No Apay a Saan nga Umdas Dagiti Milagro a Mangpatanor iti Pammati
TI LAENG makita ti patien. Dayta ti panangmatmat ti adu. Kuna ti dadduma a mamatida iti Dios no ipalgakna ti bagina iti namilagruan a pamay-an. Nalabit a kasta, ngem agresulta ngata iti pudno a pammati ti kasta a kapanunotan?
Usigenyo dagiti Israelita a da Core, Datan, ken Abiram. Ipakita ti Biblia a naimatanganda dagitoy nakaskasdaaw a milagro a naggapu iti Dios: ti sangapulo a saplit iti Egipto, ti ilalasat ti nasion nga Israel iti Baybay a Nalabaga, ken ti pannakatalipupos ni Egipcio a Faraon ken ti buyotna. (Exodo 7:19–11:10; 12:29-32; Salmo 136:15) Nangngeg met da Core, Datan, ken Abiram a nagsao ni Jehova manipud langit iti Bantay Sinai. (Deuteronomio 4:11, 12) Ngem, di nagbayag kalpasan a napasamak dagitoy a milagro, immalsa dagitoy tallo a lallaki ken Jehova ken kadagiti nadutokan nga adipenna.—Numeros 16:1-35; Salmo 106:16-18.
Agarup 40 a tawen kalpasanna, nasaksian met ti maysa a mammadto nga agnagan Balaam ti maysa a milagro. Nupay bimmallaet ti maysa nga anghel, saan a naatipa a dimmasig kadagiti kabusor ti Dios, dagiti Moabita. Iti laksid dayta a milagro, nagtultuloy ni Balaam ken nagtignay a maibusor ken Jehova a Dios ken iti ilina. (Numeros 22:1-35; 2 Pedro 2:15, 16) Nupay kasta, awan kaimudinganna ti kinaawan pammati ni Balaam no maidilig ken ni Judas Iscariote. Nupay maysa a nadekket a kadua ni Jesus ken naimatanganna dagiti adu a nakaskasdaaw a milagro, liniputan ni Judas ni Kristo a kasukat ti tallopulo a bagi ti pirak.—Mateo 26:14-16, 47-50; 27:3-5.
Ammo met idi dagiti Judio a panguluen ti relihion ti maipapan iti adu a milagro ni Jesus. Kalpasan a pinagungarna ni Lazaro, inaminda pay ketdi: “Daytoy a tao agaramid kadagiti adu a pagilasinan.” Ngem limmukneng kadi ti pusoda ken namatida idi makitada ni napagungaren a Lazaro? Iti kinaagpaysona, saan. Imbes ketdi, insikatda a patayen da Jesus ken Lazaro!—Juan 11:47-53; 12:10.
Uray ti direkta nga ibaballaet ti Dios dina napatanor ti pammati kadagidiay dakes a tattao. Naminsan bayat nga adda ni Jesus kadagiti arubayan ti templo, nagkararag iti napigsa: “Ama, padayagem ta naganmo.” Simmungbat ni Jehova babaen ti maysa a timek a naggapu sadi langit: “Agpadpada a pinadayagko dayta ken padayagekto dayta manen.” Kaskasdi, daytoy namilagruan a pasamak dina napatanor ti pammati iti puso dagidiay adda idi. Kuna ti Biblia: “Nupay nakaaramid iti nakaad-adu a pagilasinan iti sanguananda, saanda a naaddaan iti pammati kenkuana.”—Juan 12:28-30, 37; idiligyo ti Efeso 3:17.
No Apay a Dagiti Milagro Dida Napatanor ti Pammati
Kasano nga adda kasta a kinaawan pammati iti laksid dagiti milagro? Agparang a nangnangruna a makapasiddaaw ti panangilaksid dagiti Judio a panguluen ti relihion ken Jesus no usigenyo nga idi mismo a rugianna ti ministeriona, ‘mangnamnaman’ ti kaaduan a Judio iti “Kristo,” wenno ti Mesias. (Lucas 3:15) Nupay kasta, ti parikut ket no ania dagidiay a ninamnamada. Inadaw ni leksikograpo a W. E. Vine ti kinuna ti maysa a nalatak nga eskolar ti Biblia a ti adda idi iti panunot dagiti Judio ket maysa a Mesias a mangipaay kadakuada iti “naindagaan a balligi” ken “material a kinarang-ay.” Gapuna, saanda a sisasagana iti maysa a nanumo, di napolitikaan a Jesus ti Nazaret, a nagparang kadakuada kas pudpudno a Mesias idi 29 K.P. Nagamak met dagiti panguluen ti relihion a dagiti sursuro ni Jesus dadaelenda ti adda a kasasaad ken pagpeggadenda dagiti prominente a saadda. (Juan 11:48) Dagiti datin a nabukel a kapanunotan ken kinaagumda ti nangbulsek kadakuada iti kaipapanan dagiti milagro ni Jesus.
