Nagkaykaysa iti Panagserbi iti Dios Kabayatan Dagiti Panawen ti Nam-ay ken Rigat

Kas insalaysay da Michel ken Babette Muller

“ADDA dakes nga ipadamagko kadakayo,” kinuna ti doktor. “Lipatenyon ti maipapan iti panagmisioneroyo idiay Africa.” Iti panangkitana ken ni baketko, a Babette, kinunana, “Adda kanser ti susom.”

Saan a mailadawan ti pannakakellaatmi. Adu a banag ti simmiplot iti panunotmi. Impagarupmi a daytoy nga isasarungkar iti doktor maysa laeng a maudi a panagpa-checkup. Nagatangen dagiti tiketmi nga agsubli idiay Benin, Akinlaud nga Africa. Ninamnamami a makasublikami sadiay iti dayta met la a lawas. Bayat ti 23 a tawen a panagasawami, napasaranmi dagiti panawen ti nam-ay ken rigat. Nupay maburiboran ken mabutbuteng, insaganami itan ti bagbagimi iti pannakidangadang maibusor iti kanser.

Rugiantay iti damo. Naipasngay ni Michel idi Setiembre 1947, ni Babette idi Agosto 1945. Dimmakkelkami idiay France ket nagkallaysakami idi 1967. Nagnaedkami idiay Paris. Maysa nga agsapa idi rugrugi ti 1968, naladaw iti trabaho ni Babette. Immasideg ti maysa a babai iti ruangan ket nangitukon kenkuana iti narelihiosuan a broshur; inawatna dayta. Kalpasanna kinuna ti babai: “Mabalin kadi nga agsubliakto a kaduak ni lakayko tapno makisaritakami kadakayo ken ni lakaymo?”

Pampanunoten ni Babette ti trabahona. Kayatnan a pumanaw ti babai, gapuna kinunana, “OK, OK.”

Isalaysay ni Michel: “Awan interesko iti relihion, ngem naawis ti atensionko iti broshur, ket binasak dayta. Kalpasan ti sumagmamano nga aldaw, nagsubli ti babai, ni Joceline Lemoine, a kaduana ni lakayna, a Claude. Nasigo unay [ni Claude] iti panangaramatna iti Biblia. Adda sungbatna kadagiti amin a saludsodko. Nasdaawak.

“Napeklan a Katoliko ni Babette ngem awan Bibliana, a gagangay laeng kadagiti Katoliko. Magagaran unay a makakita ken mangbasa iti Sao ti Dios. Nasursuromi iti panagadalmi nga ulbod ti adu kadagiti narelihiosuan nga ideya a naisuro kadakami. Rinugianmi nga isarita kadagiti kabagian ken gagayyemmi dagiti banag a nasursuromi. Idi Enero 1969, nagbalinkam a nabautisaran a Saksi ni Jehova. Siam kadagiti kabagian ken gagayyemmi ti nabautisaran di nagbayag kalpasan dayta.”

Panagserbi iti Lugar nga Agkasapulan Kadagiti Manangaskasaba

Di nagbayag kalpasan ti pannakabautisarmi, napanunotmi: ‘Awan anakta. Apay a dita sumrek iti amin-tiempo a ministerio?’ Gapuna idi 1970, pinanawanmi ti trabahomi, nagpasalista kas regular pioneer, ket immakarkami iti bassit nga ili ti Magny-Lormes, asideg iti Nevers, iti sentro ti France.

Maysa dayta a narigat a teritoria. Narigat a masarakan dagiti tattao nga agtarigagay nga agadal iti Biblia. Dikam makasarak iti pagtrabahuan, gapuna a bassit ti kuartami. No dadduma, patatas laeng ti taraonmi. No panawen ti lam-ek bumaba ti temperatura agingga iti twenty-two degrees below zero Centigrade. Inawaganmi ti panawen a binusbosmi sadiay a kas ti panawen dagiti pito a nakuttong a baka.​—Genesis 41:3.

