Report Dagiti Manangiwaragawag iti Pagarian
‘Maysa a Dakkel a Ruangan a Mangiturong iti Panagaramid ti Naluktan’ Idiay Cuba
NI APOSTOL Pablo ket maysa a naisangsangayan a manangaskasaba iti naimbag a damag ti Pagarian ti Dios. Inaramatna ti tunggal gundaway a mangiburay iti sabsabali kadagiti kari ti Namarsua a biag nga agnanayon iti natulnog a sangatauan. Bayat a sarsarungkaranna ti kadaanan nga Efeso, nabigbig ni Pablo ti baro a kasasaad a mangipalubos kenkuana a mangtulong iti ad-adu pay a tattao. Kinunana: “Agtalinaedak idiay Efeso . . . , ta naluktan kaniak ti maysa a dakkel a ruangan a mangiturong iti panagaramid.”—1 Corinto 16:8, 9.
Natakuatan met dagiti Saksi ni Jehova idiay Cuba ti bagbagida iti baro a kasasaad. Nupay saan pay nga opisial ti pannakairehistroda, maiburay itan dagiti Saksi ti namnamada iti Biblia a sipapanayag kadagiti kailianda. Itay nabiit inyebkas ti gobierno ti Cuba ti napasnek a panaginteres iti panangipalubos kadagiti nadumaduma a narelihiosuan a grupo nga agandar a siwawayawaya. Sipapanayag a dinakamat ni Presidente Castro a tagtagiragsaken itan ti gobierno ti Cuba ti napasayaat a pannakirelasion kadagiti Saksi ni Jehova kas maysa a narelihiosuan a grupo.
Daytoy baro a kasasaad linuktanna kadagiti Saksi “ti maysa a dakkel a ruangan a mangiturong iti panagaramid.” Kas pagarigan, itay nabiit linuktan dagiti Saksi ni Jehova ti maysa nga opisina idiay Cuba, a tumulong kadakuada a mangorganisar iti trabahoda a panangasaba iti dayta a pagilian. Nasurok nga 65,000 a Saksi ti tumultulong kadagiti tattao a mangadal ken mangtarus iti Biblia. Usarenda dagiti literatura ti Biblia, kas kadagiti magasin a Pagwanawanan ken Agriingkayo! Magunggonaan ti adu a nalinteg panagpuspusoda a taga-Cuba iti pannakipagadal iti Biblia kadagiti Saksi ni Jehova.
Aggigimong met a regular dagiti Saksi kadagiti babassit a grupo iti intero nga isla. No dadduma tagiragsakenda pay ti pribilehio a maaddaan kadagiti daddadakkel a taripnong kadagiti grupo ti agarup 150. Pudno nga apresiarenda ti pammalubos a nagun-odda kadagiti agtuturay ti Cuba, a mangmangted kadakuada iti gundaway a makitaripnong kadagiti naespirituan a kakabsatda, agkanta iti panagdayaw iti Dios, ken agkararag a sangsangkamaysa.
Itay nabiit naangay ti “Nadiosan a Panagbuteng” a Kombension Distrito iti nasurok a 1,000 a daras iti tallo laeng a ngudo ti lawas. Kuna ti maysa a report a ti “urnos, disiplina, ken talna” ket nabatad iti kada kombension. Kinablaawan dagiti autoridad dagiti Saksi iti daytoy a kasasaad.
Iti sangalubongan, ikagumaan dagiti pudno a Kristiano a tungpalen ti inted-Dios a bilin a mangikasaba iti naimbag a damag ti Pagarian ti Dios. Maigiddato, ikagkagumaanda a taginayonen ti natalna a pannakirelasion kadagiti agtuturay iti gobierno. (Tito 3:1) Suroten dagiti Saksi ni Jehova ti balakad ni apostol Pablo, a nagsurat: “Ibalakadko ngarud, umuna iti amin, a dagiti araraw, dagiti kararag, dagiti panangibabaet, dagiti panangidaton iti panagyaman, maaramid koma maipuon kadagiti amin a kita ti tattao, maipuon kadagiti ar-ari ken kadagidiay amin nga adda iti nangato a saad; tapno maitultuloytayo koma ti agbiag a natalinaay ken naulimek buyogen ti naan-anay a nadiosan a debosion ken kinaserioso.”—1 Timoteo 2:1, 2.