Idi kamaudiananna inlaksid dagiti Judio a panguluen ti relihion ken dagiti sabsabali pay ti namilagruan a pammaneknek a dagiti pasurot ni Jesus tinagiragsakda ti pabor ti Dios. Kas pagarigan, idi pinaimbag dagiti apostolna ti maysa a lalaki a pilay manipud pannakayanakna, insaludsod dagiti makapungtot a kameng ti nangato a korte dagiti Judio: “Ania ti aramidentayo kadagitoy a tattao? Agsipud ta, iti kinapudnona, maysa a nakalatlatak a pagilasinan ti napasamak babaen kadakuada, maysa a naiparangarang kadagiti isuamin nga agnanaed iti Jerusalem; ket ditay mabalin nga ilibak dayta. Nupay kasta, tapno saanen a mairakurak pay a sisasaknap kadagiti tattao, ibagatayo koma a sipapangta kadakuada a saandan a pulos agsao iti asinoman maibatay iti daytoy a nagan.” (Aramid 3:1-8; 4:13-17) Nalawag, daytoy nakaskasdaaw a milagro saan a nangpatanor wenno namataud ti pammati iti puso dagidiay a tattao.
Ti ambision, dayaw, ken agum ti makagapu a pinatangken dagiti adu ti pusoda. Agparang a daytoy ti nagbalin a kaso da Core, Datan, ken Abiram, a nadakamat iti pangrugian. Ti dadduma ket linapdan ti imon, buteng, ken adu a dadduma pay a makadangran a kababalin. Mapalagipantayo met maipapan kadagiti nasukir nga anghel, dagiti demonio, a dati nga addaan pribilehio a makaimatang iti mismo a rupa ti Dios. (Mateo 18:10) Saanda a pagduaduaan ti kaadda ti Dios. Kinapudnona, “dagiti sairo mamatida ket agpigergerda.” (Santiago 2:19) Kaskasdi, awan pammatida iti Dios.
Ti Kaipapanan ti Pudno a Pammati
Saan laeng a panamati ti kaipapanan ti pammati. Ad-adda pay ngem iti apagkanito a pannakatignay iti milagro. Kuna ti Hebreo 11:1: “Ti pammati isu ti sigurado a panangsegga kadagiti bambanag a namnamaen, ti nabatad a parangarang dagiti kinapudno nupay saan a nakita.” Ti tao nga addaan pammati kombinsido iti pusona nga amin a kari ni Jehova a Dios ket arigda natungpalen. Maysa pay, nabileg unay ti di mailibak a pammaneknek dagiti di makita a kinapudno ta ti pammati a mismo maikuna a katupag dayta a pammaneknek. Wen, naibatay ti pammati iti pammaneknek. Ket kadagiti napalpalabas a panawen, adda napateg nga akem dagiti milagro iti panangpatanor iti pammati wenno panangpabileg iti dayta. Dagiti pagilasinan nga inaramid ni Jesus ti nangkombinsir kadagiti sabsabali nga isu ti naikari a Mesias. (Mateo 8:16, 17; Hebreo 2:2-4) Umasping iti dayta, ti kakasta a sagut ti nasantuan nga espiritu, wenno aktibo a puersa ti Dios, kas ti namilagruan a panangpaimbag ken panagsao kadagiti pagsasao pinaneknekanna nga awanen kadagiti Judio ti anamong ni Jehova no di ket ti anamongna naiteden iti kongregasion Kristiano, nga impasdek ti Anakna a ni Jesu-Kristo.—1 Corinto 12:7-11.
Karaman kadagiti namilagruan a sagut ti espiritu ti abilidad nga agipadto. Idi nakita dagiti di manamati daytoy a milagro, natignay ti dadduma nga agdayaw ken Jehova, a kunkunada: “Ti Dios pudno nga adda iti tengngayo.” (1 Corinto 14:22-25) Nupay kasta, saan a pinanggep ni Jehova a Dios a dagiti milagro agbalinda a permanente a paset ti Nakristianuan a panagdayaw. Gapuna, insurat ni apostol Pablo: “Uray no adda dagiti sagut ti panagipadto, mapukawdanto; uray no adda dagiti pagsasao, agsardengdanto.” (1 Corinto 13:8) Napaneknekan a nagsardeng dagitoy a sagut idi natay dagiti apostol ken dagidiay immawat iti kakasta a sagut babaen kadakuada.
No kasta naawanan kadi idin dagiti tao iti pangibatayan iti pammati? Saan, ta kinuna ni Pablo: “[Ti Dios] dina binaybay-an nga awan makasaksi iti bagina iti panagaramidna ti naimbag, nga inikkannakayo kadagiti tudo manipud langit ken kadagiti nabunga a pampanawen, a pinunnona a naan-anay dagiti pusoyo iti taraon ken ragsak.” (Aramid 14:17) Kinapudnona, kadagiti nasingpet-panagpuspusona a tattao a sisasagana a manglukat iti isip ken pusoda iti pammaneknek nga adda iti aglikmuttayo, “dagiti di makita a kualidad [ni Jehova a Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen kadagiti bambanag a naaramid, uray ti agnanayon a pannakabalin ken kina-Diosna, iti kasta awan ti pagpambar [dagidiay mangilibak iti Dios].”—Roma 1:20.
