Dagiti Kristiano a Saksi Maipaay iti Nadibinuan a Kinasoberano
“‘Ideklarayo a sisasaknap dagiti kinatan-ok’ daydiay nangayab kadakayo manipud iti kinasipnget nga agturong iti nakaskasdaaw a lawagna.”—1 PEDRO 2:9.
1. Ania nga epektibo a panangsaksi maipapan ken Jehova ti naipaay idi kasakbayan panawen Kristiano?
IDI kasakbayan panawen Kristiano, maysa nga atiddog a listaan dagiti saksi ti situtured a nangpaneknek a ni Jehova ti kakaisuna a pudno a Dios. (Hebreo 11:4–12:1) Gapu ta natibker ti pammatida, situtured a tinungpalda dagiti linteg ni Jehova ken nagkedkedda a makikompromiso no maipanggep iti panagdayaw. Nangipaayda iti nabileg a pammaneknek iti sapasap a kinasoberano ni Jehova.—Salmo 18:21-23; 47:1, 2.
2. (a) Siasino ti kangrunaan a Saksi ni Jehova? (b) Siasino ti simmukat iti nasion ti Israel a kas saksi ni Jehova? Kasanotay nga ammo?
2 Ti maudi ken kangrunaan a saksi idi kasakbayan dagiti Kristiano isu ni Juan Bautista. (Mateo 11:11) Isut’ naikkan iti pribilehio a mangiwaragawag iti iyaay Daydiay Napili, ken inyam-ammona ni Jesus kas ti naikari a Mesias. (Juan 1:29-34) Ni Jesus ti kangrunaan a Saksi ni Jehova, “ti matalek ken pudno a saksi.” (Apocalipsis 3:14) Gapu ta linaksid ti nainlasagan nga Israel ni Jesus, linaksid ida ni Jehova ken nangdutok iti maysa a baro a nasion, ti naespirituan nga Israel ti Dios, nga agbalin a saksina. (Isaias 42:8-12; Juan 1:11, 12; Galacia 6:16) Inadaw ni Pedro ti maysa a padto maipapan iti Israel ket impakitana nga agaplikar dayta iti “Israel ti Dios,” ti kongregasion Kristiano, idi kinunana: “Dakayo ket ‘maysa a napili a puli, maysa a naarian a kinapadi, maysa a nasantuan a nasion, ili nga agpaay a naisangsangayan a sanikua, tapno ideklarayo a sisasaknap dagiti kinatan-ok’ daydiay nangayab kadakayo manipud iti kinasipnget nga agturong iti nakaskasdaaw a lawagna.”—1 Pedro 2:9; Exodo 19:5, 6; Isaias 43:21; 60:2.
3. Ania ti kangrunaan a rebbengen ti Israel ti Dios ken ti “dakkel a bunggoy”?
3 Ipakita ti sasao ni Pedro a ti kangrunaan a rebbengen ti Israel ti Dios isut’ panangipaay iti publiko a pammaneknek maipapan iti kinadayag ni Jehova. Iti kaaldawantayo, daytoy naespirituan a nasion ket kinaduaan ti “maysa a dakkel a bunggoy” dagiti saksi a mangidaydayaw met iti Dios iti publiko. Agikkisda a buyogen ti natbag a timek tapno mangngeg ti amin: “Ti pannakaisalakan utangtayo iti Diostayo, a situtugaw iti trono, ken iti Kordero.” (Apocalipsis 7:9, 10; Isaias 60:8-10) Kasanot’ panangsaksi ti Israel ti Dios ken ti kakaduana? Babaen ti pammati ken panagtulnogda.
