Programa iti Aldaw ti Espesial nga Asamblea iti 2010
1. (a) Ania dagiti Nainkasuratan a tema ti aldaw ti espesial nga asamblea a nailawlawag kadagiti kallabes a tawen? (b) Adda kadi aniaman a partikular a tampok manipud kadagiti napalabas nga aldaw ti espesial nga asamblea a nakatulong kadakayo iti ministerioyo?
1 “Siguraduenyo ti Napatpateg a Bambanag,” “Agtakder a Sititibker kas Maysa nga Arban,” “Agtultuloy a Mangsaksi iti Kinapudno,” ken “Datayo ti Pila—Ni Jehova ti Managdamili.” (Fil. 1:9, 10, 27; Juan 18:37; Isa. 64:8) Dagitoy ket sumagmamano laeng kadagiti tema a nailawlawag kadagiti napalabas nga aldaw ti espesial nga asamblea. Magagaranka kadin a tumabuno iti aldaw ti espesial nga asamblea para iti 2010? Mailawlawag iti daytoy nga asamblea ti tema a: “Ti Tiempo a Nabati ket Ababan,” a naadaw iti 1 Corinto 7:29.
2. Kasanotayo a maparayray ti gagartayo a tumabuno iti daytoy nga asamblea?
2 Sigagagar a pagsasaritaanyo ti maipapan iti aldaw ti espesial nga asamblea apaman a mayanunsio iti kongregasionyo ti petsa a pannakaangay dayta. Ti dadduma a nagannak tultulonganda dagiti annakda a mangpadaan iti asamblea babaen ti panangisuratda iti petsa ti asamblea iti kalendarioda, agraman ti listaan dagiti itugotda, sa agbilangda no mano laengen nga aldaw ti urayenda. Kabayatan ti rabii a Panagdaydayaw ti Pamilia, mabalin a kayatyo a repasuen dagiti innotaryo manipud kadagiti napalabas nga aldaw ti espesial nga asamblea. Maisaganayo met ti pusoyo agpaay iti daytoy nga okasion babaen ti panangrepasoyo iti libro a Magunggonaan iti Edukasion nga Ipaay ti Teokratiko nga Eskuelaan ti Panagministro, panid 13-16, tapno matulongankayo ken ti pamiliayo a ‘mangsiput no kasano ti panagimdengyo.’—Luc. 8:18.
3. Kasanotayo a magunggonaan a naan-anay kadagiti maidatag iti asamblea?
3 Iyaplikaryo ti Masursuroyo: Kalpasan ti asamblea, gagangay a mangmangngegtayo ti, “Anian a nagsayaat daytoy a programa!” Kanayon a pudno dayta ta ti asamblea ket maysa kadagiti nabaknang a probision manipud ken Jehova. (Prov. 10:22) Tapno agbunga ti mangngegantayo nga impormasion, masapul nga utoben ken ditay liplipatan dayta. (Luc. 8:15) Bayat ti panagawidyo, iwayaanyo a pagsasaritaan ti programa ti asamblea kas maysa a pamilia wenno kas grupo iti uneg ti lugan. Pagsasaritaanyo dagiti kalat ti tunggal maysa ken dagiti punto a makatulong iti ministerioyo. Ti panangaramidyo iti daytoy ket makatulong tapno magunggonaankayo iti impormasion uray no nabayagen a nalpas ti asamblea.—Sant. 1:25.
4. Apay nga espesial daytoy nga asamblea agpaay kadatayo?
4 Kanayon a mariknatayo nga espesialtayo no makaawattayo iti sagut nga eksakto a kasapulantayo. Saan kadi a sigagagar a padpadaanantayo no ania ti insagana ni Jehova iti sumaganad nga aldaw ti espesial nga asambleatayo? Sigurado a makagunggona dayta kadatayo iti amin nga aspeto. Manamnamatayo nga umawattayo iti sagut a kasapulantayo manipud iti nailangitan nga Amatayo a ni Jehova babaen ti pammaregta ken pannakasanay a mangitungpal iti trabaho nga inkumitna kadatayo.—2 Tim. 4:2; Sant. 1:17.