No Kasano ti Maaddaan iti Namnama iti Laksid ti Pannakapaay
IPAPANYO a mapadasanyo dagiti sumaganad: Napukaw amin a material a sanikuayo, ket nakaay-ay-aykayon. Dagiti annakyo—a ragragsak ti biagyo—awandan. Dinakay pay pabpabilgen ni baketyo. Literal a kimmapuyen ti salun-atyo. Tunggal aldaw ket nakatutuok.
No dayta ti dimteng a kasasaadyo iti biag, adda ngata pay panggapuanyo nga agtultuloy nga agbiag? Wenno tumulokkay kadin iti pannakapaay?
Ti nakalkaldaang a kasasaad a kailadladawan ket agpaypayso a kapadasan ni Job, maysa a lalaki a nagbiag idi panawen ti Biblia. (Job, kapitulo 1, 2) Iti maysa a naliday a kanito, insennaay ni Job: “Ti kararuak nautoyan iti biagko.” Kaykayatna a matay la koman tapno mabang-aran. (Job 10:1; 14:13) Nupay kasta, iti laksid ti nakaro a panagsagabana, nasalimetmetan ni Job ti kinatarnawna iti Dios. Gapuna ni Jehova “binendisionanna ti naud-udi a tungpal ni Job a nangnangruna ngem idi panangrugina.” Iti kasta natay a sitatalna, “lakay ken napno kadagiti aldaw.”—Job 42:12, 17.
Nangipakita ni Job iti ulidan ti panagibtur a maipagpannakkel agingga ita. Dagiti suotna ti nanggugor iti personalidadna ken nangtignay iti sabsabali nga agaramid iti nasayaat. (Santiago 5:10, 11) Kangrunaan iti amin, ti di natulawan a kinatarnaw ni Job pinagrag-ona ti puso ni Jehova. (Proverbio 27:11) Gapuna daydi makapakullayaw a tuok nagbalin kamaudiananna a dakkel a balligi ti kina-nadiosan, pammati, ken kinatarnaw a nangyeg kadagiti parabur ken ni Job ken iti amin a natignay iti ulidanna.
Namnama iti Laksid ti Nadumaduma a Suot
Mabalin nga agsagabakayo kadagiti suot nga umasping kadagidiay napasaran ni Job. Ti ipapatay ti ipatpateg mabalin a pagleddaangennakay unay. Ti nakaro a sakit mabalin a pagbalinenna ti panagbiag a nakatutuok. Ti intero a wagas ti biagyo mabalin a kasla nawarawara gapu iti naulpit a diborsio. Mabalin a pagbalinennakay a nakaay-ay-ay ti kinarigat iti panagbiag. Mabalin a puntiriakayo ti nakaro a panangidadanes dagiti nauyong a bumusbusor iti pudno a panagdaydayaw. Ti panangsaranget kadagiti suotyo nalabit pagbalinenna a desperado ti masanguananyo.—1 Pedro 1:6.
Imbes a mapaaykayo, saludsodanyo ti bagiyo, ‘Apay nga agsagsagabaak?’ Agsagsagabakayo gapu ta agbibiagkayo iti lubong nga “adda iti pannakabalin daydiay nadangkes,” ni Satanas a Diablo. (1 Juan 5:19) Kas resultana, agsagsagaba ti isuamin. Iti sumagmamano a pamay-an maapektarantayo amin iti sinugsogan-Diablo a gura iti mensahe ti Pagarian, iti nasabrak a sasao ti sabsabali, wenno kadagiti nakaam-amak nga aramid ti nadangkes a kababalin a kadawyan unay kadagitoy “napeggad a tiempo.”—2 Timoteo 3:1-5.
No napasamak ti maysa a trahedia iti biagyo, mabalin a biktimakayo iti ‘panawen ken di napakpakadaan a pasamak.’ (Eclesiastes 9:11, NW) Iti sabali a bangir, no dadduma agbalin a dakes ti bambanag iti biag gapu iti natawidtayo a kinamanagbasol. (Roma 5:12) Uray no nagbasolkayo iti nakaro ngem nagbabawi ken dimmawatkayo iti naespirituan a tulong, diyo pagarupen a binaybay-annakayo ti Dios. (Salmo 103:10-14; Santiago 5:13-15) Ad-adda pay a maseknan kadatayo ngem iti siasinoman. (1 Pedro 5:6, 7) Makapagtalekkayo a “ni Jehova adda iti asideg kadagiti sitatarumpingay ti pusoda, ket isalakanna dagiti sibabawi ti espirituda.” (Salmo 34:18) Uray pay kasano karigat wenno kakaro ti suotyo, makaipaay ni Jehova iti sirib a mangsaranget iti dayta. (Santiago 1:5-8) Kanayon a laglagipenyo a kabaelan ni Jehova a paimbagen ti amin a sugat. No adda kadakayo ti anamongna, awan ti makalapped kadakayo a gumun-od iti gunggona a biag.—Roma 8:38, 39.