Ngem sinaranaynakam ni Jehova. Maysa nga aldaw, idi gistay awanen ti taraonmi, nangitulod ti kartero iti maysa a dakkel a kahon ti keso a naggapu iti kabsat a babai ni Babette. Iti maysa pay nga aldaw a panagawidmi kalpasan ti panangasaba, nadanonmi ti sumagmamano a gagayyem a nagdaliasat iti 500 a kilometro tapno kumita kadakami. Gapu ta nadamagda ti kinarigat, pinunno dagitoy a kakabsat ti dua a kotseda iti taraon agpaay kadakami.

Kalpasan ti makatawen ket kagudua, dinutokannakam ti Sosiedad kas special pioneer. Iti simmaganad nga uppat a tawen, nagserbikam idiay Nevers, kalpasanna idiay Troyes, ken kamaudiananna idiay Montigny-lès-Metz. Idi 1976, nadutokan ni Michel nga agserbi kas manangaywan iti sirkito iti akin-abagatan a laud ti France.

Kalpasan ti dua a tawen, kabayatan ti panagadal dagiti manangaywan ti sirkito, nakaawatkami ti surat manipud iti Watch Tower Society a mangaw-awis kadakami a mapan iti sabali a pagilian kas misionero; kinuna ti surat a mabalinmit’ agpili iti Chad ken Burkina Faso (Upper Volta idi). Pinilimi ti Chad. Di nagbayag nakaawatkam iti sabali pay a surat, a mangdutdutok kadakami nga agtrabaho iti sidong ti sanga ti Tahiti. Indawatmi ti Africa, maysa a dakkel a kontinente, ngem di nagbayag naibaonkami iti maysa a bassit a puro!

Panagserbi iti Abagatan a Pacifico

Maysa a napintas a tropikal a puro ti Tahiti iti Abagatan a Pacifico. Idi sumangpetkami, agsangagasut a kakabsat ti adda idiay eropuerto a sumabet kadakami. Sinarabodakami babaen kadagiti kuentas a sabong, ket nupay nabannogkami kalpasan ti naunday a panagdaliasat manipud idiay France, kasta unay ti ragsakmi.

Uppat a bulan kalpasan a simmangpetkami idiay Tahiti, naglugankam iti bassit a bangka nga adda layagna a nagkarga kadagiti kopra. Kalpasan ti lima nga aldaw nakagtengkami iti baro a destinomi​—ti puro ti Nuku Hiva iti Marquesas Islands. Ag-1,500 a tattao ti agnanaed iti puro, ngem awan ti kakabsat. Dakami laeng.

Inuugma dagiti kasasaad iti dayta a panawen. Nagnaedkami iti bassit a balay a naaramid iti semento ken kawayan. Awan ti elektrisidad. Adda gripomi a maaramat sagpaminsan, ngem napitak ti danum. Kaaduanna, nagusarkam iti tudo a naurnong iti tangke. Awan ti sementado a dalan, basta desdes laeng.

Tapno madanon dagiti adayo a paset ti puro, masapul a mangabangkami kadagiti kabalio. Naaramid iti kayo dagiti silia​—talaga a saan a komportable, nangnangruna ken Babette, a dina pay napadasan idi ti nagsakay iti kabalio. Nangitugotkam iti buneng a pagputed kadagiti kawayan a naibangen iti dalan. Maysa a dakkel a panagbalbaliw manipud iti biag idiay France.

Nangangaykami kadagiti gimong kada Domingo, nupay dakami laeng a dua ti tumabuno. Idi damo saanmi nga inangay ti dadduma a gimong tangay duakami laeng. Imbes ketdi, sangsangkamaysa a basaenmi dagiti material iti gimong.

Kalpasan ti sumagmamano a bulan, inkeddengmi a saan a nasayaat nga agtultuloy a kasta. Isalaysay ni Michel: “Kinunak ken Babette, ‘Kasapulan nga agkawesta a naimbag. Agtugawka dita, ket agtugawak ditoy. Rugiak iti kararag, ket kalpasanna ikonduktata ti Teokratiko nga Eskuelaan ti Panagministro ken ti Gimong iti Serbisio. Siak ti agsaludsod, ket sika ti sumungbat, uray no siksika laeng ti kaduak ditoy siled.’ Naimbag ta inaramidmi ti kasta gapu ta nalaka ti agbalin a naliway iti naespirituan no awan ti kongregasion.”