Dagiti Ulbod a Saksi
4. Apay nga ulbod a saksi dagiti Judio idi kaaldawan ni Jesus?
4 Ti pammati ken panagtulnog ramanenna ti panagbiag a mayannurot kadagiti nadiosan a prinsipio. Makita ti kinapateg daytoy iti kinuna ni Jesus maipapan kadagiti relihioso a pangulo a Judio idi kaaldawanna. Dagitoy “impatugawda ti bagbagida iti tugaw ni Moises” kas mannursuro iti Linteg. Nangibaonda pay ketdi kadagiti misionero a mangkomberte kadagiti di manamati. Ngem, kinuna ni Jesus kadakuada: “Ballasiwenyo ti baybay ken ti namaga a daga tapno mangaramid iti maysa a proselita, ket inton agbalinen a maysa pagbalinenyo a sakop a maipaay iti Gehenna a mamindua nga ad-adda ngem iti bagbagiyo.” Ulbod a saksi dagitoy a relihionista—napalangguad, managinsisingpet, ken awanan ayat. (Mateo 23:1-12, 15) Iti naminsan kinuna ni Jesus iti sumagmamano a Judio: “Naggapukayo iti amayo a Diablo, ket kayatyo nga aramiden dagiti tarigagay ni amayo.” Apay a kunaenna ti kasta a banag kadagiti kameng ti nasion a pinili ti Dios? Gapu ta dida ipangag ti sasao ti kangrunaan a Saksi ni Jehova.—Juan 8:41, 44, 47.
5. Kasanotay nga ammo a nangipaay ti Kakristianuan iti ulbod a pammaneknek maipapan iti Dios?
5 Iti umasping a pamay-an, bayat dagiti siglo nanipud idi tiempo ni Jesus, ginasut a milion iti Kakristianuan ti agkunkuna nga ad-adalanna ida. Nupay kasta, saanda nga ar-aramiden ti pagayatan ti Dios ket gapuna saan ida a bigbigen ni Jesus. (Mateo 7:21-23; 1 Corinto 13:1-3) Nangibaon ti Kakristianuan kadagiti misionero, nga adu kadagitoy ti awan duadua a napasnek. Ngem, sinursuruanda dagiti tattao nga agdayaw iti maysa a Trinitario a dios a mangpuor kadagiti managbasol iti umap-apuy nga impierno, ken kaaduan kadagiti makomberteda bassit laeng ti pakakitaan a Kristianoda. Kas pagarigan, ti Rwanda a daga ti Africa ket maysa a nadam-eg a tay-ak para kadagiti misionero a Romano Katoliko. Kaskasdi, naimpusuan a nakiraman dagiti Katoliko a taga-Rwanda iti etniko a gubat iti dayta a daga iti nabiit pay. Ipakita dagiti bunga iti dayta a tay-ak dagiti misionero a saan nga immawat dayta iti pudpudno a Nakristianuan a panangsaksi manipud iti Kakristianuan.—Mateo 7:15-20.
Panagbiag a Mayannurot Kadagiti Nadiosan a Prinsipio
6. Kadagiti ania a pamay-an a ti umiso a kababalin ket nagpateg a paset ti panangsaksi?
6 Ti dakes a kababalin dagidiay agkunkuna a Kristiano ket mangyeg iti pakapilawan ti “dalan ti kinapudno.” (2 Pedro 2:2) Ti maysa a pudno a Kristiano agbiag a mayannurot kadagiti nadiosan a prinsipio. Saan nga agtakaw, agulbod, agkusit, wenno agaramid iti imoralidad. (Roma 2:22) Awan duadua a dina patayen ti kaarrubana. Dagiti Kristiano nga assawa a lallaki aywananda a siaayat dagiti pamiliada. Siraraem a suportaran dagiti assawa a babbai dayta a panangaywan. Sanayen dagiti nagannak ti annakda ket iti kasta nakasaganada nga agbalin a responsable a nataengan a Kristiano. (Efeso 5:21–6:4) Pudno, imperpekto ken agbidduttay amin. Ngem ti pudno a Kristiano raemenna dagiti pagalagadan iti Biblia ken ikagumaanna nga iyaplikar dagitoy. Madlaw daytoy dagiti sabsabali ken mangipaay iti nasayaat a pammaneknek. Adda dagiti dati a bumusbusor iti kinapudno a naguyugoy gaput’ pannakapaliiwda iti umiso a kababalin ti maysa a Kristiano.—1 Pedro 2:12, 15; 3:1.
7. Kasanot’ kapateg ti panagiinnayat dagiti Kristiano?
7 Impakita ni Jesus ti maysa a nagpateg nga aspeto ti Nakristianuan a kababalin idi kinunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Kadawyan iti lubong ni Satanas ti “kinakillo, kinadangkes, kinaagum, kinadakes, a napnoda iti apal, panangpapatay, ringgor, allilaw, makadangran a pagannayasan, a managarasaasda, manangpadpadakes, mananggura iti Dios, nakuspag, natangsit, napalangguad, manangpartuat kadagiti makadangran a bambanag, nasukir kadagiti nagannak.” (Roma 1:29, 30) Iti kasta a kasasaad, ti maysa a sangalubongan nga organisasion a nagaladan iti ayat ket nabileg a pakakitaan nga agtigtignay ti espiritu ti Dios—maysa nga epektibo a pammaneknek. Kasta nga organisasion dagiti Saksi ni Jehova.—1 Pedro 2:17.
