Report Dagiti Manangiwaragawag ti Pagarian
Ipakaammo Dagiti Agtutubo ti Naimbag a Damag Idiay Africa
DI NAGBAYAG kalpasan ti pannakapagungar ni Jesus, bisbisitaen idi ti maysa a lalaki a taga-Africa ti Jerusalem. Saan a dinakamat ti Biblia ti naganna. Isut’ naammuan laeng kas “lalaki nga adda iti pannakabalin iti sidong ni Candace a reina dagiti Etiope, ken isu ti agaywan kadagiti isuamin a gamengna.” Apay a nadakamat iti Biblia? Agsipud ta inturong ti maysa nga anghel ti Kristiano nga ebanghelisador a ni Felipe a mangipakaammo kenkuana iti “naimbag a damag maipapan ken Jesus.” Daytoy lalaki nga Etiope ti immuna a taga-Africa a nairekord a nagbalin a kameng ti kongregasion Kristiano.—Aramid 8:26-39.
Itatta, adda ginasgasut a ribu dagiti Saksi ni Jehova idiay Africa. Aramatenda ti tunggal gundaway a mangiburay kadagiti sabsabali ti naimbag a damag maipapan ken Jesus. Ipakita dagiti sumaganad a kapadasan nga uray dagiti agtutubo idiay Africa addaanda iti paset iti panangikasaba iti naimbag a damag.
◻ Agkaarruba da Sandy ken Priya, dua a 11-tawenda a babbalasitang idiay Nairobi, Kenya. Tinagiragsakda ti panagay-ayamda a dua ken panagsinsinnukatda kadagiti libro a naglaon kadagiti estoria. Rinugian dagiti nagannak ni Priya ti makipagadal iti Biblia kadagiti Saksi ni Jehova. Ita, addaanen ni Priya kadagiti napili a baro a libro nga inayonna iti koleksionna, a pakairamanan ti maysa a nangnangruna a nagbalin a paboritona, ti Panagimdeng iti Naindaklan a Mannursuro, nga impablaak ti Watchtower Bible and Tract Society. Inranudna ti librona a Naindaklan a Mannursuro iti gayyemna a ni Sandy, ket rinugian dagiti dua a babbalasitang nga adalen daytoy a regular.
Nupay kasta, tumabtabuno ti nanang ni Sandy, ni Una, iti Anglican Church ket saanna a kayat nga agbasa ti balasangna kadagiti libro manipud kadagiti Saksi ni Jehova. Iti laksid ti ibubusor ti ina, nagtultuloy ti panagadal. Maysa nga aldaw, nagpakpakaasi ni Sandy ken ni nanangna nga umimdeng iti panagsasaritada uray maminsan laeng. Ti kapitulo a binasa dagiti babbalasitang iti dayta nga aldaw ket napauluan iti “Dua a Lallaki a Nangselebrar ti Pannakaiyanakda.” Nagimdeng ni Una ket nasdaaw unay. Dagus nga immasideg iti nanang ni Priya nga addaan iti adu a saludsod iti Biblia.
Nangyurnos ti ina ni Priya iti maysa a Saksi a mangyadal iti Biblia ken ni Una. Di nagbayag, inranuden a mismo ni Una ti maad-adalna iti katrabahuanna a ni Dolly. Kabayatanna, nagtultuloy ti irarang-ay ni 11-tawenna a Priya ket inkeddengnan nga isimbolo ti dedikasionna ken Jehova a Dios babaen ti bautismo iti danum iti maysa a kombension distrito dagiti Saksi ni Jehova. Iti dayta met laeng a kombension, ad-adda a naragsakan ni Priya idi nabautisaran met da Una ken Dolly!
◻ Adda sumagmamano a pagilian idiay Africa a saan a nairehistro ti trabaho dagiti Saksi ni Jehova. Iti maysa kadagita a daga, adda sapasap a pannakapanuynoy dagiti narelihiusuan nga aramid ken pammati dagiti Saksi. Iti maysa nga eskuelaan iti dayta a daga, napalubosan ti maysa a pito-ti-tawenna a barito ken ti innem-ti-tawenna nga adingna a lalaki—annak dagiti Saksi—a saan a tumabuno iti klase kabayatan dagiti narelihiusuan a kararag.
Maysa nga aldaw, impapilit ti maysa a kabbaro a mannursuro a makipagkararagda a kadua ti dadduma nga ubbing. Nagkedked ti inauna a barito ket binaut ti mannursuro. Impapilit ti inaudi a kabsatna, ni innem-tawenna a Shadrack, ti mapan iti opisina ti prinsipal. Pinagsaludsodan ti prinsipal ken ti kabbaro a mannursuro no apay a dina kayat ti makikadua kadagiti dadduma. Sinaludsodda kenkuana no isut’ mabuteng a bauten dagiti nagannakna. Simmungbat iti nakasaysayaat nga Arabe [a pagsasao]: “Saan, ti Dios a pagdaydayawak ket saan a Dios ti riribuk no di ket ti urnos. Saanak a makapagbalin a maysa a Saksi ni Jehova iti pagtaengan ket sabali a relihion iti eskuelaan!” Kas banagna, pinalubosanda a saanen a tumabuno.
Kalpasan a nabautisaran, ti lalaki nga Etiope a nadakamat iti libro dagiti Aramid, “sirarag-o a napan a nagtultuloy iti dalanna.” (Aramid 8:39) Kasta met itatta, agragrag-o dagiti manangiwaragawag ti Pagarian iti nalawa a kontinente ti Africa iti pribilehioda a ‘mangideklara iti naimbag a damag maipapan ken Jesus.’—Aramid 8:35.