Panangrepaso iti Aldaw ti Espesial nga Asamblea

Daytoy ti mausar a pamalatpatan ken pangrepaso iti programa ti aldaw ti espesial nga asamblea iti 2005 a tawen serbisio. Nailawlawag no kasano a maangay daytoy iti artikulo a “Baro nga Urnos iti Panangrepaso Kadagiti Programa ti Asamblea,” nga agparang iti panid 4 daytoy a suplemento. Kabayatan ti repaso, iyan-anayyo ti oras tapno mausig amin a saludsod. Naipamaysa koma ti repaso iti no kasano a mayaplikartayo ti naidatag nga impormasion.

SESION ITI AGSAPA

1. Apay a nasken nga ad-adda nga umimdengtayo ken ni Jehova? Ania ti kayat a sawen ti panagimdeng? (“No Apay nga Imdengantayo ti Timek ni Jehova”)

2. Kasano a mataginayon dagiti pamilia ti nasayaat nga urnos iti naespirituan nga aktibidad? (“Dagiti Pamilia nga Umim-imdeng iti Sao ti Dios nga Awan Makasingsinga”)

3. Kasano a dagidiay adda iti sirkito gunggundawayanda ti mangasaba iti di pormal a pamay-an? (“Aramidenyo ti Amin a Banag a Pakaidayawan ti Dios”)

4. Ania dagiti maadaltayo iti pakaballaagan nga ehemplo a masarakan iti Hebreo kapitulo 3 ken 4? Kasano ti pannakisao kadatayo ni Jehova ita? (“Ti Panagimdeng No Agsasao ti Dios Saluadannatayo”)

5. Kasanoka a nagunggonaan iti palawag iti bautismo? (“Dedikasion ken Bautismo”)

SESION ITI MALEM

6. Ania ti maammuantayo maipapan ken ni Jesus idi agtutubo pay laeng, ket kasano a dagiti agtutubo iti sirkito tultuladenda ti ulidanna? (“No Kasano a ti Napasnek a Panagimdeng iti Sao ti Dios Pabilgenna Dagiti Agtutubo”)

7. Kadagiti ania a pamay-an a mabalin a rugian dagiti nagannak nga iruam dagiti maladagada ken dagiti ubbing pay nga annakda kadagiti dalan ni Jehova? (“Dagiti Ubbing nga Umim-imdeng iti Dios ken Agsursuro”)

8. Kadagiti ania nga espesipiko a banag a nasken nga imdengantayo ni Jehova, ti Anakna, ken ti “matalek ken masirib nga adipen”? (Mat. 24:45) Apay a nasken nga aramidentayo dayta? (“Ipangagyo a Kanayon ti Pannursuro ti Dios”)