Baro a Programa ti Aldaw ti Espesial nga Asamblea
Gapu ta pinabileg ida ti nasantuan nga espiritu, sipipinget nga insaknap dagiti nagkauna a Kristiano ti naimbag a damag aginggat’ mabalin. (Ara. 1:8; Col. 1:23) Ti baro a programa ti aldaw ti espesial nga asamblea a, ‘Makumikomkayo Unay Koma iti Sao,’ tulongannatayo a mangtulad iti nagsayaat nga ulidanda. (Ara. 18:5) Ditoy Pilipinas, mangrugi daytoy a programa inton Pebrero 2007.
Kinuna ni Ari David maipapan iti sao ti Dios: “Ti pammalagip ni Jehova mapagpiaran, mamagsirib iti daydiay awanan kapadasan.” (Sal. 19:7) Ti nagsayaat ti pannakaisaganana a programa iti 2007 nga aldaw ti espesial nga asamblea itampokna ti pateg ti Kasuratan “iti panangpalinteg iti bambanag” ken paregtaennatayo a mangusar iti Sao ti Dios iti panangasaba ken panangisuro buyogen ti kinaganat. (2 Tim. 3:16, 17) Ti baro a programa ipakitana no kasanotayo a maliklikan dagiti silo ken no kasanotayo a magunggonaan iti panangyaplikar kadagiti prinsipio ti Biblia iti inaldaw a panagbiag. Tulongannatayo pay a mangusar iti Sao ti Dios iti panangbadangtayo kadagiti agtutubo ken kabbaro a rumang-ay iti naespirituan.
Siguraduenyo nga addakayton sakbay a mangrugi ti programa, ken agimdengkayo a naimbag. Inotaryo dagiti punto a mabalinyo nga iyaplikar. Ipakitayo ti apresasionyo kadagiti maipaay a pammilin ken pammalagip, ken utobenyo no kasano nga iyaplikaryo dagiti bambanag a nasursuroyo.
Ti programa ti aldaw ti espesial nga asamblea parayrayenna ti apresasiontayo iti Sao ti Dios, palagipannatayo nga agtultuloy a naalibtak a mangikasaba iti naimbag a damag ti Pagarian buyogen ti kinapinget, ken ipakitana kadatayo no kasano a tulongan dagiti sabsabali a mangaramid met iti kasta. Determinadokayo ngarud koma a saan a maikapis iti aniaman a naespirituan a panangiwanwan ken instruksion nga ipapaay ni Jehova iti kastoy a pamay-an!—Isa. 30:20b, 21.