Ni Jehova​—Dios a Mangipalgak Kadagiti Palimed

“Adda maysa a Dios sadi langit a mangipalgak kadagiti palimed.”​—DANIEL 2:28.

1, 2. (a) Kasano a naiduma ni Jehova iti napeklan a Kabusorna? (b) Kasano nga isarsarming dagiti tattao daytoy a pagdumaan?

NI Jehova, ti katan-okan ken naayat a Dios ti uniberso, ti maymaysa ken kakaisuna a Namarsua, ket Dios ti sirib ken kinahustisia. Di kasapulan nga ilimedna ti kinasiasinona, dagiti aramidna, wenno dagiti panggepna. Ipalgakna ti bagina iti tiempo ken wagas a kayatna. Ditoy a naiduma iti Kabusorna, ni Satanas a Diablo, a mangilimlimed iti pudno a kinasiasinona ken dagiti panggepna.

² No kasano nga agduma ni Jehova ken ni Satanas, kasta met dagiti agdaydayaw kadakuada. Doble kara ken manangallilaw dagidiay sumursurot ken Satanas. Agpammarangda a nasingpet, ngem agar-aramidda kadagiti banag nga agtaud iti sipnget. Naibaga kadagiti Kristiano idiay Corinto a saanda a pagsiddaawan daytoy. “Ta dagiti kakasta a tattao ulbodda nga apostol, manangallilaw a managobra, a pagbalbalinenda ti bagbagida a kasla apostol ni Kristo. Ket di pakasdaawan, ta ni Satanas a mismo itultuloyna a pagbalbalinen ti bagina a kasla anghel ti lawag.” (2 Corinto 11:13, 14) Iti sabali a bangir, agpannuray dagiti Kristiano ken Kristo kas Panguloda. Idi adda ditoy daga naan-anay nga inyanninawna ti personalidad ni Jehova a Dios nga Amana. (Hebreo 1:1-3) Gapuna, babaen ti panangsurotda ken Kristo, tultuladen dagiti Kristiano ni Jehova, ti Dios ti kinapudno, kinapanayag, ken lawag. Saan met a kasapulan nga ilemmengda ti kinasiasinoda, dagiti aramidda, wenno dagiti panggepda.​—Efeso 4:17-19; 5:1, 2.

3. Kasanotay a mabalusingsing ti ibagbagada a dagiti tattao nga agbalbalin a Saksi ni Jehova mapilpilitda a makitimpuyog iti “nalimed a sekta”?

³ Kadagiti tiempo nga ammona a kasayaatan, ipalgak ni Jehova dagiti detalye maipapan kadagiti panggepna ken iti masanguanan a saan idi nga ammo dagiti tattao. Iti daytoy nga anag, isu ket maysa a Dios a mangipalgak kadagiti palimed. Gapuna, mayaw-awis​—wen maidagdagadag​—​kadagiti tattao a mayat nga agserbi kenkuana a mangammo iti kasta a naipalgak nga impormasion. Impalgak ti maysa a surbey idi 1994 a kadagiti nasurok a 145,000 a Saksi iti maysa a pagilian ti Europa, iti promedio, personal nga inusig ti tunggal maysa kadakuada dagiti sursuro dagiti Saksi ni Jehova iti las-ud ti tallo a tawen sakbay a pinilida ti agbalin a Saksi. Nawayada a nagpili, di napilpilit. Ket nagtultuloy a nawayada nga agaramid iti kayatda. Kas pagarigan, gapu ta saanen nga umanamong ti sumagmamano kadagiti nangato a pagalagadan ti moralidad para kadagiti Kristiano, idi agangay inkeddengda a saandan a kayat ti agbalin a Saksi. Nupay kasta, makapainteres ta iti napalabas a lima a tawen, adu kadagitoy a sigud a Saksi ti nangaramid kadagiti addang tapno maituloy ti pannakitimpuyog ken aramidda kas Saksi.

