Nasursuruan a Mangaramid iti Pagayatan ni Jehova

“Isuronak a mangaramid iti pagayatam, ta sika ti Diosko.”​—SALMO 143:10, NW.

1, 2. (a) Kaano koma a masursuruantayo, ken buyogen iti ania a napudno a panangmatmat? (b) Apay a nagpateg unay ti panagpaisuro ken Jehova?

ITI inaldaw a sibibiag ken aktibo ti maysa a tao, isu ket masursuruan iti banag a makagunggona. Pudno dayta iti kasasaadyo, ken pudno met daytoy iti sabsabali. Ngem aniat’ mapasamak iti ipapatay? Imposible ti masursuruan iti aniaman a banag wenno makasursuro iti dayta a kasasaad. Silalawag a kuna ti Biblia a dagiti natay “dida ammo ti aniaman.” Awan ti pannakaammo idiay Sheol, ti gagangay a tanem ti sangatauan. (Eclesiastes 9:5, 10) Kaipapanan kadi daytoy nga awan serserbina ti panagbalintayo a nasursuruan ken ti pannakagun-odtayo iti pannakaammo? Agpannuray dayta iti no ania ti naisuro kadatayo ken no kasanotay nga usaren dayta a pannakaammo.

² No nailubongan laeng ti naisuro kadatayo, awan ti manayon a masakbayantayo. Nupay kasta, makaparagsak ta riniwriw a tattao iti amin a nasion ti nasursuruan iti pagayatan ti Dios iti panggep a gumun-od iti biag nga agnanayon. Naibatay daytoy a namnama iti panagpaisuro ken Jehova, ti Gubuayan ti makaited-biag a pannakaammo.​—Salmo 94:9-12.

3. (a) Apay a maikuna a ni Jesus ti immuna nga estudiante ti Dios? (b) Aniat’ pammaneknektayo a dagiti tao ket sursuruan ni Jehova, ket ania ti resulta?

³ Ti inauna nga Anak ti Dios, kas immuna nga estudiantena, nasursuruan a mangaramid iti pagayatan ni Amana. (Proverbio 8:22-30; Juan 8:28) Iti kasta, impasimudaag ni Jesus a linaklaksa a tattao ti sursuruanto ni Amana. Aniat’ namnamatayo, datayo a makasursuro iti Dios? Kinuna ni Jesus: “Adda a naisurat kadagiti Mammadto, ‘Ket sursuruanto amin ida ni Jehova.’ Tunggal maysa a dimngeg iti Ama ken nakasursuro umay kaniak. . . . Pudno unay kunak kadakayo, Ti mamati addaan iti agnanayon a biag.”​—Juan 6:45-47.

4. Kasano nga apektaran ti nadiosan a panangisuro ti riniwriw a tattao, ken aniat’ namnamada?

⁴ Nagadaw ni Jesus iti Isaias 54:13, a tumukoy iti simboliko a babai a kukua ti Dios, ti nailangitan a Sion. Nangnangruna nga agaplikar dayta a padto kadagiti annakna, ti 144,000 a nayanak iti espiritu nga adalan ni Jesu-Kristo. Aktibo ita ti natda kadagitoy a naespirituan nga annak, a mangidadaulo iti sangalubongan a programa a panangisuro. Kas resultana, riniwriw a sabsabali pay a mangbukel iti “maysa a dakkel a bunggoy” ti mabembenepisiaran met iti panagpaisuroda ken Jehova. Addaanda iti naisangsangayan a namnama a makasursuro a dida mapasaran ti ipapatay uray kaano. Kasano? Bueno, nailiniada a makalasat iti umas-asidegen a “dakkel a rigat” ken mangtagiragsak iti biag nga agnanayon iti paraiso a daga.​—Apocalipsis 7:9, 10, 13-17.

Ad-adda a Panangipaganetget iti Panangaramid iti Pagayatan ti Dios

5. (a) Ania ti teksto para iti tawen 1997? (b) Kasano komat’ panagriknatayo maipapan iti itatabuno kadagiti Nakristianuan a panaggigimong?