Nabayag sakbay nga addada tattao a timmabuno kadagiti Nakristianuan a panaggigimongmi. Dakam laeng a dua iti las-ud ti immuna a walo a bulan. Kalpasanna, kinaduanakami ti maysa, dua, wenno no dadduma tallo a sabsabali pay. Makatawen, rinugianmi ti tinawen a panangrambak iti Pangrabii ti Apo a duakam laeng. Kalpasan ti sangapulo a minuto, dimteng ti sumagmamano a tattao, gapuna insardengko sa rinugiak manen ti agpalawag.

Ita, adda 42 nga agibumbunannag ken 3 a kongregasion idiay Marquesas Islands. Nupay inaramid dagiti simmaganad kadakami ti kadakkelan a paset ti trabaho, nabautisaran itan ti sumagmamano a tattao a nakasarsaritami idi.

Napateg Dagiti Kakabsattayo

Nasursuromi ti aganus idiay Nuku Hiva. Masapul nga urayenmi ti amin malaksid kadagiti kangrunaan unay a kasapulan. Kas pagarigan, no kayatyo ti libro, masapul nga agsuratkayo agpaay iti dayta, kalpasanna aguraykayo iti dua wenno tallo a bulan sakbay a sumangpet.

Ti kinapateg dagiti kakabsattayo ti maysa pay nga adal a nasursuromi. Idi simmarungkarkami idiay Tahiti ken timmabuno iti gimong ket nangngegmi ti panagkanta dagiti kakabsat, napaluakami. Mabalin a pudno a narigat a pakilangenan ti sumagmamano a kakabsat, ngem no agmaymaysakayo, mautobyo no kasanot’ kinasayaat ti pannakitimpuyog kadagiti kakabsat. Idi 1980, inkeddeng ti Sosiedad a masapul nga agsublikami idiay Tahiti ket agserbi iti trabaho iti sirkito. Sadiay a naparegtakami unay iti nabara a kinamanagpadagus dagiti kakabsat ken iti panangipategda iti trabaho a panangasaba. Tallo a tawen ti binusbosmi iti trabaho iti sirkito idiay Tahiti.

Iti Pinurunpuro

Simmaganad naidestinokami iti maysa a pagtaengan ti misionero idiay Raïatéa, sabali pay a puro iti Pacifico, ket nagtalinaedkam sadiay iti agarup dua a tawen. Kalpasan ti Raïatéa, natudingankami iti trabaho iti sirkito kadagiti puro ti Tuamotu. Sinarungkaranmi ti 25 kadagiti 80 a puro babaen ti bangka. Narigat daytoy para ken Babette. Agsakit tunggal agdaliasat babaen ti bangka.

Kuna ni Babette: “Talaga a terible! Kanayon nga agsakitak tunggal aglugankami iti bangka. No lima nga aldawmi idiay baybay, lima nga aldaw nga agsakitak. Awan sumamay nga agas kaniak. Nupay kasta, iti laksid ti sakitko, kaay-ayok ti kinapintas ti taaw. Maysa daytoy a nakaskasdaaw a buya. Makilinnumba iti bangka dagiti dolphin. Masansan a lumagtoda manipud iti danum no agpalakpakkayo!”

Kalpasan ti lima a tawen iti trabaho iti sirkito, natudingankami manen iti dua a tawen idiay Tahiti ket naragsakankami manen iti trabaho a panangasaba. Nagdoble dagiti agibumbunannag iti kongregasionmi manipud iti 35 agingga iti 70 iti las-ud ti makatawen ket kagudua. Sangapulo ket dua kadagiti inyadalanmi iti Biblia ti nabautisaran sakbay a pimmanawkami. Papanglakayen itan iti kongregasion ti sumagmamano kadakuada.

No dagupen nakabusboskami iti 12 a tawen idiay Abagatan a Pacifico. Kalpasanna nakaawatkam ti surat manipud iti Sosiedad a mangibagbaga a saandan a kasapulan dagiti misionero kadagiti puro tangay nabileg itan dagiti kongregasion. Ag-450 ti agibumbunannag idiay Tahiti idi dimtengkami ket nasurok a 1,000 idi pimmanawkami.

Ti Africa iti Kamaudiananna!