4. Ania ti saan a kasapulan a pakariribukan dagiti matalek a Kristiano, ken apay a saan?

⁴ Siempre, adda dagiti dati a Saksi a saan nga agsubli, ket karaman kadakuada dagiti sumagmamano nga addaan idi iti rebbengen iti kongregasion Kristiano. Saan a makapasiddaaw daytoy, ta timmallikud uray ti maysa kadagiti kasisingedan a pasurot ni Jesus, ni apostol Judas. (Mateo 26:14-16, 20-25) Ngem rason kadi daytoy tapno pagduaduaan ti Kinakristiano a mismo? Pagbalinenna kadi nga ubbaw ti naballigi a trabaho a panangisuro dagiti Saksi ni Jehova? Saan a pulos, no kasano a ti panangliput ni Judas Iscariote dina pinaay dagiti panggep ti Dios.

Mannakabalin-amin Ngem Naayat

5. Kasanotay nga ammo nga ay-ayaten da Jehova ken Jesus dagiti tattao, ket kasanoda nga impakita daytoy nga ayat?

⁵ Dios ti ayat ni Jehova. Maseknan kadagiti tattao. (1 Juan 4:7-11) Nupay nakangatngato ti saadna, kaay-ayona ti makigayyem kadagiti tattao. Maipapan iti maysa kadagiti adipenna idi ugma, mabasatayo: “‘Ni Abraham naaddaan iti pammati ken Jehova, ket naibilang dayta kenkuana kas kinalinteg,’ ket isu naawagan ‘gayyem ni Jehova.’” (Santiago 2:23; 2 Cronicas 20:7; Isaias 41:8) No kasano nga agririnnanud dagiti tao nga aggagayyem kadagiti kompidensial a banag, wenno palimed, kasta met ni Jehova kadagiti gagayyemna. Iti daytoy a banag tinulad ni Jesus ti Amana, ta nakigayyem kadagiti adalanna ken nangipalgak kadagiti palimed kadakuada. “Saankay nga awaganen iti ad-adipen,” kinunana kadakuada, “agsipud ta ti adipen dina ammo no ania ti aramiden ti apona. Ngem inawagankay iti gagayyem, agsipud ta isuamin a bambanag a nangngegko manipud iti Amak impakaammok kadakayo.” (Juan 15:15) Ti pribado nga impormasion, wenno “palimed,” nga ammo ni Jehova, ti Anakna, ken dagiti gagayyemda pagkaykaysaenna ida iti di magsat a singgalut ti ayat ken debosion.​—Colosas 3:14.

6. Apay a di kasapulan nga ilimed ni Jehova dagiti panggepna?

⁶ Ti kaipapanan ti nagan a Jehova, “Pagbalinenna,” ipasimudaagna ti kabaelanna nga agbalin nga aniaman a kasapulan a pagbalinanna tapno maibanag ti panggepna. Saan a kas kadagiti tattao, di kasapulan nga ilimed ni Jehova dagiti panggepna amangan ta lapdan dagiti dadduma a mangibanag kadagitoy. Saan nga agmintis, isu a sipapanayag nga ipalgakna iti Saona, ti Biblia, ti adu kadagiti panggepna nga aramiden. Inkarina: “Ti saok . . . dinto agsubli kaniak nga awan ti pagmamaayanna, no di ket tungpalennanto ti pagayatak, ken rumang-ayto iti banag a pangipanak kenkuana.”​—Isaias 55:11.

7. (a) Ania ti impakpakauna ni Jehova idiay Eden, ket kasano a pinaneknekan ni Satanas a pudno ti Dios? (b) Kasano a kanayon a pudno ti prinsipio iti 2 Corinto 13:8?

