Pananggun-od iti Pannakaammo Maipapan iti Dios​—Kasano?

Mabalin a pagduaduaan ti dadduma no pudno met laeng a kayat ti dios nga ipalgak ti kinasiasinona kadagiti tattao. No agpayso a kayatna, kasanona nga aramiden dayta?

TI Protestante a Repormador idi maika-16 a siglo a ni John Calvin siuumiso a kinunana a dagiti tattao saanda a maam-ammo ti Dios babaen kadagiti bukodda a panagregget malaksid no ti Dios a mismo ti mangipakaammo iti kinasiasinona iti sangatauan. Nupay kasta, mabalin a pampanunoten ti dadduma no pudno met laeng a kayat ti Dios nga ipalgak ti kinasiasinona kadagiti tattao. Ket no agpayso a kayatna, kasanona nga aramiden dayta?

Adda panggep ti amin nga ar-aramiden ni Jehova, ti ‘Naindaklan a Namarsua.’ Kas “Dios a Mannakabalin-amin,” naan-anay met a kabaelanna nga ibanag dagiti panggepna. (Eclesiastes 12:1; Exodo 6:3) Masiguradotayo a kayatna nga ipakaammo dagiti panggepna kadagiti tattao agsipud ta kastoy ti impaisuratna iti mammadtona a ni Amos: “Ti Soberano nga Apo Jehova saanto nga agaramid iti maysa a banag malaksid no impalgakna ti kompidensial a banagna kadagiti adipenna a mammadto.” Ngem paliiwem ta ipalgak ti Dios dagiti panggepna kadagiti laeng adipenna, kadagidiay sipapasnek nga agay-ayat kenkuana. Saan kadi a nainkalintegan dayta? Pangibagaam aya kadagiti sekretom? Uray siasino latta kadin wenno kadagiti kasingedan a gagayyemmo?​—Amos 3:7; Isaias 40:13, 25, 26.

Para kadagiti napakumbaba, makapasiddaaw ti sirib ken pannakaammo ti Dios, ket maiparbeng laeng a kasta. Ngem saan nga umdas dayta tapno magunggonaantayo a mismo iti nadiosan a sirib ken pannakaammo. Ipaganetget ti Biblia a tapno maammuantayo dagiti kapanunotan ti Dios, masapul a napakumbaba ti pusotayo: ‘Idulinmo kenka dagiti bukodko a bilin. Ti sirib ipangagmo babaen ti lapayagmo. Pagannayasem ta pusom iti panangilasin. Agpukkawka maipaay iti mismo a pannakaawat ket iyesngawmo ti timekmo maipaay iti mismo a panangilasin. Itultuloymo a sapulen dayta kas iti pirak.’​—Proverbio 2:1-4.

Daydiay napakumbaba a mangaramid iti kastoy a kita ti panagregget talaga a maam-ammona ti Dios. Kastoy ti tuloy dayta a teksto: “Ni met laeng Jehova mangted iti sirib; manipud ngiwatna adda pannakaammo ken panangilasin.” Wen, dagiti napasnek nga agbirbirok iti kinapudno mabalinda a ‘maawatan ti kinalinteg ken panangukom ken kinapalungdo, ti intero a turongen ti naimbag.’​—Proverbio 2:6-9.

Panangbirok iti Kinapudno

Kuna ti The Encyclopedia of Religion: “Nabatad a paset ti biag ti tao ti kinapateg ti panangilasin iti nagdumaan ti umiso ken di umiso, mannakabalin ken awanan pannakabalin, agpayso ken peke, puro ken kontaminado, nalawag ken nalidem, agraman dagiti kasasaad a saan a nalaka a mailasin no dagita ket dakes wenno naimbag.” Tapno mapennek daytoy a panagkasapulan, nabayagen nga agsapsapul dagiti tattao iti kinapudno. Addan rimmang-ayanda iti panangsapulda iti dayta, depende iti panangikagumaan ti tunggal tao nga agpannuray ken ni Jehova, daydiay inawagan ti salmista a “ti Dios ti kinapudno.”​—Salmo 31:5.

Ti nagan ni Jehova literal a kaipapananna ti “Pagbalinenna.” (Genesis 2:4) No kasta, ti mismo a kaipapanan ti nagan ti Dios ket naisentro iti kina-Namarsuana ken iti panggepna. Kinapudnona, ti panangammo ken panangusar iti nagan ni Jehova ti maysa a pakailasinan ti pudno a relihion. Silalawag a binigbig ni Jesus dayta a kinapudno. Kas panangtukoy kadagiti pasurotna, kastoy ti inkararagna iti Dios: “Impakaammok kadakuada ti naganmo ket ipakaammokto dayta, tapno ti ayat a pinangayatmo kaniak maadda koma kadakuada ken siak a maikaykaysa kadakuada.”​—Juan 17:26.

Kas panagpannurayna iti pannakigayyemna iti Dios, kastoy ti sikokompiansa a kinuna ti maysa a nagkauna a Hebreo nga agnagan iti Jose idi natudingan a mangibuksil iti kayulogan dagiti tagtagainep: “Saan aya a dagiti kayulogan kukua ti Dios?”​—Genesis 40:8; 41:15, 16.

Sumagmamano a siglo kalpasanna, nagtagtagainep ni Ari Nabucodonosor iti Babilonia ngem awan kadagiti mamasirib a tattaona ti nakaibuksil iti kaipapanan dayta. Kastoy ti kinuna ni mammadto Daniel iti dayta nga ari: “Adda maysa a Dios iti langlangit a Manangipalgak kadagiti palimed, ket impakaammona ken Ari Nabucodonosor no ania ti mapasamak iti kamaudianan a paset dagiti aldaw.”​—Daniel 2:28.

