Ti Nasaysayaat a Biag​—Asidegen!

PANUNOTENYO ti maysa a mammadles iti panniempo a dagiti padlesna ti gistay kankanayon a pumudno. No ipadlesna iti padamag iti rabii nga agtudonto iti sumuno nga aldaw, dikay bumdeng a mangitugot iti payongyo no pumanawkayo iti balay iti kabigatanna. Agtalekkayo gapu iti napalabas a rekordna. Ipangagyo ti ibagana.

Ita, kasanot’ kinamapagtalkan ti kari ni Jehova maipapan iti nasaysayaat a biag iti paraiso a daga? Bueno, aniat’ ipakita ti napalabas a rekordna? Ti pannakatungpal dagiti padto ti Biblia nabatad nga ipasdekna ti rekord ni Jehova. Isut’ Dios a mapagtalkan iti kinaumiso ken kinapudno. (Josue 23:14; Isaias 55:11) Mapagtalkan unay dagiti kari ni Jehova a Dios ta no dadduma tukoyenna pay dagiti naikari a pasamak iti masanguanan a kaslattay napasamakdan. Kas pagarigan, kalpasan ti panangikarina iti maysa a baro a lubong a pakapukawanton ti ipapatay ken panagladingit, mabasatayo: “Napasamakdan [dagiti naikari a bendision]!” Iti sabali a pannao, “Kinapudno dagitoy!”​—Apocalipsis 21:5, 6, footnote.

Wen, ti kaitungpalan dagiti kari ni Jehova iti napalabas ipaayannatayo iti panagtalek iti pannakatungpal ti karina a nasaysayaat a biag para iti sangatauan. Ngem kaanonto a dumteng daytoy a nasaysayaat a biag?

Nasaysayaat a Biag​—Kaano?

Mabiiten ti nasaysayaat a biag! Makasiguradotay iti dayta ta kuna ti Biblia nga adunto dagiti dakes a banag a mapasamak ditoy daga sakbay la unay ti panangyeg ti Paraiso iti nasaysayaat a biag. Mapaspasamaken dagidiay a dakes a bambanag.

Kas pagarigan, impadto ni Jesu-Kristo nga addanto dadakkel a gubat. Kinunana: “Ti nasion tumakderto a bumusor iti nasion ket ti pagarian bumusor iti pagarian.” (Mateo 24:7) Pimmudno daytoy a padto. Bayat dagiti tawen 1914 aginggat’ 1945, addan dua a gubat sangalubongan, ken sinaruno daytoy ti nakaad-adu a sabsabali pay a gubat a nagdadangadangan dagiti nasion. “Iti tinawen a promedio, ti kaadu dagiti natay iti gubat iti daytoy a periodo [sipud pay idi Gubat Sangalubongan II] ket nasurok a mamindua a daras nga ad-adu ngem kadagiti natay iti maika-19 a siglo ken mamimpito a daras nga ad-adu ngem idi maika-18 a siglo.”​—World Military and Social Expenditures 1993.

Ti panagsaknap ti sakit ket sabali pay a pammaneknek iti kinaasidegen ti nasaysayaat a biag iti Paraiso. Impadto ni Jesus nga addanto ‘angol iti nadumaduma a disso.’ (Lucas 21:11) Pimmudno kadi daytoy a padto? Wen. Kalpasan ti umuna a gubat sangalubongan, ti trangkaso Español pinapatayna ti nasurok a 20 milion a tattao. Manipud idin, minilion a tattao ti pinapatay ti kanser, sakit ti puso, malaria, AIDS, ken dadduma pay a saksakit. Kadagiti napanglaw a pagilian, minilion ti matmatay iti kada tawen kadagiti sakit a maigapu iti narugit a danum (a pakairamanan ti panagibleng ken impeksion ti bagis gapu iti ariet).

Kinuna pay ni Jesus: “Addanto dagiti kinakirang ti taraon.” (Mateo 24:7) Kas naipakita iti immun-una nga artikulo, awan umdas a taraon dagiti napanglaw iti lubong. Daytoy ti sabali pay a paset ti pammaneknek a dandanin dumteng ti nasaysayaat a biag iti Paraiso.

“Addanto dagiti dadakkel a ginggined,” kinuna ni Jesus. (Lucas 21:11) Pimmudno met daytoy iti kaaldawantayo. Sipud pay idi 1914, ginasut a ribu a biag ti pinukaw dagiti napigsa a ginggined.