Nagsublikami idiay France, ket kalpasan ti makabulan ket kagudua, inikkannakam ti Sosiedad iti baro a pakaidestinuan​—Benin, Akinlaud nga Africa. Tinarigagayanmi idi ti mapan idiay Africa 13 a tawenen ti napalabas, gapuna nakaragragsakkami unay.

Dimtengkami idiay Benin idi Nobiembre 3, 1990, ket nairamankami kadagiti immuna a misionero a dimteng kalpasan a naikkat ti 14 a tawen a panangipawil iti trabaho a panangikasaba iti Pagarian. Talaga a makapagagar. Awan parikut iti panagnaedmi gapu ta ti panagbiag umasping kadagiti puro iti Pacifico. Mannakigayyem ken managpadagus unay dagiti tao. Mabalinmo ti agsardeng ken makisarita iti asinoman iti lansangan.

Sumagmamano laeng a lawas kalpasan ti isasangpetmi idiay Benin, adda nadlaw ni Babette a bukol iti susona. Gapuna napankami iti maysa a bassit a klinika iti asideg ti kaipatpatakder a sanga nga opisina. Sinukimat ti doktor ket kinunana a masapul nga insigida a maoperaan. Iti kabigatanna napankami iti sabali pay klinika a sadiay nakitami ti maysa a Europeo a doktor, maysa a gynecologist manipud idiay France. Kinunana met a masapul nga agawidkami a dagus idiay France tapno maoperaan ni Babette. Kalpasan ti dua nga aldaw addakamin iti eroplano nga agturong idiay France.

Nalidaykami a pimmanaw idiay Benin. Gapu iti kabbaro a wayawaya ti relihion iti pagilian, nagagaran dagiti kakabsat a maaddaan kadagiti baro a misionero, ket naragsakankam nga agnaed sadiay. Gapuna a naglidaykami idi kasapulan a pumanawkami kalpasan ti kaaddami iti pagilian iti sumagmamano a lawas laeng.

Idi nakasangpetkami idiay France, sinukimat ti siruhano ni Babette ket pinatalgedanna a kasapulan a maoperaan. Insigida a nagtignay dagiti doktor, a naaramid ti maysa a bassit nga operasion, ket pinaruarda ni Babette iti ospital iti simmaganad nga aldaw. Impagarupmi a nalpasen ti amin.

Kalpasan ti walo nga aldaw, nakipagkitami iti siruhano. Kadaydi nga imbagana nga adda kanser ti suso ni Babette.

Iti pananglagip no kasanot’ panagriknana kadaydi, kuna ni Babette: “Idi damo, nakalkalmaak ngem ni Michel. Ngem kadaydi aldaw a naammuak dayta dakes a damag, awan aniaman a mariknak. Diak makasangit. Diak makaisem. Ti kunak matayakon. Para kaniak, ti kanser katupagnan ti ipapatay. Ti kapanunotak, Masapul nga aramidenmi ti rumbeng nga aramidenmi.”

Ti Pannakidangadang iti Kanser

Naammuanmi ti dakes a damag iti Biernes, ket nakaiskediul ni Babette tapno maoperaan iti maikadua a gundaway iti Martes. Nakidaguskami iti manang ni Babette, ngem masaksakit met, gapuna saan a mabalin nga agtultuloy a makidaguskami iti bassit nga apartment-na.

Pinanunotmi no sadino ti papananmi. Kalpasanna nalagipmi da Yves ken Brigitte Merda, maysa a pagassawaan a nagdagusanmi idi. Managpadagus unay kadakami dagitoy nga agassawa. Gapuna tineleponuanmi ni Yves ket imbagami kenkuana a kasapulan a maoperaan ni Babette ket saanmi nga ammo no sadinot’ pagyananmi. Imbagami met a kasapulan ni Michel ti trabaho.

Inikkan ni Yves ti trabaho ni Michel iti aglawlaw ti balayna. Inandingay ken pinaregtadakam dagiti kakabsat buyogen ti adu a kinamanangngaasi. Tinulongandakam met iti pinansial. Ti Sosiedad ti nagbayad iti gastos ni Babette iti panagpaagas.

Narisgo ti operasion. Masapul nga ikkaten ti dodoktor dagiti lymph node ken ti suso. Rinugianda a dagus ti chemotherapy. Kalpasan ti makalawas, mabalinen a rummuar ni Babette iti ospital, ngem kasapulan nga agsubli kada maikatlo a lawas para iti agtultuloy a therapy.

