Naan-anay a Magunggonaan iti “Dagiti Naregta a Manangiwaragawag iti Pagarian” a Kombension Distrito
1 Makapabileg a Programa: Anian a makapabileg a programa ti tinagiragsaktayo iti kallabes a kombension distrito! Nagtitipontayo nga addaan maymaysa a panggep, tapno ad-adda a makabalan a mangiwaragawag a sireregta iti Pagarian ti Dios. Malagipyo kadi no kasano a dinepinar ti immuna a nagpalawag ti sao nga “iwaragawag”? Iti palawag a “Ditay Agbuteng ta Ammotayo nga Adda Kadatayo ni Jehova,” malagipyo kadi no ania a panagsukimat ti naidagadag nga aramidentayo? Ania dagiti nausigyon a pudno a pakasaritaan ti biag?
2 Iti simposium a “Ti Kualidad ti Pammatitayo Masubok Babaen Kadagiti Nadumaduma a Pakasuotan,” adda naipaay a tallo a kangrunaan a makagapu no apay nga ipalubos ni Jehova ti pannakaidadanes. Mailawlawagyo kadi no ania dagita? Ania ti Nainkasuratan a pakaibatayan ti neutral a takdertayo kas Kristiano? Ania ti naidagadag nga aramidentayo tapno masaganaantayo dagiti karit iti neutral a takdertayo? Kasano a pakaidayawan ni Jehova ti simamatalek a panagibturtayo kadagiti pakasuotan?
3 Aniada nga eksena iti drama nga “Agtakder a Sititibker Bayat Dagiti Nariribuk a Panawen” ti nangnangruna a nakapabileg kadakayo? Kasanotay a matulad ni Jeremias?
4 Iti palawag publiko a, “Ti Buya Daytoy a Lubong Agbaliwbaliw,” ania dagiti nadakamat a dakkel a panagbalbaliw a mapasamak iti masanguanan ken mangiturong iti nakaal-alingget nga aldaw ti Dios? Bayat a dumdumngegkayo iti maudi a palawag nga, “Aduan iti Nasayaat nga Ar-aramid kas Nareregta a Manangiwaragawag iti Pagarian,” kasanoyo nga innaig ti impormasion iti ministerioyo?
5 Dagiti Kangrunaan a Punto nga Iyaplikar: Kas nailawlawag iti palawag nga “Ipakitayo a Managyamankayo,” kasanotay a mayebkas ti naimpusuan a panagyamantayo ken Jehova? Iti pannakatema a palawag a, “Nalapunos iti Regta Dagiti Manangiwaragawag iti Pagarian,” siasino dagiti naidagadag a tuladentayo no maipapan iti kinaregta? Ania ti naidagadag a sukimatentayo maipapan iti bagbagitayo?
6 Iti simposium a “Ti Padto ni Mikias Pabilgennatayo a Magna iti Nagan ni Jehova,” ania dagiti naitampok a tallo a banag a masapul nga aramidentayo tapno anamongannatayo ni Jehova? Kabaelantay kadi nga aramiden dagitoy? (Mik. 6:8) Sigun iti palawag nga “Agtalinaed a Nadalus Babaen ti Panangsaluad iti Pusoyo,” kadagiti ania a pamay-an a masapul nga agtalinaedtayo a nadalus iti moral? Iti palawag nga “Agannadkayo iti Panangallilaw,” kadagiti ania a banag a napakdaarantayo a di paallilaw ken di mangallilaw kadagiti sabsabali?
7 Aniada a praktikal a punto iti simposium a “Dagiti Manangiwaragawag iti Pagarian a Mangpadpadayag iti Ministerioda” ti inyaplikaryon iti ministerioyo? Iti palawag a “Makapabileg ti Panagpapatang Maipapan Kadagiti Naespirituan a Banag,” nausig ti Filipos 4:8. Kasano a makatulong kadatayo dayta a teksto tapno agbalin a naespirituan ti panagpapatangtayo, ken kaanotayo a pagsasaritaan dagiti kasta a banag?
8 Ti palawag nga “Agtalekkayo a Naan-anay ken Jehova Kadagiti Tiempo ti Rigat” sinalaysayna no kasanotay a madaeran dagiti didigra, kinarigat ti biag, sakit, parikut iti pamilia, ken dagiti pagkapuyan. Kasanotay a maipakita ti panagtalektayo ken Jehova no maipasangotayo kadagitoy a kasasaad?
9 Dagiti Baro a Naespirituan a Gameng: Naragsakantayo nga immawat iti baro a libro nga Agdayawkayo iti Maymaysa a Pudno a Dios. Ania ti epektona kadakayo ti pakaammo a nangilawlawag iti panggep dayta a libro? Apay a makatulong dayta iti trabahotayo a panagaramid kadagiti adalan kas maikadua a maadal a libro?
10 Kalpasanna, inawattayo ti napintas a libro nga Umadanika ken Jehova. Ania ti dadduma kadagiti naisangsangayan a pasetna? Ania dagiti ilustrasion a nangnangruna a magustuanyo? Ti kadi panangbasayo iti dayta ad-adda nga inyadaninakayo ken Jehova? Siasino pay ti mabalin a magunggonaan iti dayta?
11 Ti “Dagiti Naregta a Manangiwaragawag iti Pagarian” a Kombension Distrito impaayannatayo iti naespirituan a pammaregta a kasapulantayo kadagitoy narikut a tiempo. Tapno naan-anay a magunggonaantayo iti daytoy naisangsangayan a naespirituan a probision, ikagumaantayo koma a lagipen dagiti nangngegantayo, apresiaren dagiti naawattayo, ken iyaplikar dagiti nasursurotayo. (2 Ped. 3:14) Ti panangaramid iti kasta pabilgennatayo nga agtalinaed a natarnaw ken agbalin a naregta a manangiwaragawag iti Pagarian kas panangtulad ken ni Jesu-Kristo nga Apotayo, a pakaidayawan amin ni Jehova.—Fil. 1:9-11.