⁵ Kabayatan ti 1997, iti nasurok a 80,000 a kongregasion iti intero a lubong, pagtalinaeden dagiti Saksi ni Jehova iti panunotda ti panglukat a sasao ti Salmo 143:10, NW: “Isuronak a mangaramid iti pagayatam.” Daytoy ti teksto iti tawen 1997. Agserbi dagidiay a sasao, a nalawag a maiparang kadagiti Kingdom Hall, kas pammalagip a ti maysa a naisangsangayan a lugar a pangawatan iti nadiosan nga edukasion ket kadagiti gimong iti kongregasion, a sadiay mabalintay ti makipaset iti maangay a programa a panangisuro. No kaduatay dagiti kakabsattayo kadagiti gimong tapno agpaisuro iti Naindaklan nga Instruktortayo, mariknatayo ti kas iti narikna ti salmista, a nagkuna: “Naragsakanak idi kinunada kaniak, intayon idiay balay ni Jehova.”​—Salmo 122:1; Isaias 30:20.

6. Iti sasao ni David, aniat’ bigbigentayo?

⁶ Wen, kayattayo ti masursuruan a mangaramid iti pagayatan ti Dios imbes a ti pagayatan ti Diablo a kabusortayo wenno ti pagayatan dagiti imperpekto a tao. Gapuna, kas ken David, bigbigentayo ti Dios a pagdaydayawan ken pagserserbiantayo: “Ta sika ti Diosko: ti espiritum naimbag; idalannak iti daga ti kinalinteg.” (Salmo 143:10) Imbes a tarigagayanna ti makikadua kadagiti tattao ti kinaulbod, kinaykayat ni David ti mapan iti pagdaydayawan ken Jehova. (Salmo 26:4-6) Buyogen ti espiritu ti Dios a mangiturong kadagiti addangna, nabalinan ni David ti nagna kadagiti dana ti kinalinteg.​—Salmo 17:5; 23:3.

7. Kasano nga agtigtignay ti espiritu ti Dios iti kongregasion Kristiano?

⁷ Impanamnama ti Natantan-ok a David, ni Jesu-Kristo, kadagiti apostol nga isuro kadakuada ti nasantuan nga espiritu ti amin a banag ken ipalagipna kadakuada ti amin nga imbagana kadakuada. (Juan 14:26) Nanipud idi Pentecostes, in-inut nga impalgak ni Jehova “dagiti nauneg a bambanag ti Dios” nga adda iti naisurat a Saona. (1 Corinto 2:10-13) Ar-aramidenna daytoy babaen ti makitkita a kalasugan nga inawagan ni Jesus a “matalek ken masirib nga adipen.” Mangipapaay daytoy iti naespirituan a taraon a masalsalaysay iti programa a panangisuro agpaay kadagiti kongregasion ti ili ti Dios iti intero a lubong.​—Mateo 24:45-47.

Masursuruan iti Pagayatan ni Jehova Kadagiti Gimongtayo

8. Apay a nagpateg ti pannakipaset iti Panagadal iti Pagwanawanan?

⁸ Ti material iti linawas a Panagadal iti Pagwanawanan iti kongregasion ket masansan a maipapan iti panangyaplikar kadagiti prinsipio iti Biblia. Sigurado a makatulong daytoy kadatayo a mangsaranget kadagiti pakariribukan iti biag. Masalsalaysay iti dadduma a panagadal dagiti nauuneg a naespirituan a kinapudno wenno dagiti padto iti Biblia. Anian a nagadu ti masursurotayo iti kakasta a panagadal! Iti adu a pagilian mapno dagiti Kingdom Hall kadagitoy a panaggigimong. Nupay kasta iti sumagmamano a pagilian, bumabbaba ti bilang dagiti tumabtabuno iti gimong. Apay ngata? Ti kadi sekular a trabaho ti nalabit nga ipalubos ti sumagmamano a manglapped iti regular a pannakitaripnongda “tapno mangparegta iti ayat ken nasayaat nga ar-aramid”? Wenno mabalin ngata nga adu nga oras ti mabusbusbos kadagiti sosial nga aktibidad wenno iti panagbuya iti telebision, a kasla ket okupadoda unayen a saandan a matabunuan dagiti amin a gimong? Laglagipenyo ti naipaltiing a bilin iti Hebreo 10:23-25. Saan kadi a ti panagtataripnongtayo maipaay iti nadibinuan a pannursuro ket napatpateg ita bayat a “makitkitatayo a ti aldaw umas-asidegen”?

