Dumar-aykayo iti “Pammati iti Sao ti Dios” a Kombension Distrito!
MINILION ti agtataripnongto iti ginasut a disso iti intero a lubong. Iti laengen Pilipinas, 49 a kombension ti nayeskediul. Maangay ti umuna inton Disiembre 19-21, 1997, ket ti maudi, inton Enero 2-4, 1998. Nalabit maangayto iti siudad nga asideg iti pagnanaedanyo ti maysa kadagitoy tallo-aldaw a panagtataripnong—manipud Biernes agingga iti Domingo.
Mabenepisiarankayto iti nawadwad a praktikal a pannursuro a naibatay iti Biblia. Iti kaaduan a lugar, mangrugi ti programa iti kada bigat babaen ti musika iti 8:30. Iti bigat ti Biernes, maidatag ti 25 a minuto nga interbiu kadagiti tattao a ti pammatida iti Sao ti Dios dakkel ti epektona iti biagda. Magibusan dayta nga umuna a sesion iti panulbek a palawag a, “Pannagna Babaen ti Pammati, Saan a Babaen ti Panagkita.”
Iti umuna a palawag iti malem ti Biernes, mausig ti napateg a paset dagiti agtutubo iti kongregasion Kristiano. Ti sumaganad a nagkatlo-pasetna a simposium salaysayenna dagiti pagalagadan ti Biblia iti panagsasao, kababalin, ken panaglanglanga dagiti Kristiano. Kalpasanna, iti palawag nga “Agannadkayo iti Kinaawan Pammati” ken “Nabiag ti Sao ti Dios,” masalaysay ti nasayaat a pammagbaga iti Hebreo kapitulo 3 ken 4. Magibusan ti programa iti Biernes babaen ti diskurso a “Libro Para iti Amin a Tao.”
Ti umuna a palawag iti bigat ti Sabado ket “Ti Pammati nga Awanan Ar-aramid ket Natay.” Ti sabali pay a napateg a diskurso iti dayta a bigat, “Mairamut ken Mapatibkerkayo Koma iti Kinapudno,” ilawlawagna no kasanotayo a rumang-ay iti naespirituan. Magibusan ti sesion iti regular a paset ti kombension, “Ti Pammati iti Sao ti Dios Mangiturong iti Bautismo,” kalpasanna adda maaramid nga urnos iti pannakabautisar dagiti baro nga adalan.
Ti panglukat a palawag iti malem ti Sabado, “Makidangadangkay a Sipipinget Maipaay iti Pammati,” salaysayenna ti pammagbaga ti libro ti Biblia a Judas. Ti maysa nga oras a simposium a napauluan “Mapantayo iti Balay ni Jehova” ilawlawagna dagiti gunggona nga itden dagiti Nakristianuan a gimong. Magibusan ti programa iti dayta nga aldaw iti diskurso a “Ti Kalidad ti Pammatiyo—Masubsuboken.”
Iti bigat ti Domingo, maidatag ti nagkatlo-pasetna a simposium a mangsalaysay iti libro ti Biblia a Joel, agraman ti kaitungpalanna iti kaaldawantayo. Sa sumaruno ti drama a naibatay iti Biblia a napauluan “Pagtalinaedenyo a Simple ti Matayo.” Iti malem, maitampok iti kombension ti palawag publiko a, “Ti Pammati ken ti Masanguananyo.”
Sigurado a magunggonaankayo iti naespirituan no tumabunokayo. Naimpusuan a maabrasakayo iti amin a sesion. Iplanoyo itan ti idadar-ayyo. Para iti lokasion a kaasitgan iti pagtaenganyo, makiumankayo iti lokal a Kingdom Hall dagiti Saksi ni Jehova wenno agsuratkayo kadagiti agipabpablaak iti daytoy a magasin. Masarakanyo met dagiti pakaangayan ti kombension iti Disiembre 8 a ruar ti Agriingkayo!