Kuna pay ti Biblia a dagiti “maudi nga al-aldaw” ket markaanto ti panagbalbaliw dagiti tattao. Agbalindanto a ‘managayat iti bagbagida’ ken “managayat iti kuarta,” ket dagiti ubbing agbalindanto a “nasukir kadagiti nagannak.” Kaaduan a tattao agbalinto a “managayat iti ragragsak imbes a managayat koma iti Dios.” (2 Timoteo 3:1-5) Dikay kadi umanamong nga adu ti tumutop iti daytoy a panangiladawan?

Bayat nga umad-adu ti tattao nga agar-aramid iti dakes a bambanag, lumanlanlan ti kinakillo. Naipadto met daytoy. Sigun iti Mateo 24:12, dinakamat ni Jesus ti maipapan iti “iyaadu ti kinakillo.” Mabalin nga umanamongkayo a nakarkaro itan ti krimen ngem kadagiti napalabas a tawen. Madanagan dagiti tattao iti sadinoman a matakawan, masaur, wenno madangranda.

Dagiti gubat, nasaknap a sakit, kinakirang ti taraon, ginggined, iyaadu ti krimen, ken ti idadakes ti natauan a relasion​—makita amin dagitoy itatta, kas impadto ti Biblia. ‘Ngem saan aya a napasamaken amin dagitoy a bambanag iti intero a pakasaritaan ti tao?’ mabalin a maisaludsodyo. ‘Aniat’ nakaidumaan ti kaaldawantayo?’

Adda sumagmamano a naisangsangayan unay a banag a mapaspasamak itatta. Saan a kunaen ti Biblia a ti maysa a pasamak, a kas iti kinakirang ti taraon, ket mismo a pammaneknek nga addatayo iti panawen ti panungpalan ken asidegen ti nasaysayaat a biag. Dagiti padto ti Biblia maipapan iti panawen ti panungpalan ket matungpal iti nadangkes a kaputotan.​—Mateo 24:34-39; Lucas 17:26, 27.

Maysa pay, nakaskasdaaw unay a dadduma a paset ti padto ni Jesus​—nangruna dagidiay maipapan iti kinakirang ti taraon ken nasaknap a sakit​—ket matungtungpal itatta. Apay? Gapu ta narangrang-ay itan dagiti maaramidan ti siensia. Narangrang-ay wenno nasaksaknap itan ti medikal a pannakaammo ken dagiti kita ti panangagas. Ti laeng Dios ti makaipadto iti Saona, ti Biblia, a kumaronto ti sakit ken panagbisin iti dayta a tiempo, saan a sumaysayaat.

Yantangay matungtungpal aminen dagiti padto ti Biblia maipapan iti panawen ti panungpalan, wenno “maudi nga al-aldaw,” aniat’ maikunatayo? Nga asidegen ti nasaysayaat a biag! Ngem kasanonto a mapasamak dayta?

Nasaysayaat a Biag​—Kasano?

Panagkunayo mayeg ngata dagiti tattao ti Paraiso? Iti intero a historia agingga iti daytoy nga aldaw, nakaad-adun a kita ti gobierno ti tao. Inkarigatan ti dadduma a penken ti kasapulan dagiti tattao. Kaskasdi, kumarkaro ti adu a parikut. Agpadpada a makidangdangadang dagiti gobierno kadagiti nabaknang a pagilian ken napanglaw a dagdaga iti panagabuso iti droga, nanumo a pagtaengan, kinapanglaw, krimen, kinaawan pagtrabahuan, ken gubat.

Uray pay no marisut dagiti gobierno ti dadduma kadagitoy a parikut, pulos a didanto makaipaay iti naan-anay a wayawaya manipud iti sakit; dida met mapagpatingga ti panaglakay ken ipapatay. Nabatad, pulos a dinto mayeg dagiti tattao ti Paraiso iti daytoy a daga.

Nainsiriban a kunaen ti Biblia: “Dika agkammatalek kadagiti prinsipe, ken iti anak ti tao, a kenkuana awan ti tulong.” Siasino ngarud ti rumbeng a pagkammatalkantayo? Sumungbat ti Biblia: “Naragsak daydiay adda kenkuana ti Dios ni Jacob a badangna, a ti inanamana adda ken Jehova a Diosna.” (Salmo 146:3, 5) No manginanamatayo ken Jehova a Dios, pulos a ditayto maupay.

