“Dagiti Naregta a Manangiwaragawag iti Pagarian” Sirarag-o a Nagtataripnongda

NARIRIBUK ti lubong gapu iti parikut iti moral, ekonomia, ken politika. Ngem iti laksid dagitoy amin a riribuk, nagtataripnong dagiti Saksi ni Jehova maipaay iti natalna a tallo nga aldaw a “Dagiti Naregta a Manangiwaragawag iti Pagarian” a Kombension Distrito. Nangrugi idi Mayo 2002, naaramid dagitoy a panagtataripnong iti intero a lubong.

Talaga a nakaragragsak dagita a kombension. Repasuentayo iti apagbiit ti makapabileg a naibatay-Biblia a programa.

Naigunamgunam iti Umuna nga Aldaw ti Regta ni Jesus

Ti umuna nga aldaw ti kombension ket natemaan iti “Tuladenyo ti Kinaregta ni Jesus nga Apotayo.” (Juan 2:17) Ti palawag a “Pagrag-oanyo ti Agtataripnong kas Manangiwaragawag iti Pagarian” ket sibabara nga inawisna dagiti timmabuno a makiraman iti rag-o a kanayon a pakabigbigan dagiti kombension ti ili ti Dios. (Deuteronomio 16:15) Napasarunuan daytoy a palawag iti interbiu kadagiti naregta a manangaskasaba iti naimbag a damag.

Ti palawag nga “Agragsakkayo iti Napalalo ken Jehova a Mismo” ket bersikulo por bersikulo nga inlawlawagna ti Salmo 37:1-11. Naidagadag a saantayo nga ‘agpudot’ gapu iti agparang a balligi dagiti nadangkes. Nupay mabalin a padaksendatayo dagiti nadangkes, ibatadto ni Jehova no siasino ti matalek nga ilina. Ti palawag nga “Ipakitayo a Managyamankayo” inlawlawagna no kasano a maipakitatayo ti panagyaman iti Dios. Amin a Kristiano masapul a mangipaayda iti “sakripisio ti panagdaydayaw” ken ni Jehova. (Hebreo 13:15) Siempre, ti kaadu ti tiempo nga ipaaytayo iti panagserbi ken ni Jehova agpannuray iti apresasion ken kasasaadtayo.

Napauluan ti pannakatema a palawag iti “Nalapunos iti Regta Dagiti Manangiwaragawag iti Pagarian.” Intampokna ni Jesu-Kristo kas ti kasayaatan nga ulidan no iti kinaregta. Kalpasan a naipasdek idi 1914 ti nailangitan a Pagarian, agkasapulan dagiti pudno a Kristiano iti regta a mangiwaragawag iti naimbag a damag. Tinukoy ti ispiker ti maipapan iti kombension idiay Cedar Point, Ohio, E.U.A., idi 1922, ken impalagipna kadatayo ti nakalallagip nga awag: “Ipablaakyo ti Ari ken ti Pagarianna”! Iti kamaudiananna, ti kinaregta dagiti matalek nga adipen ti Dios tinignayna ida a mangipakaammo kadagiti naisangsangayan a kinapudno maipapan iti Pagarian kadagiti amin a nasion.

Ti palawag a “Ditay Agbuteng ta Ammotayo nga Adda Kadatayo ni Jehova,” a naiparang iti malem ti umuna nga aldaw, impakitana a kangrunaan a puntiria ni Satanas ti ili ti Dios. Ngem iti laksid ti ibubusor kadatayo, ti panangusig kadagiti adu a mapagulidanan iti pammati idi panawen ti Biblia ken iti panawentayo paregtaennatayo a situtured a mangsango kadagiti suot ken sulisog.​—Isaias 41:10.

Simmaganad iti programa ti nagkatlo a paset a simposium iti tema a “Ti Padto ni Mikias Pabilgennatayo a Magna iti Nagan ni Jehova.” Pinagdilig ti umuna nga ispiker ti moral a panagrakaya, narelihiosuan nga apostasia, ken materialismo idi kaaldawan ni Mikias ken iti kaaldawantayo. Kinunana: “Natalged ti namnamatayo iti masanguanan no agtulnogtayo a naimpusuan ken siguraduentayo a nasantuan ti kababalintayo ken napno ti biagtayo kadagiti aramid a pakakitaan iti nadiosan a debosion​—ken no ditay liplipatan a sigurado nga umayto ti aldaw ni Jehova.”​—2 Pedro 3:11, 12.