9. (a) Kasanonatay a kabalan ti Gimong ti Serbisio maipaay iti ministerio? (b) Ania komat’ kababalintayo maipapan iti panangasaba?

⁹ Ti maysa kadagiti kangrunaan a responsabilidadtayo isu ti panagserbi kas ministro ti Dios. Nadisenio ti Gimong ti Serbisio tapno masursuruantayo no kasanotay a maaramid daytoy a sieepektibo. Masursurotayo no kasano ti iyaasideg kadagiti tao, no aniat’ sawen, no aniat’ aramiden no adda maipakita nga interes, ken kasta met no aniat’ aramiden no pagkedkedan dagiti tao ti mensahetayo. (Lucas 10:1-11) Bayat a mapagsasaritaan ken maidemostra dagiti epektibo a pamay-an iti daytoy linawas a gimong, ad-adda nga agbalintayo a sisasagana a mangdanon kadagiti tao saan laeng a no mamalaybalaytayo no di ket kasta met no mangaskasabatayo kadagiti lansangan, paradaan, iti transportasion publiko, eropuerto, pagnegosiuan, wenno kadagiti eskuelaan. Maitunos iti kiddawtayo nga, “Isuronak a mangaramid iti pagayatam,” kayattayo nga aprobetsaren ti amin a gundaway a mangaramid iti indagadag ti Apotayo: “Agsilnag koma ti silawyo iti sanguanan dagiti tattao, tapno . . . mangipaayda ti dayag iti Amayo nga adda iti langlangit.”​—Mateo 5:16.

10. Kasanotayo a pudpudno a matulongan dagiti ‘maikari’?

¹⁰ Iti kakasta a gimong iti kongregasion, masursuruantay met a mangaramid kadagiti sabsabali nga adalan. No adda masarakantayo nga interesado wenno makaipaimatayo iti literatura, ti kalattayo no sumarungkartayo ket tapno makairugi kadagiti panangyadal iti Biblia iti pagtaengan. No an-anagen, umasping daytoy iti ‘panaggian [dagiti ad-adalan] kadagiti maikari’ tapno sursuruanda ida kadagiti banag nga imbilin ni Jesus. (Mateo 10:11; 28:19, 20) Tangay adda nasasayaat a katulongan, kas ti libro a Pannakaammo a Mangiturong iti Biag nga Agnanayon, talaga a makabkabalantayo a naimbag a mangitungpal a naan-anay iti ministeriotayo. (2 Timoteo 4:5) Iti kada lawas bayat a tumabunokayo iti Gimong ti Serbisio ken iti Teokratiko nga Eskuelaan ti Panagministro, ikagumaanyo a tarusan sa kalpasanna aramatenyo dagiti makatulong a punto a mangirekomenda kadakayo kas maysa kadagiti naan-anay a kualipikado a ministro ti Dios, a mangar-aramid iti pagayatanna.​—2 Corinto 3:3, 5; 4:1, 2.

11. Kasano nga impakita ti sumagmamano ti panagtalek kadagiti sasao a masarakan iti Mateo 6:33?

¹¹ Pagayatan ti Dios nga “itultuloy[tayo] . . . a sapulen nga umuna ti pagarian ken ti kinalintegna.” (Mateo 6:33) Saludsodanyo ti bagiyo, ‘Kasanok nga iyaplikar daytoy a prinsipio no dagiti maipakalikagum iti panggedak [wenno dagiti ipakalikagum ti asawak] lapdanna ti itatabunok iti gimong?’ Adu a nataengan iti naespirituan ti mangaramid kadagiti addang a makisarita kadagiti amoda maipapan iti dayta a banag. Impakaammo ti maysa nga amin-tiempo a ministro iti amona a kasapulanna ti panawen kada lawas tapno makatabuno kadagiti gimong iti kongregasion. Pinatganna ti kalikagumna. Ngem gapu ta kayatna a maammuan no ania ti maar-aramid kadagiti gimong, kiniddawna ti itatabunona. Sadiay a nangngeganna ti pakaammo maipanggep iti umas-asideg a kombension distrito. Kas resultana, inyurnos ti amo ti tumabuno iti maysa nga aldaw iti kombension. Aniat’ maadalyo iti daytoy nga ehemplo?

