Pudno a Kinatalged—Ita ken iti Agnanayon
AWAN duadua a makaipaay ni Jehova a Dios iti kinatalged kadagiti tattaona. Isu “ti Mannakabalin-amin.” (Salmo 68:14) Ti naisangsangayan a naganna kaipapananna “Isut’ Mamagbalin.” Daytoy ti mangipabigbig kenkuana kas Daydiay maymaysa iti uniberso a makabalin a mangsaranget iti aniaman a bangen tapno matungpal dagiti karina ken maibanag ti pagayatanna. Kuna ti Dios a mismo: “Kastanto met ti saok a rumuar iti ngiwatko. Isu dinto agsubli kaniak nga awan ti pagmamaayanna, no di ket tungpalennanto ti pagayatak, ken rumang-ayto iti banag a pangipanak kenkuana.”—Isaias 55:11.
Mangipaay ti Dios iti kinatalged kadagidiay agkammatalek kenkuana. Patalgedan daytoy ti Saona. “Ti nagan ni Jehova nabileg a sarikedked,” kinuna ni masirib nga Ari Solomon iti sidong ti panangipaltiing ti Dios. “Ti nalinteg agkamang kenkuana ket maisalakan.” Kinunana pay: “Ti agkammatalek ken Jehova natalgedto.”—Proverbio 18:10; 29:25.
Kinatalged Kadagiti Adipen ti Dios
Kanayon a mangipaay ni Jehova iti kinatalged kadagidiay agpannuray kenkuana. Kas pagarigan, tinagiragsak ni mammadto Jeremias ti pannalaknib ti Dios. Idi rinaut dagiti buyot ti Babilonia ti apostata a Jerusalem, napilitan a ‘mangan dagiti tao iti tinapay a tinimbeng, ken sibubuteng.’ (Ezequiel 4:16) Kimmaro unay ti kasasaad ta inanger ken kinnan dagiti sumagmamano nga inna ti bukodda nga annak. (Un-unnoy 2:20; 4:10) Nupay sibabalud idi ni Jeremias gapu iti awanan buteng a panangaskasabana, sinigurado ni Jehova nga ‘adda mangted kenkuana iti inaldaw ti sangabukel a tinapay nga aggapu iti kalsada dagiti agtintinapay agingga iti naibus ti isuamin a tinapay iti ili.’—Jeremias 37:21.
Idi natnag ti Jerusalem kadagiti taga-Babilonia, di man la napapatay wenno naipan kas maysa a balud ni Jeremias idiay Babilonia. Imbes ketdi, “ti [taga-Babilonia a] kapitan ti guardia . . . intedna kenkuana ti taraon ken maysa a sagut ket isu pinalubosanna.”—Jeremias 40:5.
Sinigsiglo kalpasanna impasigurado ni Jesu-Kristo kadagiti adipen ti Dios: “Dikay pulos maringgoran ket kunaenyo, ‘Ania ti kanenminto?’ wenno, ‘Ania ti inumenminto?’ wenno, ‘Ania ti pagkawesminto?’ Ta amin dagitoy isuda dagiti bambanag a sigagagar a sapsapulen dagiti nasion. Ta ti nailangitan nga Amayo ammona a kasapulanyo amin dagitoy a bambanag. Itultuloyyo, ngarud, a sapulen nga umuna ti pagarian ken ti kinalintegna, ket isuamin dagitoy sabsabali pay a bambanag mainayondanto kadakayo.”—Mateo 6:31-33.
Kaipapanan kadi daytoy a tagiragsaken dagiti adipen ni Jehova ti nadibinuan a pannalaknib iti amin nga agdama-aldaw a didigra? Saan, saan a kasta. Saan a mailiklik dagiti matalek iti pannakadangran. Agsakit dagiti pudno a Kristiano, maidadanes, agbalin a biktima ti krimen, matay kadagiti aksidente, ken agsagaba kadagiti dadduma pay a pamay-an.
Nupay saan pay a mangipaay ni Jehova iti naan-anay a kinatalged manipud iti pannakadangran, ipakita dagiti report nga usarenna ti pannakabalinna a mangipaay kadagiti adipenna ken mangsalaknib kadakuada. Mabádangan met dagiti Kristiano manipud iti adu a parikut agsipud ta iyap-aplikarda dagiti prinsipio ti Biblia iti biagda. (Proverbio 22:3) Mainayon pay, tagiragsakenda ti kinatalged ti sangalubongan a timpuyog dagiti naayat a naespirituan a kakabsat, nga agtitinnulong kadagiti tiempo ti panagkasapulan. (Juan 13:34, 35; Roma 8:28) Kas pagarigan, kas panagtignay maigapu iti nakaay-ay-ay a kasasaad dagiti kakabsatda idiay dinadael ti gubat a Rwanda, sidadaras a nagdonar dagiti Saksi ni Jehova idiay Europa ken pinatulodanda ida iti 65 a tonelada a kawes ken aggatad iti $1,600,000 a medisina, taraon, ken dadduma pay nga abasto.—Idiligyo ti Aramid 11:28, 29.