Dagiti Saksi Ket Estudiante ti Biblia
8, 9. (a) Kasano a napabileg ti salmista gapu iti panagadalna iti Linteg ti Dios ken panagmennamennana iti dayta? (b) Kadagiti ania a pamay-an a ti panagadal iti Biblia ken panagmennamenna pabilgennatayo nga agtultuloy a mangsaksi?
8 Tapno agballigi iti panangipaay iti nasayaat a pammaneknek, ti maysa a Kristiano masapul nga ammo ken ipategna dagiti nalinteg a prinsipio ni Jehova ken pudpudno a guraenna ti kinadakes ti lubong. (Salmo 97:10) Makaguyugoy ti lubong iti panangitandudona iti bukodna a kapanunotan, ken nagrigat a sarangten ti espirituna. (Efeso 2:1-3; 1 Juan 2:15, 16) Aniat’ makatulong kadatayo a mangtaginayon iti umiso a panagpampanunot? Ti regular ken napasnek a panagadal iti Biblia. Adu a daras nga inulit ti nagsurat iti Salmo 119 ti panagayatna iti Linteg ni Jehova. Kanayon ti panangbasbasana ken panangut-utobna iti dayta, “agmalmalem.” (Salmo 119:92, 93, 97-105) Kas resultana, naikunana: “Guraek ti kinaulbod, ken karimonko dayta. Ayatek ti lintegmo.” Mainayon pay, ti nauneg a panangipategna ti nangtignay kenkuana. Kunana: “Mamimpito iti inaldaw nga idaydayawka gapu kadagiti nalinteg a pagbilinam.”—Salmo 119:163, 164.
9 Iti umasping a pamay-an, ti regular a panagadal iti Sao ti Dios ken panagmennamenna iti dayta tukayenna ti pusotayo ken tignayennatayo a ‘mangidayaw kenkuana’—mangsaksi maipapan ken Jehova—a masansan, uray “mamimpito iti inaldaw.” (Roma 10:10) Maitunos iti daytoy, kuna ti nagsurat iti umuna a salmo a ti maysa a regular nga agmennamenna iti sasao ni Jehova “awan duadua nga agbalinto a kas iti maysa a kayo a naimula iti sibay dagiti ay-ayus ti danum, nga ipaltuadna ti bungana iti tiempona ken ti bulongna met saan a malaylay, ket isuamin nga aramidna rumang-ayto.” (Salmo 1:3) Impakita met ni apostol Pablo ti bileg ti Sao ti Dios idi insuratna: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”—2 Timoteo 3:16, 17.
10. Aniat’ nabatad maipapan iti ili ni Jehova kadagitoy maudi nga al-aldaw?
10 Ti napartak nga iyaadu dagiti pudno nga agdaydayaw iti daytoy maika-20 a siglo ipasimudaagna ti pammendision ni Jehova. Di pagduaduaan, kas maysa a grupo, suksukayen dagitoy moderno-aldaw a saksi maipaay iti nadibinuan a kinasoberano ti panagayat iti linteg ni Jehova iti pusoda. Kas iti salmista, natignayda a mangtungpal iti lintegna ken simamatalek a saksianda “iti aldaw ken rabii” ti kinadayag ni Jehova.—Apocalipsis 7:15.
Dagiti Mannakabalin nga Aramid ni Jehova
11, 12. Aniat’ nagapuanan dagiti milagro nga inaramid ni Jesus ken dagiti adalanna?
