‘Taraon iti Umiso a Tiempo’
1. Kasano a nakatulong kadakayo ken kadagiti dadduma ti nabiit pay a programa ti aldaw ti espesial nga asamblea?
1 Kalpasan ti itatabunotayo iti aldaw ti espesial nga asamblea, masansan a maikunatayo, “Dayta la ketdi ti kasapulantayo!” Kinuna ti maysa a manangaywan iti sirkito a kalpasan ti pannakangngegda iti programa, ti dadduma iti sirkitona inyebkasda ti tarigagayda nga ad-adda pay a makiraman iti ministerio. Kinuna ti maysa nga agdaldaliasat a manangaywan, “Nakatulong dayta kadakami a mangutob a naimbag no ayantayon iti agus ti panawen bayat nga us-usigenmi dagiti prioridadmi iti biag.” Kinuna ti sabali pay nga agdaldaliasat a manangaywan, “Inyebkas ti adu nga agibumbunannag a nagsayaat dayta a palagip tapno siguraduenda nga ipamaysa ti kapatgan iti biagda, ti ministerio.” Kasano a natulongannakayo ti aldaw ti espesial nga asamblea?
2. Ania ti mailawlawag iti programa iti daytoy a tawen serbisio?
2 Ti programa iti daytoy a tawen serbisio ket kasapulantayo met. Natemaan daytoy iti ‘Agkamangkayo ken Jehova,’ a naadaw iti Salmo 118:8, 9. Dagitoy ti sumagmamano kadagiti topiko a mailawlawag: “No Kasano a ni Jehova ket Sarikedked Kadagiti Panawen ti Rigat,” “Tulonganyo Dagiti Sabsabali nga Agkamang Kadagiti Payak ni Jehova,” “Tuladenyo ni Jehova iti Panangipaay iti Pagkamangan,” “Dakayo nga Agtutubo, Agtalekkayo ken Jehova!” ken “Ti Naespirituan a Paraisotayo—Pagkamangan nga Impaay ni Jehova.”
3. Kasanotayo a mabenepisiaran a naan-anay no tumabunotayo iti asamblea?
3 Tapno Mabenepisiaran: Apaman a maipakaammo ti petsa ti asamblea, mangaramidkayon kadagiti masnup a plano tapno makatabunokayo ken awisenyo met dagiti iyad-adalanyo. Tapno ‘agbungatayo buyogen ti panagibtur,’ nasken a ditay liplipatan dagiti mangngegantayo. (Luc. 8:15) Gapuna, dumngegkayo a naimbag iti programa, ken inotaryo dagiti kangrunaan a punto agraman dagiti instruksion a kayatyo nga iyaplikar iti biagyo ken iti ministerioyo. Kalpasan ti asamblea, iwayaanyo a pagsasaritaan a sangapamiliaan ti programa ken usigenyo dagiti espesipiko a pamay-an a mayaplikaryo ken ti pamiliayo ti nangngegyo nga impormasion.
4. Apay a rumbeng a seggaantayo ti mapaspasungad nga aldaw ti espesial nga asambleatayo?
4 Kas iti nananam ken nasustansia a taraon, ti maidasar iti aldaw ti espesial nga asamblea iti daytoy a tawen ket naisagana buyogen ti adu nga ayat ken napagpanunotan a naimbag. Sapay koma ta bendisionan ni Jehova ti panangikagumaanyo a tumabuno ken mabenepisiarankayo iti daytoy a ‘taraon iti umiso a tiempo’ a makapasalun-at iti naespirituan kadagiti Kristiano a ministro.—Mat. 24:45.