Ipakita ti kapadasan da Jose ken Daniel a dagidiay laeng agserserbi ken Jehova a Dios ti maparaburan iti sirib ken pannakaammo maipapan iti Dios. Siempre, mabalin a kasapulan ti panangiwaksi kadagiti dati a kapanunotan tapno magun-odantayo ti anamong ti Dios. Kasta ti nasken nga aramiden idi dagiti Judio a nagbalin a Kristiano idi umuna a siglo. Yantangay napadakkelda kas managraem ken managtulnog kadagiti linteg a napanday iti sidong ti sistema ti bambanag dagiti Judio, kasapulanda pay idi ti tiempo sakbay a maakseptarda a ni Jesus ti Mesias. Isu ket immay tapno tungpalenna ti Linteg Mosaiko, a nagserbi kas “anniniwan ti naimbag a bambanag nga umay.” (Hebreo 10:1; Mateo 5:17; Lucas 24:44, 45) Daytat’ sinuktan “ti linteg ni Kristo,” nga adayo a natantan-ok ngem iti Linteg Mosaiko.​—Galacia 6:2; Roma 13:10; Santiago 2:8.

Naipasngaytayo amin iti lubong a nayadayo iti Dios. Gapu iti basol a natawidtayo iti umuna nga agassawa, naipasngaytayo a kabusor ti Dios, nga awanan iti umiso a pannakaammo kadagiti panggepna. Natawidtayo met ti nagulib a puso. (Jeremias 17:9; Efeso 2:12; 4:18; Colosas 1:21) Tapno magun-odantayo ti pannakigayyem ti Dios, masapul a sursuruentayo a tuladen ti panagpampanunot ti Dios. Saan a nalaka nga aramiden dayta.

Mabalin a narigat nga iwaksi dagiti palso a narelihiosuan a kapanunotan wenno aramid, nangruna no namulagatantayo dagitoy. Ngem nainsiriban kadi nga itultuloytayo nga annuroten ti palso a kapanunotan ken aramid? Sigurado a saan! Ad-adda a nainsiriban a balbaliwantayo ti panagpampanunottayo tapno magun-odantayo ti anamong ti Dios.

Panangilasin iti Kalasugan nga Us-usaren ti Dios a Mangisuro

Pagpatulongantayo ngay tapno maawatantayo ti Sao ti kinapudno ken makapagbiagtayo maitunos iti dayta? Iti Israel idi un-unana, ti Dios dinutokanna dagiti mapagtalkan ken nasungdo a tattao tapno mangidaulo iti nasionna. Ni Kristo, nga Ulo ti kongregasion Kristiano ita, iwanwanwanna met dagidiay sipapasnek nga agbirbirok iti kinapudno. Ar-aramidenna dayta babaen kadagiti mapagtalkan ken nasungdo a pasurotna, a mangbukel iti kalasugan a natudingan a mangiwanwan ken mangsalaknib kadagiti agbirbirok iti kinapudno. (Mateo 24:45-47; Colosas 1:18) Ngem kasano a mailasin ti kalasugan nga us-usaren ti Dios a mangisuro?

Dagiti pudno a pasurot ni Jesu-Kristo ikagkagumaanda nga ipakita dagiti kualidad nga inyulidan ni Jesus idi nagbiag kas maysa a tao. Iti dumakdakes a lubong, nalaka a mailasin dagitoy a pasurotna gapu iti panangipakitada kadagiti naisangsangayan a naespirituan a kualidad. (Kitaem ti kahon iti panid 6.) Iparparangarang kadi dagiti miembro iti relihionmo ken ti relihion dagiti kaarrubam dagitoy a kualidad? Pagimbagam no sukimatem daytoy a banag babaen ti Bibliam.

Aw-awisendaka a mangaramid iti kasta babaen ti urnos a panagadal iti Biblia. Itay napan a tawen, adda promedio a nasurok nga 6,000,000 a tattao wenno pamilia iti 235 a pagilian a nangaprobetsar iti dayta nga urnos ti panagadal iti Biblia babaen iti tulong dagiti Saksi ni Jehova. Agtultuloy, makapnek, ken makagunggona ti pananggun-od iti sirib ken pannakaammo ti Dios. Apay a dimo rugian ti agadal tapno a magun-odam ti sirib ken pannakaammo ti Dios? Dimonto pagbabawyan dayta. Wen, mabalintay nga am-ammuen ti Dios!

[Kahon iti panid 6]

DAGIDIAY MAKITUNTUNOS ITI DIOS . . .

kanayon a neutralda kadagiti napolitikaan a panagbibinnusor.​—Isaias 2:4.

mangpatpataudda kadagiti agkakaimbag a bunga babaen ti panangaramidda iti pagayatan ti Dios.​—Mateo 7:13-23.

sipupudno nga agiinnayatda iti maysa ken maysa.​—Juan 13:35; 1 Juan 4:20.

agtutunos ti ibagbagada uray sadino ti ayanda.​—Mikias 2:12.

saanda a tultuladen dagiti di umiso a kapanunotan ken aramid ti lubong nga adda iti aglawlawda.​—Juan 17:16.

saksaksianda ti kinapudno ken agar-aramidda kadagiti adalan.​—Mateo 24:14; 28:19, 20.

tagtagiragsakenda ti regular a panaggigimong tapno makapagpipinnaregtada.​—Hebreo 10:25.

agdaydayawda iti Dios kas maysa a sangalubongan nga organisasion.​—Apocalipsis 7:9, 10.

[Dagiti Ladawan iti panid 7]

Ti pannakaammo maipapan iti Dios ket magun-odan babaen ti panagadal kas indibidual, kas pamilia, ken kas kongregasion