Nagtataripnongda kas Nararagsak a Managdaydayaw

NAIBILIN kadagiti nagkauna nga ili ni Jehova a Dios nga ‘agragsakdanto iti isuamin’ no agtataripnongda tapno agdaydayaw. (Deuteronomio 16:15) Dagiti “Nararagsak a Managdaydayaw” a Kombension Distrito ti 1995/96 awan duadua nga impaayanna dagiti Saksi ni Jehova kadagiti nasayaat a rason tapno agrag-o.

Sipud pay idi nangrugi daytoy a serie dagiti kombension, nangpabileg dagitoy iti pammati. Impakitada met no kasano a magun-odan ti ragsak iti di naragsak a lubong. Saggaysaentay nga usigen ti tunggal aldaw ti kombension.

‘Idaydayawyo Ni Jehova, Dakayo a Tattao . . . Agrag-okayo!’

Naibatay ti tema iti ngato ti umuna nga aldaw ti kombension iti Salmo 149:1, 2. Ti palawag nga “Addaantayo iti Rason nga Agdir-i iti Rag-o” sinukimatna ti pakayaplikaran ti padto iti Isaias kapitulo 35. Natungpal dayta iti nagkauna nga Israel ken nangnangruna iti kaaldawantayo iti pannakaisubli ti kinarang-ay ken kinasalun-at dagiti agdaydayaw ken Jehova iti naespirituan a paraiso. Gapuna, addaan dagiti kombensionista iti rason nga agdir-i iti rag-o maigapu iti pinanggep ti Dios agpaay iti ilina iti naespirituan a paraiso ken iti umad-adanin a literal a Paraiso a nakaas-asidegen.

Ti keynote address a, “Naisalsalumina Kas Nararagsak a Managdaydayaw iti Intero a Lubong,” sinungbatanna ti saludsod nga: Aniat’ nangisalumina kadatayo manipud iti daytoy a lubong? Dayta ti nagkaykaysa a panagdaydayawtayo ken Jehova. Sadinoman ti pagnanaedan dagiti Saksi ni Jehova ditoy daga, agtutunos ti panagsao ken panangisuroda. Maragsakanda met iti naindaklan a panggep ni Jehova a mangsantipikar iti nasantuan a naganna ken mangalangon iti kinasoberanona babaen ti Pagarianna. Ngem, kasanonatay a tulongan ni Jehova a maaddaan iti paset iti panggepna? Intalekna kadatayo ti kinapudno ti nasantuan a Saona. Inikkannatayo ti Dios iti nasantuan nga espirituna. Pinaraburannatayo iti maysa a sangalubongan a panagkakabsat ken urnos agpaay iti nasin-aw a panagdaydayaw. Ti internasional a pamiliatayo tulongannatay nga agserbi ken Jehova buyogen ti napalaus a rag-o ti puso.

Ti “Panagtalinaed a Naisina ken Awanan Mulit iti Lubong” impaganetgetna ti kinapateg ti panangliklik kadagiti mulit ti panangidumduma ken panamaglalasin iti kita. (Santiago 2:5-9) Mabalin a makilangenlangen laeng ti dadduma kadagidiay kapadada iti nalikudan wenno panagbiag, a mabaybay-anda dagiti padada a Kristiano a napanglaw wenno marigrigat. Dadduma ti agannayas a mangpabor kadagidiay addaan saad ti responsabilidad iti kongregasion. Malipatanda a ti kadaklan a pribilehio a mabalin a magun-odan ti asinoman isu ti panagbalin ti maysa a Saksi ni Jehova. Gapuna, ditay koma palubosan dagiti nainlubongan a pagannayasan a mangmulit kadatayo ken mangsinga iti talna ti kongregasion.​—2 Pedro 3:14.

Ti palawag a “Sisasaganaak Kadin a Makiasawa?” intudona nga adu ti agap-apura a makiasawa. Dadduma ti makiasawa tapno maliklikanda ti narigat a kasasaad iti pagtaengan wenno gapu ta makias-asawan dagiti kapatadanda. Nupay kasta, dagiti nainkalintegan a rason iti pannakiasawa iramanna ti agpada a tarigagay a mangragpat kadagiti nateokratikuan a kalat, pudpudno nga ayat, panagkasapulan iti kadua ken kinatalged, ken ti tarigagay a mangpatanor kadagiti annak. Napateg ti naespirituan a pannakasanay iti panagsagana a mangasawa. Malaksid iti dadduma pay a banag, napateg ti panangsukay kadagiti makaay-ayo a kababalin babaen ti panangikawes iti baro a personalidad. Nainsiriban met a siguraduen no mangipakpakita met laeng ti manamnama nga asawa iti pammaneknek ti kaadda ti pudpudno a relasionna ken Jehova ken nadayaw ti pannakilanglangenna iti sabsabali. Nainsiriban met ti panagpabalakad kadagiti nataengan a Kristiano.​—Proverbio 11:14.