Nupay palubosan ni Jehova nga aglak-am kadagiti pannubok dagiti pudno a Kristiano, makasiguroda nga ipaayna kadakuada ti pigsa, tulong, ken sirib nga agibtur. Iti panagsuratna kadagiti kapammatian, kinuna ni apostol Pablo: “Awan ti sulisog [pannubok] a dimteng kadakayo malaksid ti kadawyan kadagiti tattao. Ngem ti Dios matalek, ket dinanto palubosan a masulisogkayo [masubok] iti labes ti kabaelanyo nga itured, no di ket maigiddan iti pannakasulisog [pannubok] aramidennanto met ti dalan a pagruaran tapno mabalinanyo nga ibturan dayta.”—1 Corinto 10:13; The Emphatic Diaglott.
No Aniat’ Maaramidan ti Dios Kadagiti Tattaona
Ita, riniwriw a tattao ti maragsakan a mangaramid iti pagayatan ti Dios. Saanda a napilitan nga agserbi iti Dios; ar-aramidenda dayta gapu ta am-ammo ken ay-ayatenda. Kasta met, gapu ta ay-ayaten ni Jehova dagiti nasungdo nga adipenna, panggepna a pagbalinen ti daga a maysa a paraiso a sadiay tagiragsaken dagiti natulnog a sangatauan ti talna, salun-at, ken kinatalged iti agnanayon.—Lucas 23:43.
Aramiden ti Dios daytoy babaen ti nailangitan a gobierno, a ti dinutokanna nga Ari, ni Jesu-Kristo, ti Agturay iti dayta. (Daniel 7:13, 14) Dakamaten ti Biblia daytoy a gobierno kas ti “pagarian ti Dios” ken kas “ti pagarian dagiti langlangit.” (1 Corinto 15:50; Mateo 13:44) Suktanto ti Pagarian ti Dios ti isuamin a natauan a gobierno. Imbes a maaddaan iti adu a gobierno ditoy daga, addanto laeng maymaysa a gobierno. Agturayto iti kinalinteg iti intero a daga.—Salmo 72:7, 8; Daniel 2:44.
Aw-awisen ni Jehova ti isuamin tapno agbiag iti sidong ti Pagarian. Maysa a pamay-an nga ar-aramidenna daytoy isut’ nasaknap a panagiwaras iti Biblia, ti libro a mangilawlawag no ania ti aramidento ti Pagarian iti sangatauan. Ti Biblia ti kasaknapan a naiwaras a libro iti lubong, ken magun-odan itan, kompleto man dayta wenno iti sumagmamano a paset, iti nasurok a 2,000 a pagsasao.
Siaayat ni Jehova a Dios a tumultulong kadagiti tattao a mangtarus no ania ti isursuro ti Biblia maipapan iti Pagarian. Ar-aramidenna ti kasta babaen ti panangisuro ken panangibaon kadagiti tattao a mangilawlawag iti Kasuratan kadagiti sabsabali. Nasurok a lima a milion dagiti Saksi ni Jehova ita a mangiwarwaragawag iti naimbag a damag ti Pagarian ti Dios iti nasurok a 230 a daga.
Pudno a Kinatalged Agpaay iti Amin?
Awatento kadi ti isuamin ti awis nga agbalin nga iturayan ti Pagarian ti Dios babaen ti panangsurot kadagiti nalinteg a pagalagadanna? Saan, agsipud ta adu a tattao ti saan nga interesado a mangaramid iti pagayatan ti Dios. Laksidenda dagiti panagregget a tumulong kadakuada a mangbalbaliw iti panagbiagda maipaay iti pagsayaatan. Kinapudnona, ipakpakitada nga arigda dagidiay nagkunaan ni Jesus: “Ti puso daytoy nga ili nagbalin a di makaawat, ket kadagiti lapayagda dimngegda nga awanan panagtignay, ket inkidemda dagiti matada; tapno dida pulos makakita kadagiti matada ken makangngeg kadagiti lapayagda ket maalada ti kababagasna iti puspusoda ket agsublida, ket paimbagen [ti Dios] ida.”—Mateo 13:15.
Kasano koma a maadda ti pudno a kinatalged ditoy daga kadagidiay agkedked nga agbiag a maitunos kadagiti nalinteg a dana ti Dios? Awan la ketdi. Pagpeggaden dagiti dakes a tattao ti kinatalged dagidiay mayat nga agserbi ken Jehova.
