Baro a Programa iti Aldaw ti Espesial nga Asamblea
1 “Agbalinkayo a Tattao a Sinursuruan ni Jehova” ti tema para iti baro a programa iti aldaw ti espesial nga asamblea a mangrugi iti Pebrero. (Juan 6:45) Ti nadiosan a sursuro manipud ken Jehova ti pudno a tumulong kadatayo a maaddaan iti makapnek a panagbiag. Patanorenna kadatayo ti nasged a panangipateg iti naespirituan a tawidtayo. Ti panangikagumaantayo a tumulong kadagiti sabsabali a dumngeg iti naimbag a damag pagbalinennatayo a naserbi a kameng ti kagimongan. Itampok daytoy nga aldaw ti espesial nga asamblea dagiti bendision a masagrap dagiti tattao a sinursuruan ni Jehova.
2 Pagdumaen ti programa dagiti magunggona iti nadiosan a sursuro ken dagiti pagdaksan ti nailubongan a sursuro. Ad-adda a nalawag a makitatayo no kasano ti panangipaay ni Jehova iti katan-okan a kita ti edukasion—edukasion a naibasar iti Saona, ti Biblia. Maipaganetget dagiti tallo a benneg ti panagdayaw a pakasagrapantayo iti ragsak iti panagpaisuro iti Dios. Mainayon pay, maparegta dagiti agtutubo a tumulad kadagiti nalatak a pagwadan iti Biblia a kas kada David ken Timoteo ken mangipangruna iti biagda kadagiti naespirituan nga aramid. Mapatibker ti pammatitayo bayat a maitampok met ti kinasungdo dagiti nataengan. Adda gundaway nga agpabautisar dagiti kabbaro a dedikado a maikari. Sakbay pay ti aldaw ti asamblea, masapul a pakaammuandan ti mamangulo a manangaywan maipapan iti dayta a tarigagay.
3 Ti kangrunaan a diskurso iti aldaw ti espesial nga asamblea ket napauluan iti “Sinursuruan ni Jehova a Mangaramid iti Pagayatanna.” Ipaganetgetna dagiti rason no apay a kasapulan nga itultuloytay amin ti agsursuro, agtalinaed a natibker iti pammati, ken agtultuloy a rumang-ay. Mairamanto dagiti makapabileg a kapadasan a mangipakita no kasano a nakatulong dagiti publikasion ti Sosiedad kadagiti adu nga agpaisuro ken Jehova.
4 Mangaramidkayo iti masnup a plano a tumabuno. Seggaanyo ti agpaisuro iti Naindaklan nga Instruktortayo maipapan iti adu nga agkakaimbag a bambanag.—Isa. 30:20.