Baro a Programa iti Aldaw ti Espesial nga Asamblea
Nangrugi ti probision iti espesial nga asamblea idi 1987. Dagitoy a taripnong a maangay iti agmalem ket napaneknekan a makaparegta kadagiti adipen ni Jehova ken kadagiti interesado a tumabuno. Mangrugi iti Pebrero, 1999, maangayto ti baro a programa iti aldaw ti espesial nga asamblea. Makitayonto a makagunggona iti naespirituan dagiti siam a palawag ken naruay nga interbiu ken kapkapadasan.
Ti tema ti baro a programa ket “Ipakitayo ti Naimpusuan a Panangapresiar iti Lamisaan ni Jehova.” (Isa. 65:14; 1 Cor. 10:21) Pabilgenna ti determinasiontayo a mangipangpangruna iti biagtayo ti panagdayawtay ken Jehova. (Sal. 27:4) Ti paset ti manangaywan ti sirkito ilawlawagna ti “Panangsukimat Kadagiti Pagannayasan ti Pusotayo” no maipapan iti pannakigimong. Ti bisita nga agpalawag (wenno lokal a kabsat no awan ti bisita nga agpalawag) ipakitana kadatayo no kasano a “Manteneren ti Espiritualidad Babaen ti Pannangan iti Lamisaan ni Jehova.” Addanto met praktikal a pammaregta kadagiti agtutubo iti organisasion ni Jehova tapno makapagtalinaedda a di maisin iti panagserbi iti Dios. Ti kangrunaan a diskurso ti bisita nga agpalawag, a napauluan “Pannakapabileg iti Naespirituan Tapno Makakasaba a Situtured,” ipakitana no kasano a makatulong dagiti naaramid a probision baeten ti kongregasion tapno maikasabatayo a situtured ti Pagarian. Siasino ti dina kayat ti magunggonaan iti daytoy a programa?
Kadagidiay kabbaro a dedikado nga agtarigagay nga agpabautisar, pakaammuanda koma a dagus ti mamangulo a manangaywan. Inanamaentayo nga iti panangrugi ti maika-12 a tawen nga urnos iti aldaw ti espesial nga asamblea, amin a tumabuno ket mapabilegdanto iti naespirituan a maipaay iti trabaho nga adda iti masanguanan.