Maaw-awiskayo iti “Dagiti Naregta a Manangiwaragawag iti Pagarian” a Kombension Distrito
ITI PILIPINAS laengen, 63 a kombension ti nayeskediul. Maangay ti umuna inton Nobiembre 22-24, 2002 ket inton Enero 10-12, 2003 ti maudi. Mabalin a maangay iti siudad nga asideg kadakayo ti maysa kadagitoy a tallo nga aldaw a taripnong—a kaaduanna ket maangay iti Biernes agingga iti Domingo.
Mangrugi dagiti sesion babaen ti musika iti alas 8:30 ti bigat. Iti umuna nga aldaw, ti panglukat a palawag ket sarunuen ti paset a mangitampok iti pannakainterbiu dagiti manangiwaragawag iti Pagarian. Kalpasan dagiti palawag nga “Agragsakkayo iti Napalalo ken Jehova a Mismo” ken “Ipakitayo a Managyamankayo,” agngudo ti sesion iti agsapa babaen ti pannakatema a palawag a “Nalapunos iti Regta Dagiti Manangiwaragawag iti Pagarian.”
Ti sesion iti malem ti Biernes ket ramanen ti nagkatlo a simposium a, “Ti Padto ni Mikias Pabilgennatayo a Magna iti Nagan ni Jehova,” agraman dagiti palawag nga “Agtalinaed a Nadalus Babaen ti Panangsaluad iti Pusoyo” ken “Agannadkayo iti Panangallilaw.” Kamaudiananna, adda maipaay a nagsayaat a tulong a mainaig iti Nakristianuan a ministerio kabayatan ti maudi a palawag iti dayta nga aldaw a napauluan iti, “Agdayawkayo iti Maymaysa a Pudno a Dios.”
Nairaman iti sesion iti agsapa ti Sabado ti nagkatlo a simposium a “Dagiti Manangiwaragawag iti Pagarian a Mangpadpadayag iti Ministerioda.” Sarunuen dayta dagiti makaparegta a palawag a “No Apay nga ‘Agkararagkayo a Di Agressat’” ken “Makapabileg ti Panagpapatang Maipapan Kadagiti Naespirituan a Banag.” Mailawlawag met iti programa iti agsapa ti dedikasion ken bautismo, ket kalpasanna, mabautisaran dagiti kualipikado nga indibidual.
Itampok ti programa iti malem ti Sabado ti maudi a nagkatlo a simposium ti kombension a, “Ti Kualidad ti Pammatitayo Masubok Babaen Kadagiti Nadumaduma a Pakasuotan.” Dagita a paset ket tumulong kadagiti Kristiano a mangsaranget iti karit ti panagtalinaed a neutral. Agngudo ti programa iti Sabado babaen ti tampok ti kombension nga isu ti makaparagsak a palawag nga “Umadanika ken Jehova.”
Dagiti agtutubo ti kangrunaan a nakaiturongan ti programa iti agsapa ti Domingo babaen kadagiti panglukat a palawag a “Ni Jehova Kadi ti Pagtalkanyo?” ken “Agtutubo—Ipasdekyo ti Masakbayanyo iti Sidong ti Organisasion ni Jehova.” Ti maudi a paset ket pakairamanan ti 20 a minuto nga interbiu. Sarunuen daytoy ti maysa a full-costume a drama maipapan ken Jeremias, a nagkuna iti, “maysaak laeng nga ubing,” idi nadutokan kas maysa a mammadto. (Jeremias 1:6) Kalpasanna, adda palawag a mangitampok iti mensahe ti drama. Itampok ti programa iti malem ti palawag publiko a “Ti Buya Daytoy a Lubong Agbalbaliw.”
Sigurado a mapabaknang ti espiritualidadyo no dar-ayanyo ti amin a tallo nga aldaw. Tapno maammuanyo ti pakaangayan ti kombension a kaasitgan iti pagtaenganyo, makiumankayo iti Kingdom Hall dagiti Saksi ni Jehova iti lugaryo wenno agsuratkayo kadagiti mangipabpablaak iti daytoy a magasin.