Ti maikadua nga ispiker iti simposium intampokna ti panangkondenar ni Mikias kadagiti lider ti Juda. Inabusoda dagiti napanglaw, awan gawayna a tattao. Ngem impakpakauna met ni Mikias ti panagballigi ti pudno a panagdayaw. (Mikias 4:1-5) Gapu ta pinabilegnatayo ti nasantuan nga espiritu ni Jehova, determinadotayo a mangiwaragawag iti daytoy makapabang-ar a mensahe ti namnama. Ngem kasanon no adda sakit wenno dadduma pay a manglaplapped kadatayo? Kinuna ti maikatlo nga ispiker: “Nainkalintegan ken saan a narigat a tungpalen dagiti bilin ni Jehova.” Inlawlawagna dagiti nagduduma nga aspeto ti Mikias 6:8, a mabasatayo: “Ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?”

Yantangay mabalin a maapektaran dagiti Kristiano iti moral a panagrakaya ti lubong, nagunggonaantayo amin iti palawag a napauluan “Agtalinaed a Nadalus Babaen ti Panangsaluad iti Pusoyo.” Kas pagarigan, ti panagtalinaedtayo a nadalus tulongannatayo a maaddaan iti naragsak a panagasawa. Kas Kristiano, masapul a ditay man la panunoten ti agaramid iti seksual nga imoralidad.​—1 Corinto 6:18.

Ti palawag nga “Agannadkayo iti Panangallilaw” impakitana a nainsiriban nga ibilangtayo kas sabidong dagiti panangbalusingsing, saan a naan-anay a pudno, ken agdadata a kinaulbod nga isaksaknap dagiti apostata. (Colosas 2:8) Kasta met, masapul a ditay allilawen ti bagbagitayo babaen ti panangpanunot a mabalintayo a penneken ti managbasol a tarigagaytayo nga awan ti ibungana a dakes.

“Agdayawkayo iti Maymaysa a Pudno a Dios” ti paulo ti pangserra a palawag iti umuna nga aldaw. Bayat a dumakdakes ti kasasaad ditoy lubong, anian a makaparegta a maammuan nga asidegen nga iyeg ni Jehova ti nalinteg a baro a lubongna! Siasino ti agnaed iti dayta? Dagiti laeng agdayaw ken Jehova. Kas panangtulong kadatayo, kadagiti annaktayo, ken kadagiti iyad-adalantayo iti Biblia a mangragpat iti daytoy a kalat, inruar ti ispiker ti baro a maadal a libro nga Agdayawkayo iti Maymaysa a Pudno a Dios. Anian ti ragsaktayo a nangawat iti dayta!

Naitampok iti Maikadua nga Aldaw ti Regta Agpaay iti Naimbag

Natemaan ti maikadua nga aldaw ti kombension iti “Naregta a Maipaay iti Naimbag.” (1 Pedro 3:13) Ti umuna nga ispiker inlawlawagna ti teksto ti Biblia para iti dayta nga aldaw. Impaganetgetna nga ad-adda a rumegtatayo babaen ti regular, nabagas a panangusig iti inaldaw a teksto.

Kalpasanna, naiparang ti simposium a “Dagiti Manangiwaragawag iti Pagarian a Mangpadpadayag iti Ministerioda.” Inggunamgunam ti umuna a paset a kasapulan ti panangaramat a siuumiso iti Sao ti Dios. (2 Timoteo 2:15) ‘Adda bileg’ ti Biblia iti biag dagiti tattao no sieepektibo nga usarentayo dayta. (Hebreo 4:12) Nasken nga iturongtayo ti atension iti Biblia ken ikalintegantayo dayta iti makakombinsir a pamay-an. Ti maikadua a simposium indagadagna a sarungkarantayo a kanayon dagiti interesado a tattao. (1 Corinto 3:6) Nasken ti panagsagana ken kinatured tapno masurnadantayo a dagus ti amin a mangipakita iti interes. Ti maikatlo a paset inrekomendana a matmatantayo ti tunggal tao a makasabaantayo kas manamnama nga agbalin nga adalan ken impakitana a ti panangitukon iti panagadal iti Biblia iti damo a pannakisarita ket mabalin a mangiturong iti rag-o iti panangtulong kadagiti indibidual nga agbalin nga adalan.