Nasursuruan iti Pagayatan ni Jehova Babaen Kadagiti Nadiosan a Nagannak

12. Tapno masursuruan dagiti annak iti pagayatan ni Jehova, aniat’ rumbeng nga aramiden dagiti Kristiano a nagannak buyogen ti kinaanus ken kinatibker?

¹² Ngem saan laeng a dagiti gimong iti kongregasion ken kombension ti kakaisuna a probision tapno masursuruan a mangaramid iti pagayatan ti Dios. Naibilin kadagiti nadiosan a nagannak a sanayen, disiplinaen, ken padakkelenda dagiti annakda a mangidayaw ken Jehova ken mangaramid iti pagayatanna. (Salmo 148:12, 13; Proverbio 22:6, 15) Tapno maaramid dayta kasapulan nga itugottayo “dagiti ubbing” kadagiti gimong a sadiay mabalinda ti ‘agdengngeg ken agsursuro,’ ngem komusta met ngay ti panangisuro kadakuada iti nasantuan a kasuratan iti pagtaengan? (Deuteronomio 31:12; 2 Timoteo 3:15) Adu a pamilia ti sipapasnek a nangirugi iti regular a programa ti sangapamiliaan a panagadal iti Biblia, ngem di nagbayag nabaybay-anda agingga a paspasaray laengen wenno naisardengen. Napadasanyo kadin ti kasta? Maikunayo kadi a ti balakad a maaddaan iti kasta a regular a panagadal ket di maitutop wenno ti pamiliayo ket naiduma la unay, isut’ gapuna a saan nga agkurri dayta iti kasasaadyo? Aniaman ti situasion, pangngaasiyo ta repasuenyo dakayo a nagannak dagiti nagsayaat nga artikulo a “Ti Nabaknang a Naespirituan a Tawidmi” ken “Dagiti Gunggona ti Kinapinget” Ti Pagwanawanan nga Agosto 1, 1995.

13. Kasano a magunggonaan dagiti pamilia manipud iti panangusig iti teksto iti inaldaw?

¹³ Maparegta dagiti pamilia nga iyugalida nga usigen ti inaldaw a teksto iti Panangsukimat Kadagiti Kasuratan iti Inaldaw-aldaw. Ti basta panangbasa iti teksto ken dagiti komento ket nasayaat, ngem ad-adda a makagunggona ti panangsalaysay iti teksto ken panangyaplikar iti dayta. Kas pagarigan, no us-usigenda ti Efeso 5:15-17, mabalin a komentuan dagiti kameng ti pamilia no kasano ‘a gatangen ti nainggundawayan a tiempo’ maipaay iti personal a panagadal, tapno makipaset iti amin-tiempo a ministerio, ken tapno maasikaso ti dadduma pay a teokratiko nga annongen. Wen, ti panangusig ti pamilia iti teksto iti inaldaw mabalin a mangiturong iti maysa wenno iti adu nga ‘agtultuloy a mangtarus [a naan-anay] no ania ti pagayatan ni Jehova.’

14. Rumbeng nga agbalin nga ania a kita ti mannursuro dagiti nagannak kas ipasimudaag ti Deuteronomio 6:6, 7, a mangkalikagum iti ania?

