Ti “Nasantuan a Kagay iti Trier”

TI Trier, nga addaan iti pakasaritaan iti 2,000 a tawenen, isu ti kadadaanan a siudad idiay Alemania.a Iti adu a siglo natibker ti pannakainaig ti Trier iti Iglesia Katolika. Idi 1996 impabuya ti katedral idiay Trier ti maysa a relikia a maipagarup a gistay kadaan a mismo iti siudad. Naawagan dayta a ti Nasantuan a Kagay iti Trier.

Ti kagay ket 62 a pulgada ti kaatiddogna ken 43 a pulgada ti kaakabana ken addaan kadagiti manggas a kaguduana ti kaatiddogna. Naaramid iti kapas ket, sigun ken Hans-Joachim Kann iti librona a Wallfahrtsführer Trier und Umgebung (Giya iti Panagperegrino Idiay Trier ken Kadagiti Aglawlawna), nalabit maisusuot idi kas makinruar a kawes. Dadduma a pattapatta petsaanda iti maikadua wenno uray pay iti umuna a siglo K.P. ti orihinal a kawes​—nga adu a pasetna ti naritubar ken napalagda babaen kadagiti sabsabali a lupot iti panaglabas dagiti siglo. No agpayso a kasta, pagbalinenna dayta kas antigo a lupot, makapainteres a maipabuya iti museo.

Nupay kasta, ipapilit ti dadduma a saan laeng nga antigo ti kawes no di pay ket nasantuan​—gapuna napanaganan iti Nasantuan a Kagay. Awan ngamin nagsaipanna, a kas iti makin-uneg a kawes nga inusar ni Jesu-Kristo. (Juan 19:23, 24) Kuna ti dadduma a kinapudnona kukua ti Mesias ti “Nasantuan a Kagay.”

Di masinunuo no kasano a nakagteng ti kagay idiay Trier. Kuna ti maysa a libro a “naipan iti siudad babaen ken emperatris Helena, ina ni Constantino a Dakkel.” Kuna ni Kann a ti umuna a mapagtalkan a report iti kaadda ti kagay idiay Trier ket manipud idi 1196.

Ti kagay, a naidulin iti katedral, ket pasaray maipabuya sipud pay idi maika-16 a siglo. Kas pagarigan, naaramid daytoy idi 1655, di nagbayag kalpasan ti Tallopulo a Tawen a Gubat, a nangipaayan ti Trier iti dakkel unay a sakripisio. Adu ti naganansia iti pannakailako dagiti pakalaglagipan iti panagperegrino iti dayta nga okasion.

Adda tallo a panagperegrino iti “Nasantuan a Kagay” iti daytoy a siglo​—idi 1933, 1959, ken 1996. Idi 1933 naipakaammo ti panagperegrino iti isu met laeng nga aldaw a pannakadutok ni Hitler a chancellor ti Aleman a Turay. Kuna ni Kann a daytoy naiparparna a panaggiddan ti dua a pasamak itampokna dagiti kasasaad a nanglikmut iti panagperegrino. Nangbuangay dagiti nakauniporme a buyot ti Nazi iti mangbayabay kadagiti peregrino iti ruar ti katedral. Dua ket kagudua a milion a tattao ti nangbuya iti kagay iti dayta a tawen.

Pinagdilig ni Herbert, agnanaed idiay Trier iti adun a tawen, dagiti panagperegrino idi 1959 ken 1996. “Idi 1959 napusek dagiti lansangan, nga adda dagiti paggatangan kadagiti pakalaglagipan iti gistay amin a suli ti kalsada. Iti daytoy a tawen naul-ulimek nga adayo ti intero nga okasion.” Kinapudnona, 700,000 laeng ti nangbuya iti kagay idi 1996, a nakurkurang iti maysa a milion no idilig idi 1959.

Apay a Mapanda Buyaen ti Kagay?

Iyunay-unay ti iglesia a saan koma a mamatmatan ti kagay kas pagrukbaban. Maibilang ti kinaawan saip ti kagay kas simbolo ti panagkaykaysa ti iglesia. Ipadamag ti Frankfurter Allgemeine Zeitung nga idi ipakaammona ti panagperegrino, kinuna ni Obispo Spital: “Ti karkarna a kasasaad iti lubongtayo karitennatayo a Kristiano a maaddaan kadagiti karkarna a sungbat. Masapul a sarangtentayo ti dumegdegdeg a guranggura, kinadangkok, ken kinaranggas.” Inlawlawag ti obispo a ti panangbuya iti kagay ipalagipna iti maysa ti panagkaykaysa.

Ngem apay a kasapulan ti asinoman ti “Nasantuan a Kagay” tapno mapalagipan iti panagkaykaysa ti iglesia? Kasanon no madadael ti kagay wenno mapirpirsay wenno maibutaktak a bugos? Agpeggad kadin ti panagkaykaysa ti iglesia? Komusta ngay dagiti tattao a di makapagperegrino idiay Trier? Saanda kadi unay a maseknan iti panagkaykaysa iti iglesia?

Awan dakamaten ti Nasantuan a Kasuratan maipapan kadagiti nagkauna a Kristiano nga agkasapulan kadagiti banag a mangipalagip kadakuada iti kinapateg ti Nakristianuan a panagkaykaysa. Kinapudnona, imparegta ni apostol Pablo kadagiti Kristiano: “Magmagnakami babaen ti pammati, saan a babaen ti panagkita.” (2 Corinto 5:7) Gapuna nadeskribir ti panagkaykaysa a tagtagiragsaken dagiti pudno a Kristiano kas “panagmaymaysa iti pammati.”​—Efeso 4:11-13.

[Footnote]