Baro a Programa ti Aldaw ti Espesial nga Asamblea
No makakita wenno makangngegtayo iti pagilasinan a mangipangpangta ti didigra ngem ditay ipangag dayta, mabalin a dakes ti pagbanaganna. Ad-adda pay a nasken nga ipangagtayo dagiti bilin ni Jehova mainaig kadagiti naespirituan a banag. Maipaganetget daytoy iti programa ti aldaw ti espesial nga asamblea iti umay a tawen serbisio. Natemaan daytoy iti “Siputanyo No Kasano ti Panagimdengyo.”—Luc. 8:18.
Iti umuna a palawagna, ti bumisbisita nga ispiker ilawlawagna no kasano nga agaplikar kadatayo ita ti balakad ni Pablo kadagiti Hebreo kadagiti umuna a kapitulo ti naipaltiing a suratna kadakuada. Ti pangserra a palawag nga, “Ipangagyo a Kanayon ti Pannursuro ti Dios,” tulongannatayo amin a mangamiris no pudno met laeng nga umim-imdengtayo ken ni Jehova, iti Anakna, ken iti “matalek ken masirib nga adipen.”—Mat. 24:45.
Adu dagiti paset ti programa a nangnangruna a makagunggona kadagiti pamilia. Ti “Dagiti Pamilia nga Umim-imdeng iti Sao ti Dios nga Awan Makasingsinga” tulongannatayo tapno dagiti banag iti lubong saanda a leppesen ti espiritualidadtayo. Karaman iti dayta ti pannakainterbiu dagidiay nangaramid kadagiti panagbalbaliw tapno mayun-unada dagiti naespirituan a banag. Ti “No Kasano a ti Napasnek a Panagimdeng iti Sao ti Dios Pabilgenna Dagiti Agtutubo” iramanna ti pannakainterbiu dagiti agtutubo a nangsalimetmet iti kinapudno idiay eskuelaan, kadagiti kapatadanda, wenno iti ministerio. Ti “Dagiti Ubbing nga Umim-imdeng iti Dios ken Agsursuro” tulongannatayo a di mangtagibassit iti abilidad dagiti ubbing nga agsursuro. Ti pannakainterbiu dagiti agtutubo ken dagiti dadakkelda tulongannatayo a mangkita iti pagsayaatan ti panangiruam kadagiti ubbing iti daldalan ni Jehova manipud iti kinamaladagada.
Bayat nga ‘iyaw-awan ni Satanas ti intero a mapagnaedan a daga,’ ipakpakita ni Jehova kadagiti matalek nga adipenna ti dalan a rumbeng a pagnaanda. (Apoc. 12:9; Isa. 30:21) Ti napasnek a panagimdeng iti balakadna ken sitatallugod a panagbiag a mayannurot iti dayta pagbalinennatayo a masirib, naragsak, ken mangiturong iti biag nga agnanayon.—Prov. 8:32-35.