Panagilimed Maigapu iti Nagan ti Apo
SANGAPULO ket dua ti natay, rinibu ti nagsakit, ken nailatak ti maysa a palimed idi nagwaras ti makasabidong a gas iti subway idiay Tokyo, Japan, idi Marso 1995. Sililimed a nakaurnong ti maysa a relihioso a sekta a maaw-awagan Aum Shinrikyo (Natan-ok a Kinapudno) iti armas a sarin gas nga inusarna a mangragpat kadagiti misterioso a kalat.
Kalpasan ti maysa a bulan, rinebbek ti bomba ti maysa a pasdek ti gobierno idiay Oklahoma City, E.U.A., ket 167 ti natay. Impasimudaag ti ebidensia a ti panangbomba adda pakainaiganna iti di pagkinnaawatan ti gobierno ken ti relihioso a kulto ti Branch Davidian idiay Waco, Texas, eksakto a dua a tawenen ti napalabas. Walopulo a miembro ti kulto ti natay idi. Ti panagbettak ti bomba impalgakna met ti maysa a banag a di ammo ti kaaduan a tattao: Adu dagiti kasla militar a grupo nga agtigtignay ita idiay Estados Unidos, a ti dadduma kadakuada maatap a sililimed nga agpangpanggep a bumusor iti gobierno.
Iti saan a nabayag, idi dandanin agngudo ti 1995, nasarakan dagiti nakset a bangkay ti 16 a tattao iti maysa a bakir nga asideg ti Grenoble, Francia. Miembroda ti Order of the Solar Temple, maysa a bassit a relihioso a kulto a naipadpadamag idi Oktubre 1994 idiay Switzerland ken Canada idi nagpakamatay wenno napapatay ti 53 kadagiti miembrona. Ngem uray kalpasan daytoy a trahedia, nagtultuloy daytoy a sekta. Nalimed pay laeng agingga ita ti motibo ken dagiti kalatna.
Dagiti Peggad ti Narelihiosuan a Panagilimed
Gapu kadagita a pasamak, pakasdaawan kadi no adu a tattao ti mangsipsiput kadagiti relihioso a kulto? Sigurado nga awan ti mayat a mangsuporta iti nalimed nga organisasion—relihioso wenno saan a relihioso—a mangabuso iti panagtalekna ken mangsugsog kenkuana kadagiti kalat a dina anamongan. Nupay kasta, ania ti mabalin nga aramiden dagiti tattao tapno saanda a maikalam-it kadagiti mapagduaduaan a nalimed a grupo?
Nalawag, asinoman nga agpangpanggep a makimiembro iti nalimed a timpuyog nainsiriban nga ammuenna dagiti agpayso a panggep daytoy. Saan koma a padurogan kadagiti gagayyem wenno kaam-ammona, ket ibatayna koma ti desisionna iti kinapudno, saan nga iti emosion. Laglagipenyo, nalabit a ti indibidual a mismo—saan a dagiti sabsabali—ti aglak-am iti aniaman a posible a dakes a pagbanaganna.
Ti panangsurot kadagiti prinsipio ti Biblia ti kasiguraduan a pamay-an tapno maliklikan dagiti napeggad a grupo a saan a nadayaw dagiti panggepda. (Isaias 30:21) Ramanen daytoy ti panagtalinaed a neutral iti politika, panagayat kadagiti sabsabali, uray kadagiti kabusor, panangidian kadagiti “aramid ti lasag,” ken panangsukay kadagiti bunga ti espiritu ti Dios. Kangrunaan iti amin, dagiti pudno a Kristiano masapul a saanda a paset ti lubong, kas ken Jesus, ket gapu itoy saanda a makiraman kadagiti nalimed a timpuyog ti lubong.—Galacia 5:19-23; Juan 17:14, 16; 18:36; Roma 12:17-21; Santiago 4:4.
Dagiti Saksi ni Jehova napasnekda nga estudiante ti Biblia a mangipappapuso iti pammatida ken sipapanayag a mangikagkagumaan nga agbiag a mayannurot iti dayta. Iti sangalubongan, agdindinamagda kas maysa a relihioso a grupo a ‘mangsapsapul iti talna ken mangsursurot iti dayta.’ (1 Pedro 3:11) Siuumiso a kuna ti libroda a Dagiti Saksi ni Jehova—Manangiwaragawag iti Pagarian ti Dios: “Dagiti Saksi ni Jehova saanda a pulos a kameng ti mailimlimed a sosiedad. Dagiti sursuroda a naibasar iti Biblia naan-anay a nailawlawag kadagiti publikasionda a maiwaras kadagiti isuamin. Sa, ikagumaanda unay nga imbitaran ti publiko a tumabuno kadagiti gimong tapno buyaen ken denggenda a mismo dagiti maang-angay.”
Awan nalimed a maar-aramid iti pudno a relihion. Naibilin kadagiti agdaydayaw iti pudno a Dios a saanda nga ilemmeng ti kinasiasinoda wenno ilimed ti panggepda kas Saksi ni Jehova. Dagiti nagkauna nga adalan ni Jesus pinunnoda ti Jerusalem iti sursuroda. Saanda nga inlimed dagiti patpatien ken ar-aramidenda. Pudno met dayta kadagiti Saksi ni Jehova ita. Siempre, no sibibiddut a kedngan dagiti rehimen a diktadura ti wayawayada nga agdayaw, masapul a siaannad ken situtured nga itultuloy dagiti Kristiano ti trabahoda, nga agtulnogda iti “Dios kas agturay imbes a kadagiti tattao,” maysa a kasasaad a kasapulan nga aramidenda gapu iti natured a panangasabada iti publiko.—Aramid 5:27-29; 8:1; 12:1-14; Mateo 10:16, 26, 27.
No impagarupyo idi a maysa a nalimed a kulto wenno sekta dagiti Saksi ni Jehova, nalabit dayta ket gapu ta nagbassit ti ammoyo maipapan kadakuada. Kasta la ketdi ti kasasaad dagiti adu idi umuna a siglo.
Ti Aramid kapitulo 28 saritaenna kadatayo ti maipapan iti pannakitaripnong ni apostol Pablo kadagiti “kangrunaan a lallaki dagiti Judio” sadi Roma. Kinunada kenkuana: “Pagarupenmi nga umiso a dumngegkami kenka no ania dagiti kapanunotam, ta pudno a no maipapan itoy a sekta naammuanmi a masupsuppiat iti isuamin a lugar.” (Aramid 28:16-22) Kas sungbat, ni Pablo “inlawlawagna kadakuada ti banag babaen ti panangipaayna iti naan-anay a pangsaksi maipapan ti pagarian ti Dios” ket “ti sumagmamano nangrugida a mamati.” (Aramid 28:23, 24) Di pagduaduaan nga agpaay iti agnanayon a pagimbaganda ti panangammo iti kinapudno maipapan iti pudno a Kinakristiano.
Tangay dedikadoda iti napanayag ken publiko a panagserbi iti Dios, maragsakan dagiti Saksi ni Jehova a mangipalgak iti agdadata a kinapudno maipapan iti trabaho ken patpatienda iti asinoman a mayat a mangammo iti pudno. Apay a dikay agusig a mismo, iti kasta maaddaankayo iti umiso a pannakaammo maipapan iti pammatida?
[Ladawan iti panid 6]
Maragsakan dagiti Saksi ni Jehova a mangipalgak no siasinoda ken no ania ti ar-aramidenda