Natemaan ti sumaganad a palawag iti “No Apay nga ‘Agkararagkayo a Di Agressat.’” Imbalakad ti Biblia kadagiti Kristiano nga agpaiwanwanda iti Dios iti amin nga aspeto ti panagbiagda. Nasken a mangitudingtayo iti kanito maipaay iti pribado a panagkararag. Kanayonanna, masapul a reggetantayo ti agkararag, agsipud ta mabalin a palubosannatayo ni Jehova nga agtultuloy nga agkararag sakbay nga agminar ti sungbatna.​—Santiago 4:8.

Ti palawag a “Makapabileg ti Panagpapatang Maipapan Kadagiti Naespirituan a Banag” indagadagna kadatayo nga usarentayo ti abilidad nga agsao a pakagunggonaantayo ken ti sabsabali. (Filipos 4:8) Nasken nga adda ti inaldaw a naespirituan a panagpapatang dagiti agassawa ken dagiti annak. Tapno maaramid dayta, nasken nga ikagumaan dagiti pamilia nga agsasangoda iti uray maysa a pannangan iti kada aldaw, iti kasta, maaddaanda iti makapabileg a panagpapatang.

Nagngudo ti programa iti agsapa babaen ti makapabileg a palawag a “No Kasano a Mangiturong iti Pannakaisalakan ti Dedikasion ken Bautismo.” Dagiti kandidato iti bautismo nakagun-odda iti pannakaammo, naaddaanda iti pammati, nagbabawida, tinallikudanda ti dakes nga aramid, ken indedikarda ti biagda iti Dios. Kinuna ti ispiker a kalpasan a mabautisaranda, masapul nga itultuloyda ti rumang-ay iti naespirituan ken taginayonenda ti regta ken nasayaat a kababalinda.​—Filipos 2:15, 16.

Iti malem, dua a kangrunaan a punto ti naigunamgunam iti palawag nga “Agbalinkayo a Naemma, ken Pagtalinaedenyo a Simple ti Matayo.” Ti panagbalin a naemma kaipapananna ti kaadda ti realistiko a panangmatmat kadagiti limitasiontayo ken iti saadtayo iti imatang ti Dios. Ti kinaemma tulongannatayo tapno mataginayontayo a “simple” ti matatayo​—naipamaysa iti Pagarian ti Dios, saan a kadagiti material a banag. No aramidentayo daytoy, saan a kasapulan a maringgorantayo, agsipud ta ipaay ni Jehova dagiti kasapulantayo.​—Mateo 6:22-24, 33, 34.

Ti simmaganad nga ispiker impakitana no apay a nasken nga “Agtalektayo a Naan-anay ken Jehova Kadagiti Tiempo ti Rigat.” Kasano a maparmektayo dagiti personal a pagkapuyan ken marisut dagiti problematayo iti pinansial wenno salun-at? Kiddawentayo ken ni Jehova ti praktikal a sirib ken agpatulongtayo kadagiti dadduma. Imbes nga aglagaw wenno mapukawan iti namnama, nasken a pabilgentayo ti panagtalektayo iti Dios babaen ti panangbasa iti Saona.​—Roma 8:35-39.

Ti naudi a simposium ti kombension ket napauluan iti “Ti Kualidad ti Pammatitayo Masubok Babaen Kadagiti Nadumaduma a Pakasuotan.” Impalagip kadatayo ti umuna a paset a maidadanes ti amin a pudno a Kristiano. Agserbi daytoy kas pammaneknek iti sabsabali, pabilgenna ti pammatitayo, ken mangipaay kadatayo iti gundaway a mangipakita iti kinasungdotayo iti Dios. Nupay ditayo isagmak ti biagtayo nga awan gapgapuna, ditay pulos agusar kadagiti di nainkasuratan a wagas tapno maliklikan ti pannakaidadanes.​—1 Pedro 3:16.

Ti maikadua nga ispiker iti daytoy a simposium sinungbatanna dagiti saludsod mainaig iti neutralidad. Saan a pacifista dagiti nagkauna a Kristiano, ngem bigbigenda a ni Jehova ti kangrunaan a pagsungduanda. Kasta met ita, nainget a salsalimetmetan dagiti Saksi ni Jehova ti prinsipio a: “Saankayo a paset ti lubong.” (Juan 15:19) Yantangay mabalin a kellaat a masubok ti neutralidadtayo, masapul a mangituding dagiti pamilia iti tiempo a mangrepaso kadagiti pagalagadan ti Biblia mainaig iti dayta a banag. Kas naipaganetget iti maikatlo a palawag iti simposium, ti panggep ni Satanas ket, saan a tapno papatayennatayo, no di ket tapno parigatennatayo agingga a ditay makapagtalinaed a matalek. Babaen ti simamatalek a panangandur iti panangumsi, imoral a pannulisog, saem, ken saksakit, mapadayawantayo ni Jehova.