Saan laeng a panamati iti kaadda ti Dios ti kasapulan. Indagadag ni Pablo: “Sumardengkayo a maisuksukog maitunos iti daytoy a sistema ti bambanag, no di ket mapagbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken perpekto a pagayatan ti Dios.” (Roma 12:2) Maaramidan daytoy babaen ti naregget a panagadal iti Kasuratan iti tulong dagiti Nakristianuan a publikasion, kas iti daytoy a magasin. Saan a nakapuy wenno narabaw ti pammati a naibatay iti umiso a pannakaammo iti Sao ti Dios, ti Biblia. Dagidiay makatarus iti pagayatan ti Dios ken mangaramid iti dayta buyogen ti pammati ket mangipapaayda iti sagrado a panagserbi iti Dios.—Roma 12:1.
Panamati Uray Di Makita
Narigatan idi ni apostol Tomas a mamati iti pannakapagungar ni Jesus. “Malaksid no makitak kadagiti imana ti nagdalanan dagiti lansa ket iserrekko ti ramayko iti nagdalanan dagiti lansa ken maiserrekko ti imak iti bakrangna, pudno a diakto mamati,” kinuna ni Tomas. Idi a ni Jesus naglasag kamaudiananna kas tao nga addaan kadagiti sugat a bunga ti pannakailansana, namati ni Tomas gapu iti daytoy a milagro. Nupay kasta, kinuna ni Jesus: “Naragsak dagidiay saan a nakakita ket kaskasdi a mamatida.”—Juan 20:25-29.
Ita, minilion a Saksi ni Jehova ti ‘magmagna babaen ti pammati, saan a babaen ti panagkita.’ (2 Corinto 5:7) Nupay saanda a nakita dagiti milagro a nailanad iti Biblia, natibker ti pammatida a napasamak dagitoy. Mamati dagiti Saksi iti Dios ken iti Saona. Iti tulong ti espirituna, matarusanda dagiti sursuro ti Biblia ken ti kangrunaan a temana—ti pannakaalangon ti kinasoberano ni Jehova a Dios babaen ti nailangitan a Pagarianna. (Mateo 6:9, 10; 2 Timoteo 3:16, 17) Iyap-aplikar dagitoy pudno a Kristiano iti biagda ti nainsiriban a balakad ti Biblia a maipaay iti pagimbaganda. (Salmo 119:105; Isaias 48:17, 18) Awatenda ti di masupiat a pammaneknek a dagiti padto iti Biblia tandaanda ti panawentayo kas “ti maudi nga al-aldaw,” ken mamatida nga asidegen ti baro a lubong nga inkari ti Dios. (2 Timoteo 3:1-5; Mateo 24:3-14; 2 Pedro 3:13) Pagrag-oanda nga iranud kadagiti sabsabali ti pannakaammo ti Dios. (Proverbio 2:1-5) Ammoda a babaen laeng ti panagadal iti Kasuratan a dagidiay agsapsapul iti Dios pudpudno nga isut’ masarakanda.—Aramid 17:26, 27.
Malagipyo kadi ni Albert a nadakamat iti immuna nga artikulo? Sumagmamano nga aldaw kalpasan a di nasungbatan ti kararagna maipaay iti milagro, isut’ sinarungkaran ti maysa kadagiti Saksi ni Jehova, maysa a baket a nangibati kenkuana iti naibatay-Biblia a literatura. Kalpasanna inawat ni Albert ti libre a panagadal iti Biblia iti pagtaengan. Bayat nga umad-adu ti ammona maipapan iti mensahe ti Biblia, ti pannakaupayna nasuktan iti panaggagar. Nautobna a nasarakanna met laengen ti Dios.
Idagadag ti Kasuratan: “Sapulenyo ni Jehova ita ta masarakan pay. Umawagkayo kenkuana ita ta asideg pay.” (Isaias 55:6) Maaramidanyo daytoy, saan a babaen ti panangur-urayyo iti moderno-aldaw a milagro a naggapu iti Dios, no di ket babaen ti pananggun-odyo iti umiso a pannakaammo iti Saona. Nasken unay daytoy, ta saan nga umdas dagiti milagro laeng a mangpatanor iti pammati.
[Ladawan iti panid 5]
Uray ti namilagruan a pannakapagungar ni Lazaro saanna a tinignay dagiti kabusor ni Jesus a mamati
[Dagiti Ladawan iti panid 7]
Masapul a maibatay ti pammati iti umiso a pannakaammo iti Biblia