti panangipakatko iti daytoy a kasuratan, in-inut a napasublik ti espiritual ken emosional a kinatimbengko. Napasamak amin dagitoy 12 a tawenen ti napalabas, ket maragsakanak a mangibaga a nakapagtultuloyak iti amin-tiempo a panagserbi agingga ita. Makagunggona ken naragsak ti panagbiagko iti laksid ti sagpaminsan a pannakarikna iti saem. Kapkapnekak a ti pammaregta iti panawen a kas iti dayta dakkel ti maaramidanna iti biag ti maysa a tao.”

Kasapulan dagiti dadduma ti pammaregta gapu ta nakaaramidda kadagiti biddut ket ita ikarkarigatanda nga ilinteg dagitoy. Nalabit nga immawatda iti naayat a pannubngar. (Proverbio 27:6) Rumbeng a naalibtak dagiti panglakayen a nangipaay ti pannubngar a mangpadayaw no makitada a maipakpakat dagiti Nainkasuratan a balakad. Adda dua a pagimbagan nga itden ti pammaregtada​—patalgedanna ti ayatda iti nakabasol tapno saan nga “agleddaang unay” ken mangipalagip kenkuana kadagiti pagimbagan ti panangyaplikar iti balakad.​—2 Corinto 2:7, 8.

Maysa a panglakayen ti nakaaramid iti nakaro a biddut ket napukawna ti pribilehiona kas manangaywan iti kongregasion. “Idi maipakaammo ti pannakaikkatko kas maysa a panglakayen, napanunotko nga amangan no alusiisen dagiti kakabsat no kumaduaak kadakuada,” kunana. “Nupay kasta, pinagtalinaed dagiti panglakayen a kompidensial ti makagapu ket nangaramidda ti naisangsangayan a panangikagumaan a mangparegta kaniak. Nangipakita met dagiti dadduma pay a kameng ti kongregasion iti ayat ket saandak a liniklikan, a pudno a nakatulong iti naespirituan a panagimbagko.”

Makaparegtakay Koma

Iti okupado a panagbiagtayo, nalaka a maliwayan ti pammaregta. Ngem anian a makagunggona ti maaramidan daytoy! Tapno makaipaay iti epektibo a pammaregta, dua a banag ti kasapulan a panunotenyo. Umuna, panunotenyo no ania ti sawenyo, tapno agbalin nga espesipiko ti pammaregtayo. Maikadua, mangsapulkayo iti gundaway nga umasideg iti maysa a tao a maikari iti pammadayaw wenno agkasapulan iti pammabileg.

No naynay nga aramidenyo daytoy, naragragsakkayto. Wen, ta impanamnama kadatayo ni Jesus: “Ad-adu ti kinaragsak iti panangted ngem iti panangawat.” (Aramid 20:35) Babaen ti panangparegtayo kadagiti dadduma, maparegtayo met ti bagiyo. Apay a diyo aramiden kas kalat ti mangparegta iti maysa a tao iti tunggal aldaw?

No kasano a malaylay ti maysa a napintas a sabong no saan a masibugan, mabalin a kumapuy met dagiti ipatpategtayo no awan ti pammaregta