Adda Kadi Naimbag nga Ipaay Dagiti Suot?
Adda kadaanan a pagsasao, “Kalpasan ti sipnget adda lawag.” Simple dayta a panangikuna a kasano man kadakes ti bambanag, kanayon nga adda pangnamnamaan. Ti panggep ti amin a naisurat iti Sao ti Dios ket tapno “maaddaantay koma iti namnama.” (Roma 15:4) Uray pay kasanot’ kakaro ti kasasaadyo, dagiti kari ken prinsipio iti Biblia maipaayannakayo iti napabaro a rag-o ken namnama.
Ipakita ti Kasuratan a ti “rigat ket apagkanito ken nalag-an” no idilig kadagiti agnanayon a bendision nga agur-uray kadagidiay mangay-ayat iti Dios. (2 Corinto 4:16-18) Ipaspasimudaag met ti Biblia a dagiti nadiosan a galad a napatanor iti baet dagiti suot ket napatpateg nga amang ngem iti tan-ok wenno material a kinabaknang. (1 Juan 2:15-17) Iti kasta, uray ti panagsagaba mangyeg iti pagimbagan. (Hebreo 5:8) Kinapudnona, ti panangyaplikar kadagiti nasursuro iti panawen dagiti suot mangyeg kadakayo kadagiti di ninamnama a bendision.
Mabalin a pagbalinennakayo a naan-anus ti maysa a narikut a suot. Mabalin nga umanamongkayo nga iti napalabas adda ugaliyo a makapasuron kadagiti sabsabali ken manglapped pay ketdi iti naespirituan a panagrang-ayyo. Nalabit a dayta ket sobra a panagtalek. Kalpasan nga agrigatkayo gapu iti didigra, nalabit a giddato a mabigbigyo ti kinalap-ityo ken ti kinapateg kadakayo dagiti sabsabali. No ti suotyo insurona kadakayo dayta a leksion ken nagbalbaliwkayo, nagunggonaankayo iti dayta.
Ngem komusta no, iti napalabas, marigatan a makilangen kadakayo ti dadduma gapu ta marigatankayo a mangmedmed iti pungtotyo? Mabalin a nangpatanor pay ketdi daytoy kadakayo iti parikut mainaig iti salun-atyo. (Proverbio 14:29, 30) Ngem, ita, mabalin a nasaysayaaten ti situasion gapu ta agpampannuraykayo iti espiritu ti Dios a tumulong kadakayo nga agteppel.—Galacia 5:22, 23.
Kas iti sabsabali, nalabit nga adda idi panawen nga awanankayo iti pannakipagrikna tapno agbalin a naasi kadagidiay agbasol. Ngem no dakayo a mismo ti adda iti situasion a kasapulanyo unay ti asi, nalabit ad-adda itan nga agannayaskayo nga agbalin a naasi iti sabsabali. Ti nabara a pannakipagrikna, pannakaseknan, ken asi a naipakita kadakayo tinulongannakayo a mangbigbig a rumbeng nga ipakitayo dagiti umasping a galad kadagiti agbabbabawi a managbasol. No ti panagpaut-otyo tinignaynakayo a manglinteg kadagitoy a pagkapuyan iti personalidadyo, maysa daytoy a nagunggonayo iti kapadasanyo. Nasursuroyo a ti “asi agragsak unay a sibaballigi a ringbawanna ti panangukom.”—Santiago 2:13; Mateo 5:7.
Komusta no ti panangdisiplina ti kongregasion Kristiano nagresulta iti pannakapukawyo kadagiti il-ilalaenyo a pribilehio ken ti panagraem dagiti sabsabali? Dikay tumulok iti pannakapaay. Ti panangdisiplina tumulong a mamagtalinaed iti kongregasion a nadalus, ngem karaman iti daytoy a panggep ti naespirituan a pannakaisubli ti nagbasol. Pudno, “awan ti disiplina a kasla makaparag-o iti agdama, no di ket makapaladingit; ngem kalpasanna kadagidiay a nasanayen iti dayta ipaayna ti natalna a bunga, nga isu ti, kinalinteg.” (Hebreo 12:11) Nupay mabalin a mangupay ti disiplina, dina baybay-an ti napakumbaba a managbabawi nga awan pangnamnamaan. Nakaro ti pannakatubngar ni Ari David iti nagkauna nga Israel gapu iti dakes nga aramidna, ngem nagbabawi ket kamaudiananna immawat iti komendasion kas maysa a tao nga addaan naisangsangayan a pammati.—2 Samuel 12:7-12; Salmo 32:5; Hebreo 11:32-34.