¹⁴ Dagiti nagannak masapul a napingetda a mannursuro kadagiti annakda. (Deuteronomio 6:6, 7) Ngem daytoy ket saan a basta panangtubngar wenno panangbilin kadagiti annakda. Kasapulan met nga agimdeng ti ama ken ti ina, iti kasta ad-adda a maammuanda no ania ti kasapulan a mailawlawag, malawlawagan, mailadawan, wenno maulit. Iti maysa a Kristiano a pamilia, gutugoten dagiti nagannak ti annakda nga agsao a siwayawaya babaen ti panangparegtada kadakuada nga agsaludsod maipapan kadagiti banag a dida matarusan wenno pakaseknanda. Iti kasta naammuanda a marigatan a mangtarus ti maysa a baritoda a ni Jehova ket awan nangrugianna. Naaramat dagiti nagannak ti impormasion kadagiti publikasion ti Watch Tower Society a mangipakpakita a ti panawen ken law-ang ket maawat nga awan patinggada. Daytat’ nangyilustrar iti punto, ket kapkapnekan dayta ti anakda. Gapuna iwayaanyo a sungbatan a sibabatad ken manipud iti Kasuratan ti salsaludsod dagiti annakyo, a tulonganyo ida mangtarus a pudno a makapnek ti panagsursuro a mangaramid iti pagayatan ti Dios. Ania pay ti maisursuro ita iti ili ti Dios​—ubbing ken natataengan?

Nasursuruan a Mangipateg ken Makidangadang

15. Kaano a nalabit masubok ti kinapudno ti nainkabsatan nga ayattayo?

¹⁵ Maitunos iti baro a bilin ni Jesus, ‘isursuronatayo ti Dios nga agiinnayat.’ (1 Tesalonica 4:9) No natalinaay ken naannayas dagiti bambanag, mabalin a mariknatayo a talaga nga ipatpategtayo amin a kakabsattayo. Ngem aniat’ mapasamak no tumanor ti personal a di pagkikinnaawatan wenno masairtayo iti ibaga wenno aramiden ti maysa a Kristiano? Iti daytoy a gundaway mabalin a masubok ti kinapudno ti ayattayo. (Idiligyo ti 2 Corinto 8:8.) Aniat’ isursuro ti Biblia nga aramidentayo iti kakasta a situasion? Ti maysa isu ti panagregget a mangipakita iti ayat iti naan-anay a pamay-an. (1 Pedro 4:8) Imbes a ti laeng bukodtayo a pagimbagan ti kitkitaentayo, a masuron iti babassit a pagkurkurangan, wenno agbilang iti biddut, masapul nga ikagumaantayo nga abbongan iti ayat ti adu a basol. (1 Corinto 13:5) Ammotayo a daytoy ti pagayatan ti Dios, ta daytat’ isursuro ti Saona.

16. (a) Ania a kita ti pannakigubat ti maisursuro a pakipasetan dagiti Kristiano? (b) Kasanotayo a nakabalan?

¹⁶ Nupay di inaig ti adu ti ayat iti pannakigubat, maisursuro met kadatayo ti naud-udi, ngem maysa a naidumduma a kita ti pannakigubat. Binigbig ni David ti panagpannurayna ken Jehova a mangisuro kenkuana no kasano ti makigubat, nupay idi tiempona ramanen dayta ti literal a pannakigubat kadagiti kabusor ti Israel. (1 Samuel 17:45-51; 19:8; 1 Ar-ari 5:3; Salmo 144:1) Komusta met ti pannakidangadangtayo ita? Saan a nainlasagan dagiti igamtayo. (2 Corinto 10:4) Naespirituan ti pannakidangadangtayo, gapuna kasapulan a makabalantayo iti naespirituan a kabal. (Efeso 6:10-13) Babaen iti Saona ken ti naummong nga ilina, isursuronatayo ni Jehova tapno makapagballigi iti naespirituan a pannakidangadang.

17. (a) Ania dagiti pamay-an nga ar-aramaten ti Diablo tapno isiasinatayo? (b) Ania ti nainsiriban koma a liklikantayo?

¹⁷ Kadagiti makaallilaw, nasikap a pamay-an, masansan nga aramaten ti Diablo dagiti elemento ti lubong, apostata, ken dadduma pay a bumusbusor iti kinapudno iti panangikagumaanna a mangisiasi kadatayo nga agturong kadagiti di napateg a banag. (1 Timoteo 6:3-5, 11; Tito 3:9-11) Kas man la makitkitana a bassit ti gundawayna a mangparmek kadatayo iti direkta, sangonsango nga iraraut, gapuna gandatennatay a parmeken babaen ti panangtignayna kadatayo a mangyebkas kadagiti reklamo ken iti minamaag a salsaludsod, nga awan serserbina iti naespirituan. Kas nasiput a mannakigubat, rumbeng nga agbalintayo nga alisto iti kakasta a peggad no kasano nga alistotayo kadagiti sangonsango nga iraraut.​—1 Timoteo 1:3, 4.