Daytoy a makaisuro a salaysay ti sinaruno ti maysa pay a napauluan “Dagiti Nagannak a Makagun-od iti Rag-o Kadagiti Annakda.” Masansan a panawen ti napalaus a panagrag-o ti pannakaipasngay ti maysa nga ubing. Nupay kasta, mangyeg met iti dakkel a responsabilidad ti panangpatanor kadagiti annak. (Salmo 127:3) Gapuna, napateg a maisuro kadagiti annak nga ayatenda ni Jehova. Maaramidan daytoy dagiti nagannak babaen ti regular a panangisarita kadagiti annakda ti maipapan ken Jehova ken ti panangyaplikar kadagiti prinsipio ti Saona iti pamilia.

Nagpatingga ti umuna nga aldaw ti kombension babaen ti maysa a sorpresa​—ti pannakairuar ti baro a broshur a Dagiti Saksi ni Jehova ken ti Edukasion. Nabatad nga inlawlawagna a “parparegtaen [dagiti Saksi] dagiti ubbingda nga aggaggaget ken ipasnekda dagiti trabaho a naiparebbeng kadakuada idiay eskuelaan.” Ilawlawag met daytoy a publikasion dagiti naisangsangayan a resulta kadagiti klase iti panagbasa ken panagsurat nga inkondukta dagiti Saksi ni Jehova iti adu a tawen idiay Nigeria, Mexico, ken dadduma pay a pagilian. Ti broshur tulonganna koma dagiti mannursuro a makakita a dakkel ti panangipategtay iti edukasion.

“Kankanayon nga Idatontayo iti Dios ti Sakripisio ti Panagdaydayaw”

Naibatay ti nasao a tema ti maikadua nga aldaw iti Hebreo 13:15. Ti programa iti bigat indatagna ti simposium a “Panangsungbat iti Awis a Mangidayaw ken Jehova.” Saan a lapped ti edad iti panangsungbat iti daytoy nga awis. Idagadag ti Salmo 148:12, 13 kadagiti babbaro, babbalasang, lallakay, ken ubbing nga idayawda ni Jehova. Nabalinan dagiti adu a naragsak nga ad-adipen ni Jehova a parang-ayen ti panagdayawda. Iti sangalubongan, nasurok nga 600,000 ti makiramraman iti amin-tiempo a trabaho a panangasaba, wenno panagserbi kas payunir. Nasurok a 15,000 ti makiramraman iti special pioneer a trabaho, ken nasurok a 15,000 ti agserserbi iti Bethel.

Ti “Panagserbi a Sisusungdo a Kadua ti Organisasion ni Jehova” isu ti palawag a nangipakita a napateg ti kinasungdo kadagiti adipen ti Dios. Ti panagbalin a nasungdo ken Jehova kaipapananna ti idedekket kenkuana a buyogen ti debosion a nakabilbileg ta agtignay dayta kas nabileg a pigket. Kalikaguman ti kinasungdo a liklikantayo ti sipapakinakem a pananglabsing kadagiti bilin ti Biblia, makitadatay man dagiti sabsabali wenno saan. Kalikagumanna met a sisusungdo nga itandudotayo dagiti pannursuro ti Biblia a masarakan kadagiti magasin a Pagwanawanan ken Agriingkayo! kasta met kadagiti sabsabali pay a naespirituan a taraon nga ipapaay ti Watch Tower Society. Daytoy a palawag ti sinaruno ti palawag iti bautismo. Anian a rag-o idi nangipaay dagiti kandidato iti bautismo ti pammaneknek iti dedikasionda ken Jehova!

Dagiti sasao ti Oseas 4:1-3 impasdekna ti padron para iti palawag iti malem a “Nasayaat a Kababalin Wenno Kinadakes​—Ania ti Surotenyo?” Nupay nagbalinen a dakes ti panangmatmat ti lubong iti nasayaat a kababalin, kasapulan a mangipaay dagiti Kristiano iti “napasnek a panagregget” a mangalagad iti nasayaat a kababalin. (2 Pedro 1:5) Mangrugi daytoy iti no kasanot’ panagpampanunot ti maysa a tao. No nasayaat ti pampanunotna, agsaonto iti nadalus, nasayaat, ken makapabileg a sasao ken ikagumaanna ti agbalin a mapagtalkan iti pannakilangenna iti dadduma. Ramanen met ti panangsurot iti nasayaat iti panangikagumaan nga agbalin a mannakaawat ken naasi kadagiti pada a Kristiano nga agsagsagaba iti tuok wenno panagleddaang.​—1 Tesalonica 5:14.

Ti maysa pay a palawag nga, “Agaluadkayo Kadagiti Silo ti Diablo,” pinakdaaranna dagiti Kristiano maibusor iti panangisarangda iti bagbagida kadagiti impluensia dagiti sairo. Iti tay-ak ti panangagas kadagiti sakit, kasapulan nga agannad dagiti Kristiano kadagiti pamay-an, kas iti hipnotismo, a pangallukoy ti okulto. Iti sabali a bangir, personal a banag ti aramiden dagiti indibidual a mangtaming iti pisikal a salun-atda.

