Baro nga Urnos iti Panangrepaso Kadagiti Programa ti Asamblea
Bayat a dumakdakes ti lubong ni Satanas, pabpabilgennatayo ni Jehova a ‘mangtallikud iti di kinanadiosan ken nailubongan a tartarigagay ken agbiag a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag.’ (Tito 2:12) Dagiti programa ti tinawen nga asamblea sirkito ken ti aldaw ti espesial nga asamblea ket karaman kadagiti probision nga ipapaayna babaen ti “matalek ken masirib nga adipen.” (Mat. 24:45) Anian a makapabileg dagitoy a naespirituan a panagtataripnong!
Tapno matulongantayo a manglaglagip ken mangipakat kadagiti nasursurotayo, maipatungpal iti 2005 a tawen serbisio ti baro nga urnos iti panangrepaso kadagiti programa ti asamblea. Naglaon ti panid 5-6 iti daytoy a suplemento kadagiti artikulo a mangted iti pamalatpatan no ania nga impormasion ti maidatag ken kadagiti pangrepaso a saludsod iti tunggal programa ti asamblea. Usigen dagiti kongregasion daytoy nga impormasion iti Gimong ti Serbisio no asidegen ken di agbayag kalpasan ti itatabunoda kadagiti asambleada. Kasano ti pannakayurnos daytoy?
Maysa wenno dua a lawas sakbay a tumabuno ti kongregasion iti asamblea sirkito, maiparang iti Gimong ti Serbisio ti sangapulo a minuto a palawag iti artikulo a “Baro a Programa ti Asamblea Sirkito” a mangpatanor iti panangsegga iti programa. Ti agpalawag iturongna met ti atension kadagiti pangrepaso a saludsod ken paregtaenna ti amin nga aginotar kas panagsagana iti repaso a maangay sumagmamano a lawas kalpasan ti asamblea.
Sumagmamano a lawas kalpasan ti asamblea, mairaman iti Gimong ti Serbisio ti 15 a minuto a panangrepaso iti programa ti umuna nga aldaw ti asamblea. Iti sumaruno a lawas, mausar ti 15 a minuto iti panangrepaso iti maikadua nga aldaw ti programa. Dagiti pangrepaso a saludsod iti daytoy a suplemento ti pakaibatayan dagitoy a diskusion. Ti praktikal a pateg ti impormasion ti pakaipamaysaan ti repaso. Dagiti panglakayen mabalinda a paababaen, ikkaten, wenno baliwan ti eskediul ti dadduma a paset ti Gimong ti Serbisio tapno maiwayaan dagitoy a repaso.
Kasta met laeng nga urnos ti masurot mainaig iti programa ti aldaw ti espesial nga asamblea, ngem adda 15 a minuto a panangrepaso iti intero a programa. Kayattay amin nga idulin ken usaren daytoy a suplemento tapno magunggonaantayo a naan-anay iti nagsayaat a pannursuro ni Jehova.—Isa. 48:17, 18.