Ti Nasaysayaat a Wagas
MASEKNAN dagiti Saksi ni Jehova iti panagrakaya ti espiritualidad iti lubong ken iti imoralidad ken narelihiosuan a panagduadua nga agraraira iti kagimongan. Kas bungana, no dadduma maaw-awaganda a pundamentalista. Ngem kastada aya? Saan. Nupay addaanda iti natibker a narelihiosuan a pammati, saanda a pundamentalista iti anag a pannakaaramat ti termino. Saanda a pilpiliten dagiti lider ti politika a mangitandudo iti maysa a kapanunotan, ken saanda a mangyussuat kadagiti demostrasion ken kinaranggas maibusor kadagidiay dida kanunongan. Nakasarakda iti nasaysayaat a wagas. Tultuladenda ti Liderda, ni Jesu-Kristo.
Kombinsido dagiti Saksi ni Jehova nga adda narelihiosuan a kinapudno, a masarakan dayta iti Biblia. (Juan 8:32; 17:17) Ngem isursuro ti Biblia dagiti Kristiano nga agbalin a manangngaasi, naimbag, naalumamay, ken nainkalintegan—dagiti galad a saan a mangipalubos iti kinapanatiko. (Galacia 5:22, 23; Filipos 4:5) Iti libro ti Biblia a Santiago, maparparegta dagiti Kristiano a sukayenda “ti sirib manipud ngato,” a nailadawan kas “umuna iti amin nadalus, sumaganad natalna, nainkalintegan, sisasagana nga agtulnog, napno iti asi ken naimbag a bungbunga.” Innayon ni Santiago: “Ti bunga ti kinalinteg naimula ti bin-ina iti sidong dagiti natalna a kasasaad a maipaay kadagidiay agar-aramid ti talna.”—Santiago 3:17, 18.
Malagip dagiti Saksi ni Jehova a ni Jesus ket maseknan unay idi iti kinapudno. Imbagana ken ni Poncio Pilato: “Maigapu itoy a naiyanakak, ken maigapu itoy nga immayak iti lubong, tapno saksiak ti kinapudno.” (Juan 18:37) Nupay isu ket maysa nga awanan-buteng a manangitandudo iti kinapudno, saanna nga impilit dagiti patpatienna iti sabsabali. Imbes ketdi, tinignayna ti panunot ken pusoda. Ammona a ti nailangitan nga Amana, a maysa a “naimbag ken nalinteg” a Dios, ti mangikeddeng no kasano ken kaano a maikkat ti kinaulbod ken kinaawan-hustisia ditoy rabaw ti daga. (Salmo 25:8) Gapuna, saanna a pinilit dagidiay di immanamong kenkuana. Iti kasumbabangirna, dagidiay tradisional a papangulo ti relihion idi kaaldawanna ti nangikagumaan a mangpilit ken Jesus.—Juan 19:5, 6.
Natibker ti pammati dagiti Saksi ni Jehova maipapan kadagiti narelihiosuan a doktrina, ken iparangarangda ti natibker a pagalagadanda no iti moral. Kas ken apostol Pablo, kombinsidoda nga adda laeng “maysa nga Apo, maysa a pammati, maysa a bautismo.” (Efeso 4:5) Ammoda met ti sasao ni Jesus nga: “Akikid ti ruangan ken nailet ti dalan nga agturong iti biag, ket bassit dagidiay makasarak iti dayta.” (Mateo 7:13, 14) Kaskasdi, dida pilpiliten ti dadduma a sumurot iti pammatida. Imbes ketdi, tultuladenda ni Pablo ken “agpakpakaasi” iti amin nga agtarigagay a ‘makikappiada iti Dios.’ (2 Corinto 5:20) Daytoy ti nasaysayaat a wagas. Daytoy ti wagas ti Dios.
