Baro a Programa iti Aldaw ti Espesial nga Asamblea
Nakaskasdaaw ti pannakadisenio ti mata. (Sal. 139:14) Ngem saanna a mabalin a paggiddanen a kitaen ti dua a banag. Pudno dayta iti literal ken piguratibo a pamay-an. Tapno nalawag ken nakasentro ti naespirituan a matatayo, nasken nga ipamaysatayo ti atensiontayo iti panangaramid iti pagayatan ti Dios. Bayat a kumarkaro dagiti pakasingaan iti lubong ni Satanas, anian a maitutop a ti programa iti aldaw ti espesial nga asamblea iti 2006 ilawlawagna ti tema a “Taginayonenyo a Simple ti Matayo”!—Mat. 6:22.
Ania ti aramidentayo tapno umawattayo kadagiti pamendision ni Jehova? (Prov. 10:22) Mausig daytoy a saludsod iti paset nga “Agapitkayo Kadagiti Gunggona no Taginayonenyo a Simple ti Matayo.” Itampok dagiti interbiu no ania dagiti magunggonatayo iti panangyaplikar kadagiti Nainkasuratan a prinsipio. Ti umuna a palawag ti bumisbisita nga ispiker a “Panangtaginayon a Simple ti Mata iti Nadangkes a Lubong,” pakdaarannatayo kadagiti banag a mangnayon kadagiti pakakumikomantayo ken in-inut a mangleppes iti espiritualidadtayo. Maammuantayo met no ania ti ramanen ti panangpili iti “naimbag a bingay.”—Luc. 10:42.
Kasano a dagiti nagannak ken dagiti sabsabali maparegtada dagiti agtutubo a Kristiano a mangipamaysa kadagiti naespirituan a kalat? Dagiti paset a “Dagiti Nagannak nga Umiso ti Panangibiatda Kadagiti Panada” ken “Dagiti Agtutubo a Mangragragpat Kadagiti Naespirituan a Kalat” ramanenda dagiti komento dagiti nagannak ken agtutubo maipapan iti daytoy napateg a saludsod. (Sal. 127:4) Ti pangserra a palawag ti bumisbisita nga ispiker ilawlawagna no kasanotayo a makidanggay iti organisasion ni Jehova kas indibidual, kas pamilia, ken kas maysa a kongregasion.
Kabbarotayo man wenno nabayagen nga agserserbi ken ni Jehova, napateg a ‘taginayonentayo a simple ti matatayo.’ Ti programa iti aldaw ti espesial nga asamblea tulongannatayo a mangaramid iti dayta.