No Dumteng Dagiti Natural a Didigra

Accra, Ghana, Hulio 4, 1995: Ti kapipigsaan a tudo iti agarup 60 a tawen ti nakaigapuan ti nakaro a layus. Agarup 200,000 ti napukawan iti amin a banag, 500,000 ti di nakasubli iti balbalayda, ken 22 ti natay.

San Angelo, Texas, E.U.A., Mayo 28, 1995: Rinebbek dagiti allawig ken uraro daytoy a siudad nga addaan 90,000 nga agindeg, a namataud iti napattapatta a $120 milion (E.U.) a pateg ti nadadael.

Kobe, Japan, Enero 17, 1995: Ti ginggined a 20 segundo laeng ti kapautna nangibati iti rinibribu a natay, pinulpullo a ribu a nasugatan, ken ginasut a ribu a naawanan iti pagtaengan.

AGBIBIAGTAYO iti nalabit maikuna a panawen dagiti didigra. Ipalgak ti report ti Naciones Unidas nga iti periodo ti 30 a tawen manipud idi 1963-92, immadu dagiti tao a napapatay, nasugatan, wenno pimmanaw gapu iti didigra iti promedio nga 6 a porsiento kada tawen. Ti nakalkaldaang a kasasaad tinignayna ti NU a mangawag iti dekada ti 1990 kas “ti Internasional a Dekada iti Panangkissay iti Natural a Didigra.”

Siempre, ti puersa ti nakaparsuaan​—kas iti bagyo, panagbettak ti bulkan, wenno ginggined​—saan a kanayon a mangibunga iti didigra. Ginasgasut ti mapasamak kada tawen a di madangran dagiti tao. Ngem no maikisap ti adu a biag ken madadael dagiti sanikua, siuumiso a maawagan dayta iti didigra.

Agparang a di maliklikan ti panagadu ti natural a didigra. Kuna ti libro a Natural Disasters​—Acts of God or Acts of Man?: “Balbaliwan dagiti tao ti aglawlawda tapno agbalin dayta nga ad-adda nga asideg kadagiti didigra, ken agtignayda a mamagbalin iti bagida nga awan gawayna iti kakasta a peggad.” Mangidatag ti libro iti maipagarup a pagarigan: “Ti nakapsut a ginggined iti maysa nga ili dagiti abong-abong a naaramid iti pitak nga adda iti igid ti derraas mabalin a maysa a didigra a pakatayan ken pagsagabaan dagiti tao. Ngem ti kadi didigra ad-adda a maipabasol kadagiti ginggined wenno iti panagnaed dagiti tao iti kakasta a delikado a balbalay iti maysa a napeggad a lugar?”

Kadagiti estudiante ti Biblia, adda pay sabali a makagapu no apay a di pakasdaawan ti iyaadu dagiti natural a didigra. Agarup 2,000 a tawenen ti napalabas, impadto ni Jesu-Kristo a “ti panungpalan ti sistema ti bambanag” mailasinto babaen iti, kadagiti sabsabali pay a banag, “kinakirang ti taraon ken dagiti ginggined iti nadumaduma a disso.” (Mateo 24:3, 6-8) Impadto met ti Biblia a kadagiti “maudi nga al-aldaw,” dagiti tattao managayatdanto iti bagbagida, managayat iti kuarta, awanan nainkasigudan a panagayat, ken awanan panagayat iti kinaimbag.a (2 Timoteo 3:1-5) Dagitoy a galad masansan a tignayenna ti tao nga agaramid maibusor iti aglawlawna, a mamagbalin kadagiti tao nga ad-adda nga awan gawayda iti puersa ti nakaparsuaan. Dagiti aramid ti tao a didigra ket resulta met ti awanan-iti-ayat a kagimongan a pagbibiagan ti kaaduan.

Bayat nga umad-adu ti agnaed iti planetatayo, bayat a ti kababalin ti tao ad-adda a mamagpeggad kadagiti tao, ken bayat a ti gameng ti daga ad-adda a maabuso, agtultuloy a sapliten dagiti didigra ti tao. Mangidatag iti karit ti panangipaay iti tulong, kas ipakita ti sumaganad nga artikulo.

[Footnote]

[Picture Credit Line iti panid 3]

Ngato: Information Services Department, Ghana; kannawan: San Angelo Standard-Times

[Picture Credit Line iti panid 2]

AKKUB: Maxie Roberts/Courtesy of THE STATE