Nagpatingga ti maikadua nga aldaw nga addaan makaparagsak a sorpresa​—ti pannakairuar ti baro a maibulsa a publikasion a nairanta a tumulong kadagiti nasingpet panagpuspusona a tattao a rumang-ay a nadaras nga agturong iti dedikasion ken bautismo. Napauluan daytoy a baro a 192-panid a libro iti Pannakaammo a Mangiturong iti Biag nga Agnanayon. Ti libro a Pannakaammo idatagna ti kinapudno iti makapabileg a pamay-an. Saan a naibatay kadagiti mapagduaduaan nga ulbod a doktrina. Ti kinalawag ti sasao ken ti lohikal a panangsalaysay ti mangpalaka iti panangaramat iti daytoy a libro a mangidaulo kadagiti panagadal iti Biblia ken tumulong kadagiti tattao a makatarus iti makaparagsak a pannakaammo ti Dios.

“Agragsakkayo, Dakayo a Tattao, ket Agrag-okayo iti Agnanayon”

Dagitoy a sasao manipud iti Isaias 65:18 ti tema iti maikatlo nga aldaw ti kombension. Ti kaitungpalan ti padto ti Biblia itudona ti 1914 kas ti tawen idi simrek daytoy dakes a sistema iti maudi nga al-aldawna. Gapuna, ti simposium dagiti palawag a napauluan iti “Nararagsak a Managdaydayaw Kabayatan Daytoy Panagpatingga ti Sistema” inawisna ti napasnek nga atension ti tallaong. Impakita dagiti nagpalawag no kasano a naapektaran unay dagiti binilion babaen ti naagum ken naranggas nga espiritu ti lubong. Inton agangay, maukomdanto kas paset ti lubong nga iturturayan ni Satanas. Gapuna, itan ti panawen ti panagpili. Siasino ti pakidasigantayo? Kayattay kadi a dayawen ni Jehova ken itandudo ti kinasoberanona, wenno palubosantay ni Satanas a mangituray kadatayo babaen ti panangaramid kadagiti banag a makaay-ayo kenkuana? Agtakdertayo koma amin nga awan panagalla-alla iti dasig ni Jehova.

Ti palawag publiko iti kombension nga, “Idaydayawyo ti Ari ti Kinaagnanayon!” impaayanna amin a timmabuno iti nakired a taraon iti isip. Nupay kasla di matarusan dagiti nakapuy a tao ti kapanunotan iti kinaagnanayon, naan-anay a matarusan ni Jehova dayta. “Ni Jehova isu ti Ari nga agnanayon nga awan inggana,” inkanta ti salmista. (Salmo 10:16) Daytoy nga Ari ti kinaagnanayon ti nanglukat iti dana tapno tagiragsaken ti sangatauan ti biag nga agnanayon baeten iti Anakna, ni Jesu-Kristo. (Juan 17:3) “Wen, datayo a managbasol a tattao mabalintayo a gun-oden ti biag nga agnanayon babaen ti nadiosan nga edukasion ken pammati iti daton a subbot ni Jesus,” kinuna ti nagpalawag.

Bayat nga immadani ti panagpatingga ti kombension, napabileg dagidiay timmabuno babaen ti maudi a palawag a napauluan iti “Siraragsak nga Idaydayaw ni Jehova iti Inaldaw-aldaw.” Makaparagsak ti umawat kadagiti report iti nagrang-ayan ti trabaho a panagaramid-adalan iti intero a daga. Ket natignay dagiti kombensionista a ‘mangitan-ok ken Jehova tunggal aldaw ken mangidaydayaw iti naganna iti agnanayon.’​—Salmo 145:2.

Dagiti nakaal-alingget a kinaranggas ti mangrabsut ti rag-o ti lubong. Nupay kasta, dagiti indibidual nga addaan iti naan-anay a pammati ken Jehova mabalinda a gun-oden ti nadiosan a rag-o. Kas sangalubongan nga agkakabsat, mabalinan ngarud dagiti Saksi ni Jehova nga uliten dagiti sumaganad a sasao ti Salmo 35:27, 28: “Umsiagda koma iti rag-o ken maragsakanda dagiti makianamong itoy sililinteg a panggepko, wen, kunaenda kadi a kankanayon: ‘Ni Jehova maitan-ok koma, isu a pagayatanna ti kinarang-ay ti adipenna.’ Ket ti dilak sarsaritaennanto ti kinalintegmo ken ti pannakaidayawmo iti bayat ti aldaw.”

[Dagiti ladawan iti panid 7]

Magunggonaan dagiti pamilia iti broshur a “Dagiti Saksi ni Jehova ken ti Edukasion”

[Dagiti ladawan iti panid 8, 9]

Idatag ti baro a libro a, “Pannakaammo a Mangiturong iti Biag nga Agnanayon,” dagiti kinapudno iti Biblia iti makapabileg a pamay-an

[Ladawan iti panid 9]

Adu ti nabautisaran kas panangisimboloda iti dedikasionda ken Jehova

[Ladawan iti panid 9]

Natignay unay dagiti kombensionista iti drama a “Panangraem Kadagidiay Maikari iti Kinalakayda”