11 Idi umuna a siglo, inikkan ti nasantuan nga espiritu dagiti matalek a Kristiano a saksi iti pannakabalin nga agaramid kadagiti milagro, a nangipaay iti nabileg a pammaneknek a pudno ti panangsaksida. Idi adda iti pagbaludan ni Juan Bautista, isut’ nangibaon kadagiti adalan tapno agsaludsod ken Jesus: “Sika kadi Daydiay Umay, wenno inanamaenmi aya ti sabali?” Saan a simmungbat ni Jesus iti wen wenno saan. Imbes ketdi, kinunana: “Mapankayo ket ipadamagyo ken Juan ti mangmangngeg ken makitkitayo: Dagiti bulsek makakitada manen, ket dagiti pilay magmagnada, dagiti agkukutel madaldalusanda ket dagiti tuleng makangkangngegda, ket dagiti natay mapagpagungarda, ket dagiti napanglaw maidekdeklara kadakuada ti naimbag a damag; ket naragsak daydiay di makasarak kaniak iti pakaigapuan ti pannakaitibkol.” (Mateo 11:3-6) Nagserbi dagitoy mannakabalin nga aramid a kas pammaneknek ken Juan a ni Jesus ket pudno nga isu “Daydiay Umay.”—Aramid 2:22.
12 Iti umasping a pamay-an, pinaimbag ti dadduma kadagiti pasurot ni Jesus dagiti masakit ken pinagungarda pay ketdi dagiti natay. (Aramid 5:15, 16; 20:9-12) Nagserbi dagitoy a milagro kas maysa a pammaneknek ti Dios a mismo a maipuon kadakuada. (Hebreo 2:4) Ken imparangarang ti kakasta nga aramid ti kinamannakabalin-amin ni Jehova. Kas pagarigan, pudno a ni Satanas, “ti agturay iti lubong,” kabaelanna nga iyeg ti ipapatay. (Juan 14:30; Hebreo 2:14) Ngem idi pinagungar ni Pedro ti matalek a babai a ni Dorcas kadagiti natay, naaramidanna laeng dayta gapu iti pannakabalin ni Jehova, tangay Isu laeng ti makaisubli iti biag.—Salmo 16:10; 36:9; Aramid 2:25-27; 9:36-43.
13. (a) Iti ania a pamay-an a paneknekan pay laeng dagiti milagro iti Biblia ti pannakabalin ni Jehova? (b) Kasano a ti kaitungpalan ti padto ket addaan nagpateg a paset iti panangpaneknek iti Kina-Dios ni Jehova?
13 Itatta, saanen a mapaspasamak dagidi a datdatlag nga aramid. Naibanagen ti panggepda. (1 Corinto 13:8) Nupay kasta, adda pay laeng kadatayo ti rekord maipapan kadagitoy iti Biblia, a pinaneknekan ti adu a nakakita. No iturong dagiti Kristiano itatta ti atension kadagitoy historikal a pasamak, mangipapaay pay laeng dagidiay nga aramid iti epektibo a pammaneknek iti pannakabalin ni Jehova. (1 Corinto 15:3-6) Maysa pay, idi kaaldawan ni Isaias, tinukoy ni Jehova ti umiso a padto kas maysa a naisangsangayan a pammaneknek nga Isu ti pudno a Dios. (Isaias 46:8-11) Adu a nadibinuan pannakaipaltiingna a padto iti Biblia ti matungtungpal ita—ket adu kadagitoy [ti matungtungpal] iti kongregasion Kristiano. (Isaias 60:8-10; Daniel 12:6-12; Malakias 3:17, 18; Mateo 24:9; Apocalipsis 11:1-13) Malaksid iti panangipakitana nga agbibiagtayon “kadagiti maudi nga al-aldaw,” ti kaitungpalan dagitoy a padto alangonenna ni Jehova kas ti kakaisuna a pudno a Dios.—2 Timoteo 3:1.
14. Kadagiti ania a pamay-an a ti moderno-aldaw a pakasaritaan dagiti Saksi ni Jehova ket nabileg a pammaneknek a ni Jehova ti Soberano nga Apo?
14 Kamaudiananna, mangar-aramid pay laeng ni Jehova kadagiti naindaklan a banag, nakaskasdaaw a banag, agpaay iti ilina. Iwanwanwan ti espiritu ni Jehova ti rumanraniag a lawag ti kinapudno iti Biblia. (Salmo 86:10; Apocalipsis 4:5, 6) Dagiti naisangsangayan nga irarang-ay a naireport iti aglikmut ti lubong ket pammaneknek a ‘pappapardasen dayta [ni Jehova] iti panawenna.’ (Isaias 60:22) No rumsua dagiti naulpit a panangidadanes iti nadumaduma a pagilian kadagitoy maudi nga al-aldaw, situtured a makapagibtur dagiti tattao ni Jehova gapu iti pammabileg ti nasantuan nga espiritu. (Salmo 18:1, 2, 17, 18; 2 Corinto 1:8-10) Wen, ti moderno-aldaw a historia dagiti Saksi ni Jehova a mismo ket maysa a nabileg a pammaneknek a ni Jehova ti Soberano nga Apo.—Zacarias 4:6.