Ti suot mabalin nga addaan dakkel nga epekto iti panangmatmatyo. Iti napalabas, mabalin a naipamaysa ti atensionyo kadagiti materialistiko a kalat ken gapuanan a nangyeg kadakayo iti pannakabigbig ken sosial a takder iti daytoy lubong. Nalabit a ti suot a nainaig iti kinarigat iti pinansial wenno pannakalugi iti material ti nakaipamaysaan ti panunotyo kadagiti napatpateg a banag. (Idiligyo ti Filipos 1:10) Ita mabigbigyo a dagiti naespirituan a prinsipio ken kalat iti sagrado a panagserbi isuda laeng ti mangyeg iti pudpudno a rag-o ken manayon a pannakapnek.
Agtalek ken Jehova
Ti panangipaay iti sagrado a panagserbi ken Jehova mabalin nga agresulta iti pannakaidadanes ken panagsagaba iti ima dagidiay mangbusor kadagiti Nakristianuan a patpatienyo. Mabalin a mariknayo a mairurumenkayo gapu iti daytoy a suot, ngem adda magunggona iti dayta. Mabalin a pabilgen daytoy a suot ti pammatiyo. Mainayon pay, mabalin a maparegta ken mapabileg dagiti sabsabali nga agsagsagaba iti pannakaidadanes iti pannakakitada iti panagibturyo. Dagiti makaimatang iti nasayaat a kababalinyo mabalin a matignay a mangidayaw iti Dios. Uray dagiti bumusbusor kadakayo mabalin nga agbain ket bigbigenda dagiti naimbag nga aramidyo!—1 Pedro 2:12; 3:16.
Tapno maliklikan ti maupay no maidadanes, masapul nga agtalekkayo ken Jehova. Ipakpakita ti Saona a sigurado a dumteng ti bang-ar manipud iti suot, ngem mabalin a saan a kaskarina a dumteng no kayatyo. Kabayatanna, “dikay sumuko nga agaramid iti umiso.” (2 Tesalonica 3:13) Itultuloyyo ti agsapul kadagiti pamay-an tapno masarangetyo dagiti pannubok ken makapagibtur. Uray no agparang nga awan pangnamnamaan kadagiti bambanag, ‘iyallatiwyo ta awityo ken Jehova, ket saranayennakayto. Dinanto ipalubos a magaraw ti nalinteg.’ (Salmo 55:22) Imbes a malapunoskayo iti panangay-ay iti bagi, panunotenyo nga anian a pannakabendisionyo a nakaammo ken Jehova, nga adda iti lugaryo iti ummong ti tattaona, ken ik-ikutanyo ti namnama a biag nga awan inggana.—Juan 3:16, 36.
Pagtalinaedenyo a nakasentro ti panunotyo kadagiti napateg a banag. Agkararagkayo ken Jehova iti inaldaw, a dumawatkayo iti bileg nga agibtur. (Filipos 4:6, 7, 13) Iwaksiyo ti aniaman a rikna nga agibales kadagidiay mangpatpataud iti panagsagabayo. Ipannurayyo dagiti bambanag iti ima ni Jehova. (Roma 12:19) Itultuloyyo ti agbirok kadagiti pamay-an tapno mapasayaat ti personalidadyo, a sukayenyo dagiti Nakristianuan a galad. (2 Pedro 1:5-8) Apresiarenyo amin a banag a naaramidan ti sabsabali kadakayo, a pakairamanan dagiti panglakayen a siaayat a mangay-aywan kadagiti naespirituan a kasapulanyo. (Hebreo 13:7, 17) Agkammatalekkayo iti Dios, ket pagtalinaedenyo a naipamaysa ti matayo iti gunggona a biag, nga agtalekkayo nga uray ti ipapatay dina maagaw daytoy kadakayo.—Juan 5:28, 29; 17:3.
No agsagsagabakay ita iti napalaus a ladingit wenno nakaro a suot, ‘agtalekkayo ken Jehova iti amin a pusoyo,’ ket iti kamaudiananna aglaplapusanan a rag-o ti mangsandi iti ladingit ken rigatyo. (Proverbio 3:5, 6; Juan 16:20) Masuktanto iti ragsak ti ladingit inton bendisionannakay ti Dios kas ti inaramidna ken Job. Awan kaimudingan dagiti sagsagabaenyo ita no idilig iti gunggonayo. (Idiligyo ti Roma 8:18.) Ti matalek a panagibturyo maparegtana dagiti sabsabali ken tulongannakayo a mangsukay kadagiti nasayaat a Nakristianuan a galad nga agtaud iti “baro a personalidad.” (Efeso 4:23, 24; Colosas 3:10, 12-14) No kasta, ngarud, palubosanyo a ti nainsiriban a balakad ni apostol Pedro pabilgenna ti nakemyo: “Dagidiay agsagsagaba maitunos iti pagayatan ti Dios itultuloyda met koma nga ikumit dagiti kararuada iti matalek a Namarsua bayat nga agar-aramidda iti naimbag.”—1 Pedro 4:19.
[Ladawan iti panid 23]
Agbalinkayo a kas ken ni Job. Dikay pulos maawanan iti namnama
[Ladawan iti panid 24]
Agtalekkayo ken Jehova iti amin a pusoyo