Sadino ti Pakasarakan iti Pudno a Kinaragsak?

IPAGARUP ti adu a tattao a masarakan ti kinaragsak babaen ti pananggun-od iti material a sanikua. Dakayo ngay? Nupay awan duadua a mangyeg kadatayo iti ragsak dagiti material a banag, saanda nga ipanamnama dayta; saan met a mangpatanor iti pammati dagiti pisikal a pagnam-ayan wenno mapennek dagiti naespirituan a kasapulan.

Iti Sermonna iti Bantay, kinuna ni Jesu-Kristo: “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” (Mateo 5:3) Kinuna pay ni Jesus: “Agaluadkayo a maibusor iti tunggal kita ti kinaagum, agsipud ta uray no addaan kinaruay ti maysa a tao ti biagna saan nga aggapu kadagiti bambanag nga ik-ikutanna.”​—Lucas 12:15.

Adu ti mangbirbirok iti kinaragsak babaen ti pannakiraman iti maiparit a sekso ken dadduma pay nga “aramid ti lasag.” (Galacia 5:19-21) Nupay kasta, saan a mangyeg iti pudno ken manayon a kinaragsak ti itutulok kadagiti nainlasagan a tarigagay. Kinapudnona, dagidiay mangar-aramid kadagita a banag saanda a tawiden ti Pagarian ti Dios.​—1 Corinto 6:9, 10.

Agbaw-ing dagiti dadduma iti bukodda a panunot iti panagbirbirokda ti kinaragsak babaen ti panangikagumaanda a mangpatanor iti panagraem iti bukodda a bagi. Napno dagiti libraria ken paglakuan iti libro kadagiti libro nga ipagarupda a tumulong a mangpasayaat kadakuada iti personal, ngem saan a nangyeg dagiti kasta a publikasion iti manayon a ragsak kadagiti tattao. No kasta, sadino ngarud ti pakasarakantayo iti napaypayso a kinaragsak?

Tapno pudpudno a naragsak, masapul a bigbigentayo ti nakayanakan a naespirituan a kasapulantayo. Kinuna ni Jesus: “Naragsak dagidiay sipapanunot iti naespirituan a kasapulanda.” Siempre, saantayo a magunggonaan iti basta panangbigbig iti daytoy a pakasapulan ket awan met ti ar-aramidentayo maipanggep iti dayta. Kas ilustrasion: Ania ti mapasamak iti maysa a tumataray iti maraton no kalpasan ti lumba di uminum iti danum a kasapulan unay ti bagina? Di kadi maugotan inton agangay ket nakaro ti pagbanaganna? Kasta met, no ditay ikaskaso ti pannakasapultayo iti naespirituan a taraon, inton agangay kumapsuttayo iti naespirituan. Agtungpal daytoy iti pannakapukaw ti rag-o ken ragsak.

Naan-anay a binigbig ni Jesus ti naespirituan a kasapulanna, a regular nga inadal ken inut-utobna ti Sao ti Dios. Nalakana a sapulen ken basaen dagiti paset ti Nasantuan a Kasuratan, ket insurona dagiti sabsabali nga aramidenda met ti kasta. (Lucas 4:16-21; idiligyo ti Efeso 4:20, 21.) Inyarig met ni Jesus iti taraon ti panangaramid iti pagayatan ti nailangitan nga Amana. Pagragsakanna unay nga aramiden ti pagayatan ti Dios.​—Juan 4:34.

Wen, saan a masarakan ti pudno a kinaragsak babaen ti pananggun-od kadagiti material a banag; saan met a mangyeg iti kinaragsak ti panangpalugod iti managbasol a lasag. Ti pudno a kinaragsak ket maysa a kasasaad ti puso, a naibatay iti napaypayso a pammati ken nasayaat a pannakirelasion ken Jehova a Dios. Ngarud, maitutop la unay nga inkanta ni salmista a David: “Naragsak ti umili a ti Diosna ni Jehova.”​—Salmo 144:15b, NW.

[Ladawan iti panid 23]

Mangyeg kadakayo iti pudno a kinaragsak ti pammati ken nasayaat a pannakirelasion iti Dios