Maabrasakayo iti “Makipagnakayo iti Dios” a Kombension Distrito
◼ Minilion ti tumabuno iti ginasut a pakaangayanna iti intero a lubong. Ti umuna iti 67 a tallo-aldaw a kombension iti Pilipinas ket maangay inton Nobiembre 19-21, ken inton Enero 7-9, 2005 ti maudi. Mabalin a maysa kadagitoy tallo-aldaw a taripnong—a kaaduanna, maangay iti Biernes inggat’ Domingo—ket maangay iti siudad nga asideg iti lugaryo.
Iti kaaduan a lugar, mangrugi ti programa iti alas 8:30 ti agsapa ti kada aldaw babaen iti musika. Ti tema iti Biernes ket “Daytoy ti Dalan. Magnakayo iti Dayta.” Ti panglukat a palawag a “Naguummongtayo Tapno Isuro Kadatayo ni Jehova Dagiti Dalanna,” ti sarunuen ti maysa a paset a manginterbiu kadagiti sisusungdo a makipagpagna iti Dios. Kalpasan dagiti palawag nga “Itultuloyyo a Paneknekan no Aniakayo” ken “Inaldaw nga Agpaidalankayo iti Sao ti Dios,” agturpos ti sesion iti agsapa babaen ti pannakatema a palawag a “Makipagnakayo iti Dios Kadagitoy Nariribuk a Tiempo.”
Karaman iti sesion ti Biernes ti nagkatlo a paset a simposium a “Ti Padto ni Oseas Tulongannatayo a Makipagna iti Dios.” Kalpasanna, maipalawagto ti “Saanyo a Pagsinaen ti ‘Pinagtipon ti Dios’” ken “Panagraem Kadagiti Sagrado a Taripnongtayo.” Ti pangserra a palawag a “Naimbag a Damag Para Kadagiti Tattao iti Amin a Nasion,” ti mangparegta tapno maidanon ti naimbag a damag kadagiti tattao iti amin a pagsasao.
Ti tema iti Sabado ket “Itultuloyyo nga Aluadan a Siiinget ti Pannagnayo.” Ti simposium iti agsapa a “Pannagna a Progresibo kas Ministro,” ramanenna ti paset a mangipaay iti dadduma pay a singasing iti panangdanon kadagidiay sabali ti pagsasaoda. Agserra ti programa iti agsapa babaen ti napateg a palawag a “Pannakitulag a Makipagna ken ni Jehova.” Kalpasanna, addanton gundaway dagiti kualipikado a tattao tapno agpabautisar.
Dagiti palawag iti malem ti Sabado ramanenna ti “Liklikanyo ti ‘Aniaman a Pakaigapuan ti Pannakaitibkol’” ken “Dagiti Makaay-ayo nga Aktibidad a Makapabang-ar.” Dagiti sumaganad a paset a “Ni Jehova ti Pastortayo,” “Gatangenyo ti Nainggundawayan a Tiempo,” ken “Pannagna iti Dana ti Rumanraniag a Lawag,” ti mangiparang kadagiti makaparegta nga interbiu. Agngudo ti sesion babaen ti mamagpanunot a palawag nga “‘Agtultuloykayo nga Agbantay’—Dimtengen ti Oras ti Panangukom.”
Ti tema iti programa ti Domingo nga “Agtultuloykayo a Magna iti Kinapudno,” ket naipaganetget iti palawag nga “Agtutubo—Magnakayo iti Dana ti Kinalinteg.” Sumaganad ti full-costume a drama a mangitampok iti ministerio ni apostol Pablo. Kalpasan dayta, addanto palawag a mangipaganetget kadagiti leksion manipud iti drama. Ti programa iti malem ti mangitampok iti diskurso publiko a “Ti Pannakipagna iti Dios Mangyeg Kadagiti Gunggona Ita ken iti Agnanayon.”
Tapno maammuanyo ti pakaangayan ti kombension a kaasitgan iti lugaryo, mabalinyo ti makiuman iti Kingdom Hall dagiti Saksi ni Jehova iti lugaryo wenno agsuratkayo kadagiti nangipablaak iti daytoy a magasin.