Pudno a Kinaragsak​—Ania ti Tulbek?

NAIRANTA nga agragsak dagiti tao. Apay a makasigurotayo iti dayta? Bueno, usigenyo ti nangrugian ti tao.

Pinarsua ni Jehova a Dios ti immuna nga agassawa nga addaan abilidad a mangsagrap iti kinaragsak. Naikabil da Adan ken Eva iti paraiso, maysa a makaay-ayo a minuyongan a naawagan Eden. Inted ti Namarsua kadakuada amin a pisikal a banag a kasapulanda iti biag. Adda iti minuyongan “amin a kayo a nakaay-ayo a makita, ken naimbag a kanen.” (Genesis 2:9) Nasalun-at, nakired, ken napintas idi da Adan ken Eva​—perpektoda ken pudno a naragsak.

Ngem, ania kadi idi ti tulbek iti kinaragsakda? Ti kadi paraiso a taengda wenno nalabit ti pisikal a kinaperpektoda? Dagitoy a sagut manipud iti Dios nangted ragsak iti biagda. Ngem ti kinaragsakda saan a nagpannuray iti kakasta a makita a bambanag. Saan a basta napintas a parke ti minuyongan ti Eden. Maysa dayta a santuario, lugar a pagdaydayawan iti Dios. Ti tulbek iti agnanayon a kinaragsakda isu ti abilidadda a mangipasdek ken mangmantener iti naayat a relasion iti Namarsua. Tapno agbalin a naragsak, kasapulan nga umuna pay nga agbalinda a naespirituan.​—Idiligyo ti Mateo 5:3.

Ti Espiritualidad Mangiturong iti Kinaragsak

Idi damo addaan ni Adan iti naespirituan a relasion iti Dios. Maysa dayta a naayat, nadungngo a relasion a kas iti ralasion ti agama. (Lucas 3:38) Iti minuyongan ti Eden, addaan da Adan ken Eva iti nagsayaat a kasasaad a pakapennekan ti tarigagayda nga agdayaw. Babaen ti sitatallugod, naayat a panagtulnogda ken Jehova, makaipaayda iti dayaw ken dayag iti Dios nga adayo nga amang ngem iti maipaay dagiti animal. Sisisirib a maidaydayawda ti Dios gapu kadagiti nakaskasdaaw a galadna ken maitandudoda ti kinasoberanona. Maitultuloyda met a sagrapen ti naayat ken nadungngo a panangaywan ni Jehova.

Daytoy a relasion iti Namarsua ken panagtulnog kadagiti lintegna nangyeg iti pudpudno a ragsak kadagiti immuna a nagannak kadatayo. (Lucas 11:28) Saan a kasapulan a mapasaran da Adan ken Eva ti adu a tawen ti panageksperimento sakbay a matakuatanda ti tulbek iti kinaragsak. Naragsakdan manipud pay pannakaparsuada. Naragsakda gapu ta addaanda iti natalna a relasion iti Dios ken agpaspasakupda iti autoridadna.

Nupay kasta, nagpatingga dayta a kinaragsak idi nagsukirda iti Dios. Babaen ti iyaalsada, ginuped da Adan ken Eva ti naespirituan a relasionda ken Jehova. Saan idan a gayyem ti Dios. (Genesis 3:17-19) Agparang a nanipud idi napapanawda iti minuyongan, saanen a pulos nakikomunikar ni Jehova kadakuada. Napukawda ti kinaperpektoda, ti namnama nga agbiag nga agnanayon, ken ti minuyongan a taengda. (Genesis 3:23) Ngem napatpateg pay, tangay napukawda ti relasionda iti Dios, napukawda ti tulbek iti kinaragsak.

Ti Pannakabalintayo nga Agpili

Sakbay a natay, impatawid da Adan ken Eva kadagiti annakda dagiti natauan a galadda, ti nakaisigudan a konsiensiada, ken ti kapasidad para iti espiritualidad. Ti pamilia ti tao ket saan a naipababa kas kadagiti animal. Mabalintay ti makikappia iti Namarsua. (2 Corinto 5:18) Kas nasaririt a parsua, nagtultuloy nga addaan dagiti tattao iti pannakabalin nga agpili no agtulnogda iti Dios wenno saan. Nailadawan daytoy adu a siglo kalpasanna idi pinagpili ni Jehova ti kabbuangay a nasion ti Israel iti biag wenno patay. Babaen ti pannakangiwatna a ni Moises, kinuna ti Dios: “Inkabilko iti sangom ita nga aldaw ti biag ken ti imbag, ti patay ken ti dakes.”​—Deuteronomio 30:15-18.