⁷ Di nagbayag kalpasan ti iyaalsa idiay Eden, binalabala ni Jehova ti pagtungpalan ti kontrobersia iti nagbaetanda iti Kabusorna, a ni Satanas. Ti Bin-i nga inkari ti Dios, masugat iti nasaem, ngem saan nga agnanayon, idinto ta aglak-am ni Satanas iti makapapatay a sugat inton kamaudiananna. (Genesis 3:15) Idi 33 K.P., ti Diablo aktual a sinugatna ti Bin-i, ni Jesu-Kristo, babaen ti panangpapatayna kenkuana. Iti kasta, tinungpal ni Satanas ti Kasuratan ken pinaneknekanna met a ni Jehova ket Dios ti kinapudno, nupay nabatad a saan a pinanggep daytoy ni Satanas. Ti pananggurana iti kinapudno ken kinalinteg, kasta met ti kinatangsit ken kinasubegna, ti nangituggod kenkuana a mangaramid iti impakpakauna ti Dios nga aramidenna. Wen, kadagiti amin a bumusbusor iti kinapudno, uray ken Satanas a mismo, pudno ti prinsipio nga: “Awan ti maaramidanmi a maibusor iti kinapudno, no di ket maipaay laeng iti kinapudno.”​—2 Corinto 13:8.

8, 9. (a) Ania ti ammo ni Satanas, ngem pagpeggaden aya daytoy a pannakaammo ti pannakaibanag dagiti panggep ni Jehova? (b) Ania a nabatad a pakdaar ti di ikankano dagiti bumusbusor ken Jehova, ken apay?

⁸ Manipud idi naipasdek ti Pagarian ti Dios a di makita idi 1914, matungtungpalen ti Apocalipsis 12:12: “Gapu itoy agragsakkayo, dakayo a langlangit ken dakayo nga agnaed kadakuada! Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” Kaskasdi, agbalbaliwto ngata ni Satanas gapu ta ammona nga ababan ti tiempona? No aramidenna dayta, bigbigbigen ni Satanas a ni Jehova ket Dios ti kinapudno ket kas Katan-okan nga Agturay, isu laeng ti maikari a dayawen. Nupay kasta, di maaklon ti Diablo ti pannakaabak, uray no ammona dayta.

⁹ Sipapanayag nga ipalgak ni Jehova no anianto ti mapasamak inton umay ni Kristo a mangukom iti sistema ti lubong ni Satanas. (Mateo 24:29-31; 25:31-46) Iti daytoy a banag, kastoy ti kuna ti Saona maipapan kadagiti turayen ti lubong: “Inton sasawenda: ‘Talna ken talged!’ iti kasta giddato nga umayto kadakuada ti kellaat a pannakadadael kas iti ut-ot ti panagrigat nga umay iti maysa a masikog a babai.” (1 Tesalonica 5:3) Dagidiay sumursurot ken Satanas dida ikankano daytoy nalawag a pakdaar. Nakullaapanda gapu iti dakes a pusoda, ket daytoy ti manglapped kadakuada nga agbabawi kadagiti dakes nga aramidda ken mangbalbaliw kadagiti plano ken gannuatda a mangpadpadas a mangkeltay kadagiti panggep ni Jehova.

10. (a) Kasano kasaknap a nalabit natungpal ti 1 Tesalonica 5:3, ngem kasano koma ti panagtignay ti ili ni Jehova? (b) Apay a dagiti tattao nga awanan pammati mabalin a kumaronto ti panangbusorda iti ili ti Dios?

¹⁰ Nangnangruna nanipud 1986, idi nga indeklara ti Naciones Unidas ti Sangalubongan a Tawen ti Talna, sangkasao ti lubong ti talna ken talged. Nangaramidda kadagiti masnup nga addang iti panangikagumaanda a mangtun-oy iti sangalubongan a talna, a kasla naballigi bassit. Daytoy kadi ti naan-anay a kaitungpalan daytoy a padto, wenno adda namnamaentayo pay a makapakellaat a pakaammo iti masanguanan? Lawlawaganto ni Jehova dayta a banag iti tiempo nga inkeddengna. Kabayatanna, agtalinaedtayo a siririing iti naespirituan, ‘nga aguraytayo ken agtalinaedtayo a silalagip unay iti kaadda ti aldaw ni Jehova.’ (2 Pedro 3:12) Bayat nga adu pay dagiti saritaan maipapan iti kappia ken talged iti panaglabas ti panawen, dagiti dadduma a makaammo iti daytoy a pakdaar, ngem di mangikankano iti dayta, mabalin nga ad-adda a sikukuspag nga ipagarupda a saan a tungpalen, wenno di kabaelan a tungpalen, ni Jehova ti saona. (Idiligyo ti Eclesiastes 8:11-13; 2 Pedro 3:3, 4.) Ngem ammo dagiti pudno a Kristiano a tungpalento ni Jehova ti panggepna!

