Nagbalbaliwen ti Tiempo

ANIA ketdin a nagragsak koma ti agbiag iti nagkauna nga Israel iti sidong ti nadayag a panagturay ni matalek nga Ari Solomon! Tiempo idi ti kinatalna, kinarang-ay, ken kinaragsak. Kabayatan ti sisusungdo a panangsuporta ni Solomon iti pudno a panagdaydayaw, siwawadwad a binendisionan ni Jehova ti nasion. Inted ti Dios ken ni Ari Solomon saan laeng a ti dakkel a kinabaknang no di pay ket ti “maysa a masirib ken mannakaawat a puso” tapno makapagturay ni Solomon iti kinalinteg ken ayat. (1 Ar-ari 3:12) Kuna ti Biblia: “Amin dagiti ar-ari iti daga tarigagayanda a makita ni Solomon tapno mangngegda ti kinasiribna, nga inkabil ti pudno a Dios iti pusona.”​—2 Cronicas 9:23.

Impaay ni Jehova ti kinatalged, kinatalna, ken nawadwad a naimbag a bambanag kadagiti tattao. Kuna ti Sao ti Dios: “Ti Juda ken ti Israel aduda, kas kadagiti darat nga adda iti igid ti baybay iti kinaruay, a mangmanganda ken agiinumda ken agragragsakda.” Agpadpada iti literal ken iti piguratibo [a pamay-an], dagiti tattao ‘nagtultuloyda a nagnaed a sitatalged, tunggal maysa iti sirok ti ubasna ken iti sirok ti higosna . . . kadagiti amin nga aldaw ni Solomon.’​—1 Ar-ari 4:20, 25.

Nagbalbaliwen ti tiempo. Naiduma unayen ti biag itatta no idilig kadagidi naragsak nga al-aldaw idi un-unana. Saan a kas idi tiempo ni Solomon, maysa a kangrunaan a parikut itatta isut’ kinapanglaw. Adda kinapanglaw uray kadagiti nabaknang a pagilian. Kas pagarigan, agpadpada iti Estados Unidos ken iti European Union, gistay 15 a porsiento kadagiti tattao ti agbibiag iti kinapanglaw, kuna ti United Nations Development Program.

No maipapan iti kasaasad ti lubong, ti The State of the World’s Children 1994, maysa a report ti UNICEF (United Nations Children’s Fund), kunana a kakalima iti populasion ti lubong ti agbibiag iti naan-anay a kinapanglaw, a kunana pay a ti biag ti kaaduan a napanglaw iti lubong ket “rumigrigat ken dumakdakes.”

Iti sumagmamano a pagilian, mangnayon pay kadagiti pakarigatan dagiti napanglaw ti kumarkaro nga implasion. Kinuna ti maysa a babai iti maysa a pagilian ti Africa: “Makakitaka iti maysa a banag idiay tiendaan, ket kunam, ‘Sige, agawidak pay ket mangalaak iti kuarta tapno magatangko dayta.’ Agsublika kalpasan ti maysa nga oras tapno maammuan laeng a saanmon a magatang dayta gapu ta ngimmaton ti presio. Aniat’ aramiden ti maysa a tao? Pudno a makapaupay dayta.”

Kinuna ti sabali pay a babai sadiay: ‘Tapno makalasat, lipatenmin dagiti sabali pay a masapsapul. Ti pakakumikomanmi itan isut’ pananggun-od iti taraon.’

Sigun iti Naciones Unidas, kasla nalidem ti masanguanan. Kas pagarigan, pattapattaen ti UNICEF a no agtultuloy ti agdama nga iyaadu ti populasion, mamimpatton ti kaadu ti napanglaw a tattao iti sangalubongan “iti las-ud laeng ti panagbiag ti maysa a tao.”

Ngem, iti laksid dagiti kumarkaro a kasasaad ti ekonomia ken kagimongan, adda panggapuan dagiti adipen ti Dios a mangnamnama. Nupay makipulpulapolda kadagidiay mangmatmatmat iti masanguanan a buyogen ti kumarkaro a kinaawan namnama, dagiti adipen ti Dios kumitada iti masanguanan a buyogen ti rag-o ken panagtalek. Mausig iti sumaganad nga artikulo dagiti rason no apay.

[Picture Credit Line iti panid 3]

De Grunne/Sipa Press