Kadaydi panawen a panagpapaagas ni Babette, mannakitinnulong unay dagiti kakabsat iti kongregasion. Dakkel a pammaregta ti maysa a kabsat a babai a naaddaan met iti kanser ti suso. Imbagana ken Babette no ania ti manamnama ken liniwliwana unay.

Nupay kasta, mariribukankami iti masakbayanmi. Gapu ta nadlawda daytoy, inkaduadakami iti ruar da Michel ken Jeanette Cellerier tapno mangan iti restaurant.

Imbagami kadakuada a masapul nga agsardengkami iti panagserbi kas misionero ket saankamin nga agsubli idiay Africa. Nupay kasta, kinuna ni Kabsat Cellerier: “Ania? Asino ti nangibaga nga agsardengkayo? Ti kadi Bagi a Manarawidwid? Dagiti kadi kakabsat ditoy France? Asino ti nangibaga iti dayta?”

“Awan nangibaga iti dayta,” insungbatko, “Ibagbagak dayta.”

“Saan, saan!” kinuna ni Brother Cellerier. “Agsublikayo!”

Simmaruno iti chemotherapy ti radiation, a nagpatingga idi agtapus ti Agosto 1991. Kinuna dagiti doktor nga awan makitada a parikut iti panagsublimi idiay Africa, basta agsubli ni Babette idiay France para kadagiti regular a panagpa-checkup.

Ti Panagsubli Idiay Benin

Gapuna nagsuratkami iti hedkuarters idiay Brooklyn, a dumawatkami iti pammalubos nga agsubli iti panagserbi kas misionero. Magagarankami a makangngeg iti sungbatda. Agparang a nabannayat ti panaglabas ti aldaw. Kamaudiananna, saanen a makauray ni Michel, gapuna nagtelepono idiay Brooklyn ket sinaludsodna no naawatda ti suratmi. Kinunada nga inusigda dayta​—mabalinmi ti agsubli idiay Benin! Anian a panagyamanmi ken Jehova!

Nangorganisar ti pamilia Merda iti dakkel a sosial a panagtataripnong tapno rambakanmi ti damag. Idi Nobiembre 1991 nagsublikam idiay Benin, ket sinarabodakami dagiti kakabsat iti maysa a padayá!

Umim-imbagen ni Babette. Sagpaminsan nga agsublikami idiay France maipaay iti kompleto a medikal checkup, ket awanen ti masarakan dagiti doktor a pakailasinan ti kanser. Maragsakankami a nagsubli iti nakaitudinganmi kas misionero. Mariknami a kasapulandakami ditoy Benin, ket binendisionan ni Jehova ti trabahomi. Sipud idi nagsublikami 14 a tattao ti natulonganmi a nagpabautisar. Lima kadakuada ti regular pioneer itan, ken maysa ti nadutokan kas ministerial nga adipen. Nakitami met ti panagdakkel ti bassit a kongregasionmi ket kalpasanna ti pannakabingayna a nagbalin a dua a kongregasion.

Kadagiti napalabas a tawen, nagserbikami ken Jehova kas agassawa ket tinagiragsakmi ti adu a bendision ken naam-ammomi ti adu a nakaay-ayat a tattao. Ngem sinanay ken pinapigsanakami met ni Jehova tapno sibaballigi a maibturanmi dagiti rigat. Kas ken Job, saanmi a kanayon a natarusan no apay napasamak dagiti banag iti kasta, ngem ammomi a kanayon nga adda sadiay ni Jehova a tumulong kadakami. Dayta ti kas ti kuna ti Sao ti Dios: “Adtoy! Ti ima ni Jehova saan a napaababa tapno dina mabalin ti mangisalakan, ti lapayagna saan met a nabannog tapno dina mabalin ti dumngeg.”​—Isaias 59:1.

[Ladawan iti panid 23]

Da Michel ken Babette Muller a nakakawes iti tradisional a pagan-anay idiay Benin

[Dagiti ladawan iti panid 25]

Ti trabaho a panagmisionero iti tengnga dagiti taga-Polynesia iti tropikal a Tahiti