18. Ania a talaga ti ramanen ti panagbiag a saan nga agpaay iti bagitayo?

¹⁸ Saantayo nga itandudo dagiti tarigagay ti tattao wenno ti pagayatan dagiti nasion. Isursuronatayo ni Jehova babaen iti ehemplo ni Jesus a rumbeng a saantayon nga agbiag maipaay iti bagitayo; imbes ketdi, adda koma kadatayo ti panagpampanunot a kas iti panagpampanunot ni Kristo Jesus ken agbiag maipaay iti pagayatan ti Dios. (2 Corinto 5:14, 15) Idi napalabas, mabalin a nakaro unay ken imoral ti panagbiagtayo, a sinayangtayo ti nagpateg a panawen. Gagangayen iti daytoy dakes a lubong ti naariwawa a panagraragsak, panagbartek, ken imoralidad. Ita ta nasursuruantayo a mangaramid iti pagayatan ti Dios, ditay kadi agyaman ta naisinatayon iti daytoy rinuker a lubong? Gapuna agreggettayo iti naespirituan a pannakidangadangtayo tapno maliklikantayo ti mairaman kadagiti narugit nga aramid ti lubong.​—1 Pedro 4:1-3.

Isursuronatayo nga Agpaay iti Pagimbagantayo

19. Ania dagiti gunggona nga itden ti panagsursuro iti pagayatan ni Jehova ken panangaramid iti dayta?

¹⁹ Napateg a bigbigen a dakkel ti magunggonatayo iti panagsursuro a mangaramid iti pagayatan ni Jehova. Kaawatan, masapul nga aramidentayo ti pasettayo babaen ti napasnek a panangipangag tapno makasursuro sa kalpasanna tungpalen dagiti naibilin kadatayo babaen iti Anakna kasta met iti Saona ken iti naummong nga ilina. (Isaias 48:17, 18; Hebreo 2:1) No aramidentayo dayta, mapabilegtayo nga agtalinaed a natibker kadagitoy nariribuk a panawen ken malasatantayo dagiti bagyo nga adda iti masanguanan. (Mateo 7:24-27) Uray ita, maay-ayotayo ti Dios babaen ti panangaramid iti pagayatanna ken masiguradotayo a masungbatan dagiti kararagtayo. (Juan 9:31; 1 Juan 3:22) Ket sagrapentayto ti pudpudno a ragsak.​—Juan 13:17.

20. Ania ti nasayaat a mennamennaen bayat a makitkitayo ti teksto iti intero a tawen 1997?

²⁰ Kabayatan ti 1997, masansanto a maaddaantayo iti gundaway a mangbasa ken mangusig iti teksto iti tawen, Salmo 143:10, NW: “Isuronak a mangaramid iti pagayatam.” Bayat nga aramidentay daytoy, usarentayo ti sumagmamano kadagiti gundaway a mangutob kadagiti probision ti Dios agpaay kadatayo tapno masursuruantayo, kas nasalaysay iti ngato. Ken aramatentayo ti kasta a panagmennamenna kadagidiay a sasao kas panggutugot nga agtignay maitunos iti dayta a panagpakpakaasi, tangay ammotayo a “ti mangaramid iti pagayatan ti Dios agtalinaed iti agnanayon.”​—1 Juan 2:17.

Kasanoyo a Sungbatan?

◻ Asino ita ti masursuruan a mangaramid iti pagayatan ni Jehova?

◻ Kasano koma nga apektarannatay ti Salmo 143:10 kabayatan ti 1997?

◻ Kasanotayo a masursuruan a mangaramid iti pagayatan ni Jehova?

◻ Aniat’ makalikaguman kadagiti Kristiano a nagannak iti panangisuro kadagiti annakda?