Umno a Panagraem Kadagiti Ahensia nga Us-usaren ni Jehova

11. Ania ti naammuan da Daniel ken Jose maipapan ken Jehova?

¹¹ Idi naaddaan iti makariribuk a tagtagainep a dina malagip, nagkiddaw iti tulong ti agturay iti Neo-Babiloniko nga Imperio a ni Ari Nabucodonosor. Awan kadagiti papadi, mammuyon, ken managanitona ti makaibaga kenkuana iti natagtagainepna wenno makailawlawag iti kaipapananna. Nupay kasta, nabalinan ti adipen ti Dios a ni Daniel, nupay sidadaan nga inannugotna a saan nga agtaud iti kabukbukodanna a sirib ti panangipalgak iti tagtagainep ken ti kaipapananna. Kinuna ni Daniel: “Adda maysa a Dios sadi langit a mangipalgak kadagiti palimed, ket impakaammona ken Ari Nabucodonosor ti maaramidto kadagiti maud-udi nga aldaw.” (Daniel 2:1-30) Sumagmamano a siglo sakbayna, naammuan met ni Jose, maysa pay a propeta ti Dios, a ni Jehova ket Manangipalgak kadagiti palimed.​—Genesis 40:8-22; Amos 3:7, 8.

12, 13. (a) Asino idi ti katan-okan a propeta ti Dios, ket apay a kasta ti sungbatyo? (b) Siasino ita ti agserserbi kas “mayordomo dagiti sagrado a palimed ti Dios,” ket kasanotay koma a matmatan ida?

¹² Ni Jesus ti katan-okan a propeta ni Jehova a nagserbi ditoy daga. (Aramid 3:19-24) Inlawlawag ni Pablo: “Ti Dios, nga iti nabayagen a tiempo nagsao kadagiti ammatayo iti adu a paspasamak ken iti adu a pamay-an babaen kadagiti mammadto, nagsao kadatayo iti pagnguduan dagitoy nga aldaw babaen ti maysa nga Anak, a dinutokanna nga agtawid iti isuamin a bambanag, ken babaen kenkuana inaramidna dagiti sistema ti bambanag.”​—Hebreo 1:1, 2.

¹³ Nagsao ni Jehova kadagiti nagkauna a Kristiano babaen ti Anakna, a ni Jesus, a nangipakaammo kadakuada kadagiti nadibinuan a palimed. Kinuna ni Jesus kadakuada: “Naipaay kadakayo a maawatanyo dagiti sagrado a palimed ti pagarian ti Dios.” (Lucas 8:10) Idi agangay inawagan ni Pablo dagiti napulotan a Kristiano kas “dagiti sakop ni Kristo ken dagiti mayordomo ti sagrado a palpalimed ti Dios.” (1 Corinto 4:1) Iti kaaldawantayo, agtultuloy nga agserserbi a kasta dagiti napulotan a Kristiano, nga isuda ti mangbukel iti klase matalek ken masirib nga adipen a, babaen ti Bagi a Manarawidwid daytoy, mangipapaay iti naespirituan a taraon iti umiso a tiempo. (Mateo 24:45-47) No dakkel ti panagraemtayo kadagiti napaltiingan a propeta ti Dios idi un-unana, ken nangnangruna ti Anak ti Dios, saan kadi a rebbeng a raementayo met ti natauan nga ahensia nga us-usaren ita ni Jehova a mangipalgak iti Biblikal nga impormasion a kasapulan unay ti ilina kadagitoy napeggad a panawen?​—2 Timoteo 3:1-5, 13.

Panangipanayag Wenno Panangilimed?