Sigurado a Daydiay addaan iti sirib ken pannakabalin a mamarsua iti daga, init, ken kadagiti bituen ket mapagbalinna met ti daga a maysa a paraiso. Matulonganna dagiti tattao a mangtagiragsak iti nasaysayaat a biag. Aniaman ti ikeddeng ni Jehova a Dios nga aramiden, kabaelanna ken ipatungpalnanto. Kuna ti Saona: “Iti Dios awan ti deklarasion a saanto a mabalin.” (Lucas 1:37) Ngem kasanonto nga iyeg ti Dios ti nasaysayaat a biag?

Iyegto ni Jehova iti sangatauan ti nasaysayaat a biag babaen ti Pagarianna. Ket ania ti Pagarian ti Dios? Maysa dayta a pudpudno a gobierno nga addaan iti dinutokan ti Dios nga Agturay, ni Jesu-Kristo. Adda idiay langit ti Pagarian ti Dios, ngem iti din agbayag mangyegto dayta kadagiti nakaskasdaaw a bendision ken nasaysayaat nga amang a biag kadagiti agnaed iti Paraiso a daga.​—Isaias 9:6, 7.

Mabalin a pagaammoyon ti modelo a kararag ni Jesus, a masarakan iti Biblia idiay Mateo 6:9-13. Kuna ti paset dayta a kararag iti Dios: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” Maitunos iti dayta a kararag, ‘umayto’ ti Pagarian ti Dios tapno ibanagna ti panggep ni Jehova a Dios agpaay iti daga. Ket panggepna a daytoy daga agbalinto a paraiso.

Tumaud ti maysa a maudi a saludsod: Aniat’ masapul nga aramidenyo tapno matagiragsakyo ti nasaysayaat a biag iti um-umayen a Paraiso?

No Aniat’ Masapul nga Aramidenyo

Siaayat nga idiaya ni Jehova a Dios ti namnama a nasaysayaat a biag iti Paraiso kadagiti amin a mangaramid iti pagayatanna. Kuna ti Biblia kadatayo: “Ti sililinteg tawidennanto ti daga, ket agtaengto kenkuana nga agnanayon.” (Salmo 37:29) Ngem aniat’ mamagbalin iti tao a nalinteg iti imatang ti Dios?

Tapno maay-ayotay ni Jehova kasapulan nga ammuentay ti ad-adu pay maipapan iti kayatna nga aramidentayo. No gumun-odtay iti pannakaammo iti Dios ken iyaplikartay dayta iti panagbiagtayo, makapagbiagtay nga agnanayon. Iti maysa a kararag iti Dios, kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Ti libro a mangibaga kadatayo iti maipapan kada Jehova a Dios ken Jesu-Kristo isu ti Sao ti Dios, ti Biblia. Maysa daytoy kadagiti kapapatgan a sagut ni Jehova. Ti Biblia ket mayarig iti maysa a surat ti naayat nga ama kadagiti annakna. Ibagana kadatayo ti maipapan iti kari ti Dios a mangyeg iti nasaysayaat a biag para iti sangatauan ken ipakitana kadatayo no kasanotay a magun-odan dayta. Ipakaammo kadatayo ti Biblia no aniat’ naaramidan ti Dios iti napalabas ken no anianto ti aramidenna iti masanguanan. Ipaayannatay met iti praktikal a balakad no kasanot’ sibaballigi a panangsango kadagiti parikuttayo ita. Kinapudnona, isuronatayo ti Sao ti Dios no kasanot’ mangsapul iti kinaragsak uray pay iti daytoy nariribuk a lubong.​—2 Timoteo 3:16, 17.

Maragsakan dagiti Saksi ni Jehova a mangyurnos iti libre a panangyadal iti Biblia kadakayo iti pagtaenganyo. Sursuruenyo no kasanoyo a magun-odan ti naragragsak a biag itan, buyogen ti inanama iti nasaysayaat a biag iti asidegen a masanguanan.

[Ladawan iti panid 5]

Ipasimudaag dagiti padto iti Biblia nga asidegen ti nasaysayaat a biag

[Ladawan iti panid 7]

Iyegto ti Pagarian ti Dios ti nasaysayaat a biag para iti sangatauan