Kinamapagtalkan—Naiparna Wenno Nairanta?
“Nupay saanak a naisigud a mapagtalkan, no dadduma maiparna a kastaak.” Kasta ti kinuna ti kontrabida ni Autolycus iti The Winter’s Tale ni William Shakespeare. Daytoy iladawanna ti kangrunaan a pagkapuyan ti tao—ti pagannayasantayo nga agaramid iti dakes, nga agtaud iti ‘manangallilaw a puso.’ (Jeremias 17:9; Salmo 51:5; Roma 5:12) Ngem kaipapananna kadi nga awan maaramidantayo iti daytoy a banag? Naiparna kadi laeng ti naimbag a kababalin? Sigurado a saan!
Sakbay a simrek dagiti annak ni Israel iti Naikari a Daga, nagsao ni Moises kadakuada bayat a nakapakarsoda kadagiti tanap ti Moab. Insangona kadakuada ti dua a nabatad a pagpilian. Mabalinda a tungpalen dagiti bilin ti Dios ket awaten dagiti bendisionna wenno laksiden dagitoy ket apiten ti napait a bunga ti basol. (Deuteronomio 30:15-20) Agpilida.
Kas tattao nga addaan wayawaya nga agpili, addaantayo met iti pagpilian. Awan siasinoman—agraman ti Dios—a makapilit kadatayo nga agaramid iti naimbag wenno agaramid iti dakes. Ngem, mabalin a nainkalintegan nga isaludsod ti dadduma, ‘No ti pusotayo agannayas iti dakes, kasanotay a maaramid ti naimbag?’ Bueno, siaannad a sukimaten ti maysa a dentista ti ngipen tapno matakuatan ti dadael wenno binukbok sakbay a kumaro. Kasta met, kasapulan a sukimatentayo ti piguratibo a pusotayo tapno makita dagiti pagkapkapuyan ken binukbok a moral. Apay? Agsipud ta kinuna ni Jesus a “rummuar iti puso dagiti nadangkes a panagrasrason, panangpapatay, pannakikamalala, pannakiabig, panagtakaw, ulbod a pammaneknek, panagtabbaaw.”—Mateo 15:18-20.
Tapno masaluadan ti maysa a ngipen, kasapulan a naan-anay nga ikkaten ti dentista ti aniaman a masarakan a binukbok. Kasta met, kasapulan ti nainsiriban a panagtignay tapno maikkat “dagiti nadangkes a panagrasrason” ken dakes a tarigagay manipud iti puso. Babaen ti panagbasa ken panagmennamenna iti Sao ti Dios, ti Biblia, saantay laeng a maammuan dagiti wagas ti Namarsua kadatayo no di ket masursurotayo pay nga aramiden ti umiso.—Isaias 48:17.
Ginundawayan ni Ari David ti Israel ti maysa pay a kasapulan a tulong iti pannakidangadang nga agaramid iti umiso. Inkararagna: “Parsuaem kaniak ti nadalus a puso, O Dios; ket pabaruem ti maysa a nalinteg nga espiritu itoy unegko.” (Salmo 51:10) Wen, babaen ti panagtalek ken Jehova a Dios a buyogen ti kararag, mapagballigiantay met ti pagannayasantayo nga agaramid iti dakes ken masukaytayo ti maysa a “baro nga espiritu” tapno agaramid iti naimbag. Iti kastoy a pamay-an, ditay ipalubos a naiparna laeng ti kinamapagtalkan. Agbalin daytoy a maysa a banag a nairanta.
[Ladawan iti panid 21]
Kas iti kasasaad ni David, ti panagkararag ken Jehova matulongannatayo nga agaramid iti naimbag