Maikaskasaba ti Naimbag a Damag
15. Ania a napalawa a panangsaksi ti ipaay ti kongregasion Kristiano?
15 Dinutokan ni Jehova ti Israel kas saksina kadagiti nasion. (Isaias 43:10) Nupay kasta, sumagmamano laeng nga Israelita ti binilin ti Dios a mapan ken mangasaba kadagiti di-Israelita, ken kadawyan a daytoy ket tapno maiwaragawag dagiti panangukom ni Jehova. (Jeremias 1:5; Jonas 1:1, 2) Ngem, ipasimudaag dagiti padto iti Hebreo a Kasuratan nga addanto aldaw nga iturong ni Jehova ti atensionna kadagiti nasion iti nasaknap a pamay-an, ket ar-aramidennan daytoy babaen ti naespirituan nga Israel ti Dios. (Isaias 2:2-4; 62:2) Sakbay nga immuli sadi langit, binilin ni Jesus dagiti pasurotna: “Inkayo ngarud ket mangaramidkayo kadagiti adalan a tattao iti isuamin a nasnasion.” (Mateo 28:19) Kabayatan ti panangipamaysa ni Jesus “kadagiti napukaw a karnero iti balay ti Israel,” naibaon dagiti pasurotna “kadagiti amin a nasion,” uray “agingga iti kaadaywan a paset ti daga.” (Mateo 15:24; Aramid 1:8) Kasapulan a mangngegan ti amin a sangatauan ti Nakristianuan a pammaneknek.
16. Ania a bilin ti tinungpal ti kongregasion Kristiano idi umuna a siglo, ken kasanot’ kasaknapna?
16 Impakita ni Pablo a naawatanna a naimbag daytoy. Idi tawen 61 K.P., naikunana a ti naimbag a damag ket ‘agbungbunga ken rumangrang-ay iti isuamin a lubong.’ Saan laeng a naikasaba ti naimbag a damag iti maysa a nasion wenno maysa a sekta, kas iti daydiay naaramid iti “panagdaydayaw kadagiti anghel.” Imbes ketdi, sipapanayag a “naikaskasaba [dayta] kadagiti amin a parsua nga adda iti baba ti langit.” (Colosas 1:6, 23; 2:13, 14, 16-18) Iti kasta, tinungpal ti Israel ti Dios idi umuna a siglo ti bilin nga “‘ideklara a sisasaknap dagiti kinatan-ok’ daydiay nangayab [kadakuada] manipud iti kinasipnget nga agturong iti nakaskasdaaw a lawagna.”
17. Kasano nga agtultuloy a matungtungpal a sisasaknap ti Mateo 24:14?
17 Nupay kasta, dayta a trabaho a panangasaba idi umuna a siglo ket pakpakauna laeng ti maibanag kadagiti maudi nga al-aldaw. Iti panangtukoyna a nangnangruna iti kaaldawantayo, kinuna ni Jesus: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:14; Marcos 13:10) Matungtungpal kadin daytoy a padto? Wen. Manipud iti bassit a pangrugian idi 1919, maikaskasaba itan ti naimbag a damag iti nasurok a 230 a pagilian. Mangmangngegan ti panangsaksi kadagiti nalamiis unay a paset ti Amianan ken kadagiti nadagaang a tropikal a pagilian. Masaksaknapan dagiti dadakkel a kontinente, ken madandanon dagiti adayo a puro tapno makasabaan dagiti agnaed kadagitoy. Uray iti tengnga ti dadakkel a riribuk, kas iti gubat idiay Bosnia ken Herzegovina, agtultuloy a maikaskasaba ti naimbag a damag. Kas idi umuna a siglo, agbungbunga ti panangsaksi “iti amin a lubong.” Sipapanayag a maiwarwaragawag ti naimbag a damag “kadagiti amin a parsua nga adda iti baba ti langit.” Ti resultana? Umuna, naurnongen dagiti natda iti Israel ti Dios “manipud iti tunggal tribo ken pagsasao ken ili ken nasion.” Maikadua, ti riniwriw kadagiti “dakkel a bunggoy” nangrugi a maurnong manipud “kadagiti isuamin a nasion ken kadagiti tribo ken kadagiti il-ili ken kadagiti pagsasao.” (Apocalipsis 5:9; 7:9) Sisasaknap nga agtultuloy a matungtungpal ti Mateo 24:14.
