Dagiti Saksi ni Jehova iti Aglikmut ti Lubong—Sweden
TI Sweden ket adda iti makindaya a paset iti peninsula ti Scandinavia ken iti ngatuen ti Arctic Circle. Agdindinamag iti sangalubongan gapu ta nabungon daytoy kadagiti naraber a kabakiran ti evergreen, kasta met ti dan-aw ken bambantay. Ti Sweden ket maysa kadagiti pagilian ti Europa a kararasayan ti agnanaed. Nupay kasta, sibaballigi dagiti Saksi ni Jehova a nangbirok kadagiti managayat iti kinapudno sadiay sipud pay idi naladaw a paset ti 1800’s. Usigenyo ti nabiit pay a pagarigan.
Nakipagadal iti Biblia ti maysa a babai kadagiti Saksi, ngem saan a kinayat daytoy ni lakayna. Imbagana ken ni baketna nga isardengnan ti makipagadal, ket inaramidna daytoy. Agtartrabaho daytoy a lalaki iti maysa a bodega dagiti produkto a mainum. Maysa nga aldaw, dimteng iti bodega ti maysa a tsoper ti trak a kaduana ti sangapulot’-tawenna nga apokona. Kiniddaw ti lakay a bantayanna ti barito bayat nga agikarga daytoy iti trakna. Tapno laeng mairugina ti saritaan, dinamag ti lalaki iti barito no aniat’ inawatna a sagut iti kallabes a kasangayna. Iti pannakakellaat ti lalaki, imbaga kenkuana ti barito nga isu ken ti pamiliana saanda a ramrambakan dagiti panagkasangay agsipud ta isuda ket Saksi ni Jehova. Imbaga pay kenkuana ti barito a nakagun-od iti sagsagut kadagiti sabali a tiempo iti tawen ken awan a pulos ti nakaikapisanna, yantangay addaan iti nadekket unay ken managayat a pamilia. Kinunana pay nga awan sagsagut a makaartap iti dayta.
Namin-adu a nagsubli ti barito a kaduana ni apongna. Tunggal mapan, kanayon nga adut’ saludsod ti lalaki iti barito, ket nasdaaw unay iti panangipaay ti barito kadagiti napudno, prangka a sungbat nga awan aniaman a panagalikaka. Natignay met gapu iti panangapresiar ti barito kadagiti pudpudno a nasayaat a kababalin. Maysa a rabii, kalpasan ti panagbuya ti lalaki iti programa ti telebision a nangipakita kadagiti nakaay-ay-ay a kasasaad ti lubong, nautobna a kasapulan ti napaspasnek pay a panangsukimatna kadagiti naespirituan a bambanag. Inawaganna [iti telepono] ti Saksi a nangyadal ken ni baketna ket kiniddawna nga agsubli. Di nagbayag, nakipagadal ti lalaki iti maysa a Saksi ket napartak ti irarang-ayna. Isut’ nabautisaran idi Abril 10, 1994. Nabautisaran metten ni baketna.
Ti Panagrang-ay Kalikagumannat’ Patakder
Ti Sweden ket pagtaengan ti adu a nagkamang manipud sabali a dagdaga, ket naballigi unay dagiti Sueko a Saksi iti panangasaba kadakuada. Iti pangkaaduan, kastat’ kaballigi ti trabaho ta kasapulanen dagiti baro a Kingdom Hall a maipaay iti irarang-ay. Manipud idi 1986 agingga idi 1993, 37 a Kingdom Hall ti naibangon babaen ti quick built a pamay-an iti panagibangon, bayat a 8 a patakder ti napalawa ken natarimaan. Idi laeng 1994, naibangon ti pito a kanayonan pay a Kingdom Hall, ken tallo dagiti natarimaan.
Iti agdama, adda 65 a kongregasion nga agur-uray iti tulong a mangbangon iti baro a Kingdom Hall wenno mangpalawa wenno mangtarimaan iti agdama [a Hall-da]. Agarup 2,500 a boluntario ti timmulong kadagiti kasta a proyekto ti panagibangon, ket inapresiar unay dagiti kongregasion ti naayat a tulongda.
Ti makin-amianan a paset ti Sweden, nga adda iti ngatuen ti Arctic Circle, ket maawagan no dadduma a daga a yan ti init iti katengngaan ti rabii. Kasta nga agpayso agsipud ta kabayatan ti kalgaw, adda panawen a saan a pulos a lumnek ti init sadiay. Nupay kasta, iti intero a Sweden, agtultuloy met nga agraniag a silalawag ti lawag ti kinapudno. Babaen ti pamendision ni Jehova, saanto a pulos nga agkudrep dayta a naespirituan a lawag no di ket agtultuloyto a rumaniag a rumaniag.
[Kahon iti panid 8]
KASASAAD TI PAGILIAN
1994 Tawen Serbisio
KANGATUAN A BILANG TI MANGASKASABA: 24,246
RATIO: 1 A SAKSI ITI 362
TIMMABUNO ITI MEMORIAL: 40,372
PROMEDIO DAGITI AGIBUMBUNANNAG A PAYUNIR: 2,509
PROMEDIO DAGITI PANAGADAL ITI BIBLIA: 11,306
BILANG TI NABAUTISARAN: 850
BILANG DAGITI KONGREGASION: 358
SANGA NGA OPISINA: ARBOGA
[Ladawan iti panid 9]
Ti sanga nga opisina ken Pagtaengan a Bethel idiay Arboga
[Ladawan iti panid 9]
Dagiti immuna a Saksi idiay Hjo inaramatda daytoy a minibus a mangwanas iti teritoria nga agarup 5,000 a kilometro kuadrado