Naiduma unay ti narelihiosuan a pundamentalismo, sigun iti pannakaaramat dayta a sao ita. Adu a pamay-an ti ar-aramaten dagiti pundamentalista—a pakairamanan ti kinaranggas—tapno maipatungpal dagiti prinsipioda iti kagimongan. Iti panangaramidda iti dayta, agbalinda a napateg a paset ti napolitikaan a sistema. Ngem, kinuna ni Jesus a dagiti pasurotna rumbeng a “saanda a paset ti lubong.” (Juan 15:19; 17:16; Santiago 4:4) Maitunos kadagita a sasao, siiinget nga agtalinaed a neutral dagiti Saksi ni Jehova kadagiti napolitikaan a susik. Ken, kas inamin ti Italiano a pagiwarnak a Fuoripagina, “saan[da] nga ipilit ti aniaman iti asinoman; nawaya ti amin nga umawat wenno agkedked iti ibagbagada.” Ania ti resulta? Ti natalna a mensahe ti Biblia dagiti Saksi awisenna amin a kita ti tattao, uray dagidiay dati a pundamentalista.—Isaias 2:2, 3.
Lubong nga Addaan Kadagiti Natibker a Pagalagadan
Bigbigen dagiti Saksi a saan a marisut ti tattao dagiti parikut a pakaseknan dagiti pundamentalista. Diyo mapilit ti maysa a tao a mamati iti Dios wenno umawat iti personal a pammatiyo. Ti panangpanunot a posible ti kasta a banag ti nakaigapuan ti sumagmamano kadagiti kaaalinggagetan a pasamak iti historia, kas dagiti Krusada, dagiti Inkisision idi edad media, ken ti “pannakakomberte” dagiti Americano nga Indian. Nupay kasta, no agtalekkay iti Dios, situtulokkayo a mangipannuray kadagiti bambanag kenkuana.
Sigun iti Biblia, nangikeddeng ti Dios iti panawen a panangipalubosna kadagiti tattao a mangsalungasing kadagiti lintegna ket iti kasta mangibunga iti panagsagaba ken ut-ot. Dandanin aggibus dayta a panawen. Agturturayen ni Jesus kas Ari iti nailangitan a Pagarian ti Dios, ket asidegen nga ikkaten dayta a Pagarian dagiti gobierno ti tao ket sublatenna ti inaldaw a panangituray iti sangatauan. (Mateo 24:3-14; Apocalipsis 11:15, 18) Ti resulta ket maysanto a sangalubongan a paraiso nga iti dayta naruay ti talna ken kinalinteg. Iti dayta a tiempo awanton ti panagduadua no kasano a dayawen ti pudno a Dios. “Ti sililinteg tawidennanto ti daga, ket agtaengto kenkuana nga agnanayon.” (Salmo 37:29) Ti kakasta nga agnanayon a galad kas ti naayat a kinamanangaasi, kinapudno, hustisia, ken kinaimbag agballiginto agpaay iti pagsayaatan ti amin a natulnog a sangatauan.
Iti panangnamnama iti dayta a panawen, naindaniwan a kinuna ti salmista: “Ti panangngaasi ken kinapudno nagarakupda; ti kinalinteg ken kappia naginnagepda. Ti pudno tumaud ditoy daga ket ti kinalinteg timmannawag manipud langit. Wen, ni Jehova itdennanto ti naimbag; ket ti dagatayo pataudennanto ti bunga. Ti kinalinteg magnanto iti sanguananna, ket pagbalinennanto a dana dagiti tugtugotna.”—Salmo 85:10-13.
Nupay ditay mabalbaliwan ti lubong, kabaelantayo kas indibidual a patanoren dagiti nadiosan a galad uray ita. No kasta, mabalintay nga ikagumaan ti agbalin a kita dagiti tattao a kayat ti Dios nga agdaydayawto kenkuana iti dayta baro a lubong. Iti kasta mairamantayto kadagidiay naemma a tinukoy ti salmista: “Dagiti naemma tawidendanto ti daga, ket maay-ayatandanto iti kinaruay ti talna.” (Salmo 37:11) Andingayen ken paraburan ti Dios dagidiay mangaramid iti pagayatanna, ket addada karina a nakaskasdaaw a banag agpaay iti masakbayanda. Kinuna ni apostol Juan: “Ti lubong aglabas ken kasta met ti tarigagayna, ngem ti mangaramid iti pagayatan ti Dios agtalinaed iti agnanayon.”—1 Juan 2:17.
[Ladawan iti panid 7]
Aw-awisen dagiti Saksi ni Jehova ti amin tapno maammuanda ti maipapan iti naimbag a damag ti Pagarian ti Dios
[Picture Credit Line iti panid 6]
Silaw iti panid 3, 4, 5, ken 6: Printer’s Ornaments/ni Carol Belanger Grafton/Dover Publications, Inc.