Dandanin ti 1998-1999 a “Dalan ti Dios iti Biag” a Kombension!
IDIAY Estados Unidos laeng, 198 a kombension ti nayeskediul manipud Mayo agingga iti Setiembre. Nalabit, maangayto ti maysa kadagitoy a tallo nga aldaw a taripnong iti siudad nga asideg iti pagtaenganyo. Iti kaaduan a lugar, mangrugi ti programa iti kada aldaw—Biernes agingga iti Domingo—babaen ti musika iti alas 9:30 t.b.
Ti programa iti agsapa ti Biernes itampokna dagiti report iti irarang-ay ti panangikasaba iti Pagarian iti nadumaduma a paset ti lubong. Ket maipaganetgetto ti tema ti kombension iti panulbek a palawag a “Pangsubbot ni Kristo—Dalan ti Dios iti Pannakaisalakan.”
Iti malem, ti simposium a “Nagannak—Itukityo ti Dalan ti Dios Kadagiti Annakyo” mangipaay kadagiti singasing no kasano a gutugoten dagiti agtutubo tapno ayatenda ni Jehova ken agserbida kenkuana. Agngudo ti programa iti malem babaen ti palawag nga “Adda Kadi Biag Kalpasan ti Ipapatay?”
Ti programa iti agsapa ti Sabado itampokna ti trabaho dagiti Saksi ni Jehova a panagaramid adalan iti tallo nga agsasaruno a paset, “Panangtulong Kadagiti Tattao a Magna iti Dalan nga Agturong iti Biag,” “Ti Karit a Panangdanon Kadagiti Tattao,” ken “Panangisuro Kadagiti Adalan Maipapan iti Amin nga Imbilin ni Kristo.” Iti ngudo ti programa iti agsapa, addanto probision iti pannakabautisar dagiti baro nga adalan.
Ti panglukat a palawag iti malem ti Sabado a “Panagserbi a Buyogen ti Namnama a Biag nga Awan Inggana” paregtaennatayo a sipapasnek a mangutob no ania dagiti personal a makagapu iti panagserbitayo iti Dios. Dagiti palawag a “Panangapresiar Kadagiti ‘Sagut a Tattao,’ a Mangisuro iti Dalan ti Dios” ken “Personalidad—Ikkaten ti Daan ket Ikawes ti Baro” ipaayda ti makaiwanwan a bersikulo por bersikulo a panangusig iti Efeso kapitulo 4. Sumaganad, addanto nagsayaat a Nainkasuratan a pammagbaga iti palawag nga “Agtalinaedkayo nga Awan Mulitna Manipud iti Lubong” ken iti nagkatlo a paset a simposium nga “Agtutubo—Surotenyo ti Dalan ti Dios.” Agngudo ti programa iti malem babaen ti palawag a “Ti Namarsua—Ti Personalidad ken Daldalanna.”
Ti programa iti agsapa ti Domingo itampokna ti nagkatlo a paset a simposium a mangusig kadagiti maudi a kapitulo ti libro ti Biblia nga Ezequiel agraman ti naimpadtuan a pakayaplikaranda. Agngudo ti programa iti agsapa babaen ti napintas a drama a naibatay iti kinamatalek dagiti tallo nga agtutubo a Hebreo. Ti tampok ti kombension iti malem isu ti palawag publiko a “Ti Kakaisuna a Dalan nga Agturong iti Biag nga Agnanayon.”
Sigurado a mapabaknangkayo iti naespirituan babaen ti itatabunoyo iti tallo nga aldaw. Abrasaendakayo a naimpusuan iti kada sesion, ken siempre, matabunuanyo amin dayta nga awan bayadna. Tapno maammuanyo ti pagkombensionan a kaasitgan iti pagtaenganyo, makiumankayo iti lokal a Kingdom Hall dagiti Saksi ni Jehova wenno suratanyo dagiti managipablaak iti daytoy a magasin.