14. Kaano nga ilimed dagiti Kristiano ti ar-aramidenda, ket iti kasta makin-ulidan ti sursurotenda?

¹⁴ Ti kadi sipapanayag a panangipalgak ni Jehova kadagiti bambanag kaipapananna a dagiti Kristiano rebbeng a kanayon nga ipalgakda ti amin nga ammoda iti amin a kasasaad? Bueno, sursuroten dagiti Kristiano ti balakad ni Jesus kadagiti apostolna nga agbalinda a “naannad a kas kadagiti serpiente ket kaskasdi a nasingpet a kas kadagiti kalapati.” (Mateo 10:16) No adda mangibaga a saanda a mabalin ti agdaydayaw iti Dios kas kalikaguman ti konsiensiada, itultuloy dagiti Kristiano ti ‘agtulnog iti Dios,’ ta ammoda nga awan natauan nga ahensia nga addaan kalintegan a mangiparit iti panagdayaw ken Jehova. (Aramid 5:29) Impakita ni Jesus a mismo a maitutop daytoy. Mabasatayo: “Itan kalpasan dagitoy a bambanag intultuloy ni Jesus a sursoren ti Galilea, ta dina kinayat a sursoren ti Judea, agsipud ta isu inkagkagumaan a papatayen dagiti Judio. Nupay kasta, asideg idin ti piesta dagiti Judio, ti piesta dagiti tabernakulo. Gapuna ni Jesus kinunana kadakuada [dagiti di mamati a kakabsatna iti lasag]: . . . ‘Sumang-atkayo idiay piesta; saanak pay a sumang-at iti daytoy a piesta, agsipud ta saan pay a naan-anay a dimteng ti naikeddeng a tiempok.’ Gapuna kalpasan nga imbagana kadakuada dagitoy a bambanag, isu nagtalinaed idiay Galilea. Ngem idi a dagiti kakabsatna nakasang-atdan idiay piesta, iti kasta isu a mismo simmang-at met, saan a sipapanayag no di ket kas sililimed.”​—Juan 7:1, 2, 6, 8-10.

Ibaga Wenno Saan?

15. Kasano nga impakita ni Jose a ti panangilimed isu ti naayat nga aramiden no dadduma?

¹⁵ Iti dadduma a kasasaad, saan laeng a nainsiriban no di pay ket naayat ti panangilimed iti maysa a banag. Kas pagarigan, ania ti inaramid ni Jose, ti pannakaama ni Jesus, idi naammuanna a ni Maria a naitulag a mayasawa kenkuana “nagsikog babaen iti nasantuan nga espiritu”? Mabasatayo: “Nupay kasta, ni Jose nga asawana, agsipud ta isu nalinteg ken dina kayat a pagbalinen a bubuyaen iti publiko, pinanggepna nga idiborsio a sililimed.” (Mateo 1:18, 19) Anian a kinaulpit koma no imbabainna iti publiko!

16. Ania ti rebbengen dagiti panglakayen, kasta met amin a dadduma pay a kameng ti kongregasion, no maipapan kadagiti kompidensial a banag?

¹⁶ Di nasken a mailatak kadagiti tattao nga awan karbenganna dagiti kompidensial a banag a makapabain wenno makapasakit. Laglagipen daytoy dagiti Kristiano a panglakayen no kasapulan a personal a balakadan wenno liwliwaenda dagiti padada a Kristiano wenno nalabit disiplinaenda pay ketdi ida gapu iti nadagsen a basol ken Jehova. Nasken a mataming dagitoy a banag iti Nainkasuratan a wagas; di nasken ken di naayat ti panangipalgak kadagiti kompidensial a banag kadagidiay awan pakainaiganna. Saan a padasen dagiti miembro ti kongregasion Kristiano nga ammuen manipud kadagiti panglakayen dagiti kompidensial nga impormasion no di ket raemenda ti rebbengen dagiti panglakayen a mangilimed kadagiti kompidensial a banag. Kuna ti Proverbio 25:9: “Isusikmo ti kalintegan iti kaarrubam met laeng, ket dika ipalgak ti palimed ti sabali.”

17. Apay a kadawyanna, ilimed dagiti Kristiano dagiti kompidensial a banag, ngem apay a saanda a kanayon a maaramid dayta?

