Report Dagiti Manangiwaragawag ti Pagarian

Maikaskasabanto ti Naimbag a Damag ti Pagarian

ITI sinigsiglon, ti kangrunaan a kabusor ti Dios, ni Satanas a Diablo, sisisikap nga ar-aramatenna dagiti napolitikaan a gobierno ken ulbod a relihion iti panangikagumaanna a mangpasardeng iti pannakaisaknap ti pudno a Kinakristiano. Ngem mapaayto dagitoy a pamay-an. Impadto ni Jesus a ti “naimbag a damag ti pagarian maikaskasabanto [saan a, “nalabit maikaskasaba” wenno, “mabalin a maikaskasaba”] iti isuamin a mapagnaedan a daga a maipaay a pangsaksi kadagiti isuamin a nasnasion.”​—Mateo 24:14.

Nabatad ti pannakapaay ni Satanas idiay Grecia. Iti dayta a pagilian, pinadpadas ti Greek Orthodox Church a paritan dagiti Saksi ni Jehova a mangikasaba iti naimbag a damag ti Pagarian. Ngem, kas naitampok iti sumaganad a kapadasan, inton agangay, makadanon met laeng dagiti kinapudno ti Biblia kadagiti nasingpet panagpuspusona a tattao iti laksid ti ibubusor.

Agarup 30 a tawenen ti napalabas, inawat ti maysa a padi iti Greek Orthodox ti naimbag a damag ken inyebkasna pay ti tarigagayna nga agbalin a maysa kadagiti Saksi ni Jehova. Nupay kasta, siiinget a binusor dagiti kabagianna daytoy nga addang ket isut’ pinilitda a gupdenna ti pannakitimpuyog kadagiti Saksi. Tapno maay-ayona ti pamiliana, intultuloyna ti nagpadi; ngem kankanayon a binigbigna nga isut’ tinulongan dagiti Saksi ni Jehova a mangammo iti kinapudno ken insukona dayta gapu laeng iti maysa a natan-ok a saad iti ulbod a relihion.

Nupay kasta, madakamatna no dadduma ti naimbag a pakasarsaritaan dagiti Saksi ni Jehova no tumaud ti gundaway. Iti sumagmamano a gundaway, binalakadanna pay dagiti tattao a no kayatda ti makaadal kadagiti kinapudno ti Biblia, rumbeng a makipagadalda kadagiti Saksi. Iti panaglabas dagiti tawen, aktual a sinurot dagiti dadduma ti balakadna.

Itay laeng nabiit, nagsakit ti padi iti nakaro unay ket nautobna a mabalin a saanen nga agpaut ti biagna. Bayat ti kaaddana idiay ospital, inayabanna dagiti annakna, ket natipontiponda amin iti abay ti katrena.a Kalpasanna, inlawlawagna kadakuada a no matay, mabalin a makitadanto manen. Dinakamatna kadakuada ti maipapan iti sursuro ti Biblia a pagungarento ni Jehova [dagiti natay] tapno agbiagda iti maysa a paraiso a daga, ngem no pudno a kayatda a makita ti pannakapasamakto dayta, kasapulan nga adalenda ti kinapudno manipud iti Biblia ken suminada iti ulbod a relihion. Impakpakaasina kadakuada a makitimpuyogda kadagiti Saksi ni Jehova ken paisuroda kadakuada no kasanot’ agbalin a pudno a Kristiano.

Di nagbayag kalpasan dayta, pimmusay ti padi. Nupay kasta, nasayaat ti bunga ti pammakada a balakadna kadagiti annakna. Ti balasangna, a kas iti kaaduan kadagiti kabagianna, ket nakaro unay ti panangbusorna kadagiti Saksi ni Jehova ken iti trabahoda. Ngem saanna a maiwaksi ti napasnek a kiddaw ti dandani idin matay nga amana, isu a di nagbayag, nakipagkita kadagiti Saksi ni Jehova ket rinugianna ti nagadal iti Biblia. Itay laeng nabiit, nagbalinen a Saksi, nga indedikarna ti biagna ken Jehova a Dios ken insimbolona ti dedikasionna babaen ti bautismo iti danum.

Idiay Grecia ken iti nasurok a 230 a sabsabali pay a pagilian, agpannuray dagiti Saksi ni Jehova iti bileg ti nasantuan nga espiritu ti Dios. Gapu iti naan-anay a pannaranay ti nasantuan nga espiritu, makiramramanda iti kaitungpalan ti padto ni Jesus: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.”​—Aramid 1:8.

[Footnote]