Uray ita, rinibu a tawen kalpasan a napukaw ti orihinal a Paraiso, datayo a tattao mabalintay pay laeng ti mangaramid iti umiso a pangngeddeng. Addaantayo iti agan-andar a konsiensia ken napateg a kapasidad a mangtungpal kadagiti linteg ti Dios. Dakamaten ti Biblia ti maipapan iti “kinatao[tayo] iti uneg” ken ti kinatao ‘nga adda iti uneg.’ (2 Corinto 4:16; Roma 7:22) Mainaig dagitoy a sasao iti nakaisigudan a potensial nga adda kadatayo amin a mangyanninaw iti personalidad ti Dios, mangpanunot iti pampanunotna, agbalin a naespirituan.

Maipanggep iti moral a pannakaparsuatayo ken konsiensia, insurat ni apostol Pablo: “Kaanoman a dagiti tattao iti nasnasion nga awanan iti linteg aramidenda dagiti bambanag iti linteg sigun iti nakaisigudan, dagitoy a tattao, nupay awananda iti linteg, isuda ti linteg kadakuada a mismo. Isuda dagiti mismo a mangiparangarang ti banag ti linteg a maisurat iti puspusoda, bayat a ti konsiensiada saksaksianna ida ket, iti nagbabaetan dagiti bukodda a pampanunot, maidardarumda wenno mapakawanda pay ketdi.”​—Roma 2:14, 15.

Nadiosan a Kinasirib ken Panagtulnog ​—Ti Tulbek

Ngem nalabit isaludsod ti maysa, ‘No amintayo addaan nakaisigudan a pagannayasan nga agdayaw iti Dios ken, kas resultana, agsagrap iti pudno a kinaragsak, apay a nakaad-adu dagiti saan a naragsak?’ Ngamin, masapul a patanoren ti tunggal maysa kadatayo ti espiritualidadtayo tapno agbalintayo a naragsak. Nupay iti damo naparsua sigun iti ladawan ti Dios, naisina ti tao iti Namarsua kenkuana. (Efeso 4:17, 18) Gapuna, tunggal maysa kadatayo kasapulan a mangaramid kadagiti masnup nga addang tapno maipasdek ken mamantener ti naespirituan a relasion iti Dios. Saan nga automatiko a mapatanor ti kasta a relasion.

Dinakamat ni Jesus ti dua a napateg a prinsipio iti panangpatanor iti espiritualidad. Ti umuna isut’ pananggun-od iti umiso a pannakaammo iti Dios, ket ti maikadua isu ti sitatallugod a panangtungpal iti pagayatanna. (Juan 17:3) Iti panangadawna iti Sao ti Dios, kinuna ni Jesus: “Adda a naisurat, ‘Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.’ ” (Mateo 4:4) Iti sabali a gundaway, kinuna ni Jesus: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Ditay kasapulan ti mangbusbos iti adu a dekada iti panageksperimento a mangbirok iti kinaragsak. Saan a kapadasan ti tulbek iti kinaragsak. Imbes ketdi, ti laeng nadiosan a kinasirib ken panagtulnog iti Namarsua kadatayo ti mangiturong iti pudno a rag-o iti biag.​—Salmo 19:7, 8; Eclesiastes 12:13.

Nalawag, saan nga adayo kadatayo ti kinaragsak a bunga ti panangalagad iti nadiosan a sirib ken pannakaadda iti nasayaat a takder iti imatang ti Dios. (Aramid 17:26, 27) Magun-odan ti amin ti pannakaammo ken Jehova ken iti panggepna. Adda binilion a kopia ti Biblia iti adu a pagsasao, ket daytoy ti kasaknapan pay laeng pannakaiwarasna a libro ditoy lubong. Matulongannakayo ti Biblia nga agbalin a gayyem ti Dios ken mangsagrap iti pudpudno a kinaragsak, ta ibaga kadatayo ti Kasuratan a “naragsak ti umili a ti Diosna ni Jehova!”​—Salmo 144:15, NW.

[Kahon iti panid 6]

Dagiti Addang A Mangiturong Iti Kinaragsak

1. Apresiaren ken sukayenyo ti espiritualidad. Kinuna ni Jesus: “Naragsak dagidiay dumdumngeg iti sao ti Dios ken mangsalsalimetmet iti dayta!”​—Lucas 11:28.

2. Bigbigenyo a ti anamong ti Dios napatpateg ngem iti kinabaknang wenno kinasaliwanwan. Insurat ni Pablo: “Ti sigurado, dayta ket maysa a wagas a pakagunggonaan iti dakkel, daytoy nadiosan a debosion agraman iti pannakapnek. . . . No adda pagtaraon ken pagkawestayo, mapnektayon kadagitoy a bambanag.”​—1 Timoteo 6:6-8.

3. Ikagumaanyo a patanoren ken ipangag ti sinanay-Biblia a konsiensia.​—Roma 2:14, 15.

4. Ikeddengyo a tungpalen ni Jehova a Dios, iti kasta maikari nga agbalin a maysa kadagiti tattaona. Insurat ni David idi ugma: “Naragsak ti umili a ti Diosna ni Jehova!”​—Salmo 144:15, NW.

[Ladawan iti panid 7]

“Naragsak dagidiay sipapanunot iti naespirituan a kasapulanda.”​—Mateo 5:3