18. Ania dagiti sumagmamano a bambanag a maitungtungpal ti sangalubongan a pannakaikaskasaba ti naimbag a damag?
18 Tumulong ti sangalubongan a pannakaikaskasaba ti naimbag a damag a mangpaneknek a nangrugin ti naarian a kaadda ni Jesus. (Mateo 24:3) Maysa pay, dayta ti kangrunaan a pamay-an a maani “ti anien iti daga,” bayat nga iturongna dagiti tattao iti kakaisuna a namnama ti sangatauan, ti Pagarian ni Jehova. (Apocalipsis 14:15, 16) Yantangay dagiti laeng pudno a Kristiano ti mangikaskasaba iti naimbag a damag, daytoy napateg a trabaho tumulong a mangilasin kadagiti pudno a Kristiano manipud kadagiti ulbod. (Malakias 3:18) Iti kastoy a pamay-an, agresulta dayta iti pannakaisalakan dagidiay mangikasaba kasta met dagidiay mangipangag. (1 Timoteo 4:16) Kangrunaanna, ti panangikasaba iti naimbag a damag ket pakaidayawan ken pakaitan-okan ni Jehova a Dios, daydiay nangibilin a maibanag dayta, a mangsuporta kadagidiay mangaramid iti dayta, ken mamagbalin iti dayta a nabunga.—2 Corinto 4:7.
19. Ania a determinasion ti maiparegta kadagiti amin a Kristiano bayat a sumrekda iti baro a tawen serbisio?
19 Di pakasdaawan a natignay ni apostol Pablo a mangikuna: “Asiak pay no diak indeklara ti naimbag a damag!” (1 Corinto 9:16) Kasta met ti panagrikna dagiti Kristiano itatta. Maysa a naindaklan a pribilehio ken dakkel a responsabilidad ti agbalin a kas “katrabahuan ti Dios,” a mangisilnag iti lawag ti kinapudno iti daytoy nasipngetan a lubong. (1 Corinto 3:9; Isaias 60:2, 3) Ti trabaho nga addaan bassit a nangrugian idi 1919 dimmanon itan iti nakaskasdaaw a kadakkel. Agarup lima a milion dagiti Kristiano ti mangsaksaksi iti nadibinuan a kinasoberano bayat a mangbusbosda iti nasurok a sangabilion nga oras iti maysa a tawen a mangidanon iti mensahe ti pannakaisalakan kadagiti sabsabali. Anian a rag-o ti maaddaan iti paset iti daytoy trabaho a panangsantipikar iti nagan ni Jehova! Bayat a sumrektayo iti 1996 a tawen serbisio, determinadotay koma a di bumannayat. Imbes ketdi, ad-adda nga ipangagtayo ti sasao ni Pablo ken Timoteo: “Ikasabam ti sao, naganetgetka koma.” (2 Timoteo 4:2) Bayat nga aramidentay dayta, naimpusuan nga ikararagtayo nga itultuloy ni Jehova a bendisionan ti panagreggettayo.
Malagipyo Pay Aya?
◻ Siasinot’ simmukat iti Israel kas “saksi” ni Jehova kadagiti nasion?
◻ Kasano a ti Nakristianuan a kababalin tumulong a mangpaneknek?
◻ Apay a napateg iti Kristiano a Saksi ti panagadal iti Biblia ken panagmennamenna iti dayta?
◻ Iti ania a pamay-an a ti moderno-aldaw a pakasaritaan dagiti Saksi ni Jehova agserbi kas pammaneknek a ni Jehova ti pudno a Dios?
◻ Aniat’ magapgapuanan ti pannakaikaskasaba ti naimbag a damag?
[Dagiti Ladawan iti panid 15]
Imbes a malapdan, mairakrakurak itan ti naimbag a damag “kadagiti amin a parsua nga adda iti baba ti langit”