Nagserbi kas paulo ti maudi a palawag iti dayta nga aldaw ti nabara nga awis nga “Umadanika ken Jehova.” Mayadanitayo ken Jehova no matarusantayo dagiti kangrunaan a galadna. Us-usarenna ti di nakedngan a bilegna a mangsalaknib iti ilina, nangruna iti naespirituan. Saan a nagubsang ti kinahustisiana no di ket dayta ti mangtigtignay kenkuana a mangipaay iti agnanayon a biag iti siasinoman nga agar-aramid iti kinalinteg. Nabatad ti sirib ti Dios iti wagas a panangusarna kadagiti imperpekto a tattao a mangisurat iti Biblia. Ti ayatna ti kangrunaan a makaay-ayo, a nangtignay kenkuana nga agaramid iti urnos tapno maispal ti sangatauan babaen ken Jesu-Kristo. (Juan 3:16) Nagngudo ti ispiker babaen ti pannakairuar ti makapabileg a baro a libro a napauluan Umadanika ken Jehova.

Ti Maikatlo nga Aldaw Intampokna ti Regta Maipaay iti Nasayaat nga Ar-aramid

Natemaan ti maikatlo nga aldaw ti kombension iti “Maysa nga Ili a Naregta iti Nasayaat nga Ar-aramid.” (Tito 2:14) Nangrugi ti programa iti agsapa babaen ti panangusig ti maysa a pamilia iti teksto iti aldaw. Simmaganad ti palawag a “Ni Jehova Kadi ti Pagtalkanyo?” Sabali ti pagtaltalkan dagiti nasion gapu ta agpampannurayda iti bukodda a sirib ken pigsa. Ngem saan a kasta dagiti adipen ni Jehova. Sireregta ken sirarag-o nga agpannurayda kenkuana iti laksid dagiti kalamidad.​—Salmo 46:1-3, 7-11.

Ti paset a napauluan “Agtutubo​—Ipasdekyo ti Masakbayanyo iti Sidong ti Organisasion ni Jehova” sungbatanna daytoy a saludsod: Kasano a ti agtutubo magun-odna ti kasayaatan iti biag? Saan a posible daytoy babaen ti panagagawa a gumun-od iti kuarta, sansanikua, ken kinatan-ok. Ti Namarsua kadatayo siaayat nga idagdagadagna kadagiti agtutubo a laglagipenda ti Dios bayat nga ubingda pay. Pinagsaludsodan ti ispiker ti sumagmamano a naregta iti Nakristianuan a serbisio bayat ti kinaagtutuboda, ket nadlawtayo ti rag-oda. Anian a makagunggona met a naawattayo ti baro a tract nga, Agtutubo​—Kasanoyo nga Usaren ti Biagyo?, a nairanta a tumulong kadagiti agtutubo a Saksi a mangipasdek iti pundasion maipaay iti agnanayon a masanguanan iti organisasion ni Jehova!

Simmaganad ti makapikapik a drama a naadaw iti Biblia a napauluan “Agtakder a Sititibker Bayat Dagiti Nariribuk a Panawen.” Nangipaay daytoy iti ababa a panangiladawan iti annongen ni Jeremias manipud kinaagtutubona agingga iti pannakadadael ti Jerusalem, a sireregta nga impadtona. Narikna ni Jeremias a saan a kualipikado iti annongenna, ngem intungpalna iti laksid ti ibubusor, ket inispal ni Jehova.​—Jeremias 1:8, 18, 19.

Simmaruno iti drama ti palawag a “Tuladenyo ni Jeremias​—Awanan Buteng nga Iwaragawagyo ti Sao ti Dios.” Dagiti mangiwarwaragawag ita iti Pagarian masansan a puntiria iti kinaulbod ken malisioso a propaganda. (Salmo 109:1-3) Ngem kas ken ni Jeremias, mapagballigiantayo ti pannakaupay babaen ti panangtagiragsak iti Sao ni Jehova. Ken makapagtalektayo a saan nga agballigi dagiti bumusbusor kadatayo.