Saan a piliten ti Dios dagiti tattao nga agbalbaliw, ngem dina met palubosan ti kinadangkes nga agtultuloy. Nupay siaanus ni Jehova a mangibabaon kadagiti Saksina tapno isurona dagiti tattao maipapan kadagiti dana ken pangpanggepna, dina itultuloy nga aramiden dayta iti napaut unay. Impadto ni Jesu-Kristo: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.”—Mateo 24:14.
Aniat’ kaipapanan “ti panungpalan” kadagidiay mangilaksid kadagiti pagalagadan ti Dios? Kaipapananna ti nakaro a pannakaukom ken pannakadadaelda. Dakamaten ti Biblia ti maipapan iti “pammales kadagidiay di makaammo iti Dios ken kadagidiay di agtulnog iti naimbag a damag maipapan ken Apotayo a Jesus. Dagitoy a mismo agpasardanto iti pannakaukom a dusa nga agnanayon a pannakadadael.”—2 Tesalonica 1:6-9.
Kamaudiananna—Pudno a Kinatalged iti Agnanayon!
Kalpasan ti pannakadadael dagidiay mangilaksid kadagiti dana ni Jehova iti kinatalna, iyegto ti Pagarian ti Dios ti maysa a nadayag a panawen ti kinatalged agpaay a pakagunggonaan dagiti nalinteg ditoy daga. (Salmo 37:10, 11) Anian a pannakaidumanto dayta a baro a lubong iti daytoy pagbibiagantayo ita!—2 Pedro 3:13.
Awanton ti kinakirang ti taraon ken panagbisin. Nawadwadton ti taraon ti isuamin. Kuna ti Biblia nga ‘amin nga inilin-ili mangaramidto iti maysa a rambak dagiti nalukmeg a banag.’ (Isaias 25:6) Awanton ti panagkurang ti taraon, ta “addanto kinaruay ti bukel iti daga; iti tapaw dagiti banbantay ti bungada margaayanto.”—Salmo 72:16.
Saanton nga agnaed dagiti tattao kadagiti abong ken kalapaw. Iti sidong ti Pagarian ti Dios, maaddaanton ti isuamin kadagiti nasayaat a pagtaengan, ket mangandanto iti taraon a pinataud ti bukodda a daga. Ikarkari ti Biblia: “Isuda bangonendanto dagiti balbalay ket agtaengdanto kadakuada; ket agmuladanto kadagiti kaubasan ket kanendanto ti bungada.”—Isaias 65:21.
Imbes a nasaknap a kinaawan trabaho, addanto nabunga a trabaho, ket makitanto ti tattao dagiti nasayaat a banagna. Kuna ti Sao ti Dios: “Dagiti pinilik agragsakdanto iti mabayag iti aramid dagiti im-imada. Isuda didanto agtrabaho iti ubbaw.”—Isaias 65:22, 23.
Iti sidong ti turay ti Pagarian, saanto nga agsagaba dagiti tattao ken matay gapu iti sakit. Ipatalged kadatayo ti Sao ti Dios: “Ti agtaeng dinanto kunaen: ‘Masakitak.’”—Isaias 33:24.
Iti naindagaan a Paraiso nga asidegen a pumayso, ti panagsagaba ken ut-ot, ladingit ken ipapatay, aglabaston. Wen, uray ti ipapatay! Agbiagto nga agnanayon dagiti tattao iti Paraiso! Kuna ti Biblia kadatayo a ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”—Apocalipsis 21:4.
Iti sidong ti panagturay ni Jesu-Kristo, ti “Prinsipe ti Kappia,” iti kamaudiananna pudpudno a natalgedto ti biag ditoy daga. Wen, maaddanto ti sangalubongan a kinatalged iti sidong ti nalinteg, naayat a panangituray ti maysa a gobierno—ti Pagarian ti Dios.—Isaias 9:6, 7; Apocalipsis 7:9, 17.
[Blurb iti panid 4]
“Ipasimudaag ti natauan a kinatalged ti panagtalek iti masanguanan, . . . [panagtalek iti] kinatibker ti kasasaad ti politika ken ekonomia.”—Maysa a babai nga agnanaed idiay Asia
[Blurb iti panid 5]
“Ti kinaranggas ken kinadelingkuente ti ad-adda a mamagbuteng kadakayo.”—Maysa a lalaki nga agnanaed idiay South America
[Blurb iti panid 6]
“Saanak a natalged kabayatan ti . . . panangraut. No makigubat ti maysa a pagilian, kasano a marikna dagiti tao ti kinatalged?”—Maysa nga ages-eskuela iti elementaria idiay Makintengnga a Daya
[Blurb iti panid 7]
“Mariknak ti kinatalged no ammok a mabalinkot’ magna kadagiti lansangan iti rabii a di marames.”—Maysa nga ages-eskuela a babai idiay Africa