¹⁷ Agaplikar met daytoy a prinsipio iti uneg ti pamilia wenno kadagiti nasinged a gagayyem. Nasken a pagtalinaeden a kompidensial ti dadduma a banag tapno maliklikan ti di pagkikinnaawatan ken nariribuk a relasion. “Ti angin nga amian iparangna ti tudo: kasta ti aramiden ti managtanabutob a dila iparangna ti naunget a langa.” (Proverbio 25:23) Siempre, gapu iti kinasungdo ken Jehova ken kadagiti nalinteg a prinsipiona, kasta met ti ayat kadagiti nakabasol nga indibidual, mabalin nga adda dagiti gundaway a masapul nga ipakaammo uray dagiti kompidensial a banag kadagiti nagannak, Kristiano a panglakayen, wenno kadagiti tattao nga addaan karbengan a makaammo.a Ngem kaaduanna, saan nga isaosao dagiti Kristiano dagiti personal a pakaseknan ti sabsabali, a saluadanda dagitoy a kas iti panangsaluadda kadagiti bukodda a pakaseknan.

18. Ania dagiti tallo a Nakristianuan a kababalin a makatulong kadatayo a mangikeddeng no ania ti rebbeng ken di rebbeng nga ibagatayo?

¹⁸ Kas pananggupgop, tultuladen ti maysa a Kristiano ni Jehova babaen ti panangilimed kadagiti bambanag no kasapulan, nga ipalgakna laeng dagitoy no maitutop. Iti panangikeddeng no ania ti rebbeng ken di rebbeng nga ibagana, ti kinapakumbaba, pammati, ken ayat ti mangiwanwan kenkuana. Ti kinapakumbaba ti manglapped kenkuana nga agpannakkel, nga ipalgakna ti amin nga ammona tapno dayawen dagiti sabsabali wenno paggagarenna ida a mangammo kadagiti palimed a dina mabalin nga ibaga. Ti pammati iti Sao ni Jehova ken iti kongregasion Kristiano ti mangtignay kenkuana a mangikasaba iti Biblikal nga impormasion bayat a pagannadanna ti mangisawang kadagiti banag a mabalin a mangsair kadagiti sabsabali iti damo pay laeng. Wen, ti ayat ti manggutugot kenkuana a mangipanayag kadagiti banag a pakaidayawan ti Dios ken kasapulan a maammuan dagiti tattao tapno magun-odda ti biag. Iti sabali a bangir, dina ipalgak dagiti kompidensial a personal a banag, nga ammona a kaaduanna, saan a naayat ti panangipalgak kadagitoy.

19. Ania a kababalin ti makatulong a mangilasin kadagiti pudno a Kristiano, ket ania ti ibungana?

¹⁹ Makatulong daytoy natimbeng a panangmatmat a mangilasin kadagiti pudno a Kristiano. Saanda nga ilemmeng ti kinasiasino ti Dios babaen ti di panangaramat iti naganna wenno babaen ti misterioso, di mailawlawag a doktrina a Trinidad. Dagiti di am-ammo a dios ket paset ti ulbod a relihion, saan nga iti pudno. (Kitaenyo ti Aramid 17:22, 23.) Pudno nga ipatpateg dagiti napulotan a Saksi ni Jehova ti pribilehio nga agbalin a “mayordomo ti sagrado a palpalimed ti Dios.” Babaen ti sipapanayag a panangipalgak kadagitoy a palimed kadagiti sabsabali, tultulonganda dagiti nasingpet panagpuspusona a makigayyem ken Jehova.​—1 Corinto 4:1; 14:22-25; Zacarias 8:23; Malakias 3:18.

[Footnote]

Kasanoyo a Sungbatan?

◻ Apay a di kasapulan nga ilimed ni Jehova dagiti panggepna?

◻ Siasino ti pangipalgakan ni Jehova kadagiti palimedna?

◻ Ania ti rebbengen dagiti Kristiano no maipapan kadagiti kompidensial a banag?

◻ Ania dagiti tallo a kababalin a tumulong kadagiti Kristiano a mangammo no ania ti rebbeng ken di rebbeng nga ibagada?

[Dagiti Ladawan iti panid 8, 9]

Ipalgak ni Jehova dagiti palimed babaen ti Saona