Pudno a naintiempuan ti palawag publiko a napauluan “Ti Buya Daytoy a Lubong Agbaliwbaliw.” Mapaspasamak iti panawentayo ti dadakkel a panagbalbaliw. Impadto ti Biblia a dagiti kasta a kasasaad, agraman ti panangipukkaw iti “talna ken talged,” ket agturong iti nakaam-amak nga aldaw ti panangukom ti Dios. (1 Tesalonica 5:3) Mangyegto dayta iti nakaskasdaaw a panagbalbaliw​—ti panagpatingga ti amin a gubat, krimen, kinaranggas, ken uray sakit. Gapuna, imbes nga agtalek iti daytoy sistema ti bambanag, daytoy ti tiempo nga itultuloytayo nga ipakita ti nadiosan a debosion ken panangtaginayon iti nadalus a panagbiag.

Kalpasan ti sumario ti artikulo iti panagadal iti Pagwanawanan para iti lawas, nangngegan ti maudi a palawag iti kombension, a napauluan “Aduan iti Nasayaat nga Ar-aramid kas Nareregta a Manangiwaragawag iti Pagarian.” Impaganetget ti ispiker no kasano a ti programa ginutugotnatayo iti naespirituan ken pinaregtanatayo nga agpannuray ken ni Jehova. Kas konklusion, naidagadag nga agbalintayo a nadalus, naayat, ken naregta a manangiwaragawag iti Pagarian ti Dios.​—1 Pedro 2:12.

Buyogen ti kababalin a kas kadagiti adipen ni Jehova idi panawen ni Nehemias, sigurado a nagawidtayo a sirarag-o gapu kadagiti naespirituan a bendision a naawattayo iti “Dagiti Naregta a Manangiwaragawag iti Pagarian” a Kombension Distrito. (Nehemias 8:12) Saan kadi a daytoy a makatukay a kombension linapunosnakayo iti rag-o ken determinasion nga agtalinaed kas naregta a manangiwaragawag iti Pagarian?

[Kahon/Ladawan iti panid 23]

Baro a Katulongan iti Panagadal!

Iti ngudo ti umuna nga aldaw ti kombension, naragsakan dagiti timmabuno gapu iti pannakairuar ti baro a libro nga Agdayawkayo iti Maymaysa a Pudno a Dios. Nairanta daytoy a mayadal kadagidiay nalpasen a nangadal iti libro a Pannakaammo a Mangiturong iti Biag nga Agnanayon ken awan duadua a pabilgenna ti pammati dagidiay “siuumiso nga agannayas iti agnanayon a biag.”​—Aramid 13:48.

[Credit Line]

Ladawan iti akkub ti libro: retrato a kukua ti U.S. Navy

[Kahon/Dagiti Ladawan iti panid 24]

Tulong Tapno Ad-adda a Suminged iti Dios

Ti maudi nga ispiker iti maikadua nga aldaw ti kombension impakaammona ti pannakairuar ti baro a libro nga Umadanika ken Jehova. Saklawenna ti uppat a kangrunaan a benneg, maysa para iti tunggal kangrunaan a galad ni Jehova​—pannakabalin, kinahustisia, sirib, ken ayat. Tunggal benneg ti libro ket addaan iti kapitulo a mangipakita no kasano a nangipaay ni Jesu-Kristo iti nabiag nga ulidan dagiti galad ti Dios babaen ti aramid. Ti kangrunaan a panggep daytoy baro a libro isu ti panangtulongna kadatayo ken kadagiti iyad-adalantayo iti Biblia a maaddaan iti nasingsinged ken nabilbileg a relasion ken ni Jehova a Dios.

[Kahon/Dagiti Ladawan iti panid 26]

Naespirituan a Panangiwanwan Agpaay Kadagiti Agtutubo

Nakallalagip ti maikatlo nga aldaw ti kombension gapu iti pannakairuar ti naisangsangayan a tract a napauluan Agtutubo​—Kasanoyo nga Usaren ti Biagyo? Yantangay nairanta a tumulong kadagiti agtutubo a Saksi a mangaramid kadagiti umiso a pangngeddeng maipapan iti masanguananda, mangipaay daytoy a tract iti Nainkasuratan a balakad no kasano a mangipasdek iti agnanayon a karera iti panagserbi ken Jehova.